నాంపల్లి కోర్టుకు అల్లు అర్జున్
సంధ్య థియేటర్ ఘటనలో అల్లు అర్జున్‌కు న్యాయస్థానం విధించిన 14 రోజుల రిమాండ్ ఈరోజుతో పూర్తి కాగా.. వ్యక్తిగతంగా విచారణకు ఆయన నాంపల్లి కోర్టులో హాజరవుతున్నారు. ఇదే కేసులో అల్లు అర్జున్‌కు హైకోర్టు మధ్యంతర బెయిల్ ఇచ్చిన విషయం తెలిసిందే. ఈ రోజు నాంపల్లి కోర్టులో హైకోర్టు బెయిల్ మంజూరు చేసిన విషయాన్ని ఆయన తెలపనున్నారు.

సంధ్య థియేటర్ (Sandhya Theatre) ఘటనలో పాన్ ఇండియా స్టార్ అల్లు అర్జున్‌ (Hero Allu Arjun) శుక్రవారం నాంపల్లి కోర్టు (Nampalli Court)కు వెళ్లనున్నారు. గతంలో బెయిల్ రిజెక్ట్ అయిన కేసుకు సంబంధించి కోర్టుకు వెళుతున్నారు. మరోవైపు అల్లు అర్జున్‌కు న్యాయస్థానం విధించిన 14 రోజుల రిమాండ్ ఈరోజుతో పూర్తి కాగా.. వ్యక్తిగతంగా విచారణకు ఆయన హాజరవుతున్నారు. ఇదే కేసులో అల్లు అర్జున్‌కు కోర్టు మధ్యంతర బెయిల్ ఇచ్చిన విషయం తెలిసిందే. ఈ రోజు నాంపల్లి కోర్టులో హైకోర్టు బెయిల్ మంజూరు చేసిన విషయాన్ని ఆయన తెలపనున్నారు. కాగా టాలీవుడ్ హీరో అల్లు అర్జున్‌ను చిక్కడపల్లి పోలీసులు ఈనెల 13వ తేదీ (శుక్రవారం) అరెస్ట్ చేశారు. అల్లు అర్జున్ నటించిన పుష్పా -2 సినిమా చూసేందుకు వచ్చి అక్కడ జరిగిన తొక్కిసలాటలో ఓ మహిళ మృతిచెందిన ఘటన తెలుగు రాష్ట్రాల్లో తీవ్ర కలకలం రేపింది. ఈ ఘటనలో ఇప్పటికే ముగ్గురిని అరెస్ట్ చేసిన విషయం తెలిసిందే. సంధ్యా థియేటర్ యజమానితోపాటు మేనేజర్‌ను అరెస్టు చేశారు. సరైన భద్రతా చర్యలు చేపట్టని సెక్యూరిటీ మేనేజర్‌ను కూడా అరెస్టు చేశారు. ముగ్గురిని అరెస్టు చేసి చిక్కడపల్లి పోలీసులు రిమాండ్‌కు పంపించారు. ఈ ఘటనపై పోలీసులు సంచలన విషయాలు మీడియా ముందుకు తెచ్చిన విషయం తెలిసిందే.

పుష్ప-2 ప్రీమియర్‌ షో సందర్భంగా సంధ్య థియేటర్‌ తొక్కిసలాట కేసులో నిందితుడు, సినీ హీరో అల్లు అర్జున్‌కు తెలంగాణ హైకోర్టు నాలుగు వారాల మధ్యంతర బెయిల్‌ ప్రసాదించింది. ఈ కేసులో ఆయన అరెస్టయి జైలుకు వెళ్లిన కొద్ది గంటల్లోనే బెయిలు లభించింది. అలాగే ఈ ఘటనలో అరెస్టు అయిన ముగ్గురికి బెయిల్ ఇచ్చింది. సంధ్య థియేటర్‌ తొక్కిసలాట సంఘటనలో రేవతి అనే మహిళ మృతి చెందగా, ఆమె కుమారుడు తీవ్ర గాయాలపాలై ఆస్పత్రిలో చికిత్స పొందుతున్నారు. హత్య చేసే ఉద్దేశంతో దాడి చేయడం, ఉద్దేశ పూర్వకంగా పదునైన ఆయుధాలతో దాడి చేయడం వంటి సెక్షన్లు ప్రస్తుత కేసుకు వర్తించవని హైకోర్టు పేర్కొంది. నిర్లక్ష్యం వల్ల మరణం జరిగిందనుకున్నా ఆ నేరానికి పడే గరిష్ఠ శిక్ష ఐదేళ్లే కాబట్టి బెయిల్‌కు పిటిషనర్‌ అల్లు అర్జున్‌ అర్హుడని పేర్కొంది. ఏడేళ్లలోపు జైలుశిక్ష పడే కేసుల్లో అరెస్ట్‌ అవసరం లేదు కాబట్టి.. ఇది బెయిలబుల్‌ కేసేనని జస్టిస్‌ జువ్వాడి శ్రీదేవి ధర్మాసనం పేర్కొంది.

ప్రభుత్వ భూముల రిజిస్ట్రేషన్‌కు చెక్‌
ప్రభుత్వ భూములు అన్యాక్రాంతం కాకుండా రిజిస్ట్రేషన్ల శాఖ మరో కీలక నిర్ణయం తీసుకుంది.

ప్రభుత్వ భూములు అన్యాక్రాంతం కాకుండా రిజిస్ట్రేషన్ల శాఖ మరో కీలక నిర్ణయం తీసుకుంది. ఎటువంటి ప్రభుత్వ భూమి అయినా సరే, గతంలో వాటిపై ఎన్ని లావాదేవీలు జరిగినా సరే...ఇప్పుడు మళ్లీ వాటిని విక్రయించాలంటే తప్పనిసరిగా జిల్లా రిజిస్ట్రార్‌ ఆమోదం తీసుకునేలా నిబంధనలు మార్చింది. ఈ మేరకు ఆ శాఖ సాఫ్ట్‌వేర్‌లో మార్పులు కూడా చేసింది.

జిల్లాల అధికారులు గతంలో అందించిన ప్రభుత్వ భూముల జాబితాలు 22-ఏ, 22-ఏ-1-సి (దేవదాయ శాఖ) ప్రకారం సిస్టమ్‌లో అప్‌లోడ్‌ చేసింది. వాటికి సంబంధించి ఇప్పుడు ఎవరైనా రిజిస్ట్రేషన్‌కు వెళితే...దానిని సిస్టమ్‌ తిరస్కరిస్తోంది. ‘జిల్లా రిజిస్ట్రార్‌ అనుమతి అవసరం’ అని సూచిస్తోంది. దాంతో కక్షిదారులు జిల్లా రిజిస్ట్రార్‌ కార్యాలయాలకు వెళ్లాల్సి వస్తోంది. ఈ తంతు గత నాలుగు రోజులుగా నడుస్తోంది. అయితే ఇటువంటి వాటి విషయంలో ఎలా వ్యవహరించాలో రాష్ట్ర కార్యాలయం నుంచి ఇంకా మార్గదర్శకాలు రాలేదు.

జనవరి ఒకటో తేదీ నుంచి భూముల విలువలు పెరుగుతున్నాయి. ఈ నాలుగు రోజుల్లో రిజిస్ట్రేషన్లు జరగకపోతే ఆ తరువాత స్టాంపు డ్యూటీ కింద ఎక్కువ మొత్తం కట్టాల్సి వస్తుంది. అందుకని కక్షిదారులు ఆందోళన చెందుతున్నారు. ఇంతకుముందు ఇలాంటి డాక్యుమెంట్లు వస్తే స్థానిక సబ్‌ రిజిస్ట్రార్‌ కక్షిదారులు సమర్పించిన ప్రభుత్వ ఉత్తర్వులు, పత్రాలు చూసి సంతృప్తి చెందితే రిజిస్ట్రేషన్‌ చేసేవారు. ఇప్పుడు ఆ అధికారం జిల్లా రిజిస్ట్రార్‌కు మాత్రమే ఇచ్చారు.

విశాఖ జిల్లా వరకు చూసుకుంటే వీఎంఆర్‌డీఏ ఇంటి స్థలాలు, ఫ్లాట్లు విక్రయిస్తోంది. ఈ భూములన్నీ 22-ఏలోనే ఉంటాయి. వీఎంఆర్‌డీఏ డాక్యుమెంట్లు రిజిస్ట్రేషన్‌కు పెడితే సబ్‌ రిజిస్ట్రార్లు అభ్యంతరాలు చెప్పేవారు కాదు. అలా అప్పట్లో వీఎంఆర్‌డీఏ వద్ద కొనుక్కొని ఇప్పుడు ఎవరైనా వాటిని తిరిగి అమ్మాలనుకుంటే...అవి కూడా 22-ఏలో కనిపిస్తున్నాయి. వాటికి కూడా జిల్లా రిజిస్ట్రార్‌ అనుమతి అవసరం అని చూపిస్తోంది. అదేవిధంగా అర్బన్‌ ల్యాండ్‌ సీలింగ్‌ భూములు కూడా 22-ఏలో ఉన్నాయి. ప్రభుత్వానికి డబ్బులు చెల్లించి వాటిని తిరిగి కొనుక్కున్న వారికి కూడా ఇప్పుడు రిజిస్ట్రేషన్లు జరగడం లేదు.

అయితే గత వైసీపీ ప్రభుత్వం జగనన్న కాలనీల పేరుతో పేదలకు ‘సెంటు భూమి’ ఇచ్చింది. వారి ఆర్థిక అవసరాలకు ఆ భూమిని ఎప్పుడైనా అమ్ముకునే వెసులుబాటు కల్పించింది. దానిని ఆసరాగా చేసుకొని వైసీపీ నేతలు చాలామంది లబ్ధిదారుల పేరిట రిజిస్టర్‌ అయిన భూములను నెల రోజులకే, కొందరైతే మరుసటిరోజే తమ బినామీల పేరు మీద రిజిస్ట్రేషన్‌ చేయించుకున్నారు. ఇప్పుడు కూటమి ప్రభుత్వం వాటిపై ఆరా తీస్తుండడంతో వాటిని ఏదో ఒక రేటుకు అమ్మేసి బయటపడాలని యత్నిస్తున్నారు. ఇలాంటి తప్పుడు రిజిస్ట్రేషన్లు ఆపడానికే ప్రభుత్వం ‘జిల్లా రిజిస్ట్రార్‌ అనుమతి’ అవసరం అనే నిబంధన విధించింది. జగనన్న కాలనీలు కూడా 22-ఏలోనే ఉన్నాయి. వాటిని పరిశీలించి, నిజమైన లబ్ధిదారులు అమ్ముతున్నారా?, బినామీలు అమ్ముతున్నారా?...అనేది పరిశీలించడానికి ప్రభుత్వం ఈ నిర్ణయం తీసుకుంది. అయితే ఈ క్రమంలో ప్రభుత్వ సంస్థల నుంచి భారీగా డబ్బులు పెట్టి ప్లాట్లు కొన్నవారు ఇబ్బంది పడుతున్నారు. దీనిపై వెంటనే రాష్ట్ర అధికారులు మార్గదర్శకాలు జారీచేయాల్సి ఉంది.

నేడు సెల‌వు ప్ర‌క‌టించిన తెలంగాణ ప్ర‌భుత్వం
విద్యాసంస్థ‌లు, ప్ర‌భుత్వ కార్యాల‌యాల‌కు ఈరోజు సెల‌వు

ఈ మేర‌కు ఉత్త‌ర్వులు జారీ చేసిన సీఎస్ శాంతి కుమారి

అలాగే వారం రోజుల‌పాటు రాష్ట్ర‌వ్యాప్తంగా సంతాప దినాలు

భారత మాజీ ప్రధాని మన్మోహన్ సింగ్ అస్తమయం చెందారు. తీవ్ర అనారోగ్యంతో గురువారం రాత్రి ఢిల్లీలోని ఎయిమ్స్ లో తుది శ్వాస విడిచారు. మన్మోహన్ మృతి నేపథ్యంలో తెలంగాణ ప్ర‌భుత్వం విద్యాసంస్థ‌లు, ప్ర‌భుత్వ కార్యాల‌యాల‌కు ఈరోజు సెల‌వు ప్ర‌క‌టించింది. ఈ మేర‌కు ప్ర‌భుత్వ ప్ర‌ధాన కార్య‌ద‌ర్శి శాంతి కుమారి గురువారం రాత్రి ఉత్త‌ర్వులు జారీ చేశారు. అలాగే వారం రోజుల‌పాటు రాష్ట్ర‌వ్యాప్తంగా సంతాప దినాలు పాటించాల‌ని సీఎస్ ఉత్త‌ర్వుల్లో పేర్కొన్నారు.

మ‌రోవైపు కేంద్ర ప్రభుత్వం కూడా వారం రోజులు సంతాప దినాలుగా ప్రకటించిన విష‌యం తెలిసిందే. ఇవాళ్టి (డిసెంబరు 27) ప్రభుత్వ కార్యక్రమాలన్నింటినీ రద్దు చేసింది. ఈరోజు ఉదయం 11 గంటలకు ప్రధాని నరేంద్ర మోదీ అధ్యక్షతన ఢిల్లీలో కేంద్ర మంత్రి మండ‌లి భేటీ కానుంది. కాగా మన్మోహన్ సింగ్ అంత్యక్రియలను పూర్తి ప్రభుత్వ లాంఛనాలతో నిర్వహించాలని నిర్ణయించారు.

మన్మోహన్ సింగ్ కన్నుమూత
దేశ ప్రధానిగా, ఆర్ధిక మంత్రిగా, ఆర్బీఐ గవర్నర్ గా ఎన్నో కీలక పదవుల్లో విశిష్టమైన సేవలు అందించిన డాక్టర్ మన్మోహన్ సింగ్ గురువారం రాత్రి తుది శ్వాస విడిచారు. అనారోగ్యంతో బాధపడుతున్న ఆయన ఢిల్లీ ఎయిమ్స్ లో చికిత్స పొందుతూ కన్నుమూశారు. ఆయన మృతిపట్ల దేశ వ్యాప్తంగా పలువురు ప్రముఖులు సంతాపం వ్యక్తం చేస్తున్నారు.

ప్రముఖ ఆర్థిక వేత్త, మాజీ ప్రధానమంత్రి డాక్టర్ మన్మోహన్ సింగ్ మరణం పట్ల ముఖ్యమంత్రి ఎ రేవంత్ రెడ్డి తీవ్ర దిగ్భ్రాంతిని వ్యక్తం చేశారు. ఆయన మరణం పట్ల ప్రగాఢ సంతాపాన్ని తెలియజేశారు. డాక్టర్ మన్మోహన్ సింగ్ మరణంతో దేశం ఒక గొప్ప నాయకుడిని కోల్పోయిందని అన్నారు. ఆయన ఆర్థిక శాఖ మంత్రిగా ఉన్నప్పుడే దేశంలో ఆర్థిక సంస్కరణలకు శ్రీకారం చుట్టారని పేర్కొన్నారు. ఒక ఆర్థిక వేత్తగా, ఒక అధ్యాపడిగా, రిజర్వు బ్యాంకు గవర్నర్‌గా, రాజ్యసభ సభ్యుడిగా, ప్రతిపక్ష నాయకుడిగా, ప్రధానమంత్రిగా దేశానికి ఎనలేని సేవలు అందించారని కొనియాడారు. యూపీఏ ప్రభుత్వానికి నాయకత్వం వహించి పదేళ్లపాటు ప్రధానమంత్రిగా ఆయన దేశంలో అనేక వినూత్న కార్యక్రమాలకు శ్రీకారం చుట్టారని పేర్కొన్నారు. డాక్టర్ మన్మోహన్ సింగ్ మరణం పూడ్చలేనిదని అన్నారు. మన్మోహన్ సింగ్ ఆత్మకు శాంతి చేకూరాలని ఆ భగవంతుడిని ప్రార్థిస్తూ, వారి కుటుంబ సభ్యులకు సానుభూతి తెలియజేశారు. ఈ క్రమంలో దేశ ప్రధాని మోదీతోపాటు పలువురు ప్రముఖులు సోషల్‌ మీడియా వేదికగా ఆయన మృతిపట్ల సంతాపం తెలిపారు.

మాజీ ప్రధానమంత్రి మన్మోహన్ సింగ్ మరణ వార్త తీవ్ర దిగ్భ్రాంతికి గురిచేసిందని ఏపీ సీఎం చంద్రబాబు అన్నారు. విజ్ఞానం, వినయం, నిబద్ధతకు మన్మోహన్ సింగ్ ప్రతీకని కొనియాడారు. 1991లో ఆర్థిక మంత్రిగా తీసుకొచ్చిన సంస్కరణల నుంచి ప్రధానమంత్రిగా దేశానికి వెలకట్టలేని సేవలందించారని కొనియాడారు. ఆయన కుటుంబ సభ్యులకు, అభిమానులకు ప్రగాఢ సానుభూతి తెలియజేస్తున్నట్లు చంద్రబాబు పేర్కొన్నారు.

పులివెందులలో ప్రజాదర్బార్ ప్రారంభం
పులివెందుల‌లో ప్రజాదర్బార్‌ కార్యక్రమం కొద్దిసేప‌టి క్రితం ప్రారంభ‌మైంది. వైయ‌స్ఆర్‌సీపీ అధినేత వైయ‌స్‌ జగన్‌ నాలుగు రోజుల పర్యటనలో భాగంగా పులివెందులలో ఉన్నారు. ఈ సందర్భంగా ఇవాళ పులివెందులలోని క్యాంపు కార్యాలయంలో ప్రజాదర్బార్‌ ఏర్పాటు చేశారు. క్యాంపు ఆఫీసుకు వచ్చిన ప్రజల నుంచి వైయ‌స్ జ‌గ‌న్ వినతి పత్రాలను స్వీకరిస్తున్నారు. వైయ‌స్ జ‌గ‌న్‌ను క‌లిసేందుకు రాయలసీమ జిల్లాలు నుంచి వైయ‌స్ఆర్ కాంగ్రెస్ పార్టీ నాయకులు, కార్యకర్తలు, ప్రజలు తరలివస్తున్నారు.

నేడే తెలంగాణ టెట్‌ హాల్‌టికెట్లు విడుదల
తెలంగాణ టెట్‌ 2024 హాల్‌టికెట్లు విడుదలకు సిద్ధంగా ఉన్నాయి. ఇప్పటికే విద్యాశాఖ ఏర్పాట్లు పూర్తి చేసింది. 

తెలంగాణ టీచర్‌ ఎలిజిబిలిటీ టెస్ట్‌ హాల్‌టికెట్లు గురువారం (డిసెంబర్‌ 26) విడుదల కానున్నాయి. ఈ మేరకు విద్యాశాఖ ఏర్పాట్లు చేసింది. ఈ పరీక్షకు దరఖాస్తు చేసుకున్న అభ్యర్థులు అధికారిక వెబ్‌సైట్‌ నుంచి డౌన్‌లోడ్‌ చేసుకోవచ్చు. ఇక ఈ టీజీ టెట్‌ 2025 పరీక్షలు జనవరి 2వ తేదీ నుంచి ప్రారంభం అవుతాయి. జనవరి 20వ తేదీతో ముగుస్తాయి. ఈ మేరకు ఇప్పటికే విద్యాశాఖ షెడ్యూల్‌ విడుదల చేసిన విషయం తెలిసిందే. TS TET Hall Ticket 2024 విడుదలయ్యాక ఈ డైరెక్ట్‌ లింక్‌ ద్వారా డౌన్‌లోడ్‌ చేసుకోవచ్చు.

విద్యాశాఖ ఇప్పటికే ప్ర‌క‌టించిన టీజీ టెట్‌ పూర్తిస్థాయి షెడ్యూల్ ప్ర‌కారం.. వ‌చ్చే సంవ‌త్స‌రం 2025 జనవరి 8, 9, 10, 18 తేదీల్లో టెట్ పేపర్-1 పరీక్ష నిర్వహిస్తారు. జనవరి 2, 5, 11, 12, 19, 20 తేదీల్లో పేపర్ -2 పరీక్ష నిర్వహిస్తారు. రెండు సెషన్లలో ఈ పరీక్షలు నిర్వహించనున్నారు. ఉదయం 9 గంటల నుంచి 11.30 గంటల వరకు, మధ్యాహ్నం 2 గంటల నుంచి 4.30 గంటల వరకు ఈ పరీక్షలు జరగనున్నాయి.

కర్ణాటకకు వెళ్లనున్న సీఎం రేవంత్ రెడ్డి
కర్ణాటక రాష్ట్రం బెలగావిలో సీడబ్ల్యూసీ సమావేశాలు జరగనున్నాయి. ఈ సమావేశాల్లో సీఎం రేవంత్ రెడ్డి పాల్గొనున్నారు. ముఖ్యమంత్రి రేవంత్ రెడ్డితోపాటు పీసీసీ చీఫ్ మహేశ్ కుమార్ గౌడ్ మంత్రులు ఉత్తమ్ కుమార్ రెడ్డి దామోదర్ రాజనర్సింహ వెళ్లనున్నారు.

కర్ణాటక (Karnataka) రాష్ట్రం బెలగావి (Belagavi)కి తెలంగాణ ముఖ్యమంత్రి రేవంత్ రెడ్డి (CM Revanth Reddy) వెళ్లనున్నారు. ఇవాళ(గురువారం) ఉదయం 11గంటలకు బేగంపేట విమానాశ్రయం నుంచి ఆయన బయలుదేరనున్నారు. బెలగావిలో రెండ్రోజులపాటు సీడబ్ల్యూసీ (CWC) సమావేశాలు జరగనున్నాయి. ఇవాళ మధ్యాహ్నం 3 గంటలకు ప్రారంభమయ్యే ఈ సమావేశాల్లో సీఎం పాల్గొనున్నారు. ముఖ్యమంత్రి రేవంత్ రెడ్డితోపాటు పీసీసీ చీఫ్ మహేశ్ కుమార్ గౌడ్, మంత్రులు ఉత్తమ్ కుమార్ రెడ్డి, దామోదర్ రాజనర్సింహ, ఎమ్మెల్సీ జీవన్ రెడ్డి, సీడబ్ల్యూసీ సభ్యుడు వంశీచందర్ రెడ్డి వెళ్లనున్నారు. వీరంతా ప్రత్యేక విమానంలో హైదరాబాద్ నుంచి బెలగావికి చేరుకోనున్నారు.

మహాత్మాగాంధీ ఏఐసీసీ అధ్యక్షుడిగా బాధ్యతలు స్వీకరించి వందేళ్లు పూర్తయిన సందర్భంగా డిసెంబర్ 26, 27 తేదీల్లో ప్రత్యేక సీడబ్ల్యూసీ సమావేశాలు నిర్వహించాలని కాంగ్రెస్ అధిష్ఠానం నిర్ణయించింది. బెలగావిలోనే గాంధీజీ ఏఐసీసీ అధ్యక్షుడిగా బాధ్యతలు స్వీకరించారు. అందుకే అక్కడ సమావేశాలు నిర్వహిస్తున్నారు. ఈ సమావేశాలకు "నవ సత్యాగ్రహ భైఠక్‌" అని కాంగ్రెస్ అధిష్ఠానం నామకరణం చేసింది. ఈ మేరకు సీడబ్ల్యూసీ సభ్యులు, శాశ్వత ఆహ్వానితులు, ప్రత్యేక ఆహ్వానితులు, పీసీసీలు, సీఎల్పీ నేతలు, పార్లమెంటరీ పార్టీ ఆఫీస్‌ బేరర్లు, సీఎంలు, మాజీ సీఎంలు సహా దాదాపు 200 మంది కీలక నేతలకు ఆహ్వానం పంపింది. ఈ మేరకు తెలంగాణ నుంచి కాంగ్రెస్ నేతలు పెద్దఎత్తున వెళ్లనున్నారు.

అయితే బెలగావికి వెళ్లడానికి ముందే టాలీవుడ్ ప్రముఖులతో సీఎం రేవంత్ రెడ్డి నేడు సమావేశం నిర్వహించనున్నారు. పుష్ప-2 ప్రీమియర్ షో సందర్భంగా సంధ్య థియేటర్‌లో జరిగిన తొక్కిసలాట ఘటన తర్వాత టాలీవుడ్‌పై తెలంగాణ ప్రభుత్వం ఆంక్షలు పెట్టేందుకు నిర్ణయించింది. ప్రీమియర్, బెనిఫిట్ షోలు వంటివి రద్దు చేస్తున్నట్లు ప్రకటించింది. ఈ నేపథ్యంలోనే ఇవాళ ఉదయం 10 గంటలకు బంజారాహిల్స్‌లోని కమాండ్ కంట్రోల్ సెంటర్‌లో సీఎం రేవంత్ రెడ్డితో సినీ ప్రముఖులు భేటీ కానున్నారు. దిల్ రాజు నేతృత్వంలో 36 మంది సభ్యులు రేవంత్‌తో సమావేశం కానున్నారు. హీరోలు వెంకటేశ్, నితిన్, వరుణ్ తేజ్, శివబాలాజీ.. దర్శకులు త్రివిక్రమ్, హరీశ్ శంకర్, అనిల్, బాబీ, వంశీ.. నిర్మాతలు అల్లు అరవింద్, దగ్గుబాటి సురేశ్, సునీల్ నారంగ్, సుప్రియ, నాగవంశీ, నవీన్ ఎర్నేని, రవిశంకర్ కలవనున్నట్లు తెలుస్తోంది.

మహిళా కానిస్టేబుల్‌ ఆత్మహత్య
కామారెడ్డి జిల్లాలో సంచలన ఘటన చోటుచేసుకుంది. జిల్లాలోని భిక్కనూరు పోలీ్‌సస్టేషన్‌ ఎస్సై సాయికుమార్‌ బుధవారం రాత్రి కనిపించకుండా పోయారు.

కామారెడ్డి జిల్లాలో సంచలన ఘటన చోటుచేసుకుంది. జిల్లాలోని భిక్కనూరు పోలీ్‌సస్టేషన్‌ ఎస్సై సాయికుమార్‌ బుధవారం రాత్రి కనిపించకుండా పోయారు. అదే సమయంలో బీబీపేట పోలీ్‌సస్టేషన్‌లో పనిచేసే మహిళా కానిస్టేబుల్‌ శృతి, అదే గ్రామానికి చెందిన నిఖిల్‌ అనే వ్యక్తి కూడా అదృశ్యం కాగా.. అడ్లూరు ఎల్లారెడ్డి చెరువులో వీరిద్దరి మృతదేహాలు లభ్యమయ్యాయి. అయితే అదే చెరువు వద్ద ఎస్సైకి చెందిన కారు, చెప్పులు లభ్యం కావడంతో ఆయన కూడా చెరువులో దూకారా? అన్న అనుమానాలు వ్యక్తమవుతున్నాయి. బుధవారం డ్యూటీ అయిపోయాక రాత్రి అయినా శృతి ఇంటికి రాకపోవడంతో.. ఆమె తల్లి తాడ్వాయిలో కానిస్టేబుల్‌గా పనిచేస్తున్న శృతి స్నేహితురాలికి ఫోన్‌ చేశారు. తన కూతురు ఇంకా ఇంటికి రాలేదని ఫోన్‌ చేస్తే స్విచ్‌ ఆఫ్‌ వస్తుందని తెలిపారు.

ఆమె సూచన మేరకు విషయాన్ని పోలీసు అధికారుల దృష్టికి తీసుకెళ్లారు. వెంటనే అప్రమత్తమైన పోలీసులు శృతి ఫోన్‌ను ట్రేస్‌ చేశారు. 44వ జాతీయ రహదారి పక్కన గల అడ్లూర్‌ ఎల్లారెడ్డి పెద్ద చెరువు వద్ద ఫోన్‌ సిగ్నల్స్‌ ఉన్నట్టు గుర్తించారు. పోలీసులు అక్కడి వెళ్లి చూడగా శృతి ఫోన్‌తోపాటు భిక్కనూరు ఎస్సై కారు, చెప్పులు, అలాగే బీబీపేటకు చెందిన నిఖిల్‌ అనే వ్యక్తి చెప్పులు, ఫోన్‌ కూడా కనిపించాయి. దీంతో ఎస్సై సాయికుమార్‌కు ఫోన్‌ చేయగా.. స్విచ్‌ ఆఫ్‌ వచ్చింది. పోలీసులు వెంటనే జిల్లా ఉన్నతాధికారులకు సమాచారం అందించగా.. ఎస్పీ సింధు శర్మ.. సిబ్బందితో అక్కడికి చేరుకున్నారు. చీకట్లోనే చెరువులో గాలింపు చర్యలు చేపట్టగా.. కానిస్టేబుల్‌ శృతి, నిఖిల్‌ల మృతదేహాలు లభ్యమయ్యాయి. ఎస్సై సాయికుమార్‌ ఆచూకీ మాత్రం ఇంకా లభించలేదు. ఇంతకీ చెరువు వద్దకు వీరు ఎందుకు వెళ్లారు? ఇద్దరి మృతదేహాలు చెరువులో ఎందుకున్నాయన్నది మిస్టరీగా మారింది.

ఎస్సై సాయికుమార్‌కు కానిస్టేబుల్‌ శృతితో గతంలోనే పరిచయం ఉంది. సాయికుమార్‌ రెండేళ్ల క్రితం బీబీపేట ఎస్సైగా పని చేసిన సమయంలో శృతి అక్కడే పనిచేసేవారు. ఆమెకు అప్పటికే వివాహమై.. భర్తతో విడాకులు కూడా అయ్యాయి. దీంతో సాయికుమార్‌, శృతి మధ్య పరిచయం వివాహేతర సంబంధానికి దారితీసిందన్న ఆరోపణలున్నాయి. వీరి మధ్య బీబీపేట సింగిల్‌ విండో సొసైటీలో ఆపరేటర్‌గా పని చేస్తున్న నిఖిల్‌ అనే వ్యక్తి మధ్యవర్తిగా వ్యవహరించినట్లు సమాచారం. అయితే ఆ తర్వాత సాయికుమార్‌ భిక్కనూరుకు బదిలీ కావడంతో శృతితో దూరం పెరిగిందని, తనను పెళ్లి చేసుకోవాలని ఆమె ఒత్తిడి తేవడంతో వీరి మధ్య విభేదాలు తలెత్తినట్టు తెలిసింది.

రేవంత్ కు చిరంజీవి ఫోన్ భేటీకి దూరం
రేవంత్ తో టాలీవుడ్ భేటీ ఆసక్తిని పెంచుతోంది. తాజా పరిణామాల నేపథ్యంలో సంక్రాంతి సినిమా ల భవిష్యత్ రేవంత్ నిర్ణయం పై ఆధారపడి ఉంది. సంధ్యా థియేటర్ ఘటనతో పాటుగా సినీ పరిశ్రమ సమస్యల పైన ఈ భేటీలో చర్చించనున్నారు. ఇప్పటికే సినీ ప్రముఖులు సమావేశం జరిగే కమాండ్ కంట్రోల్ సెంటర్ కు చేరుకున్నారు. అయితే అనూహ్యంగా ఈ భేటీకి మెగాస్టార్ చిరంజీవి దూరంగా ఉన్నారు. దీంతో కొత్త చర్చ తెర మీదకు వచ్చింది.

సీఎం రేవంత్ తో సమావేశానికి సర్వం సిద్దమైంది. సినీ ప్రముఖులు బంజారాహిల్స్‌లోని పోలీస్ కమాండ్ కంట్రోల్ సెంటర్‌కు చేరుకున్నారు. త్రివిక్రమ్ శ్రీనివాస్, హరీష్ శంకర్, దిల్ రాజు, మురళీ మోహన్, శ్యాం ప్రసాద్ రెడ్డి, శివ బాలాజీ, బోయపాటి శ్రీను, రాఘవేంద్రరావు, అల్లు అరవింద్, కిరణ్ అబ్బవరం, ఎలమంచిలి రవి, నాగార్జున ఇప్పటికే సమావేశం కోసం వచ్చారు. కాగా, ఈ సమావేశం ఏర్పాటులో కీలకంగా వ్యవహరించిన చిరంజీవి మాత్రం రాలేదు. మెగా హీరోల్లో వరుణ్ తేజ్ హాజరయ్యారు. అల్లు అరవింద్ దిల్ రాజు ఈ టీం ను లీడ్ చేస్తున్నారు. అయితే చిరంజీవి గైర్హాజరు వెనుక పలు కారణాల పైన చర్చ జరుగుతోంది.

సీఎం రేవంత్ రెడ్డితో సినీ ప్రముఖుల భేటీని ఏర్పాటు చేయించిన మెగాస్టార్ చిరంజీవి ఈ సమావే శానికి హాజరు కావడం లేదు. అయితే, ఇప్పటికే సీఎం రేవంత్ రెడ్డితో ఆయన మాట్లాడారని తెలు స్తోంది. రేవంత్ తో భేటీ అయ్యే టీం ను డిసైడ్ చేయటంలో చిరంజీవి కీలక పాత్ర పోషించారు. చిరు సూచన మేరకు సినిమా ఇండస్ట్రీలోని అన్ని విభాగాల ప్రముఖులు హాజరవుతున్నారు. ఇక, హీరో నాగార్జున ఈ భేటీలో ప్రత్యేకంగా పాల్గొంటున్నారు. అయితే, అల్లు అర్జున్ వివాదంలో మెగా హీరోల ప్రతీ అడుగు చర్చగానే నిలిచింది. అల్లు అర్జున్ అరెస్ట్ తరువాత చిరంజీవి, నాగబాబు ఇద్దరూ అల్లు అర్జున్ ఇంటికి వెళ్లారు. జైలు నుంచి వచ్చిన తరువాత అదే విధంగా అల్లు అర్జున్ వారిద్దరి ఇళ్లకు వెళ్లారు.

ఏపీ డిప్యూటీ సీఎం పవన్ మాత్రం తొలి నుంచి ఈ వివాదానికి దూరంగా ఉన్నారు. అయితే ఈ సంక్రాంతికి రాం చరణ్ నటించిన గేమ్ ఛేంజర్ సినిమా సైతం విడుదల కానుంది. తెలంగాణ ప్రభుత్వం బెనిఫట్ షోలు.. టికెట్ ధరల పెంపు పైన నిర్ణయం వెనక్కు తీసుకోకుంటే నష్టం తప్పదనే అంచనాలు ఉన్నాయి. దీంతో, రేవంత్ ను ఒప్పించి.. ఆ నిర్ణయంలో సడలింపు కోసం దిల్ రాజు ప్రయత్నాలు చేస్తున్నారు. ఈ క్రమంలోనే ఈ భేటీ ఏర్పాటు చేసారు. అయితే, ఈ భేటీ ఏర్పాటుకు తొలి నుంచి పూర్తి ప్రయత్నాలు చేసిన చిరంజీవి ప్రస్తుతం విదేశాలలో ఉన్నారని తెలుస్తుంది. అయితే, రేవంత్ తో ఫోన్ లో మాట్లాడిన సమయంలోనే కీలక అంశాలను ప్రస్తావన చేసినట్లు సమాచారం.

అమరావతిలో మరో కార్యక్రమానికి శ్రీకారం జనవరి నుంచి పనులు ప్రారంభం
రాజధాని అమరావతి నిర్మాణాలకు కూటమి సర్కార్‌ తిరిగి జీవం పోస్తుంది. వైఎస్సార్సీపీ సర్కార్‌ కక్షపూరిత ధోరణితో పునాదుల దశలోనే నిలిచిపోయిన ఐకానిక్‌ భవనాల పనులను ప్రారంభించేందుకు సిద్ధమైంది. దీని కోసం ఐకానిక్‌ ర్యాప్ట్‌ ఫౌండేషన్‌ వద్ద ఉన్న నీటిని తోడే కార్యక్రమానికి శ్రీకారం చుట్టింది. మరోవైపు అమరావతి ఓఆర్ఆర్ అలైన్‌మెంట్‌ ఎక్కువ మలుపులు లేకుండా నిర్మించడంపై ప్రభుత్వం దృష్టి సారించింది.

రాజధాని అమరావతి పనులను కూటమి ప్రభుత్వం పరుగులు పెట్టిస్తోంది. ఇప్పటికే సీఆర్డీఏ భవనం పనులను సీఎం చంద్రబాబు పునఃప్రారంభించారు. ఇప్పుడు ఐకానిక్‌ భవనాల నిర్మాణంపై దృష్టి సారించింది. గవర్నమెంట్‌ కాంప్లెక్స్‌లో భాగమైన జీఏడీ టవర్స్‌, హెచ్ఓడీ టవర్స్‌, హైకోర్టు, అసెంబ్లీ భవనాల ర్యాప్ట్‌ ఫౌండేషన్లు గతంలోనే పూర్తయ్యాయి. అయితే గత ఐదేళ్లుగా వీటిని జగన్‌ సర్కార్‌ గాలికొదిలేయడంతో చుట్టూ నీరు చేరి ఆ ప్రదేశమంతా తటాకాన్ని తలపిస్తోంది.

దీంతో వీటి పటిష్ఠతపై ఇప్పటికే మద్రాస్‌, హైదరాబాద్‌ ఐఐటీ నిపుణుల బృందంతో అధ్యయనం చేయించారు. శాస్త్రీయ అధ్యయనం చేసిన నిపుణుల బృందం ఫౌండేషన్‌కి ఎటువంటి ఢోకా లేదని తేల్చింది. దీంతో ఫౌండేషన్‌ వద్ద నీటిని తోడేస్తున్నారు. రెండు ట్రాక్టర్‌లకు భారీ మోటార్లు బిగించి పైప్‌లైన్ల ద్వారా నీటిని పాలవాగులోకి వదిలి తరలిస్తున్నారు. అక్కడి నుంచి కృష్ణా నదిలోకి పంపిస్తున్నారు.

జీఏడీ టవర్స్‌ బేస్‌మెంట్‌, గ్రౌండ్‌తో పాటు 47 అంతస్థులు, టెర్రస్‌, హెలీప్యాడ్‌తో సహా నిర్మాణం చేపట్టనున్నారు. హెచ్ఓడీ టవర్స్‌ బేస్‌మెంట్‌, గ్రౌండ్‌, 39 అంతస్థులు, టెర్రస్‌లతో నిర్మించనున్నారు. అసెంబ్లీ భవనం 250 మీటర్ల టవర్‌ ఎత్తుతో 103 ఎకరాలకు పైగా విస్తీర్ణంలో నిర్మించేందుకు నిర్ణయించారు. హైకోర్టు నిర్మాణంలో బేస్‌మెంట్‌, గ్రౌండ్‌, 7 అంతస్థులతో 55 మీటర్లు ఎత్తు ఉండేలా నిర్మించనున్నారు. ఇప్పటికే వీటన్నింటికీ ర్యాప్ట్‌ ఫౌండేషన్‌ పూర్తికాగా, జనవరి నుంచి పనులు చేపట్టేందుకు సన్నాహాలు చేస్తున్నారు.

అమరావతి అవుటర్‌ రింగ్‌ రోడ్డుని ఎక్కువ మలుపులు లేకుండా నిర్మించేందుకు ప్రభుత్వం ప్రణాళికలు రచిస్తోంది. ఇటీవల ఓఆర్ఆర్ అలైన్‌మెంట్‌పై ఎన్హెచ్ఏఐ, ఆర్ అండ్‌ బీ, సీఆర్డీఏ అధికారులతో సమీక్షించిన సీఎం పలు మార్పులు సూచించారు. ఓఆర్ఆర్ అలైన్‌మెంట్‌కి సీఆర్డీఏ ఇప్పటికే ఎన్ఓసీ జారీ చేసింది. ఆర్ అండ్‌ బీ శాఖ కూడా ఎన్ఓసీ జారీ చేస్తే, ఆ ప్రతిపాదనను ఎన్హెచ్ఏఐ కేంద్ర ఉపరితల రవాణా శాఖ ఆమోదం కోసం పంపిస్తుందని అధికార వర్గాలు తెలిపాయి.అలైన్‌మెంట్‌ ఖరారైతే భూసేకరణ ప్రక్రియ ప్రారంభిస్తామన్నాయి. మరోవైపు ఓఆర్ఆర్ నిర్మాణానికయ్యే మొత్తం ఖర్చు భరించేందుకు కేంద్రం ఇప్పటికే అంగీకారం తెలిపింది. ఓఆర్ఆర్ని ఉమ్మడి కృష్ణా, గుంటూరు జిల్లాల పరిధిలో 189 కిలోమీటర్ల పొడవున నిర్మించనున్నారు. దీనిని ఏడు జాతీయ రహదారులతో అనుసంధానించనున్నారు. అనంతపురం జిల్లా కొడికొండ చెక్‌పోస్టు నుంచి ముప్పవరం వరకు నిర్మిస్తున్న యాక్సెస్‌ కంట్రోల్డ్‌ గ్రీన్‌ఫీల్డ్‌ రహదారిని ఓఆర్ఆర్ వరకు పొడిగించనున్నారు.