ఇంటర్ విద్యార్థి మృతి కారకులైన వారిపై కఠిన చర్యలు తీసుకోవాలి: ఎస్సీ ఎస్టీ విద్యార్థి సంఘం రాష్ట్ర అధ్యక్షుడు కట్టెల శివ కుమార్

 
 
  నారాయణ కళాశాల విద్యార్థి తనుష్.. మృతి పైన ఎస్సీ ఎస్టీ విద్యార్థి సంఘం రాష్ట్ర అధ్యక్షుడు కట్టెల శివ కుమార్ స్పందించారు. ఈ మేరకు నల్లగొండలో కట్టెల శివ మాట్లాడుతూ.. నారాయణ కళాశాల యాజమాన్యం ఒత్తిడి వల్ల గిరిజన విద్యార్థి బలైయ్యాడని తక్షణమే,యాజమాన్యం పై కఠిన చర్యలు తీసుకోవాలని వారిపై ఎస్సీ, ఎస్టీ అట్రాసిటీ కేసు నమోదు చేయాలని డిమాండ్ చేశారు.
  

  
కళాశాలలోని ఉపాధ్యాయుల ఒత్తిడి వల్ల సూసైడ్ నోట్ రాసి ఆత్మహత్య చేసుకున్నాడని, ఆ బిడ్డ లేని లోటు వల్ల ఆ కుటుంబానికి తీవ్ర నష్టం జరిగిందని అన్నారు. ఇలాంటి ఘటనలు పునరావృతం కాకుండా అట్టి కళాశాల యాజమాన్యం పై కఠిన చర్యలు తీసుకోవాలన్నారు.  ఆ కళాశాల పర్మిషన్ రద్దు చేయాలని డిమాండ్ చేశారు.
 

'మహా కుంభ్' ను నూతన జిల్లాగా ప్రకటించిన యూపీ ప్రభుత్వం

 
 
  UP ప్రభుత్వం కీలక నిర్ణయం తీసుకుంది. ప్రయాగ్ రాజ్ లోని ‘మహా కుంభ్' ప్రాంతాన్ని కొత్త జిల్లాగా ప్రకటించింది. దీనిని 'మహా కుంభమేళా' జిల్లాగా పిలుస్తారని రాష్ట్ర ప్రభుత్వం తెలిపింది. 
  

  
రానున్న కుంభమేళాకు సంబంధించిన ప్రత్యేక కార్యక్రమాన్ని సజావుగా నిర్వహించడానికి, పరిపాలన పనులను మరింత మెరుగ్గా నిర్వహించడానికి ఈ కొత్త జిల్లా ఏర్పాటు చేసినట్లు యూపీ ప్రభుత్వం తెలిపింది.
 

ఆశా వర్కర్లకు లెప్రసీ సర్వే బకాయిలు వెంటనే చెల్లించాలి: సిఐటియు

 
 
  నల్లగొండ: ఆశా వర్కర్లతో లెప్రసీ సర్వే చేయాలని ప్రభుత్వం నిర్దేశించిన క్రమంలో, ఇప్పటికే పెండింగ్లో ఉన్న బకాయిలను వెంటనే చెల్లించాలని లేకపోతే సర్వేను నిలిపివేస్తామని, తెలంగాణ ఆశా వర్కర్స్ యూనియన్ యూనియన్ (సిఐటియు) జిల్లా గౌరవాధ్యక్షులు సిహెచ్ లక్ష్మీనారాయణ ప్రభుత్వాన్ని హెచ్చరించారు. జిల్లా వైద్య ఆరోగ్య శాఖా కార్యాలయం ముందు ధర్నా నిర్వహించి డిఎంహెచ్ఓ పుట్ట శ్రీనివాస్ కు వినతి పత్రం అందజేశారు.సానుకూలంగా స్పందించిన డిఎంహెచ్ఒ సమస్యల పరిష్కారానికి హామీ ఇచ్చారు. 
  

  
ఈ సందర్భంగా జరిగిన ధర్నాను ఉద్దేశించి లక్ష్మీనారాయణ మాట్లాడుతూ.. గత మూడు సంవత్సరాలుగా ఆశా వర్కర్లకు లెప్రసీ బిల్లులు పెండింగ్ లో ఉన్నాయని అట్లాగే టిబి, పల్స్ పోలియో, ఎన్సీడీ పారితోషకాలు కూడా పెండింగ్ లో ఉన్నాయని, వీటిని వెంటనే చెల్లించాలని కోరారు.
  

  
ఆశాలు ప్రధానంగా ఎదుర్కొంటున్న ఇబ్బందులలో ఏ ఎన్ సి  టార్గెట్ ఒకటని, ఆశా వర్కర్లపై తీవ్రమైన ఒత్తిడి ఉంటుందని ఎఎన్సీ టార్గెట్లు రద్దు చేయాలని డిమాండ్ చేశారు.
  

  
లెప్రసీకి సంబంధించిన మూడు సంవత్సరాల బకాయిలు వెంటనే చెల్లించాలని కోరారు. లేనియెడల జరిగేటటువంటి లెప్రసీ సర్వే లో ఆశాలు పాల్గొనబోరని తెలిపారు. 
  
             
  
ఈ కార్యక్రమంలో సిఐటియు జిల్లా నాయకులు పెంజర్ల సైదులు, ఆశ యూనియన్ జిల్లా అధ్యక్ష కార్యదర్శులు డి.మహేశ్వరి, వెంకటమ్మ, పార్వతమ్మ, జయమ్మ నవనీత, ధనమ్మ, సైదమ్మ, లలిత పుష్పలత, భాగ్యమ్మ, పద్మ, సునీత జానకి, తదితరులు పాల్గొన్నారు.
 

తిరుగండ్లపల్లి మాల మహానాడు అధ్యక్షులుగా చెల్లం శంకర్

 
 
  నల్లగొండ జిల్లా,మర్రిగూడ మండలం, తిరుగండ్లపల్లి గ్రామంలో మాల మహానాడు ఆధ్వర్యంలో, సోమవారం నూతన మాల మహానాడు గ్రామ కమిటీ ఎన్నిక జరిగింది. అధ్యక్షుడు గా చెల్లం శంకర్ ఉపాధ్యక్షులు- బత్తుల వెంకటయ్య, చెల్లం జంగయ్య, ప్రధాన కార్యదర్శి- బత్తుల పెద్దిరాజు, సహాయ కార్యదర్శి- చెల్లం ముత్యాలు, కార్యదర్శి చెల్లం పెద్దిరాజు, కోశాధికారి చెల్లం పెద్ద యాదయ్య, కార్యనిర్వాహణాధికారి వడ్డేమోని యాదయ్య లను ఎన్నుకున్నారు.
  

  
ఈ  కార్యక్రమానికి ముఖ్య అతిథిగా మాల మహానాడు మండల అధ్యక్షుడు నాగిళ్ల మారయ్య పాల్గొని డాక్టర్ బి.ఆర్ అంబేద్కర్ విగ్రహానికి పూలమాలవేసి, అనంతరం అంబేద్కర్ గురించి రాజ్యాంగం గురించి చెప్పడం జరిగింది. కార్యవర్గ సభ్యులు తదితరులు పాల్గొన్నారు.
 

RR: ప్రజాపాలన విజయోత్సవ  కార్యక్రమంలో పాల్గొన్న ఎమ్మెల్యే మల్ రెడ్డి రంగారెడ్డి

 
 
  ఇబ్రహీంపట్నం: మున్సిపాలిటీ పరిధిలోని జల్లా పరిషత్ బాలికల ఉన్నత పాఠశాలలో  విద్యాశాఖ ఆధ్వర్యంలో నిర్వహించిన, ప్రజాపాలన విజయోత్సవ కార్యక్రమానికి ముఖ్య అతిధిగా ఇబ్రహీంపట్నం ఎమ్మెల్యే మల్ రెడ్డి రంగారెడ్డి పాల్గొని, విద్యార్థులకు వ్యాసరచన పోటీలను ప్రారంభించి అందులో గెలుపొందిన విద్యార్థులకు బహుమతి ప్రధానం చేశారు.
  

  
అనంతరం ఆయన ప్రసంగిస్తూ. తెలంగాణా రాష్ట్రంలో కాంగ్రెస్ ప్రభుత్వం ఏర్పడిన తరువాత ముఖ్యమంత్రి  రేవంత్ రెడ్డి పాలన లో, రాష్ట్రం అన్ని  రంగాలలో అభివృద్ధిని  కనపరుస్తూ ముందుకు సాగుతున్నదని ప్రతి పెదవానికి సంక్షేమ పథకాలు నేరుగా అందుతున్నాయని అన్నారు.
  

  
నియోజకవర్గం లోని అన్ని పాఠశాలలో విద్యార్థులకు మౌలిక వసతుల తోపాటు ,  నాణ్యమైన విద్యను అభ్యసించేందుకు కృషి చేస్తానని అన్నారు. ఈకార్యక్రమంలో జిల్లా విద్యా అధికారి, ఇబ్రహీంపట్నం రెవిన్యూ డివిజన్ అధికారితో పాటు మండల, మున్సిపల్ అధికారులు ప్రజా ప్రతినిధులు, నాయకులు పాల్గొన్నారు.
 

TG: సీఎం రేవంత్ రెడ్డిని కలిసిన సీనియర్ ఐఏఎస్ అధికారి బుర్రా వెంకటేశం

 
 
  HYD: టీజీపీఎస్సీ నూతన ఛైర్మన్ బుర్రా వెంకటేశం ఇవాళ సీఎం రేవంత్ రెడ్డిని ఆయన నివాసంలో మర్యాదపూర్వకంగా కలిశారు.
  

  
ఈ మేరకు కమిషన్ ఛైర్మన్ గా నియమించినందుకు సీఎం కు కృతజ్ఞతలు తెలిపారు. నిరుద్యోగ యువతకు న్యాయం చేసేలా విధులు నిర్వర్తించాలని సీఎం కోరారు.
  

  
కాగా, ప్రస్తుత టిజీపీఎస్సీ ఛైర్మన్ మహేందర్ రెడ్డి, రేపటితో పదవీ విరమణ కానున్నారు. ఈనెల 3న బుర్ర వెంకటేశం బాధ్యతలు చేపట్టనున్నారు.
 

జాతీయస్థాయి ఫుట్బాల్ పోటీలకు ఎంపికైన వెంకటసాయి

 
 
  నల్గొండ జిల్లా:
  
నవంబర్ 30 తేదీ నుండి డిసెంబర్ 5 వ తేదీ వరకు జమ్మూ కాశ్మీర్ రాష్ట్రంలో జరుగు 68 వ స్కూల్ గేమ్స్ ఫెడరేషన్ అండర్ 17 బాలుర ఫుట్బాల్ జాతీయస్థాయి పోటీలకు, నల్గొండ చత్రపతి శివాజీ ఫుట్బాల్ క్లబ్ కు చెందిన రాచూరి వెంకటసాయి సెలెక్ట్ కావడం జరిగిందని క్లబ్ వ్యవస్థాపకులు, ఉమ్మడి నల్గొండ జిల్లా ఫుట్బాల్ అసోసియేషన్ ప్రధాన కార్యదర్శి బొమ్మపాల గిరిబాబు  తెలిపారు.
  నల్లగొండలో ఆదివారం బొమ్మపాల గిరిబాబు మాట్లాడుతూ.. రాచూరి వెంకటసాయి గత సంవత్సరం 2సార్లు జాతీయ స్థాయి ఫుట్బాల్ పోటీలలో పాల్గొని తెలంగాణ రాష్ట్ర జట్టుకు కెప్టెన్ గా సారధ్య బాధ్యతలు వహించడం జరిగిందని తెలిపారు.
  

  
చత్రపతి శివాజీ ఫుట్బాల్ క్లబ్ లో ఫుట్బాల్ క్రీడలో తర్ఫీదు పొంది శ్రీనిధి ఇంటర్నేషనల్ ఫుట్బాల్ క్లబ్ కు సెలెక్ట్ కావడమే కాకుండా పలు రాష్ట్రాల్లో నిర్వహించిన వివిధ పోటీల్లో పాల్గొని ప్రతిభ కలిగిన క్రీడాకారుడిగా గుర్తింపు పొందాడు.
  

  
ఈ సందర్భంగా  స్పోర్ట్స్ ఫౌండేషన్ పక్షాన తెలంగాణ స్కూల్ గేమ్స్ ఫెడరేషన్ కార్యదర్శి కుంభం రామ్ రెడ్డికి ప్రత్యేకమైన కృతజ్ఞతలు తెలిపారు.
 

NLG: రైతు వేదికలో రైతు పండుగ.. వీడియో కాన్ఫరెన్స్

 
 
  నల్లగొండ జిల్లా:
  
మర్రిగూడ మండల రైతు వేదిక లో శనివారం రైతు పండుగ లైవ్ వీడియో కాన్ఫరెన్స్ ఏర్పాటు చేశారు. ఈ మేరకు సీఎం రేవంత్ రెడ్డి, వ్యవసాయ శాఖ మంత్రి తుమ్మల నాగేశ్వరావు రాష్ట్ర రైతులను ఉద్దేశించి వీడియో కాన్ఫరెన్స్ లో మాట్లాడారు.
  

  
ఈ కార్యక్రమంలో మర్రిగూడ ఏవో మల్లేష్ ఏఈఓ విజయ్ మర్రిగూడ మండల కాంగ్రెస్ పార్టీ అధ్యక్షులు రామదాసు శ్రీనివాస్, మర్రిగూడ మండల మాజీ జెడ్పిటిసి మేతరి యాదయ్య, మాల్ మార్కెట్ డైరెక్టర్ జమ్ముల వెంకటేష్ గౌడ్, పిఎసిఎస్ డైరెక్టర్ పగడాల లింగయ్య, కాంగ్రెస్ పార్టీ సీనియర్ నాయకులు మెండు నరసింహారెడ్డి, బండ యాదయ్య, వివిధ గ్రామాల రైతులు కోలుకులపల్లి యాదయ్య, సిలివేరు యాదయ్య, ఆకారపు శ్రీను, గ్యార వెంకటేష్, తదితరులు పాల్గొన్నారు.
 

TG: ప్రజా ప్రభుత్వానికి ఇక నుంచి రైతులే బ్రాండ్ అంబాసిడర్లు: సీఎం రేవంత్ రెడ్డి

 
 
  మహబూబ్ నగర్: అధికారంలోకి వచ్చిన మొదటి ఏడాదిలోనే 25 లక్షల మంది రైతు కుటుంబాలకు 21 వేల కోట్ల రూపాయల మేరకు రుణమాఫీ చేసిన చరిత్ర దేశంలోనే ఏదైనా రాష్ట్రం ఉందంటే అది తెలంగాణ ప్రజా ప్రభుత్వం మాత్రమేనని ముఖ్యమంత్రి రేవంత్ రెడ్డి అన్నారు.
  

  
ప్రజా పాలన – ప్రజా విజయోత్సవాలలో భాగంగా మహబూబ్‌నగర్ జిల్లా అమిస్తాపూర్‌లో మూడు రోజులపాటు జరిగిన రైతు పండుగ ముగింపు కార్యక్రమంలో శనివారం సీఎం రేవంత్ రెడ్డి పాల్గొన్నారు.
  

  

  
ఉప ముఖ్యమంత్రి బట్టి విక్రమార్క, మంత్రులు, సలహాదారులు, ప్రజాప్రతినిధులు పాల్గొన్న ఈ కార్యక్రమం ఆద్యంతం ఉత్సాహభరితంగా సాగింది.
  

  
దాదాపు 18 వేల కోట్ల రూపాయలతో 22 లక్షల రైతు కుటుంబాలకు ఇప్పటికే రుణమాఫీ చేయగా, తాజాగా ఈ వేదిక నుంచి మరో 3,13,897 మంది రైతు కుటుంబాలకు రుణ మాఫీ చేస్తూ అందుకు అవసరమైన 2747.67 కోట్ల రూపాయలను ముఖ్యమంత్రి  విడుదల చేశారు.
  

  
తాజాగా విడుదల చేసిన నిధులతో రాష్ట్రంలో మొత్తంగా 25 లక్షల మంది రైతులకు 21 వేల కోట్ల రూపాయల మేరకు రుణమాఫీ జరిగింది. ఈ నిధులను విడుదల చేయడంతో పాటు జిల్లాలో పలు అభివృద్ధి కార్యక్రమాలను సీఎం వర్చువల్ గా ప్రారంభించారు.
  

  
ఉమ్మడి మహబూబ్ నగర్ జిల్లా మహిళా సమాఖ్య కోసం 255 కోట్ల రూపాయలను విడుదల చేశారు. ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ... ప్రజా ప్రభుత్వానికి ఇకనుంచి రైతులే బ్రాండ్ అంబాసిడర్లు, కాళేశ్వరం నుంచి చుక్క నీరు పారనప్పటికీ స్వతంత్రం వచ్చినప్పటి నుంచి ఇప్పటివరకు చరిత్రలో ఎప్పుడూ లేనంతగా, ఏ రాష్ట్రం ఉత్పత్తి చేయనంతగా 66 లక్షల ఎకరాల్లో 1.53 కోట్ల మెట్రిక్ టన్నుల వడ్లు పండించి రికార్డు సృష్టించినామని తెలిపారు.
  

  
రైతే రాజు అని ప్రభుత్వం రైతన్నలకు రుణమాఫీ చేయడంతో పాటు వరి వేస్తే ఉరి వేసుకున్నట్టే అన్న పరిస్థితుల నుంచి.. నేడు రికార్డు స్థాయిలో ఉత్పత్తి సాధించడమే కాకుండా ప్రభుత్వం 500 రూపాయల బోనస్ ఇచ్చిన సందర్భంలో రైతు పండుగ చేసుకుంటున్నామన్నారు.
  

  
గ్రీన్ చానెల్లో నిధులు విడుదల చేయించి ఉమ్మడి పాలమూరు జిల్లాలో 20 లక్షల ఎకరాలకు నీళ్లు పారించే బాధ్యత తీసుకుంటామని చెప్పారు.
  

  
కొడంగల్ రుణం తీర్చుకోవాలని 1300 ఎకరాల భూ సేకరణ చేసి పరిశ్రమలు స్థాపించి 25 వేల మంది మహిళలకు, యువతకు ఉద్యోగ ఉపాధి అవకాశాలు కల్పించాలన్న ప్రయత్నం చేస్తుంటే కొందరు అడ్డుపడుతున్నారు.. అమాయకులను రెచ్చగొడుతున్నారు అని తెలిపారు.
  

  
ఇక్కడ పుట్టిన వాడిని... గిట్టేది కూడా ఈ గడ్డమీదే. ముఖ్యమంత్రిగా ఉండి ఈ జిల్లాకు నీళ్లు ఇవ్వకపోతే, నిధులు ఇవ్వకపోతే, అభివృద్ధి చేయకపోతే చరిత్ర క్షమించదు. జిల్లా వాసిగా నా బాధ్యత నాకు తెలుసు అని రేవంత్ రెడ్డి అన్నారు.
  

  
భారీ స్థాయిలో జరిగిన ఈ రైతు పండుగలో మంత్రులు కోమటిరెడ్డి వెంకటరెడ్డి, ఉత్తమ్ కుమార్ రెడ్డి, తుమ్మల నాగేశ్వరరావు, దామోదర రాజనర్సింహ,  శ్రీధర్ బాబు, సీతక్క, పొంగులేటి శ్రీనివాస్ రెడ్డి, జూపల్లి కృష్ణారావు, పొన్నం ప్రభాకర్, పలువురు సలహాదార్లు, ఇతర ప్రజాప్రతినిధులు పాల్గొన్నారు.
 

వర్షపు నీటితో ప్రతి చెరువు నిండేలా చూడాలి: మునుగోడు ఎమ్మెల్యే రాజ్ గోపాల్ రెడ్డి

 
 
  నల్లగొండ జిల్లా, మునుగోడు నియోజకవర్గంలో చిన్న నీటి వనరులను పటిష్ట పరచడానికి సమగ్రమైన కార్యాచరణ రూపొందించి  పనులను మొదలుపెట్టాలని.. మునుగోడు ఎమ్మెల్యే కోమటిరెడ్డి రాజ్ గోపాల్ రెడ్డి, హైదరాబాదులోని వారి నివాసంలో శనివారం నీటిపారుదల శాఖ అధికారులతో  సమీక్ష సమావేశం నిర్వహించారు.
  

  
ఈ మేరకు ఎమ్మెల్యే మాట్లాడుతూ..
  
అత్యధిక ఫ్లోరైడ్ ప్రాంతం మునుగోడు నియోజకవర్గమని, ఇక్కడ కురిసే ప్రతి నీటిబొట్టును ఒడిసిపట్టి చెరువులకు మళ్ళించినట్లయితే భూగర్భ జలాలు పెరిగి వ్యవసాయం కొంత మెరుగుపడే అవకాశం ఉందని అన్నారు.
  

  
నియోజకవర్గంలో ఉన్న  669 చెరువుల్లో గొలుసు కట్టు చెరువులకు నీరు వచ్చే ఫీడర్ ఛానల్ లను పటిష్టం చేయడంతో పాటు ఆయా చెరువులలో  పేరుకుపోయిన పూడికను తీయడం, కట్టలను పటిష్టం చేయడం  లాంటి పనులను  విడతల వారీగా పూర్తి చేయాలని ఇరిగేషన్ అధికారులను కోరారు.
  

  
దీనికోసం డిసెంబర్ నెలలో చెరువులను పటిష్టం చేయడానికి సైట్ సర్వే పూర్తి చేసి అంచనాలు రూపొందించే పని పూర్తి చేయాలన్నారు.  జనవరి నుండి జులై వరకు ఎంపిక చేసిన చెరువులను పటిష్టం చేయాలన్నారు. వర్షాకాలం రావడానికి ముందే చెరువులను పటిష్టపరిచేలా ప్రణాళికలు ఉండాలని  సూచించారు.
  

  
భూగర్భ జలాలను పెంచడానికి చెరువులతోపాటు వాగులపై ఎన్ని చోట్ల  మత్తడి( మట్టితో నిర్మించే మినీ చెక్ డ్యాం) నిర్మాణాలు చేపట్టాలి. వాగులపై ఎన్ని చోట్ల చెక్ డ్యాములు నిర్మించాలి, వెల్మకన్నే , శేషులేటి వాగు ఫీడర్ ఛానల్ పనుల పునరుద్ధరణ, గొలుసు కట్టు చెరువులతో పాటు  మిగతా చెరువులలో నీటిని నింపడానికి కావలసిన వనరులను, చేపట్టాల్సిన పనులపై  ఈ సమీక్ష సమావేశంలో వారు చర్చించారు.
  

  
మండలాల వారిగా  కమిటీలు ఏర్పాటు చేస్తానని  ఆ కమిటీల ద్వారా నీటిపారుదల అధికారులు సమన్వయం చేసుకుంటూ, వర్షాకాలం వచ్చే సమయానికి ఎంపిక చేసిన చెరువులను నిర్దేశిత సమయంలో పూర్తిచేసేలా అధికారులు సిద్ధంగా ఉండాలన్నారు. విడతల వారీగా  మునుగోడు నియోజకవర్గ వ్యాప్తంగా ఉన్న  669 చెరువులను పటిష్ట పరచాలన్నారు.