మర్రిగూడ: ఎబినేజరు ప్రార్థన మందిరంలో ఘనంగా క్రిస్మస్ వేడుకలు
నల్గొండ జిల్లా, మర్రిగూడ మండల కేంద్రంలో ఎబినేజర్ ప్రార్థన మందిరంలో సోమవారం క్రిస్మస్ వేడుకలు ఘనంగా జరిగాయి. మండల కేంద్రం తో పాటు పల్లెల్లోని చర్చిలలో క్రైస్తవులు ప్రత్యేక ప్రార్థన చేశారు. ఏసు క్రీస్తును కొలుస్తూ భక్తులు భక్తి గీతాలు, కీర్తనలు ఆలకించారు. ఈ సందర్భంగా పాస్టర్లు యేసు క్రీస్తు జన్మదిన విశిష్టత వివరించారు. ఎబినేజరు ప్రార్థన మందిరంలో చిన్నారుల నృత్యాలు పలువురిని ఆకట్టుకున్నాయి.

TS: అంబేద్కర్ సార్వత్రిక విశ్వవిద్యాలయం 25వ స్నాతకోత్సవం.. ఈనెల 28న 
హైదరాబాద్: డాక్టర్ బిఆర్ అంబేద్కర్ సార్వత్రిక విశ్వవిద్యాలయం 25వ స్నాతకోత్సవం.. ఈనెల 28న సాయంత్రం 4:00 గంటలకు జూబ్లీహిల్స్ లో గల యూనివర్సిటీ లోని భవనం వెంకట్రాం ఆడిటోరియం లో నిర్వహిస్తున్నట్లు యూనివర్సిటీ కంట్రోలర్ ఆఫ్ ఎగ్జామినేషన్ ప్రొఫెసర్ వెంకటరమణ తెలిపారు. ఈ సందర్భంగా వారు మాట్లాడుతూ.. ముఖ్య అతిథులుగా విశ్వవిద్యాలయ కులపతి, తెలంగాణ రాష్ట్ర గవర్నర్ డాక్టర్ తమిళిసై సౌందర రాజన్ హాజరై స్నాతకోత్సవ సభా నిర్దేశనం చేస్తారని తెలిపారు. 
ఉపకులపతి ఆచార్య కే.సీతారామారావు అధ్యక్షతన నిర్వహిస్తున్న ఈ కార్యక్రమానికి ఆచార్య ఎం.జగదీష్ కుమార్ చైర్మన్ యూనివర్సిటీ గ్రాండ్ కమీషన్, న్యూఢిల్లీ వారు స్నాతకోపన్యాసం చేస్తారని తెలిపారు. కార్యక్రమాన్ని విజయవంతం చేయాలని విశ్వవిద్యాలయ ఉపకులపతి, పాలకమండలి సభ్యులు కోరారు.

TS: తెలంగాణ ఫుట్బాల్ అసోసియేషన్ చైర్మన్ గా డాక్టర్ కే.టి.మహి
తెలంగాణ ఫుట్బాల్ అసోసియేషన్ ఎన్నికలు
హైదరాబాద్: నిజాం క్లబ్ లో ఆదివారం తెలంగాణ ఫుట్బాల్ అసోసియేషన్ (TFA) ఆధ్వర్యంలో నిర్వహించిన జనరల్ బాడీ మీటింగ్ మరియు ఎలక్షన్ లో ఉమ్మడి నల్లగొండ జిల్లా పక్షాన జనరల్ సెక్రెటరీ బొమ్మపాల గిరిబాబు పాల్గొన్నారు. ఈ సందర్భంగా 4 సంవత్సరాల ( 2023-2027 ) వ్యవధి కి గాను చైర్మన్ గా ఎన్నికైన డాక్టర్ కే.టి.మహి, జనరల్ సెక్రటరీ గా ఎన్నికైన జి.పి.ఫల్గుణ లను ప్రత్యేకంగా అభినందించారు.

TS: చిక్కులు లేని భూమి హ‌క్కులు ద‌క్కాలి: భూమి చట్టాల నిపుణులు ఎం.సునీల్‌కుమార్‌
హైదరాబాద్:  తెలంగాణా రెవెన్యూ అధికారుల సమావేశం లో భూమి సమస్యల పరిష్కార మార్గాలపై, ఆదివారం భూ చట్టాల నిపుణులు ఎం. సునీల్ కుమార్ (భూమి సునీల్ కుమార్) పాల్గొని మాట్లాడుతూ.. చిక్కులు లేని భూమి హ‌క్కులు ద‌క్కాలి అని అన్నారు.
భూమి అంటే తెలంగాణ‌.. తెలంగాణ అంటే భూమి అని ప్ర‌ధాన‌మైన భూ స‌మ‌స్య‌ను తీర్చ‌కుండా ఏది కూడా ప‌రిష్కారం కాద‌ని భూమి సునీల్ కుమార్ పేర్కొన్నారు. 
ప్ర‌పంచ దేశాల‌లో భూ స‌మ‌స్య‌లు లేని దేశాలు మాత్ర‌మే అభివృద్ధి చెందుతున్న‌ట్టుగా తెలిపారు. భూ ప‌రిపాల‌న గ్రామ స్థాయిలో ఉండాల‌న్నారు. భూమి హ‌క్కుల‌కు గ్యారంటీ కూడా గ్రామ‌స్థాయి లోనే ఇవ్వాల‌న్నారు. 
భూమి హ‌ద్దుల స్ప‌ష్టంగా, హ‌క్కుల క‌ల్పించే ప‌త్రాలు ప‌క్కాగా, హ‌క్కుల మార్పిడి వెంట‌నే జ‌రిగే వ్య‌వ‌స్థ ఉండాల‌న్నారు. చిక్కులు వ‌స్తే గ్రామ స్థాయిలోనే ప‌రిష్కారం కావాల‌న్నారు. 
భూమి హ‌క్కుల‌కు ప్ర‌భుత్వ‌మే గ్యారంటీ ఇవ్వాల‌న్నారు. 
ద‌స్తావేజుల రిజిస్ట్రేష‌న్ కాదు.. హ‌క్కుల‌కు రిజ‌స్ట్రేష‌న్ కావాల‌న్నారు. ప‌క్క‌నే ఉన్న ఏపీలో ఈ దిశ‌గా చ‌ట్టం కూడా చేసుకున్నార‌ని భూమి సునీల్ కుమార్ గుర్తు చేశారు.

NLG: మ్యాన్ ఆఫ్ ద మిలియనియం పద్మశ్రీ కళ్యాణ సుందరం ను కలిసిన గ్రంథ పాలకుడు దుర్గాప్రసాద్
నల్లగొండ పట్టణంలోని నాగార్జున ప్రభుత్వ కళాశాల గ్రంథపాలకుడు డాక్టర్ దుర్గాప్రసాద్.. నేడు చెన్నైలో పద్మశ్రీ అవార్డు అందుకున్న పలని కళ్యాణ సుందరం (మ్యాన్ ఆఫ్ మిలియనియం) ను వారి నివాసంలో మర్యాదపూర్వకంగా కలిశారు. ఈ సందర్భంగా దుర్గాప్రసాద్ మాట్లాడుతూ.. కళ్యాణ సుందరం 36 సంవత్సరాలు గ్రంథ పాలకులుగా గ్రంధాలయ సమాజ సేవ చేసి పదవి విరమణ పొందారు. వారు పదవీ విరమణ తరువాత వచ్చిన 18 లక్షల రూపాయలను అనాధాశ్రమాలకు, పేదల విద్య కోసం దానం చేశారు. అమెరికా ప్రభుత్వం ఇతను చేసిన సేవకు గాను మ్యాన్ ఆఫ్ మిలీనియం అవార్డును కళ్యాణ సుందరం కు బహుకరించింది. అప్పటి అమెరికా అధ్యక్షులు బిల్ క్లింటన్ తను చేసిన సేవకు మన దేశానికి వచ్చి క్యాష్ 30 కోట్ల రూపాయలను బహూకరించారు. కళ్యాణ సుందరం గారి అమ్మ చెప్పినట్లుగా ఎప్పుడు సహాయం చేయాలి, కష్టాల్లో ఉన్న వాళ్ళని ఆదుకోవాలి, సమాచార మరియు విద్యకు సేవలో పాటుపడాలని చెప్పిన నినాదంతో వారు సర్వీస్ లో ఉన్నప్పుడు మరియు రిటైర్ అయిన తర్వాత కూడా శాలరీని పేదలకు అనాధాశ్రమాలకు దానం చేశారు.
అమెరికా ప్రభుత్వం ఇచ్చిన డబ్బు మొత్తం కూడా దేశంలో, ప్రపంచంలో ఉన్నటువంటి అనాధాశ్రమాలయాలకు వారు దానం చేశారు. ఇతని గ్రంథాలయ సేవలను చూసి భారత ప్రభుత్వం జనవరి 2023 లో పద్మశ్రీ అవార్డును బహుకరించింది. అవార్డును ఇండియన్ ప్రెసిడెంట్ ద్రౌపతి ముర్ము చేతుల మీదుగా స్వీకరించడం జరిగింది. ఇప్పుడు కళ్యాణ సుందరం వయస్సు 85, యూనిసెఫ్ ప్రపంచవ్యాప్తంగా అవుట్ స్టాండింగ్ పర్సన్స్ ని 17 మందిని ఎంపిక చేయగా ఆసియా ఖండం నుంచి ఎంపికైన ఏకైక సమాజ సేవ సమాచార సేవకుడు కల్యాణ సుందరం అని తెలిపారు.

  


కళ్యాణ సుందరం జీవిత చరిత్రను తెలుగులో రాస్తున్నానని కళ్యాణ సుందరంను వ్యక్తిగతంగా కలిసి.. బాల్యం, తన విద్య, గ్రంథాలయ సేవ, సమాజ సేవ లను తెలుసుకున్నానని, వారిని కలవడం ద్వారా ఎంతో స్ఫూర్తిని పొందానని, వారి యొక్క జీవితం భారతదేశ ప్రజలందరికీ కూడా ఒక సందేశం. ఒక సందేశాత్మకంగా సమాజంలో ఒకరికొకరికి సహాయంలో తోడ్పడటంలో విద్యాభివృద్ధిలో వారి సేవ ఎంతగానో ఉపయోగపడిందని డాక్టర్ ఆనంద్ దుర్గాప్రసాద్ తెలిపారు.

TS: ఆర్టీసీ బస్సుల్లో కండక్టర్ల చేతివాటం!
100 శాతం ఆక్యుపెన్సీ రేషియో పెంచడం కోసం, మహిళా ప్రయాణికులు ఎక్కిన దాని కన్నా ఎక్కువ జీరో టిక్కెట్లు కొడుతున్న ఓ ఆర్టీసీ కండక్టర్..
మహబూబ్ నగర్ నుండి తాండూరు వెళ్తున్న టీఎస్34టీఏ5189 బస్సులో కండక్టర్ గండీడ్, జానంపల్లి స్టేజీల వద్ద మహిళా ప్రయాణికులు ఎక్కకపోయినా జీరో టిక్కెట్లు ప్రింట్ చేస్తున్నట్లుగా పలువురు ప్రయాణికులు ఆరోపిస్తున్నారు.

TS: జేఎన్‌1తో ఆందోళన అక్కర్లేదు: డాక్టర్‌ నాగేశ్వరరెడ్డి
హైదరాబాద్‌: కరోనా వైరస్‌ లోని కొత్త వేరియంట్ జేఎన్‌.1 అంత ప్రమాదకరమేమీ కాదని, ప్రజలు దీని గురించి ఆందోళన చెందాల్సిన అవసరం లేదని ఏషియన్‌ ఇన్‌స్టిట్యూట్‌ ఆఫ్‌ గ్యాస్ట్రో ఎంటరాలజీ (ఏఐజీ) హాస్పిటల్స్‌ ఛైర్మన్‌, ప్రఖ్యాత జీర్ణకోశ వ్యాధి నిపుణులు డాక్టర్‌ డి. నాగేశ్వరరెడ్డి స్పష్టం చేశారు. 
2020లో ప్రపంచాన్నే స్తంభింపజేసి, 2021లో డెల్టా రూపంలో పెద్దసంఖ్యలో ప్రాణాలు హరించిన కొవిడ్‌.. 2022 తొలినాళ్లలో ఒమిక్రాన్‌గా విరుచుకుపడింది. దాదాపు 18 నెలలుగా మహమ్మారి జాడ కనిపించలేదు. మాస్కులు వదిలేసి ప్రజలు సాధారణ జీవితం గడుపుతున్నారు. ఉన్నట్టుండి  ‘జేఎన్‌1’ రూపంలో కరోనా మళ్లీ ప్రజా జీవితంలోకి వస్తోంది. దీంతో కేంద్ర ప్రభుత్వం రాష్ట్రాలను అప్రమత్తం చేసింది. ప్రజల్లో కోవిడ్‌ కొత్త వేరియంట్ పై ఎన్నో భయాలు, ఎన్నో సందేహాలు తలెత్తుతున్నాయి. ఈ నేపథ్యంలో ‘జేఎన్‌.1’ స్వభావం, దాని వ్యాప్తి, తీవ్రత, ప్రమాదమా? తదితర అంశాలపై డాక్టర్‌ డి.నాగేశ్వరరెడ్డి పలు అంశాలు వెల్లడించారు.
 జే ఎన్ 1 కొత్త వైరస్‌ కాదు, కానీ కొత్త వేరియంట్‌. కరోనా చైనాలో పుట్టినప్పటి నుంచి అనేక రూపాలు మార్చింది. అందులో ఒకటి ‘ఎక్స్‌బీబీ’. దాని ఉత్పరివర్తనమే ‘జేఎన్‌1’. జన్యు క్రమ విశ్లేషణ చేయగా.. స్పైక్‌ ప్రొటీన్‌లో వృద్ధి చెందినట్లుగా శాస్త్రవేత్తలు గుర్తించారు. యూరప్‌లోని లక్సంబర్గ్‌ అనే చిన్న దేశంలో మొదట బయటపడింది. ఆ తర్వాత యూరప్‌లోని ఇతర దేశాల్లోనూ అక్కడక్కడా కనిపించింది. కానీ అంత ఉద్ధృతంగా వ్యాప్తి చెందలేదు. ఒకవేళ అంటువ్యాధి అయి ఉంటే.. ఈపాటికి అంతటా వ్యాప్తి చెందేది. డెల్టా, ఒమిక్రాన్‌లు నెలరోజుల్లోనే అంటువ్యాధులు గా మారాయి. 
ప్రపంచ దేశాల్లో ఎక్కడా జేఎన్‌1ను ఉపద్రవంగా ప్రకటించలేదు. ప్రస్తుతం సింగపూర్‌లో 56వేల కేసులు నమోదయ్యాయి. ఈ వేరియంట్‌ కేసులు హాంగ్‌కాంగ్‌, చైనా వంటి దేశాల్లో కొంచం ఎక్కువగా ఉన్నాయి. దీని వ్యాప్తి, లక్షణాలు, పర్యవసనాలను వైద్యనిపుణులు సునిశితంగా గమనిస్తున్నారు. కేరళలో నమోదైన కేసుల నమూనాలను విశ్లేషిస్తే స్వల్ప సమస్యలు మాత్రమే ఉత్పన్నమవుతున్నాయని తెలుస్తోంది.

  

TS: సీఎం రేవంత్ రెడ్డి నిర్ణయాన్ని స్వాగతించిన ఉస్మానియా యూనివర్సిటీ మలిదశ ఉద్యమకారిణి డాక్టర్ రేష్మ హుస్సేన్
హైదరాబాద్: తెలంగాణ రాష్ట్రాన్ని డ్రగ్స్ రహిత రాష్ట్రంగా మార్చుకుందామని సీఎం రేవంత్ రెడ్డి తీసుకున్న నిర్ణయాన్ని స్వాగతిస్తున్నట్లు తెలంగాణ మలిదశ ఉద్యమకారిణి డాక్టర్ రేష్మ హుస్సేన్ తెలిపారు. 

  


తెలంగాణ రాష్ట్రంలో 2010లో రాష్ట్ర సాధన కోసం మలిదశ ఉద్యమం తీవ్రస్థాయిలో ఉన్నప్పుడు ఉస్మానియా యూనివర్సిటీలో బుల్లెట్ గాయాలపాలైన రేష్మ హుస్సేన్ (బుల్లెట్ రాణి) ఆదివారం మాట్లాడుతూ.. రాష్ట్రంలో మాదకద్రవ్యాల చెలామణి, వినియోగంపై ఉక్కుపాదం మోపాలని ఇటీవల సీఎం రేవంత్ రెడ్డి అధికారులను ఆదేశించినారు. ఆ నిర్ణయాన్ని ఉస్మానియా మలిదశ ఉద్యమకారినిగా ఆమె స్వాగతిస్తున్నట్లు, యువత పెడదారి పడకుండా పాఠశాల, కళాశాల మరియు సమాజంలో డ్రగ్స్ ను అరికట్టడానికి ప్రతి ఒక్కరూ సహాయ సహకారాలు అందించాలని.. యాంటీ డ్రగ్స్ టీం గా కొంతమంది యువకులు స్వచ్ఛందంగా పనిచేసి డ్రగ్స్ మహమ్మారిని తరిమికొట్టాలని, యూత్ నిర్దిష్ట లక్ష్యం ఏర్పరచుకొని సన్మార్గంలో నడవాలని పిలుపునిచ్చారు.

TS: ప్రజాపాలన పేరుతో అన్ని గ్రామాల్లో గ్రామ సభలు నిర్వహించాలి: సీఎం రేవంత్ రెడ్డి
 
డిసెంబర్‌ 28 నుండి జనవరి 6 వరకు ప్రజాపాలన కార్యక్రమం నిర్వహించాలని సీఎం రేవంత్‌ రెడ్డి అధికారులను ఆదేశించారు. అన్ని జిల్లాల కలెక్టర్లు, ఎస్పీలతో సీఎం సమావేశమయ్యారు. ఆరు గ్యారంటీల అమలు, ప్రజా పాలన కార్యక్రమాలపై వారు చర్చించారు. ఈ సందర్భంగా అధికారులకు సీఎం కీలక సూచనలు చేశారు. ప్రజాపాలన పేరుతో అన్ని గ్రామాల్లో గ్రామ సభలు నిర్వహించాలన్నారు. అన్ని గ్రామాలు, మున్సిపల్‌ వార్డుల్లో ఉదయం 9 గంటల నుండి సాయంత్రం 5 గంటల వరకు ఈ కార్యక్రమం చేపట్టాలని సూచించారు. లబ్దిదారులను పారదర్శకంగా ఎంపిక చేయాలని సూచించారు.

TS: కొత్తగా 12 కరోనా పాజిటివ్ కేసులు
తెలంగాణలో  కొత్తగా 12 కరోనా పాజిటివ్ కేసులు.. 1,322 శాంపిల్స్‌లో 12 మందికి పాజిటివ్‌గా నిర్ధారణ.. రాష్ట్రంలో 38కి చేరిన కోవిడ్‌ పాజిటివ్‌ కేసుల సంఖ్య.