యూకే రాజభవనంలో చోరీ
బ్రిటన్ రాజు కింగ్ ఛార్లెస్ నివాసంలో దొంగలు పడ్డారు. ఓ ట్రక్కు, మరో క్వాడ్ బైకు (నాలుగు చక్రాల బైకు)ను ఎత్తుకెళ్లారు. కట్టుదిట్టమైన భద్రత ఉండే ప్యాలెస్ లో చోరీ జరగడం కలకలం రేపింది. భద్రతా వైఫల్యంపై అధికారులు ఆందోళన వ్యక్తం చేస్తున్నారు. అక్టోబర్ లో జరిగిన ఈ చోరీకి సంబంధించిన వివరాలు తాజాగా బయటకు వచ్చాయి. 

అధికార వర్గాల సమాచారం ప్రకారం... ప్రిన్స్ ఛార్లెస్ దంపతులు వారంలో రెండురోజులు విండ్సర్ ప్యాలెస్ లో గడుపుతుంటారు. ఈ భవనానికి జస్ట్ 5 నిమిషాల నడక దూరంలో యువరాజు ప్రిన్స్ విలియమ్ దంపతుల నివాసం అడిలైడ్ కాటేజీ ఉంది. ఈ క్రమంలోనే అక్టోబర్ 13న విండ్సర్ క్యాజిల్ లో దొంగతనం జరిగింది.

అర్ధరాత్రి ప్రాంతంలో ఇద్దరు దొంగలు ఫెన్సింగ్ దూకి విండ్సర్ క్యాజిల్ ఎస్టేట్ లోకి ప్రవేశించారు. నేరుగా సెక్యూరిటీ జోన్ లోని ఓ ఫామ్ వద్దకు వెళ్లి అక్కడున్న ట్రక్కును, బైక్ ను ఎత్తుకెళ్లారు. ట్రక్కుతో గేటును ఢీ కొట్టి పారిపోయారు. ఆ సమయంలో రాజదంపతులు క్యాజిల్ లో లేరని తెలుస్తోంది. 

అయినప్పటికీ తరచూ రాజదంపతులు వచ్చిపోయే భవనం కావడంతో కట్టుదిట్టమైన భద్రత ఉంటుంది. రాత్రి పగలు తేడా లేకుండా సిబ్బంది పహారా కాస్తుంటారు. ఎస్టేట్ లో సెక్యూరిటీ అలారం కూడా ఉంటుంది. అనుమానాస్పద కదలికలు కనిపిస్తే అలారం మోగుతుంది. ఇంత భద్రత ఉన్నప్పటికీ దొంగతనం జరగడంపై అధికారుల్లో ఆశ్చర్యం వ్యక్తమవుతోంది. 

దొంగలు ట్రక్కును తీసుకెళుతుంటే అలారం ఎందుకు మోగలేదు... దొంగలు ఫెన్సింగ్ దూకినా సెక్యూరిటీ సిబ్బంది ఎందుకు గుర్తించలేకపోయారనేది ప్రశ్నార్థకంగా మారింది. దీనిపై భద్రతా సిబ్బంది విచారణ జరుపుతున్నట్లు సమాచారం.

దేశంలో అతిపెద్ద బ్యాంక్ నుంచి కస్టమర్లకు షాక్
దేశంలోనే అతిపెద్ద బ్యాంకు అయిన ఎస్‌బీఐ రుణాలపై వడ్డీ రేట్లను పెంచింది. మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేటును 5 బేసిస్ పాయింట్లు పెంచిన నేపథ్యంలో రుణ రేట్లు పెరగనున్నాయి. అయితే ఎలాంటి లోన్స్ పెరిగే అవకాశం ఉందనే వివరాలను ఇక్కడ తెలుసుకుందాం.

దేశంలో అతిపెద్ద ప్రభుత్వ రంగ బ్యాంకు అయిన స్టేట్ బ్యాంక్ ఆఫ్ ఇండియా (SBI) తన ఖాతాదారులకు షాక్ ఇచ్చిందని చెప్పవచ్చు. ఎందుకంటే బ్యాంక్ MCLR (మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్)ని ఇటివల 0.05% పెంచింది. ఈ కొత్త మార్పు శుక్రవారం నుంచి అమల్లోకి వచ్చింది. ఒక సంవత్సరం MCLR ఇప్పుడు 9%కి చేరుకుంది. ఇది దీర్ఘకాలిక గృహ రుణాలు, ఇతర ప్రధాన రుణాలకు ముఖ్యమైనది. ఎస్‌బీఐ (ఎస్‌బీఐ హోమ్ లోన్) ఎమ్‌సీఎల్‌ఆర్‌ని పెంచడం ఇటీవలి కాలంలో ఇది రెండోసారి. బ్యాంక్ ప్రకారం ఈ నిర్ణయానికి కారణం ఖర్చులు, మార్కెట్లో పోటీ పెరగడమేనని పేర్కొన్నారు.

MCLR పెరుగుదల వల్ల ఇప్పుడు SBI లోన్స్ తీసుకున్న కస్టమర్లు మరింత వడ్డీని చెల్లించవలసి ఉంటుంది. వారి రుణాలు MCLR ఆధారిత వడ్డీ రేట్లపై నిర్ణయించబడతాయి. SBI మొత్తం రుణ పుస్తకంలో 42% MCLRకి సంబంధించినదని బ్యాంక్ ఛైర్మన్ CS శెట్టి తెలిపారు. రుణాలు రెపో రేటు వంటి బాహ్య బెంచ్‌మార్క్ రేట్లతో అనుసంధానించబడి ఉన్నాయన్నారు. MCLRలో మార్పు వల్ల నేరుగా ఇల్లు, కారు, వ్యక్తిగత రుణాలు వంటి సేవలను ఉపయోగిస్తున్న వినియోగదారులపై ప్రభావం పడుతుంది.

SBI (SBI హోమ్ లోన్) మూడు నెలలు, ఆరు నెలలు, సంవత్సరం MCLRని 0.05% పెంచింది. అయితే ఓవర్‌నైట్, ఒక నెల, రెండు సంవత్సరాలు, మూడు సంవత్సరాల పదవీకాలానికి MCLR రేట్లలో ఎటువంటి మార్పు చేయలేదు.

కొత్త - పాత వడ్డీ రేట్లు

ముందు వడ్డీ రేటు (%) - ఇప్పుడు వడ్డీ రేటు (%)

ఒక నెల 8.20 - 8.20

మూడు నెలలు 8.50 - 8.55

ఆరు నెలలు 8.85 - 8.90

ఒక సంవత్సరం 8.95 - 9.0

రెండు సంవత్సరాలు 9.05 - 9.05

మూడు సంవత్సరం 9.10 - 9.10

MCLR అనేది బ్యాంకులు తమ ఖాతాదారులకు రుణాలు ఇచ్చే కనీస వడ్డీ రేటు. రుణ వడ్డీ (SBI హోమ్ లోన్) రేట్లను పారదర్శక పద్ధతిలో నిర్ణయించడానికి వీలుగా RBI ఏప్రిల్ 2016లో ఈ విధానాన్ని అమలు చేసింది. బ్యాంకుల నిధుల ఖర్చులు, నగదు నిర్వహణ, ఇతర ఖర్చుల ఆధారంగా MCLR నిర్ణయించబడుతుంది. ఈ విధానంలో RBI నుంచి ప్రత్యేక అనుమతి లేని పక్షంలో బ్యాంకులు కస్టమర్‌కు స్థిర రేటు కంటే తక్కువ వడ్డీ రేటుకు రుణం ఇవ్వలేవు. ఈ వ్యవస్థ ప్రధాన లక్ష్యం RBI చేసిన వడ్డీ రేటు తగ్గింపుల ప్రయోజనాన్ని వినియోగదారులకు అందించడం.

MCLRలో పెరుగుదల ఆధారంగా రుణాలు పొందిన వినియోగదారుల EMIలపై ప్రత్యక్ష ప్రభావాన్ని చూపుతుంది. అయితే రెపో రేటు వంటి బాహ్య బెంచ్‌మార్క్ రేట్లపై ఆధారపడి రుణాలు పొందిన కస్టమర్‌లపై వెంటనే ప్రభావం చూపకపోవచ్చు. ఉదాహరణకు మీరు గృహ రుణం తీసుకుంటూ MCLR 9% అయినట్లయితే, మీ నెలవారీ వాయిదా పెరగవచ్చు. అయితే ఈ మార్పు లోన్ కాలవ్యవధి, అసలు మొత్తంపై కూడా ఆధారపడి ఉంటుంది.

13 ఏళ్లకే ఐపీఎల్ వేలంలోకి
13 ఏళ్లు.. సాధారణంగా ఈ వయసు పిల్లలు అప్పుడే కోచింగ్ సెంటర్లకు క్రికెట్ అకాడమీలకు వెళ్తుంటారు... లేదా పోటీ పరీక్షలకు ముందస్తుగానే సిద్ధం అవుతుంటారు.. కానీ, అతడు రంజీ క్రికెట్ ఆడేశాడు.. అండర్ 19 ప్రపంచ కప్ కూడా ఆడేశాడు.. మిగిలింది టీమ్ ఇండియా గడప తొక్కడమే.. ఆ దిశగా మొదటి అడుగు అయిన ఇండియన్ ప్రీమియర్ లీగ్ (ఐపీఎల్) వైపు అడుగేశాడు.

భారత క్రికెట్ లో సహజంగా ముంబై డామినేషన్ ఉంటుంది. లేదా నార్త్ ఇండియా ప్రభావం కనిపిస్తుంది.. కానీ, ప్రతిభ ఉంటే ఇవేవీ అడ్డుకోలేవు. దీనికి నిదర్శనమే బిహార్ వంటి వెనుకబడిన రాష్ట్రం నుంచి ఇప్పుడు జాతీయ స్థాయిలో పేరు మార్మోగుతున్న వైభవ్ సూర్య వంశీ. 13 ఏళ్ల సూర్య వంశీ భవిష్యత్ క్రికెట్ స్టార్ గా పేరు తెచ్చుకున్నాడు. అతడు కష్టపడి, క్రమశిక్షణతో ఉంటే ఇది సాధ్యమే.

బిహార్‌ రాష్ట్రం తాజ్‌పుర్ గ్రామానికి చెందినవాడు వైభవ్ సూర్యవంశీ. 2011లో పుట్టిన ఇతడు నాలుగేళ్ల వయసుకే బ్యాట్‌ పట్టాడు. దీంతో వైభవ్ కు క్రికెట్ అంటే ఆసక్తి ఉందని గమనించిన అతడి తండ్రి సంజీవ్ సూర్యవంశీ ఏకంగా సొంత మైదానమే సిద్ధం చేశాడు. 2019 నాటికి.. అంటే 8 ఏళ్లు వచ్చేసరికి సమస్తిపుర్‌ లోని క్రికెట్ అకాడమీలో చేర్పించాడు. రెండేళ్ల శిక్షణలోనే వైభవ్ బిహార్ అండర్-16 జట్టులోకి ఎంటర్ అయ్యాడు. అంటే 10 ఏళ్లకే 16 ఏళ్ల విభాగంలో ఆడాడు.

ఓపెనర్ అయిన వైభవ్ సూర్యవంశీ దూకుడైన ఎడమ చేతివాటం బ్యాట్స్ మన్. బౌలింగ్‌ కూడా వేస్తాడు. ఈ ఏడాదిలోనే ఫస్ట్‌ క్లాస్‌ క్రికెట్‌ లోకి వచ్చాడు. ఐదు మ్యాచ్‌ లు ఆడాడు. తనదైన శైలిలో.. ఫీల్డర్ల మధ్యలోంచి బౌండరీలు కొట్టడం వైభవ్ కు ఉన్న ప్రత్యేకత. వైభవ్ పేరును తాజాగా మెగా వేలం షార్ట్ లిస్ట్ లో పెట్టింది ఐపీఎల్ మేనేజ్ మెంట్. 

రూ.30 లక్షల బేస్‌ ప్రైస్‌ తో పేరును ఎంట్రీ చేయించిన వైభవన్ ను ఏ ఫ్రాంచైజీ తీసుకున్నా సంచలనమే. కాగా, 1988లో 16 ఏళ్ల వయసులో టీమ్ ఇండియాలో వచ్చాడు సచిన్ టెండూల్కర్. ఆ తర్వాత అతడు వెనక్కు తిరిగిచూసుకోలేదు. ఎవరూ అందుకోలేని రికార్డులను నెలకొల్పాడు. మరి వైభవ్..మరో రెండేళ్లకు టీమ్ ఇండియాలోకి వచ్చినా అది రికార్డే.

కొణతం దిలీప్ అరెస్ట్
ప్రభుత్వం చేపడుతున్న చర్యలపై సోషల్ మీడియా వేదికగా విమర్శలు గుప్పిస్తున్న వారిపై చర్యలకు తీసుకునేందుకు రేవంత్ సర్కార్ ఉపక్రమించింది. ఈ నేపథ్యంలో బీఆర్ఎస్ సోషల్ మీడియా చీఫ్ కొణతం దిలీప్‌ను సోమవారం హైదరాబాద్‌లో సైబర్ క్రైమ్ పోలీసులు అరెస్ట్ చేశారు.

సోషల్ మీడియాలో రెచ్చగొట్టే వ్యాఖ్యలు చేశారనే ఆరోపణల నేపథ్యంలో బీఆర్ఎస్ సోషల్ మీడియా ఇన్‌ఛార్జ్ కొణతం దిలీప్‌ను సోమవారం సైబర్ క్రైమ్ పోలీసులు హైదరాబాద్‌లో అరెస్ట్ చేశారు. గత బీఆర్ఎస్ ప్రభుత్వ హయాంలో డిజిటల్ మీడియా హెడ్‌గా కొణతం దిలీప్ వ్యవహారించారు.

అయితే గత ఏడాది చివరలో జరిగిన అసెంబ్లీ ఎన్నికల్లో ఓటరు కాంగ్రెస్ పార్టీకి పట్టం కట్టాడు. దీంతో రేవంత్ రెడ్డి ప్రభుత్వం కొలువు తీరింది. ఈ నేపథ్యంలో కొణతం దిలీప్.. ఆ పదవి నుంచి తప్పుకున్నారు. నాటి నుంచి రేవంత్ సర్కారే లక్ష్యంగా ఆయన సోషల్ మీడియాలో విమర్శలు గుప్పిస్తున్నారు. మూసీ పరివాహక ప్రాంతంలో హైడ్రా రంగంలోకి దిగడంతోపాటు లగచర్ల ఘటనలపై సోషల్ మీడియాలో రేవంత్ రెడ్డి సర్కార్‌పై తీవ్ర వ్యతిరేక ప్రచారం జరిగింది.

దీనిని ప్రభుత్వం చాలా సీరియస్‌గా తీసుకుంది. ఆ క్రమంలో చర్యలు చేపట్టింది. ఇలాంటి పోస్టులు పెట్టిన.. పెడుతున్న వారిపై చర్యలు తీసుకునేందుకు ప్రభుత్వం సమాయత్తమైంది. ఈ నేపథ్యంలో కొణతం దిలీప్‌ను అరెస్ట్ చేసినట్లు సమాచారం. మరోవైపు బీఆర్ఎస్ పార్టీలో కొణతం దిలీప్ సోషల్ మీడియా హెడ్‌గా వ్యవహరిస్తున్నారని తెలుస్తుంది.

మరోవైపు కొణతం దిలీప్ అరెస్ట్‌పై మాజీ మంత్రి, బీఆర్ఎస్ ఎమ్మెల్యే హరీశ్ రావు స్పందించారు. కొణతం దిలీప్ అరెస్ట్‌ను ఆయన ఖండించారు. కక్షపూరిత, ప్రతీకార చర్యలు మానుకోవాలంటూ కాంగ్రెస్ ప్రభుత్వానికి ఆయన హితవు పలికారు. ప్రజా ప్రభుత్వం అని ప్రచారం చేసుకుంటూ.. అప్రజాస్వామికంగా వ్యవహరించడం దుర్మార్గమని ఆయన పేర్కొన్నారు.

ప్రశ్నించే వారిపై అక్రమ కేసులు పెట్టి వేధించడం సిగ్గు చేటన్నారు. తెలంగాణ ఉద్యమకారుడు కొణతం దిలీప్ అరెస్టును తీవ్రంగా ఖండిస్తున్నామని చెప్పారు. ఆయనను వెంటనే విడుదల చేయాలని ప్రభుత్వాన్ని ఈ సందర్భంగా హరీశ్ రావు డిమాండ్ చేశారు. ఈ మేరకు ఎక్స్ వేదికగా హరీశ్ రావు స్పందించారు.

తెలంగాణ సచివాలయంలో వాస్తు మార్పులు
తెలంగాణ సచివాలయంలో మార్పులు జరుగుతున్నాయి. తూర్పు వైపు ఉన్న ప్రధాన ద్వారాన్ని (బాహుబలి గేటు) మూసేస్తున్నారు. ఇందులో భాగంగా తలుపులు తీసేసి ఆ ప్రాంతంలో రేకులను ఏర్పాటు చేశారు. 

ఈశాన్యం గేటుకు తూర్పు వైపుకు ప్రధాన ద్వారం రానుంది. ఇక్కడ మరో గేటును ఏర్పాటు చేయనున్నారు. మిగతా గేట్లను యథావిధిగా ఉంచనున్నారు. డిసెంబర్ 9న తెలంగాణ తల్లి విగ్రహావిష్కరణ ఉండటంతో ఆ లోపు వాస్తు మార్పులు పూర్తి చేసే పనిలో అధికారులు నిమగ్నమయ్యారు.

దాదాపు రూ.3.20 కోట్లతో ప్రభుత్వం ఈ మార్పులు చేస్తోంది. సచివాలయానికి ప్రస్తుతం నాలుగు వైపుల ప్రధాన గేట్లు ఉన్నాయి. తూర్పు వైపు లుంబినీ పార్క్ ఎదురుగా ఉన్న బాహుబలి గేటు నుంచి మాజీ సీఎం కేసీఆర్ రాకపోకలు జరిపేవారు. 

ఆ గేటు నుంచి సచివాలయం లోపల ప్రధాన ద్వారం వరకు రాకపోకలను కొంతకాలం నిలిపేశారు. ఆ దారిలోనే తెలంగాణ తల్లి విగ్రహంతో పాటు చుట్టూ లాన్, ఫౌంటెయిన్లు ఏర్పాటు చేస్తున్నారు. నైరుతి, ఈశాన్య గేట్లను కలుపుతూ రోడ్డును కూడా వేస్తున్నారు.

పశ్చిమం వైపు మింట్ కాంపౌండ్ ఉంది. ఈ ద్వారాన్ని ఎక్కువగా ఉపయోగించడం లేదు. ఇక్కడ ఎలాంటి మార్పులూ చేయడం లేదు. సచివాలయం నిర్మాణం తర్వాత మార్పులు చేయడం ఇదే తొలిసారి. కొత్త సచివాలయ భవనాన్ని నాటి సీఎం కేసీఆర్ గత ఏడాది ఏప్రిల్ నెలలో ప్రారంభించారు.

అమెరికాలో భారీగా ప్రభుత్వ ఉద్యోగుల తొలగింపు
అనవసర ఖర్చులు తగ్గించేందుకు బడ్జెట్‌లో కోతలు విధించడమే ప్రథమ లక్ష్యమని ప్రకటించిన అమెరికా నూతన అధ్యక్షుడు డొనాల్డ్‌ ట్రంప్‌ ఆలోచనలను కార్యరూపంలోకి తెచ్చేందుకు కసరత్తు మొదలైంది.

అనవసర ఖర్చులు తగ్గించేందుకు బడ్జెట్‌లో కోతలు విధించడమే ప్రథమ లక్ష్యమని ప్రకటించిన అమెరికా నూతన అధ్యక్షుడు డొనాల్డ్‌ ట్రంప్‌ ఆలోచనలను కార్యరూపంలోకి తెచ్చేందుకు కసరత్తు మొదలైంది. అధికారం చేపట్టిన వెంటనే అమలు చేసేలా కసరత్తు జరుగుతోంది. ఇందుకోసం ప్రపంచ కుబేరుడు, టెస్లా సీఈవో ఎలాన్‌ మస్క్‌; భారత సంతతికి చెందిన బయోటెక్‌ కంపెనీ సీఈవో, రిపబ్లికన్‌ పార్టీ నాయకుడు వివేక్‌ రామస్వామి ఆధ్వర్యంలో ప్రభుత్వ సామర్థ్య విభాగం (డిపార్ట్‌మెంట్‌ ఆఫ్‌ గవర్నమెంట్‌ ఎఫీషియన్సీ-డోగ్‌) ప్రత్యేకంగా ఏర్పాటైంది. ప్రభుత్వ విభాగాల్లో సామర్థ్యం పెంచడమంటే భారీగా ఉద్యోగాల్లో కోత విధించడమేనని ఈ ఇరువురు సీఈవోలు భావిస్తున్నారు. ఇటీవల ట్రంప్‌ సొంత ఎస్టేట్‌ అయిన మార్‌ ఎ లాగోలో జరిగిన సన్మాన సభలో వివేక్‌ ప్రసంగిస్తూ ‘‘మస్క్‌, నేను కలిసి వాషింగ్టన్‌లోని అధికార యంత్రాంగంలో పనిచేస్తున్న లక్షలాది మంది ‘ఎన్నిక ద్వారా నియమితులుకాని ఉద్యోగుల’ను బయటకు పంపి వేస్తాం.మేం ఆ పొజిషన్‌లో ఉన్నాంఅని చెప్పారు.

మస్క్‌ గురించి మీకు పూర్తిగా తెలియదు. ప్రభుత్వ ఉద్యోగులను తగ్గించడానికి ఆయన పెద్ద కరెంటు రంపమే తెస్తున్నారు. చాలా సరదాగా ఉంటుందిలే’’ అని వ్యాఖ్యానించారు. ఈ ‘కరెంటు రంపం’ ఆలోచనను అర్జెంటీనా అధ్యక్షుడు జావియర్‌ మిలేయి నుంచి తీసుకున్నట్టు కనిపిస్తోంది. అధికారం చేపట్టిన వెంటనే సాహసోపేత పొదుపు చర్యలు తీసుకుంటానని మిలేయి ప్రకటించారు. ఆర్థిక పోకిరీ అరాచక పెట్టుబడిదారుడు’నని స్వయంగా చెప్పుకొన్నారు. అధికార యంత్రాంగం, ఆర్థిక లోటును తగ్గించేందుకు ‘కరెంటు రంపాన్ని’ ఉపయోగిస్తానని ప్రకటించారు. ఆ భావననే వివేక్‌ తీసుకున్నట్టు కనిపిస్తోంది. ప్రభుత్వ యంత్రాంగాన్ని ‘క్షవరం’ చేయాల్సి ఉందని ఆయన అన్నారు. ప్రభుత్వ యంత్రాంగం సైజును షేవింగ్‌ చేయడం మా లక్ష్యం. ఇది మాత్రం సాధ్యమైనంత వరకు పారదర్శంగా జరగాలి’’అని పేర్కొన్నారు. ఈ కసరత్తును ఆయన ‘ఆధునిక మాన్‌హట్టన్‌ ప్రాజెక్టు’ అని అభివర్ణించారు.

రెండో ప్రపంచ యుద్ధం సమయంలో అణుబాంబులు తయారు చేసేందుకు అమెరికా ప్రభుత్వం ‘మన్‌హట్టన్‌ ప్రాజెక్టు’ను నిర్వహించింది. ప్రస్తుతం భారీగా ప్రభుత్వ ఉద్యోగులను తగ్గించేందుకు చేపట్టే ప్రాజెక్టు కూడా అంత తీవ్రమైనదేనని తెలిపారు. ఇందుకోసం దేశంలోని మేధావులను ఒక్క దగ్గర చేర్చుతున్నామని చెప్పారు. జీతం తీసుకోకుండా వారానికి 80 గంటలపాటు అంకితభావంతో పనిచేసేవారు కావాలంటూ ఉద్యోగ ప్రకటన ఇచ్చారు కూడా. 

ఉద్యోగుల తొలగింపు కారణంగా కీలకమైన ప్రభుత్వ విధులు కుంటుపడుతాయన్న హెచ్చరికలకు వివేక్‌ సమాఽధానమిస్తూ ‘నూతన ఆవిష్కరణలు, వ్యయం అదుపునకు కోతలు తప్పనిసరి’ అన్నారు. ‘‘మనం క్షీణదశలో ఉన్న దేశం అంటూ నిరాశ భావనను ఇంతవరకు మనకు కలిగించారు. అది తప్పని ఎన్నికల్లో రుజువైంది. దేశ నిర్మాతలు గర్వపడేలా తగిన సైజ్‌, లక్ష్యం ఉండే ప్రభుత్వాన్ని ఏర్పాటు చేయడమే ‘డోగ్‌’ పని అని అన్నారు. దీనిపై ప్రజల్లో అవగాహన కల్పించేందుకు ప్రతివారం ఎక్స్‌లో ‘డోగ్‌కాస్ట్‌’ ప్రసారం చేసి మస్క్‌, వివేక్‌లు తమ అభిప్రాయాలను తెలుపుతారు.

అరెస్ట్ చేయొద్దని వర్మ పిటిషన్
ఆంధ్రప్రదేశ్ హైకోర్టులో ప్రముఖ దర్శకుడు రాం గోపాల్ వర్మకు చుక్కెదురైంది. ఓ కేసు విషయంలో వర్మ తరఫు న్యాయవాదులు హైకోర్టును ఆశ్రయించారు.

ఆంధ్రప్రదేశ్ హైకోర్టులో ప్రముఖ దర్శకుడు రాం గోపాల్ వర్మకు చుక్కెదురైంది. కేసు విషయంలో వర్మ తరఫు న్యాయవాదులు హైకోర్టును ఆశ్రయించారు. అరెస్ట్ నుంచి కాపాడాలని హైకోర్టు ధర్మసనాన్ని కోరారు. సదరు కేసులో వర్మ అరెస్ట్ అవుతారనే భయం ఉంటే బెయిల్ పిటిషన్ దాఖలు చేసుకోవాలని సూచించింది.

అసెంబ్లీ ఎన్నికలకు ముందు రాం గోపాల్ వర్మ తెరకెక్కించిన వ్యూహం సినిమా కాంట్రవర్సీకి దారితీసింది. అప్పటి ప్రతిపక్ష నేత చంద్రబాబు, జనసేన అధినేత పవన్ కల్యాణ్ లక్ష్యంగా సోషల్ మీడియాలో వర్మ పోస్టులు చేశారు. ఆ అంశంపై అప్పట్లో పెను దుమారం చెలరేగింది. చంద్రబాబు, పవన్ కల్యాణ్‌పై పోస్టులకు సంబంధించి ప్రకాశం జిల్లాలో కేసు నమోదైంది. 

మద్దిపాడు మండల టీడీపీ ప్రధాన కార్యదర్శి ముత్తనపల్లి రామలింగం ఫిర్యాదు మేరకు పోలీసులు కేసు ఫైల్ చేశారు. ఆ కేసులో తనను అరెస్ట్ చేస్తారని వర్మ భావించారు. ఆ కేసును కొట్టివేయాలని హైకోర్టులో పిటిషన్ దాఖలు చేశారు. అరెస్ట్ చేయొద్దని ధర్మసనాన్ని కోరగా తిరస్కరించింది. అరెస్ట్ చేస్తారని భయం ఉంటే బెయిల్ పిటిషన్ దాఖలు చేయాలని సూచించింది.

వర్మ కేసుకు సంబంధించి రేపు (మంగళవారం) విచారణకు హాజరు కావాలని పోలీసులు నోటీసులు ఇచ్చారు. ఈ విషయాన్ని హైకోర్టు ధర్మాసనం ముందు వర్మ తరఫు న్యాయవాదులు ప్రస్తావించారు. మరింత సమయం ఇచ్చేలా పోలీసులను ఆదేశించాలని అభ్యర్థించారు. సమయానికి సంబంధించిన అంశాన్ని పోలీసుల ముందు తేల్చుకోవాలని ధర్మాసనం స్పష్టం చేసింది. 

అలాంటి అభ్యర్థనలు తమ ముందుద చేయొద్దని తేల్చి చెప్పింది. కేసుకు సంబంధించి వర్మకు హైకోర్టులో ఊరట దక్కకపోవడంతో ఆయన రేపు విచారణకు హాజరవుతారా..? లేదా అనే ఉత్కంఠ నెలకొంది. ఒకవేళ వర్మ విచారణకు హాజరుకాకుంటే నేరుగా పోలీసులు అదుపులోకి తీసుకునే అవకాశం ఉంది.

రేవంత్ ను టార్గెట్ చేసిన పవన్
ఏపీ డిప్యూటీ సీఎం పవన్ తన రూటు మార్చారు. మహారాష్ట్ర ఎన్నికల ప్రచారంలో పవన్ తన సహజ శైలికి భిన్నంగా ప్రసంగాలు చేస్తున్నారు. ఆరెస్సెస్ కు మద్దతుగా కీలక వ్యాఖ్యలు చేసారు. శినసేన - జనసేన సిద్దాంతం ఒకటేనని చెప్పుకొచ్చారు. బీజేపీ గెలుపు అవసరం గురించి వివరించారు. అదే సమయంలో తొలి సారి తెలంగాణ సీఎం రేవంత్ ను టార్గెట్ చేసారు. ప్రజలకు ఇచ్చిన హామీలను ప్రస్తావించారు. పవన్ విమర్శలు తెలంగాణ రాజకీయాల్లో ఇప్పుడు కీలక మలుపుగా కనిపిస్తోంది.

మహారాష్ట్ర ఎన్నికల ప్రచారం నేటితో ముగియనుంది. ఏపీ డిప్యూటీ సీఎం పవన్ కల్యాణ్ రెండు రోజులు మహారాష్ట్ర ఎన్నికల ప్రచారంలో పాల్గొన్నారు. హిందీ, మరాఠీ భాషల్లో తన ప్రచారం కొనసాగించారు. తనకు మరాఠా ప్రజలు.. ఛత్రపతి శివాజీ, బాలాసాహెబ్ థాక్రే పైన తన అభిమానం ఎలాంటిదో వివరించారు. శివసేన - జనసేన రెండు ప్రజలకు న్యాయం చేసేందుకు సిద్దంగా ఉంటాయని చెప్పుకొచ్చారు. సనాతన హిందూ ధర్మం గురించి ప్రస్తావించారు. మహారాష్ట్ర భవిష్యత్ కు బీజేపీ కూటమి గెలుపు అవసరమని పేర్కొన్నారు. తాను ఏపీలో వైసీపీని ఓడించిన అంశాన్ని ప్రతీ సభలోనూ వివరించారు.

తెలంగాణ రాజకీయాల గురించి పవన్ తన ప్రచారంలో ప్రస్తావన చేసారు. కాంగ్రెస్ కూటమికి మద్దతుగా తెలంగాణ సీఎం రేవంత్ సైతం మహారాష్ట్రలో ప్రచారం చేస్తూ తన హయాంలో అమలు చేసిన పథకాలను వివరించారు. ప్రజలకు ఎన్నికల సమయంలో ఇచ్చిన హామీలను అమలు చేస్తున్నామని చెప్పుకొచ్చారు. దీనికి కౌంటర్ గా పవన్ కీలక వ్యాఖ్యలు చేసారు. తెలంగాణ అంటే తన గుండె ఎలా కొట్టుకుంటుందో అంటూ వివరించారు. బండెనక బండి కట్టి పదహారు బండ్లు కట్టి తనకు ఇష్టమైన పాట అని చెప్పుకొచ్చారు. తెలంగాణ పోరాటాల గడ్డ అని పేర్కొన్న పవన్.. అధికారంలోకి వస్తే మహిళలకు ప్రతీ నెలా ఇస్తామని చెప్పిన ఆర్దిక సాయం ఇవ్వటం లేదని పవన్ విమర్శించారు. ప్రజలకు ఇచ్చిన మాట కాంగ్రెస్ నిలబెట్టుకోవటం లేదని పవన్ కల్యాణ్ వ్యాఖ్యానించారు.

అటు రేవంత్ తన ఎన్నికల ప్రచారంలో తెలంగాణలో తన ప్రభుత్వ విజయాలను వివరిస్తున్నారు. కేంద్రం, ప్రధాని మోదీ పైన విమర్శలు గుప్పించారు. గుజరాత్ నుంచి ప్రధాని, అదానీ ముంబైను దోచుకోవడానికి వస్తున్నారంటూ ఆరోపించారు. బీజేపీ బందిపోటు ముఠాను తరిమికొట్టాలని రేవంత్ తన ప్రచారంలో పిలుపునిచ్చారు. పవన్ తన ప్రచారంలో భాగంగా ఓవైసీ మహారాష్ట్రలో చేసిన వ్యాఖ్యలకు కౌంటర్ ఇచ్చారు. వారి బెదిరింపులకు ఎవరూ భయపడరన్నారు. ఇక, పవన్ ఇప్పుడు రేవంత్ హామీలు అమలు చేయటం లేదంటూ చేసిన విమర్శల పైన కాంగ్రెస్ నేతలు కౌంటర్ కు సిద్దం అవుతున్నారు. ఇప్పుడు ఈ పరిణామాలు రాజకీయంగా కొత్త మలుపు తీసుకుంటున్నాయి.

తెలంగాణలో అదానీ సామ్రాజ్యం
ప్రముఖ పారిశ్రామికవేత్త అదానీ విషయంలో కాంగ్రెస్‌ అధిష్ఠానం చేస్తున్న వ్యాఖ్యలకు, రాష్ట్రంలోని కాంగ్రెస్‌ ప్రభుత్వం అనుసరిస్తున్న వైఖరికి పొంతన కుదరడం లేదు. రాహుల్‌గాంధీ నిత్యం అదానీ లక్ష్యంగా కేంద్రంపై దాడి చేస్తుంటే, రాష్ట్రంలోని కాంగ్రెస్‌ సర్కారు మాత్రం అదానీకి రెడ్‌కార్పెట్‌ పరుస్తున్నది. సిమెంట్‌ పరిశ్రమలో గుత్తాధిపత్యం సాధించాలన్న అదానీ ప్రణాళికలకు రాష్ట్ర సర్కారు బాసటగా నిలుస్తూ తనవంతు సహకారం అందిస్తున్నది.

ప్రముఖ పారిశ్రామికవేత్త అదానీ విషయంలో కాంగ్రెస్‌ అధిష్ఠానం చేస్తున్న వ్యాఖ్యలకు, రాష్ట్రంలోని కాంగ్రెస్‌ ప్రభుత్వం అనుసరిస్తున్న వైఖరికి పొంతన కుదరడం లేదు. రాహుల్‌గాంధీ నిత్యం అదానీ లక్ష్యంగా కేంద్రంపై దాడి చేస్తుంటే, రాష్ట్రంలోని కాంగ్రెస్‌ సర్కారు మాత్రం అదానీకి రెడ్‌కార్పెట్‌ పరుస్తున్నది. సిమెంట్‌ పరిశ్రమలో గుత్తాధిపత్యం సాధించాలన్న అదానీ ప్రణాళికలకు రాష్ట్ర సర్కారు బాసటగా నిలుస్తూ తనవంతు సహకారం అందిస్తున్నది. తాజాగా అదానీ గ్రూప్‌కు చెందిన సిమెంట్‌ పరిశ్రమ కోసం నల్లగొండ జిల్లాలో సున్నపురాయి గనులను విస్తరించేందుకు రాష్ట్ర కాలుష్య నియంత్రణ మండలి (పీసీబీ) ప్రజాభిప్రాయ సేకరణ చేపడుతున్నది.

ఇప్పటికే యాదాద్రి భువనగిరి జిల్లా రామన్నపేటలో అదానీ సిమెంట్‌ ప్లాంట్‌ ఏర్పాటును వ్యతిరేకిస్తూ ప్రజలు ఆం దోళన చేస్తుండగా, తాజాగా నల్లగొండ జిల్లా లో సున్నపురాయి గనిని విస్తరించేందుకు స న్నాహాలు చేస్తుంది. నల్లగొండ జిల్లా దామరచర్ల మండలం గగన్‌పహాడ్‌లో ఉన్న పెన్నా సిమెంట్‌ ఇండస్ట్రీస్‌కు చెందిన చాణక్య సిమెం ట్స్‌ లైమ్‌స్టోన్‌ మైన్‌ విస్తరణపై 29న ప్రజాభిప్రాయ సేకరణ నిర్వహించనున్నట్టు పీసీబీ తెలిసింది. పెన్నా సిమెంట్‌ కంపెనీని ఆగస్టులో అదానీ గ్రూపు రూ.10,422 కోట్లకు టేకోవర్‌ చేసింది. అదానీకి చెందిన అంబుజా సిమెంట్‌ కు పెన్నా అనుబంధ కంపెనీగా మారిపోయిం ది. 875 ఎకరాల చాణక్య సిమెంట్‌ సున్నపురాయి గనిని విస్తరించాలని నిర్ణయించింది.

తెలంగాణలో సిమెంట్‌ ప్లాంట్‌ ఏర్పాటుకు రూ.1,400 కోట్లు పెట్టుబడి పెట్టనున్నట్టు ఇప్పటికే అదానీ గ్రూపు ప్రకటించింది. ఇందు లో భాగంగా యాదాద్రి భువనగిరి జిల్లా రామన్నపేటలో 70 ఎకరాల్లో వచ్చే ఐదేండ్లలో సంవత్సరానికి ఆరు మిలియన్‌ మెట్రిక్‌ టన్నుల సామర్థ్యం గల సిమెంట్‌ ప్లాంట్‌ను ఏర్పాటుచేయాలని కంపెనీ నిర్ణయించింది. అంబుజా సిమెంట్‌ కంపెనీ ఏర్పాటు చేయనున్న ఈ పరిశ్రమ కోసం ఇటీవల పీసీబీ ప్రజాభిప్రాయ సేకరణ చేపట్టగా, ప్రజలు తీవ్రంగా వ్యతిరేకించారు. సిమెంట్‌ కంపెనీతో తమ జీవితాలు బుగ్గిపాలవుతాయని, ఎట్టి పరిస్థితిలోనూ అనుమతించేది లేదని స్థానికులు ఆందోళన చేపట్టారు.

రాష్ట్రంలో కాంగ్రెస్‌ ప్రభుత్వం ఏర్పడిన తరువాత అదానీతో బంధం బలపడుతున్నట్టు పరిస్థితులు స్పష్టం చేస్తున్నాయి. రాష్ట్రంలో ఏ ర్పాటు చేస్తున్న స్కిల్‌ యూనివర్సిటీకి అదానీ గ్రూపు రూ.100 కోట్లు విరాళం ఇచ్చారు. రాష్ట్రంలో విద్యుత్తు, సిమెంట్‌, డాటా సెంటర్లు తదితర రంగాల్లో రూ.12,400 కోట్ల పెట్టుబడులు పెట్టేందుకు జనవరిలో దావోస్‌లో జరిగిన వరల్డ్‌ ఎకనమిక్‌ ఫోరం సదస్సులో ప్రభుత్వంతో ఒప్పందం కుదిరింది. అదానీ గ్రూప్‌ చైర్మన్‌ గౌతమ్‌ అదానీ, సీఎం రేవంత్‌ ఈ ఒప్పందంపై సంతకాలు చేశారు.

డాటా సెంట ర్‌ ఏర్పాటుకు రూ.ఐదు వేల కోట్లు, గ్రీన్‌ ఎనర్జీకి సంబంధించిన రెండు పంప్‌ స్టోరేజ్‌ ప్రాజెక్టు(పీఎస్‌పీ)ల ఏర్పాటుకు ఐదు వేల కోట్లు, రక్షణ రంగంలో ఆర్‌అండ్‌డీ ఎకోసిస్టం ఏర్పాటుకు రూ.1,000 కోట్లు, సిమెంట్‌ ప్లాంట్‌ ఏర్పాటుకు రూ.1,400 కోట్లు పెట్టుబడి పెట్టనున్నట్టు కంపెనీ తెలిపింది. ఇప్పటికే పెన్నా సిమెంట్‌ను సొంతం చేసుకున్న అదానీ గ్రూ ప్‌.. రామన్నపేటలో సిమెంట్‌ ప్లాంట్‌ ఏర్పా టుకు సన్నాహాలు చేస్తున్నది. మరోవైపు, రా ష్ట్రంలో విద్యుత్తు పంపిణీ వ్యవస్థను ఇప్పటికే అదానీకి అప్పగించినట్టు వార్తలొస్తున్నాయి. ఇటీవల పాతబస్తీలో కరెంట్‌ మీటర్ల వివరాల ను ఆ గ్రూప్‌కు చెందిన సిబ్బంది సేకరించడంతో స్థానికులు తీవ్రంగా వ్యతిరేకించారు.

2028 నాటికి ఏటా 140 మిలియన్‌ టన్నుల ఉత్పత్తి సామర్థ్యం (ఎంటీపీఏ) సాధించాలని అంబుజా సిమెంట్స్‌ ప్రణాళికలు సిద్ధం చేసుకున్నది. ఇప్పటికే గుజరాత్‌లో పలు సిమెంట్‌ పరిశ్రమలను కొ నుగోలు చేయడం, పలు కంపెనీల్లో వా టాలు కొనుగోలు చేయడం ద్వారా ఉత్ప త్తి సామర్థ్యాన్ని భారీగా పెంచుకున్నది. అపార సున్నపురాయి గనులు ఉన్న పెన్నా సిమెంట్‌ను కూడా అదానీ గ్రూప్‌ కొనుగోలు చేసింది. దీంతోపాటు రామన్నపేటలో కొత్తగా సిమెంట్‌ ప్లాంట్‌ ఏర్పాటు ద్వారా ఇటు దక్షిణాది రాష్ర్టాలతోపాటు తూర్పు ప్రాంతానికి, అటు సీపోర్టు ద్వారా శ్రీలంకకు సిమెంట్‌ ఎగుమతి చేయవచ్చని అదానీ గ్రూప్‌ భావిస్తున్నది. ఇటీవలే బీహార్‌లో గ్రైండింగ్‌ యూనిట్‌ ఏర్పాటుకు 1,600 కోట్లు పెట్టుబడి పెట్టింది. బిర్లా గ్రూప్‌కు చెందిన అల్ట్రాటెక్‌ను అధిగమించి ప్రథమ స్థానానికి ఎగబాకేందుకు అదానీ గ్రూప్‌ అడుగులు వేస్తున్నది.

ముంబై ఓటు ఎటువైపు
ఈ నెల 20న జరగనున్న మహారాష్ట్ర అసెంబ్లీ ఎన్నికల్లో దేశ వాణిజ్య రాజధాని ముంబై అన్ని పార్టీలకూ కీలకం కానుంది.

 ఈ నెల 20న జరగనున్న మహారాష్ట్ర అసెంబ్లీ ఎన్నికల్లో దేశ వాణిజ్య రాజధాని ముంబై అన్ని పార్టీలకూ కీలకం కానుంది. ముంబైలోని 36 అసెంబ్లీ నియోజకవర్గాల్లో బీజేపీ, శివసేన, ఎన్సీపీతో కూడిన మహాయుతి కూటమి అభ్యర్థులతో కాంగ్రెస్‌, ఉద్ధవ్‌ ఠాక్రే వర్గం శివసేన, శరద్‌ పవార్‌ వర్గం ఎన్సీపీతో కూడిన మహావికాస్‌ అఘాడీ(ఎంవిఏ) కూటమి అభ్యర్థులు తలపడుతున్నారు. వీరికి తోడు రాజ్‌థాకరే నేతృత్వంలోని మహారాష్ట్ర నవనిర్మాణ్‌ సేన(ఎంఎన్‌ఎ్‌స), ప్రకాశ్‌ అంబేడ్కర్‌ సారథ్యంలోని వించిత్‌ బహుజన్‌ అఘాడీ, అసదుద్దీన్‌ ఒవైసీ నేతృత్వంలోని మజ్లి్‌స అభ్యర్థులు కూడా ముంబైలో తమ అదృష్టాన్ని పరీక్షించుకుంటున్నారు.

2019 అసెంబ్లీ ఎన్నికల్లో 36 సీట్లకు గాను బీజేపీ, ఉమ్మడి శివసేన ఎన్డీయే కూటమిగా 30 స్థానాలు కైవసం చేసుకున్నాయి. ఇందులో బీజేపీ 16, శివసేన 14 స్థానాలు గెలుచుకున్నాయి. ప్రస్తుత ఎన్నికల్లో మహాయుతి కూటమిలోని బీజేపీ 18, షిండే శివసేన 16, అజిత్‌ పవార్‌ ఎన్సీపీ 2 నియోజకవర్గాల్లో అభ్యర్థులను బరిలోకి దించాయి. ఎంవిఏ కూటమిలోని యూబీటీ 22, కాంగ్రెస్‌ 11, శరద్‌ పవార్‌ వర్గం ఎన్సీపీ 2 చోట్ల అభ్యర్థులను పోటీకి దించాయి. శివసేన రెండు ముక్కలై పరస్పరం పోటీపడుతుండటంతో తాజా ఎన్నికల్లో ముంబై ఓటర్లు ఏ వర్గాన్ని ఆదరిస్తారనేది ఉత్కంఠగా మారింది.

ఇటీవలి లోక్‌సభ ఎన్నికల్లో ముంబైలోని ఆరు ఎంపీ సీట్లకు గాను బీజేపీ రెండింటినే గెలుచుకోగలిగింది. మిగతా నాలుగింటిలో మూడింటిని ఉద్ధవ్‌ శివసేన గెలుచుకోగా ఎంవిఏ కూటమిలో భాగంగా కాంగ్రెస్‌ మరో స్థానాన్ని గెలుచుకుంది. మెజార్టీ నియోజకవర్గాలను గెలుచుకున్న ఎంవీఏ అదే ఊపు తో అసెంబ్లీ ఎన్నికల్లోనూ బరిలోకి దిగుతోంది.

మహారాష్ట్ర నవనిర్మాణ్‌ సేన అధ్యక్షుడు రాజ్‌థాకరే ముంబైలో 25 నియోజకవర్గాల నుంచి తన అభ్యర్థులను బరిలోకి దించారు. దీంతో సంప్రదాయ ఓట్లు చీలే అవకాశం ఉంది. ముఖ్యంగా ముంబైలో సంప్రదాయ ఓట్లను నమ్ముకున్న బీజేపీ, శివసేనలకు ఎం ఎన్‌ఎ్‌స సవాలుగా మారనుంది. వర్లీలో ఉద్ధవ్‌ థాకరే తనయుడు, సిటింగ్‌ ఎమ్మెల్యే ఆదిత్య థాకరే పోటీ చేస్తున్నారు. శివసేన తరఫున మిలింద్‌ దేవరా బరిలో ఉండగా, ఎంఎన్‌ఎ్‌స సందీప్‌ దేశ్‌పాండేను పోటీకి దించింది. దీంతో ముక్కోణపు పోటీ ఏర్పడింది. 2024 లోక్‌సభ ఎన్నికల నాటి మూడ్‌లోనే ఓటర్లు కొనసాగి తే ముంబైలో 4 సీట్లు గెలుచుకున్న ఎంవిఏ కూటమి మరోసారి స్వీప్‌ చేసే అవకాశం ఉంది. అయితే తాము అధికారంలోకి వచ్చాక చేపట్టిన అభివృద్ధి కార్యక్రమాల కారణంగా ముంబై నగర వాసులు అసెంబ్లీ ఎన్నికల్లో తమకు పట్టం కడతారని మహాయుతి కూటమి ఆశాభావంగా ఉంది.

మజ్లిస్‌ అభ్యర్థులు బరిలో నిలుస్తోన్న వెర్సోవా, శివాజీనగర్‌ తదితర నియోజకవర్గాల్లో ఎంవీఏ కూటమికి దక్కే ముస్లిం ఓట్లలో చీలిక తప్పదని విశ్లేషకులు చెబుతున్నారు. ఇది ఎంవీఏ కూటమికి మింగుడు పడని విషయంగా మారనుంది. గత ఎన్నికల్లో 44 చోట్ల పోటీ చేసిన మజ్లిస్‌ డజనుకు పైగా నియోజకవర్గాల్లో కాంగ్రె్‌స-ఎన్సీపీ కూటమి అభ్యర్థులను ఓడించడంలో కీలకంగా మారింది.