మెదక్ చర్చితో అనుబంధాన్ని గుర్తుచేసుకున్న సీఎం రేవంత్
వందేళ్లు పూర్తి చేసుకున్న మెదక్ చర్చి గొప్ప దేవాలయంగా గుర్తింపు పొందిందని సీఎం రేవంత్ రెడ్డి తెలిపారు. చారిత్రక చర్చి అభివృద్ధికి కాంగ్రెస్ ప్రభుత్వం నిధులు విడుదల చేసిందన్నారు. అలాగే మెదక్ చర్చితో తనకున్న అనుబంధాన్ని ఈ సందర్భంగా రేవంత్ గుర్తుచేశారు. పీసీసీ అధ్యక్షుడుగా ఇక్కడికి వచ్చి ఆశీస్సులు తీసుకున్నట్లు తెలిపారు.

క్రిస్మస్ పర్వదాన్ని పురస్కరించుకుని మెదక్ సీఎస్‌ఐ చర్చ్‌లో నిర్వహించిన క్రిస్మస్ వేడుకల్లో ముఖ్యమంత్రి రేవంత్ రెడ్డి (CM Revanth Reddy) పాల్గొన్నారు. ఈ సందర్భంగా సీఎం మాట్లాడుతూ.. మెదక్ చర్చి శతాబ్ది ఉత్సవాలు ఘనంగా నిర్వహించుకోవడం సంతోషంగా ఉందన్నారు. ఏసు భక్తులందరికీ క్రిస్మస్ శుభాకాంక్షలు తెలియజేశారు. వందేళ్లు పూర్తి చేసుకున్న మెదక్ చర్చి గొప్ప దేవాలయంగా గుర్తింపు పొందిందని తెలిపారు. చారిత్రక చర్చి అభివృద్ధికి కాంగ్రెస్ ప్రభుత్వం నిధులు విడుదల చేసిందన్నారు. అలాగే మెదక్ చర్చితో తనకున్న అనుబంధాన్ని ఈ సందర్భంగా రేవంత్ గుర్తుచేశారు. పీసీసీ అధ్యక్షుడుగా ఇక్కడికి వచ్చి ఆశీస్సులు తీసుకున్నట్లు తెలిపారు. ముఖ్యమంత్రి హోదాలో ఈ చర్చికి వస్తానని ఆనాడు మాట ఇచ్చానని గుర్తుచేసుకున్నారు.

శతాబ్ది ఉత్సవాలు, భక్తులతో క్రిస్మస్ జరుపుకోవాలనే ఇక్కడకు వచ్చానని తెలిపారు. తమది పేదల ప్రభుత్వమని.. పేదలకు ఎన్నో సంక్షేమ పథకాలు అమలు చేస్తున్నామని చెప్పారు. ఇందిరమ్మ ఇళ్లు, 200 యూనిట్ల ఉచిత విద్యుత్ పథకంలో దళితులు, గిరిజనులకు మేలు జరుగుతోందన్నారు. మెదక్ జిల్లా అభివృద్ధికి ప్రభుత్వం చిత్తశుద్ధితో కృషి చేస్తుందని సీఎం రేవంత్ రెడ్డి స్పష్టం చేశారు. క్రిస్మస్ వేడుకల్లో సీఎం రేవంత్‌తో పాటు మంత్రులు పొంగులేటి, దామోదర రాజనర్సింహ, కొండా సురేఖ పాల్గొన్నారు.

మెదక్ పర్యటనలో భాగంగా ముఖ్యమంత్రి రేవంత్ రెడ్డి ముందుగా పాపన్నపేట మండలంలోని ఏడుపాయల వనదుర్గామాత అమ్మవారిని దర్శించుకున్నారు. ఈ సందర్భంగా ఆలయంలో సీఎం ప్రత్యేక పూజలు చేశారు. అమ్మవారికి పట్టువస్త్రాలను సమర్పించారు. సీఎం వెంట మంత్రులు పొంగులేటి శ్రీనివాసరెడ్డి, దామోదర రాజనర్సింహ, కొండా సురేఖ, పీసీసీ అధ్యక్షుడు మహేష్ కుమార్ గౌడ్, ఎంపీ రఘునందన్ రావు తదితరులు వన దుర్గాదేవిని దర్శించుకున్నారు.

ఈరోజు ఉదయం బేగంపేట విమానాశ్రయం నుంచి ప్రత్యేక హెలికాఫ్టర్‌లో మెదక్ చేరుకున్న సీఎం రేవంత్.. అక్కడ ఏడుపాయల వనదుర్గా భవాని ఆలయానికి చేరుకుని అమ్మవారిని దర్శించుకుని ప్రత్యేక పూజలు చేశారు. ఆలయ ప్రాంగణంలో అభివృద్ది పనులకు శంకుస్థాపన చేశారు. అనంతరం మెదక్ చర్చికి చేరుకున్నారు. అక్కడ చర్చి అభివృద్ధి పనులకు శంకుస్థాపన చేసిన సీఎం రేవంత్ రెడ్డి.. ఆపై అక్కడ నిర్వహించిన క్రిస్మస్ వేడుకల్లో పాల్గొన్నారు.

తిరుపతిలో అన్నమయ్య విగ్రహానికి శాంటాక్లాజ్ టోపీ పెట్టింది ఆయనే
తిరుపతిలో అన్నమయ్య విగ్రహానికి శాంటా క్లాస్ టోపీ పెట్టిన అంశం తీవ్ర కలకలం రేపిన విషయం తెలిసిందే. తిరుపతిలో ఈ ఘటనతో అన్య మత ప్రచారం జరుగుతుందని, కావాలని ఎవరో ఈ పనికి ఒడిగట్టారని హిందూ సంఘాలు తీవ్ర స్థాయిలో ఆగ్రహం వ్యక్తం చేశాయి. రాయల చెరువు రోడ్డు కూడలిలో అన్నమయ్య విగ్రహానికి శాంటా క్లాజ్ టోపీ పెట్టిన ఘటన చోటుచేసుకుంది.

ఈ ఘటన పైన హిందూ సంఘాలు, స్వామీజీలు, బజరంగ్ దళ్ కార్యకర్తలు తీవ్ర ఆందోళనకు దిగి తిరుమల శ్రీవారి పరమ భక్తుడైన అన్నమయ్య విగ్రహానికి ఇలా శాంటా క్లాస్ టోపీ పెట్టి అపచారం చేసిన వ్యక్తిపై చర్యలు తీసుకోవాలని వారు డిమాండ్ చేశారు ఇక దీంతో రంగంలోకి దిగిన పోలీసులు అసలు అక్కడ ఏం జరిగింది అన్నది సిసిటివి ఫుటేజ్ ను పరిశీలించారు.

ఇక సీసీటీవీ ఫుటేజ్ లో ఆసక్తికర విషయాలు బయటకు వచ్చాయి. తిరుపతి ఈస్ట్ పోలీసులు సీసీటీవీ ఫుటేజ్ ను పరిశీలించగా అన్నమయ్య విగ్రహానికి శాంటా క్లాజ్ టోపీ ఒక వ్యక్తి పెట్టినట్టుగా గుర్తించారు. ఆ వ్యక్తి కూడళ్లలో పెన్నులు విక్రయిస్తూ ఉంటాడని గుర్తించిన పోలీసులు అతనిని అదుపులోకి తీసుకొని చర్యలు తీసుకుంటామని పేర్కొన్నారు.

అయితే అతడు తెలిసీ తెలియక శాంటా క్లాజ్ టోపీ అన్నమయ్యకు పెట్టాడా లేక శాంటా క్లాజ్ టోపీ పెట్టడానికి ఎవరైనా అతనిని ప్రోత్సహించారా అన్న కోణంలో కూడా పోలీసులు ఆరా తీస్తున్నారు. ఈ విషయంలో ఎవరు ఎటువంటి అపోహలు పెట్టుకోవద్దని ఇదే సమయంలో సంయమనం పాటించాలని కూడా పోలీసులు సూచించారు.

అయితే ఆ వ్యక్తి తెలియకుండా చేశాడా? ఆకతాయితనంగా చేశాడా? లేక మతవిద్వేషాలు రెచ్చగొట్టడానికి ఎవరైనా చెబితే చేశాడా? అన్న కోణంలో కూడా పోలీసులు విచారణ సాగిస్తున్నారు. క్రైస్తవుల పండుగ అయిన క్రిస్మస్ పండుగకు ముందు రోజు జరిగిన ఈ ఘటన నేపథ్యంలో మత విద్వేషాలు రగలకుండా తిరుపతిలో పోలీసులు చర్యలు తీసుకున్నారు. ఈ క్రమంలోనే సీసీటీవీ ఫుటేజ్ ను పరిశీలించగా అసలు ఏం జరిగింది అనేది వెలుగులోకి వచ్చింది.

అమెరికాలో ఇక‌ వారికి మరణశిక్షే
డోనాల్డ్ ట్రంప్ పేరువిన‌గానే మ‌న‌కు గుర్తుకు వ‌చ్చేది.. ఆయ‌న ముక్కుసూటిత‌నం. గ‌తంలో అమెరికా ప్రెసిడెంట్‌గా ఉన్నప్పుడు క‌ఠిన నిర్ణయాలు తీసుకున్న విష‌యం మ‌న‌కు తెలిసిందే. అమెరికా-మెక్సికో బార్డర్ అక్రమ వ‌ల‌స‌దారులు (illegal immigrants) ఉగ్రవాదానికి వ్యతిరేకం వంటి అనేక క్లిష్టమైన స‌మ‌స్యల‌ను ఒక్క మీటింగ్‌లో ముగించేస్తారు. 2020లో జ‌రిగిన అమెరికా అధ్యక్ష ఎన్నిక‌ల్లో ఆయ‌న ఓడిపోయిన‌ప్పటికీ.. ఈ ఏడాది న‌వంబ‌ర్‌లో జ‌రిగిన ఎన్నిక‌ల్లో మ‌ళ్లీ పోటీ చేసి, బంప‌ర్ మెజారిటీతో రెండోసారి అధ్యక్షుడు అయ్యారు.

అమెరికాలో మ‌ర‌ణ‌శిక్షకు గురైన 40 మంది ఖైదీల‌కు పెరోల్ లేకుండానే జీవిత ఖైదుగా మారుస్తున్నట్లు ప్రస్తుత అధ్యక్షుడు జో బైడ‌న్ ప్రక‌టించారు. ఈ అంశంపై డోనాల్డ్ ట్రంప్ స్పందించారు. తాను ప్రెసిటెండ్‌గా బాధ్యతలు స్వీక‌రించిన వెంట‌నే రేపిస్టుల‌క తీవ్రమైన నేరాల‌కూ పాల్పడే వారికి మ‌ర‌ణ‌శిక్ష విధిస్తాన‌ని అన్నారు. అమెరికాలోని కుటుంబాలనూ పిల్లల‌నూ ఇలాంటి నేర‌స్తుల నుంచి కాపాడ‌టానికి మ‌ర‌ణ‌శిక్షను క‌ఠినంగా అమ‌లు చేసేలా న్యాయ శాఖ‌ను ఆదేశిస్తాన‌ని తెలిపారు. కాగా, 2025 జనవరి 20వ తేదీన‌ ట్రంప్ అమెరికా అధ్యక్షుడిగా బాధ్యతలు చేపట్టబోతున్నారు.

అంతరిక్షంలో భారీ రిజర్వాయర్‌ గుర్తించిన జెట్‌ ప్రొపల్షన్‌ ల్యాబ్‌
అంతరిక్షంలో పెద్ద పరిమాణంలో ఉన్న రిజర్వాయర్‌ను శాస్త్రవేత్తలు గుర్తించారు. దాని పరిమాణం భూమిపైనున్న మహాసముద్రాలకంటే 140 ట్రిలియన్‌ రెట్లు పెద్దగా ఉంటుంది. ఇది ఓ సూపర్‌ మాసివ్‌ బ్లాక్‌ హోల్‌కు దగ్గరలో ఉంది.

అంతరిక్షంలో పెద్ద పరిమాణంలో ఉన్న రిజర్వాయర్‌ను శాస్త్రవేత్తలు గుర్తించారు. దాని పరిమాణం భూమిపైనున్న మహాసముద్రాలకంటే 140 ట్రిలియన్‌ రెట్లు పెద్దగా ఉంటుంది. ఇది ఓ సూపర్‌ మాసివ్‌ బ్లాక్‌ హోల్‌కు దగ్గరలో ఉంది. మన సూర్యుడి కంటే దాదాపు 20 బిలియన్లు పెద్దది. కాలిఫోర్నియాలోని పసాదేనాలోని నాసాకు చెందిన జెట్‌ ప్రొపల్షన్‌ లాబోరేటరీ శాస్త్రవేత్తల బృందం దాన్ని గురించింది. ప్రస్తుతం ఈ రిజర్వాయర్‌ భూమికి 12 బిలియన్‌ కాంతి సంవత్సరాల దూరంలో ఉన్నది. విశ్వం ఆవిర్భవించిన కొద్ది కాలానికే ఇక్కడ నీరు ఉన్నట్లు శాస్త్రవేత్తలు అంచనా వేస్తున్నారు. క్వాసర్‌ అనే బ్లాక్‌హోల్‌ చుట్టూ ఉన్నది. ఇది వేల ట్రిలియన్‌ సూర్యులకు సమానమైన శక్తిని విడుదల చేస్తుంది. ఇది విశ్వంలో ఇప్పటివరకు గుర్తించిన అతిపెద్ద నీటి రిజర్వాయర్‌ ఇదే. శాస్త్రవేత్తలు క్వాసార్ చుట్టూ ఉన్న వాతావరణంలో నీటి ఆవిరిని గుర్తించారు. ఆ ఆవిరి వందల కాంతి సంవత్సరాల వరకు విస్తరించి ఉంది. ఒక కాంతి సంవత్సరం ఆరు ట్రిలియన్‌ మైళ్లకు సమానం.

అల్లు అర్జున్ టీం రూ 2 కోట్ల ఆర్దిక సాయం
సంధ్యా థియేటర్ తొక్కిసలాటలో మరణించిన రేవతి కుటుంబానికి పుష్ఫ -2 టీం ఆర్దిక సాయం ప్రకటించింది. ఆస్పత్రిలో చికిత్స పొందుతున్న శ్రీతేజ్ ను అల్లు అరవింద్ .. దిల్ రాజుతో కలిసి పరామర్శించారు. శ్రీతేజ్ పరిస్థితి ఇంకా విషమంగానే ఉందని వెల్లడించారు. ఈ క్రమంలోనే పుష్ప తొక్కిసలాటలో మరణించిన రేవతి కుటుంబానికి మూవీ టీం రూ.2 కోట్ల పరిహారం ప్రకటించారు. హీరో అల్లు అర్జున్ తో పాటుగా సుకుమార్, మైత్రీ మూవీ మేకర్స్ కలిసి ఈ మొత్తం సాయంగా ఇవ్వాలని నిర్ణయించారు. సీఎం రేవంత్ తోనూ సమావేశం కానున్నట్లు దిల్ రాజు వెల్లడించారు.

పుష్ప -2 ప్రీమియర్ షో వేళ సంధ్యా థియేటర్ వద్ద జరిగిన తొక్కిసలాట లో మరణించిన రేవతి కుటుంబానికి సినిమా టీం రూ 2 కోట్ల ఆర్దిక సాయం ప్రకటించింది. ఇప్పటికే అల్లు అర్జున్ రేవతి కుటుంబానికి మద్దతుగా నిలుస్తామని వెల్లడించారు. ఆస్పత్రిలో చికిత్స పొందుతున్న శ్రీతేజ్ చికిత్స చూసుకుంటామని హామీ ఇచ్చారు. గతంలో అల్లు అర్జున్ రూ 25 లక్షల సాయం ప్రకటించారు. కాగా, అల్లు అరవింద్ ఇప్పుడు దిల్ రాజుతో కలిసి ఆస్పత్రిలో చికిత్స పొందుతున్న శ్రీతేజ్ ను పరామర్శించారు. శ్రీతేజ్ ఆరోగ్య పరిస్థితి పై వైద్యులతో మాట్లాడారు. శ్రీతేజ్ ఆరోగ్యం ఇంకా విషమంగానే ఉందని.. కానీ, క్రమేణా కోలుకుంటున్నారని వైద్యులు వెల్లడించారు.

ఇప్పటికే మంత్రి కోమటిరెడ్డి వెంకటరెడ్డి రూ 25 లక్షల సాయం అందించారు. ఇక, ఇప్పుడు అల్లు అరవింద్ ఆస్పత్రికి వచ్చి పుష్ఫ -2 టీం నుంచి రూ 2 కోట్లు బాధిత కుటుంబానికి ఇస్తున్న ట్లు వెల్లడించారు. ప్రకటించిన ఆర్దిక సాయం లో అల్లు అర్జున్ రూ. కోటి, సుకుమార్ రూ.50 లక్షలు, మైత్రి మూవీ మేకర్స్ రూ.50 లక్షలు ఇస్తున్నట్లు వివరించారు. సుకుమార్ ఇప్పటికే ఆస్పత్రిలో చికిత్స పొందుతున్న బాలుడిని పరామర్శించారు. బాలుడి తండ్రి సైతం తమకు అందిన సాయం గురించి వివరించారు. బాలుడు కోలుకోవాలని కోరుకుంటున్నట్లు అల్లు అరవింద్ ఆకాంక్షించారు. ఇటు, దిల్ రాజు ఈ వివాదానికి ముగింపు పలికేందుకు ప్రయత్నాలు ప్రారంభించారు.

అందులో భాగంగా త్వరలోనే సీఎం రేవంత్ ను సినీ పెద్దలు కలిసేందుకు ప్రయత్నాలు చేస్తున్నామని చెప్పుకొచ్చారు. శ్రీతేజ్ తండ్రికి సినీ ఇండస్ట్రీలో ఉపాధి కల్పిస్తామని ఇప్పటికే దిల్ రాజు హామీ ఇచ్చారు. ప్రస్తుతం కొనసాగుతున్న వివాదం పైన సినీ పెద్దలు ముఖ్యమంత్రితో చర్చించనున్నారు. రేపు (గురువారం) ఉదయం 10 గంటలకు సీఎం రేవంత్ తో సినీ పరిశ్రమ పెద్దలు సమావేశం కానున్నారు. ఈ సమావేశంలో జరిగిన ఘటన పైన చర్చతో పాటుగా ప్రభుత్వం ప్రకటించిన బెనిఫిట్ షో రద్దు .. టికెట్ ధరల పెంపు ఉండదనే నిర్ణయం పైనా చర్చకు వచ్చే అవకాశం కనిపిస్తోంది. దీంతో, సీఎం రేవంత్ స్పందన కీలకంగా మారనుంది.

ఏపీ నుంచి అయోధ్యకు వందేభారత్ స్లీపర్ - రూట్ షెడ్యూల్
ఏపీ నుంచి వందే భారత్ స్లీపర్ రైలు ప్రారంభం కానుంది. మరి కొద్ది రోజుల్లోనే వందేభారత్ స్లీపర్ రైళ్లు పట్టాలెక్కనున్నాయి. ఇప్పటికే దేశ వ్యాప్తంగా ఈ రైళ్ల కోసం భారీగా డిమాండ్ ఉంది. ఇక, ఏపీ నుంచి ఇప్పటికే మూడు వందేభారత్ స్లీపర్ రైళ్ల కోసం ఎంపీలు రైల్వే శాఖకు ప్రతిపాదించారు. వీటి పైన అధ్యయనం కొనసాగుతుండగానే.. తాజాగా ఏపీ నుంచి అయోధ్యకు వందేభారత్ స్లీపర్ కేటాయించాలనే ఏపీ ముఖ్యుల సూచన మేరకు రైల్వే శాఖ అంగీకరించినట్లు తెలుస్తోంది. ఈ మేరకు కసరత్తు కొనసాగుతోంది.

తెలుగు రాష్ట్రాల్లో వందేభారత్ రైళ్లకు ఆదరణ పెరుగుతోంది. విశాఖ - సికింద్రాబాద్, కాచిగూడ - యశ్వంత్ పూర్, విజయవాడ - చెన్నై, సికింద్రాబాద్ - తిరుపతి వందేభారత్ రైళ్లను ఆశించిన స్థాయిలో ఆక్యెపెన్సీ ఉందని రైల్వే అధికారులు చెబుతున్నారు. ఇక, ఏపీ నుంచి దూరపు ప్రాంతా లకు చేరుకునేందుకు వందేభారత్ స్లీపర్ రైళ్ల కేటాయింపు పైన తెలుగు రాష్ట్రాల ఎంపీల నుంచి రైల్వే శాఖకు పలు ప్రతిపాదనలు అందాయి. అందులో భాగంగా విశాఖ నుంచి తిరుపతి, విశాఖ నుంచి బెంగళూరు కు వందేభారత్ స్లీపర్ కేటాయించాలని ఇప్పటికే ఎంపీలు నేరుగా రైల్వే మంత్రిని కలిసి వితని పత్రాలు సమర్పించారు.

విజయవాడ నుంచి బెంగళూరుకు వందేభారత్ ఏర్పాటు పైన అధ్యయనం కొనసాగుతోంది. విజయవాడ నుంచి చెన్నైకు ప్రస్తుతం వందేభారత్ కొనసాగుతోంది. బెంగళూరుకు ఏర్పాటు చేయటం ద్వారా ప్రయోజన కరంగా ఉంటుందనే వినతులు రైల్వే బోర్డుకు చేరాయి. అయితే, వందే భారత్ స్లీపర్ కోసం దేశ వ్యాప్తంగా వస్తున్న డిమాండ్ ను పరిగణలోకి తీసుకొని కేటాయింపు లు చేయాలని రైల్వే శాఖ భావిస్తోంది. కానీ, ఇదే సమయంలో ఏపీ నుంచి అయోధ్య, వారణాసి కి వందేభారత్ స్లీపర్ కేటాయింపులో తొలి ప్రాధాన్యత ఇవ్వాలని రైల్వే మంత్రిని ఏపీకి చెందిన ప్రజా ప్రతినిధులు కోరారు. దీని ద్వారా ఏపీ నుంచి రెగ్యులర్ రైళ్లల్లో అయోధ్య, వారణాసి వెళ్లే వారికి ప్రయోజన కరంగా ఉంటుందని వివరించారు.

ఈ ప్రతిపాదనకు ప్రయార్టీ ఇస్తామని రైల్వే శాఖ హామీ ఇచ్చినట్లు సమాచారం. దీంతో, వందేభారత్ స్లీపర్ రైళ్లు పట్లాలెక్కిన తరువాత విజయవాడ నుంచి అయోధ్య, వారణాసి కి కేటాయింపు పైన తొలి రెండు విడతల్లోనే ప్రకటన ఉంటుందని కూటమి ముఖ్య నేతలు చెబుతున్నారు. ఇక, వచ్చే నెలలో ప్రారంభమయ్యే కుంభమేళా కోసం ప్రత్యేక రైళ్లను సైతం ప్రకటిస్తున్నారు. విజయవాడ నుంచి వరంగల్ మీదుగా ప్రస్తుతం రెగ్యులర్ రైళ్లు ప్రయాణించే మార్గంలోనే వందేభారత్ స్లీపర్ ను అయోధ్య కు కేటాయించేలా నిర్ణయం ఉంటుందని తెలుస్తోంది. రాత్రి సమయంలోనే ఈ రైలు ఉండేలా కసరత్తు చేస్తున్నట్లు సమాచారం. ఈ రైలు అందుబాటులోకి వస్తే అయోధ్య, వారణాసి వెళ్లాలనుకునే తెలుగు ప్రజలకు వరంగానే భావించాలి.

కుప్పకూలిన విమానం లోపల 72 మంది ప్రయాణికులు
కొన్ని ప్రమాదాలు మిగిల్చే విషాదం అంతా ఇంతా కాదు. వాటి వల్ల అయిన వాళ్లను కోల్పోయి ఎంతో మంది రోడ్డున పడతారు. సొంతవాళ్లు తిరిగి రారనే నిజం తెలిసి ప్రతి క్షణం ఎంతో బాధను అనుభవిస్తుంటారు.

కొన్ని ప్రమాదాలు మిగిల్చే విషాదం అంతా ఇంతా కాదు. వాటి వల్ల అయిన వాళ్లను కోల్పోయి ఎంతో మంది రోడ్డున పడతారు. సొంతవాళ్లు తిరిగి రారనే నిజం తెలిసి ప్రతి క్షణం ఎంతో బాధను అనుభవిస్తుంటారు. అలాంటి తీవ్ర ఘటన కజకిస్థాన్‌లో చోటుచేసుకుంది. అక్కడ ఘోర ప్రమాదం జరిగింది. అజర్‌బైజాన్‌ ఎయిర్‌లైన్స్‌కు చెందిన ఒక ప్యాసింజర్ ఫ్లైట్ అక్టౌ దగ్గర్లో కుప్పకూలింది. ఈ ఘటనలో పలువురు ప్రాణాలు విడిచారని సమాచారం. విమానం కుప్పకూలిన టైమ్‌లో అందులో దాదాపుగా 72 మంది ఉన్నట్లు తెలుస్తోంది.

అజర్‌బైజాన్‌లోని బాకు నుంచి బయల్దేరిన ప్యాసింజర్ ఫ్టైల్ రష్యా రిపబ్లిక్ చెచెన్యా రాజధాని గ్రోజ్నీ వైపు వెళ్తోంది. ఆ సమయంలో దట్టమైన పొగమంచు ఏర్పడటంతో గ్రోజ్నీ నుంచి దానిని దారి మళ్లించారు. ఈ క్రమంలోనే అక్టౌ విమానాశ్రయంలో ఎమర్జెన్సీ ల్యాండింగ్‌కు ప్రయత్నించారు. కానీ ప్రమాదవశాత్తూ ఎయిర్‌పోర్ట్‌కు సమీపంలో విమానం కూలిపోయింది. ఈ ఘటనకు ముందు ఎయిర్‌పోర్ట్‌ మీద ఫ్లైట్ పలుమార్లు గిరగిరా తిరిగి, కింద పడిపోయిందని సమాచారం. ఒక్కసారిగా విమానం నేలకూలడంతో భారీగా మంటలు చెలరేగాయి.

ఫార్ములా ఈ-రేస్ కేసులో ఐఏఎస్ అధికారి దాన కిషోర్ వాంగ్మూలం నమోదు
7 గంటలపాటు ప్రశ్నించిన అధికారులు

స్టేట్‌మెంట్ రికార్డు చేసిన ఏసీబీ

వివరాల ఆధారంగా కేటీఆర్ అర్వింద్ కుమార్‌లకు నోటీసులు

తెలంగాణలో రాజకీయ ప్రకంపనలు రేపుతున్న ఫార్ములా ఈ-రేస్ కేసులో ఆసక్తికరమైన పరిణామం చోటుచేసుకుంది. ఫిర్యాదుదారుడైన ఐఏఎస్ అధికారి దాన కిషోర్‌ను ఏసీబీ అధికారులు విచారించారు. సుమారు 7 గంటల పాటు ప్రశ్నించి ఆయన వాంగ్మూలాన్ని నమోదు చేశారు. 

దాన కిశోర్ నుంచి కొన్ని కీలకమైన డాక్యుమెంట్లను కూడా అధికారులు స్వాధీనం చేసుకున్నట్టుగా కథనాలు వెలువడుతున్నాయి. ఆయన చెప్పిన వివరాల ఆధారంగా ఏసీబీ అధికారులు కేసు విచారణ చేపట్టనున్నారు. నిందితులుగా ఉన్న మాజీ మంత్రి కేటీఆర్, ఐఏఎస్ అధికారి అరవింద్ కుమార్‌లకు నోటీసులు ఇవ్వనున్నారు. ఫార్ములా ఈ-రేస్‌ కేసుకు సంబంధించి ఇప్పటికే ప్రభుత్వానికి దానకిషోర్ వివరాలు సమర్పించిన విషయం తెలిసిందే. నాటి పురపాలక శాఖ మంత్రి కేటీఆర్‌ ఆదేశాల మేరకే హెచ్‌ఎండీఏ నుంచి నిధులు బదిలీ అయినట్టు ప్రభుత్వానికి వెల్లడించారు.

కాగా ఫార్ములా-ఈ రేస్ కేసులో ఏ1గా కేటీఆర్‌ ఏ2గా ఐఏఎస్‌ అర్వింద్‌కుమార్‌ ఏ3గా హెచ్‌ఎండీఏ చీఫ్‌ ఇంజినీర్‌ బీఎల్‌ఎన్‌ రెడ్డి ఉన్నారు.

సికింద్రాబాద్‌-ముజాఫర్‌పూర్‌ మధ్య వీక్లీ స్పెషల్స్‌ రైలు
సికింద్రాబాద్‌-ముజాఫర్‌పూర్‌(Secunderabad-Muzaffarpur) మార్గంలో జనవరి 7నుంచి తదుపరి ఉత్తర్వులు ఇచ్చే వరకు(కొద్దిరోజులు మినహా)వీక్లీ స్పెషల్‌ రైళ్లు నడుపుతున్నట్లు దక్షిణమధ్యరైల్వే ప్రకటించింది.

సికింద్రాబాద్‌-ముజాఫర్‌పూర్‌(Secunderabad-Muzaffarpur) మార్గంలో జనవరి 7నుంచి తదుపరి ఉత్తర్వులు ఇచ్చే వరకు(కొద్దిరోజులు మినహా)వీక్లీ స్పెషల్‌ రైళ్లు నడుపుతున్నట్లు దక్షిణమధ్యరైల్వే ప్రకటించింది. ముజాఫర్‌పూర్‌ నుంచి సికింద్రాబాద్‌(Muzaffarpur to Secunderabad)కు జనవరి 7 నుంచి ప్రతీ బుధవారం, సికింద్రాబాద్‌ నుంచి ముజాఫర్‌పూర్‌కు ఈనెల 9 నుంచి ప్రతీ శుక్రవారం రైళ్లు నడుస్తాయని సీపీఆర్‌ఓ శ్రీధర్‌ తెలిపారు.

జనవరి 14 నుంచి ఫిబ్రవరి 27 మధ్య మాత్రమే ఈ ప్రత్యేక రైళ్లు ప్రయాణీకులకు అందుబాటులో ఉండవని వెల్లడించారు. కాగా మార్గమధ్యలో ఖాజీపేట్‌ పెద్దపల్లి రామగుండం బెల్లంపల్లి కాగజ్‌నగర్‌(Khajipet, Peddapalli, Ramagundam, Bellampalli, Kagaznagar) బలార్ష నాగ్‌పూర్‌ ఇటార్సి నర్సింగపూర్‌ జబల్‌పూర్‌ ఉపాధ్యాయ ధనపూర్‌ తదితర స్టేషన్లలో ప్రత్యేక రైళ్లకు హాల్ట్‌ కల్పించినట్లు సీపీఆర్‌వో పేర్కొన్నారు.

క్రిస్మస్ శుభాకాంక్షలు తెలిపిన వైఎస్ జగన్
క్రిస్మస్‌ పర్వదినం పురస్కరించుకుని  క్రెస్తవులందరికీ వైఎస్సార్‌సీపీ అధినేత మాజీ సీఎం వైఎస్‌ జగన్‌మోహన్‌ రెడ్డి క్రిస్మస్‌ శుభాకాంక్షలు తెలియజేశారు. ఈ మేరకు ఆయన ఓ ప్రకటన విడుదల చేశారు.

 కరుణ ప్రేమ క్షమ సహనం దాతృత్వం త్యాగం.. ఇవన్నీ తన జీవితం ద్వారా మానవాళికి క్రీస్తు అందించిన మహోన్నత సందేశాలు. తద్వారా మానవాళిని సత్యపథం వైపు నడిపించేలా ఏసుక్రీస్తు మార్గనిర్దేశం చేశారు…. దుర్మార్గం నుంచి సన్మార్గానికి అమానుషత్వం నుంచి మానవత్వానికి చెడు నుంచి మంచికి దురాశ నుంచి దాతృత్వం, త్యాగాలకు జీసస్‌ బాటలు వేశారు. క్రీస్తు బోధనలు మనుషులందరినీ ఎప్పటికీ సన్మార్గంలో నడిపిస్తాయి అని తన క్రిస్మస్‌ సందేశంలో వైఎస్‌ జగన్‌ పేర్కొన్నారు. ప్రస్తుతం వైఎస్సార్‌ జిల్లా పర్యటనలో ఉన్న జగన్‌.. ఈరోజు ఇడుపులపాయలో నిర్వహించిన క్రిస్మస్‌ ప్రత్యేక ప్రార్థనల్లో కుటుంబ సభ్యులతో కలిసి పాల్గొన్నారు.