వికారాబాద్ యువకుడికి జాక్‌పాట్.. రూ.2 కోట్ల ప్యాకేజీతో అమెజాన్‌లో ఉద్యోగం
వికారాబాద్‌ జిల్లా బొంరాస్‌పేట మండలం తుంకిమెట్ల గ్రామానికి చెందిన యువకుడికి అరుదైన అవకాశం దక్కింది. గ్రామానికి చెందిన అర్బాజ్‌ ఖురేషీ అనే యువకుడు ప్రఖ్యాత అమెజాన్ సంస్థలో కళ్లుచెదిరే ప్యాకేజీతో ఉద్యోగం సాధించాడు. ఏడాదికి రూ.2 కోట్ల వార్షిక వేతనంతో ఉద్యోగం పొందాడు. దీంతో గ్రామస్తులు అతడిని అభినందిస్తున్నారు.

వికారాబాద్‌ జిల్లాకు చెందిన ఓ యువకుడు తన ప్రతిభతో లక్కీ ఛాన్స్ కొట్టేశాడు. ప్రపంచ ప్రఖ్యాత అమెజాన్ ఐటీ కంపెనీ అమెజాన్‌లో కళ్లు చెదిరే ప్యాకేజీతో ఉద్యోగం సాధించాడు. జిల్లాలోని బొంరాస్‌పేట మండలం తుంకిమెట్ల గ్రామానికి చెందిన అర్బాజ్‌ ఖురేషీ అమెజాన్‌లో రూ.2 కోట్ల వార్షిక వేతనంతో ఉద్యోగానికి ఎంపికయ్యాడు. అప్లైడ్‌ సైంటిస్ట్‌ ఉద్యోగానికి రూ. 2 కోట్ల ప్యాకేజీతో ఎంపికయ్యారు. ఇప్పటికే ఆఫర్ లెటర్ అందుకోగా.. నేడు ఉద్యోగంలో చేరనున్నారు.

ఐఐటీ పట్నా నుంచి 2019లో ఖురేషీ కంప్యూటర్‌ సైన్స్‌లో బీటెక్‌ పూర్తి చేశాడు. బీటెక్ మూడో సంవత్సరంలో ఉండగానే.. ఫ్రాన్స్‌కు చెందిన ప్రముఖ మెషిన్‌ లెర్నింగ్‌ ఎక్స్‌ఫర్ట్ గేల్‌ డయాస్‌ వద్ద 3 నెలలు ఇంటర్న్‌షిప్‌ పూర్తి చేశారు. ఆ తర్వాత బెంగళూరులోని మైక్రోసాఫ్ట్‌ రీసెర్చ్‌లో రెండేళ్ల పాటు పనిచేశారు. 2023లో అమెరికాలోని యూనివర్సిటీ ఆఫ్‌ మసాచుసెట్స్‌ నుంచి ఆర్టిఫీషియల్ ఇంటెలిజెన్స్ (AI), మెషిన్‌ లెర్నింగ్‌లో ఎంఎస్‌ పట్టా అందుకున్నాడు. తాజాగా.. అమెజాన్ ఐటీ సంస్థలో రూ.2 కోట్ల వార్షిక వేతనంతో ఉద్యోగం సాధించాడు. ఖురేషీ తండ్రి యాసిన్‌ ఖురేషీ ప్రస్తుతం తెలంగాణ ఎక్సైజ్‌ జాయింట్‌ కమిషనర్‌గా పని చేస్తున్నారు. కొడుకు ఉన్నత స్థాయి ఉద్యోగం సాధించటం పట్ల తల్లిదండ్రులతో పాటుగా.. గ్రామస్తులు అభినందనలు తెలుపుతున్నారు.

నిరుపేద విద్యార్థికి రూ.2 కోట్ల ప్యాకేజీతో గూగుల్‌లో ఉద్యోగంబీహార్‌‌కు చెందిన యువకుడు అభిషేక్‌ కుమార్‌ సైతం ఈ ఏడాది రూ.2 కోట్ల వార్షిక వేతనంతో ఉద్యోగం సాధించాడు. గూగుల్‌ లండన్‌ ఆఫీస్‌లో అతడికి రూ.2 కోట్ల జీతంతో ఉద్యోగం ఇచ్చారు. ఈ ఏడాది అక్టోబర్‌‌లోనే అతడు ఉద్యోగంలో చేరాడు. బీహార్‌లోని జముయి జిల్లాలోని జము ఖరియా అనే మారుమూల గ్రామానికి చెందిన అభిషేక్ కుమార్ పట్నా ఎన్‌ఐటీలో బీటెక్‌ పూర్తి చేశాడు. నిరుపేద కుటుంబం, గ్రామీణ నేపథ్యం నుంచి వచ్చిన అభిషేక్‌ ప్రపంచంలోనే అతిపెద్ద టెక్ కంపెనీలో భారీ ప్యాకేజీతో ఉద్యోగం సాధించాడు. మొదట్నుంచి చదువులో ప్రతిభకనబరిచే అభిషేక్‌.. చాలా మంది డ్రీమ్‌ జాబ్‌ అయిన గూగుల్‌లో అత్యధిక ప్యాకేజీతో ఉద్యోగం సాధించి చాలా మందికి ఆదర్శంగా నిలిచాడు.

తెలంగాణ తల్లి విగ్రహం చుట్టూ రాజకున్న రాజకీయం
తెలంగాణలో రాజకీయాలు వేడెక్కాయి. సీఎం రేవంత్ రెడ్డి సాధారణ మహిళా రూపంలో తెలంగాణ తల్లి విగ్రహాన్ని ఆవిష్కరిస్తున్నారని.. తెలంగాణ తల్లి విగ్రహ రూపాన్ని మార్చడంపై బీఆర్ఎస్ ఆగ్రహం వ్యక్తం చేస్తోంది. ప్రభుత్వానికి పోటీగా సోమవారం మేడ్చల్‌లో బీఆర్ఎస్ తెలంగాణ తల్లి విగ్రహాన్ని ఆవిష్కరిస్తున్నారు.

తెలంగాణ రాజకీయాలు (Telangana Politics) హీటెక్కాయి. తెలంగాణ తల్లి విగ్రహం (Telangana Thalli Statue) చుట్టూ రాజకీయాలు రాజకుంటున్నాయి. ప్రభుత్వం (Govt.), బీఆర్ఎస్ (BRS) పోటాపోటీ కార్యక్రమాలు నిర్వహిస్తున్నాయి. సీఎం రేవంత్ రెడ్డి (CM Revanth Reddy) సాధారణ మహిళా రూపంలో తెలంగాణ తల్లి విగ్రహాన్ని ఆవిష్కరిస్తున్నారని.. తెలంగాణ తల్లి విగ్రహ రూపాన్ని మార్చడంపై బీఆర్ఎస్ ఆగ్రహం వ్యక్తం చేస్తోంది. ప్రభుత్వానికి పోటీగా సోమవారం మేడ్చల్‌లో బీఆర్ఎస్ తెలంగాణ తల్లి విగ్రహాన్ని ఆవిష్కరిస్తున్నారు. ఈ కార్యక్రమంలో కేటీఆర్ పాల్గొంటున్నారు.

రాష్ట్ర ప్రభుత్వం అత్యంత ప్రతిష్ఠాత్మకంగా భావిస్తున్న తెలంగాణ తల్లి విగ్రహావిష్కరణకు ఏర్పాట్లు పూర్తయ్యాయి. సోమవారం సాయంత్రం 6.05 గంటలకు సచివాలయంలో దాదాపు లక్ష మంది మహిళల సమక్షంలో ముఖ్యమంత్రి రేవంత్‌రెడ్డి తెలంగాణ తల్లి విగ్రహాన్ని ఆవిష్కరించనున్నారు. అనంతరం బహిరంగ సభలో పాల్గొ ననున్నారు. ఈ కార్యక్రమం కోసం రాష్ట్ర వ్యాప్తంగా అన్ని నియోజకవర్గాల నుంచి మహిళా స్వయం సహాయక సంఘాల సభ్యులను హైదరాబాద్‌కు తీసుకురానున్నారు. లక్ష మంది జనసమీకరణ నేపథ్యంలో సచివాలయం పరిసర ప్రాంతాల ట్రాఫిక్‌ను ప్రత్యామ్నాయ మార్గాల వైపు మళ్లించనున్నారు. విగ్రహావిష్కరణ నుంచి రాత్రి వరకు ప్రభుత్వ ఆధ్వర్యంలో వివిధ కార్యక్రమాలు నిర్వహించనున్నారు. విగ్రహావిష్కరణ, బహిరంగ సభ తరువాత రాత్రి 7.30 గంటలకు ఎన్టీఆర్‌ మార్గ్‌ వద్ద డ్రోన్‌ షో, 8గంటలకు బాణసంచా ప్రదర్శన ఉంటుంది. అనంతరం హెచ్‌ఎండీఏ గ్రౌండ్స్‌లో ప్రముఖ సినీ సంగీత దర్శకుడు తమన్‌ నేతృత్వంలో మ్యూజికల్‌ కార్యక్రమం నిర్వహిస్తారు. కాగా, తెలంగాణ తల్లి విగ్రహాన్ని సచివాలయంలోని ప్రధాన ద్వారం ఎదురుగా ప్రభుత్వం ఏర్పాటుచేసింది. విగ్రహావిష్కరణ నేపథ్యంలో విగ్రహానికి రెండువైపులా వేదికలను సిద్ధం చేశారు. ఎడమ వైపు ముఖ్యమంత్రి, మంత్రులు, ప్రజాప్రతినిధులు కూర్చునేందుకు వీలుగా ఒక వేది కను, మరోవైపు సాంస్కృతిక కార్యక్రమాల నిర్వహణ కోసం మరో వేదికను సిద్ధం చేశారు. ఈ రెండు వేదికలకు ఎదురుగా అతిథులు, ప్రముఖులతో పాటు మహిళలు కూర్చునేందుకు వీలుగా కుర్చీలు ఏర్పాటు చేస్తున్నారు.

రాష్ట్ర ప్రభుత్వం రూపొందించిన నూతన తెలంగాణ తల్లి విగ్రహం పలు వివాదాలు, ఆరోపణల నడుమ సోమవారం ఆవిష్కరణ కాబోతోంది. గత ప్రభుత్వం రూపొందించిన తెలంగాణ తల్లి విగ్రహంలో రాచరికపు ఆనవాళ్లు ఉన్నాయని, దొరసాని తరహాలో ఉందని ప్రతిపక్షంలో ఉన్నప్పుడు కాంగ్రెస్‌ ఆరోపించింది. ఈ క్రమంలోనే గతేడాది డిసెంబరులో అధికారంలోకి వచ్చిన వెంటనే తెలంగాణ తల్లి విగ్రహంపై దృష్టిపెట్టింది. విగ్రహం ఎలా ఉండాలనే దానిపై సమాలోచనలు జరిపి.. ప్రస్తుత విగ్రహాన్ని రూపొందించారు. అయితే కాంగ్రెస్‌ ఆవిష్కరించబోయే విగ్రహ నమూనాను విడుదల చేసినప్పటి నుంచి ప్రతిపక్ష బీఆర్‌ఎస్‌ విమర్శలు చేస్తోంది. అధికార పార్టీ రూపొందించిన విగ్రహం తెలంగాణ తల్లి కాదని, కాంగ్రెస్‌ తల్లి అంటూ తీవ్రంగా విమర్శించారు. ఇక గత విగ్రహంలో ఉన్నట్లుగా కిరీటం ప్రస్తుత విగ్రహంలో ఎందుకు లేదంటూ కూడా ఆ పార్టీ నేతలు ప్రశ్నిస్తున్నారు. కాగా, రాష్ట్రంలో కాంగ్రెస్‌ ప్రభుత్వం ఏర్పాటై ఏడాది పూర్తయిన సందర్భంగా ఈ నెల 1 నుంచి 9 వరకు నిర్వహిస్తున్న ‘ప్రజాపాలన-ప్రజా విజయోత్సవాలు’ సోమవారంతో ముగియనున్నాయి.

సచివాలయంలో తెలంగాణ తల్లి విగ్రహ ఏర్పాటు పనులను ముఖ్యమంత్రి రేవంత్‌రెడ్డి ఆదివారం మంత్రులు కోమటిరెడ్డి వెంకట్‌రెడ్డి, శ్రీధర్‌బాబు, పొంగులేటి శ్రీనివా్‌సరెడ్డి, పొన్నం ప్రభాకర్‌తో కలిసి పరిశీలించారు. అధికారులతో మాట్లాడి తెలుసుకున్నారు. అనంతరం అక్కడ నుంచి నడుచుకుంటూ తన చాంబర్‌కు వెళ్లారు.

కాగా అధికార కాంగ్రెస్‌కు ప్రధాన ప్రతిపక్షం బీఆర్ఎస్ కౌంటర్ కార్యక్రమం చేపట్టింది. సోమవారం సచివాలయంలో ప్రభుత్వం తెలంగాణ తల్లి విగ్రహాన్ని ప్రతిష్టించనుంది. ఈ విగ్రహంపై బీఆర్ఎస్ నేతలు విమర్శలు చేస్తున్నారు. కాంగ్రెస్ ప్రభుత్వం ప్రతిష్టిస్తోంది తెలంగాణ తల్లి కాదుని.. కాంగ్రెస్ తల్లి అని అంటున్నారు. తెలంగాణ తల్లి పాత విగ్రహ రూపాన్నే కొనసాగించాలని డిమాండ్ చేస్తున్నారు. ప్రభుత్వానికి కౌంటర్‌గా మేడ్చల్‌లో తెలంగాణ తల్లి పాత రూపం విగ్రహాన్ని బీఆర్ఎస్ ప్రతిష్టిస్తోంది. సీఎం రేవంత్ రెడ్డి సచివాలయంలో ప్రతిష్టిస్తోన్న సమయంలోనే.‌. మేడ్చల్ కార్యక్రమంలో బీఆర్ఎస్ వర్కింగ్ ప్రెసిడెంట్ కేటీఆర్ పాల్గొననున్నారు.

మంచు మనోజ్‌కు గాయాలు
సినీ నటుడు, మంచు మోహన్ బాబు చిన్న కొడుకు మనోజ్ ఆస్పత్రిలో చేరారు. మోహన్ బాబుతో జరిగిన ఘర్షణలో గాయాలవడంతో అతను ఆస్పత్రిలో జాయిన్ అయ్యారు.

సినీ నటుడు, మంచు మోహన్ బాబు చిన్న కొడుకు మనోజ్ ఆస్పత్రిలో చేరారు. మోహన్ బాబుతో జరిగిన ఘర్షణలో గాయాలవడంతో అతను ఆస్పత్రిలో జాయిన్ అయ్యారు. ఆస్తి విషయంలో మోహన్ బాబు, మనోజ్ మధ్య ఘర్షణ జరిగింది. ఈ సందర్భంగా మోహన్ బాబు అనుచరులు వినయ్ తనపై దాడి చేసినట్లు మనోజ్ ఆరోపించారు. వినయ్‌తో పాటు.. మరికొందరు కూడా తనను కొట్టారని మనోజ్ ఆరోపించారు. ఇప్పటికే ఈ వ్యవహారం పోలీస్ స్టేషన్‌కు చేరుకుంది.

ఈ ఘర్షణలో మనోజ్‌ కాలికి బలమైన గాయాలయ్యాయట. దీంతో మనోజ్‌ను ఆయన కుటుంబ సభ్యులు ఆస్పత్రిలో చేర్పించారు. బంజారాహిల్స్‌లోని టీఎక్స్ హాస్పిటల్‌లో మనోజ్‌ను చేర్పించారు. ఆయన భార్య భూమా మౌనిక మరికొంత మందితో ఆస్పత్రికి వచ్చిన ఆయన.. అడ్మిట్ అయ్యారు. కాళ్లకు బలమైన గాయం కావడంతో.. వైద్యులు మనోజ్‌కు వైద్య పరీక్షలు నిర్వహిస్తున్నారు.

విగ్రహావిష్కరణకు రాలేను మంత్రి పొన్నంకు సెంట్రల్ మినిస్టర్ కిషన్ రెడ్డి లేఖ
డిసెంబర్ 9 సోమవారం తెలంగాణ సచివాలయ ఆవరణలో తెలంగాణ తల్లి విగ్రహ ఆవిష్కరణ చేయనున్నారు. ఇందుకు సంబంధించి ప్రభుత్వం అందరికీ ఆహ్వాన పత్రికలు పంపింది. ప్రభుత్వం తరఫున పొన్నం ప్రభాకర్ గౌడ్ గవర్నర్ జిష్ణు దేవ్ వర్మ, కేంద్ర మంత్రి కిషన్ రెడ్డి, మాజీ సీఎం కేసీఆర్ ను కలిసి ఆహ్వాన పత్రిక అందించారు. కార్యక్రమానికి రావాల్సిందిగా కోరారు. తాజాగా కేంద్ర మంత్రి కిషన్ రెడ్డి మంత్రి పొన్నం ప్రభాకర్ గౌడ్ కు లేఖ రాశారు. తను సోమవారం నిర్వహించనున్న తెలంగాణ తల్లి విగ్రహావిష్కరణకు రాలేనని పేర్కొన్నారు.

ముందస్తు కార్యక్రమాలు, పార్లమెంటు సమావేశాల ఉండడంతో తెలంగాణ తల్లి విగ్రహావిష్కరణకు రాలేకపోతున్నట్లుగా వివరించారు. తెలంగాణ తల్లి విగ్రహం రాష్ట్ర ప్రజల ఆకాంక్షలకు, ప్రత్యేక గుర్తింపు, పోరాటానికి ప్రతీకగా అని పేర్కొన్నారు. విగ్రహ ఆవిష్కరణకు తనను ఆవిష్కరించినందుకు ధన్యవాదాలు చెప్పారు. కాగా ఈ కార్యక్రమానికి మాజీ సీఎం రావడంపై ఇంకా స్పష్టత రాలేదు. ఈ కార్యక్రమానికి ఆయన వెళ్లకపోవచ్చని తెలుస్తోంది. కాగా తెలంగాణ తల్లి విగ్రహ ఆవిష్కరణకు ప్రభుత్వం అన్ని ఏర్పాట్లు చేస్తోంది.

ట్యాంక్‌బండ్ ప్రాంతాన్ని విద్యుత్ దీపాలతో అలంకరించారు. విగ్రహావిష్కరణ తర్వాత జరిగే పబ్లిక్ మీటింగ్‌లో సీఎం మాట్లాడుతారు. విగ్రహాన్ని సీఎం రేవంత్ రెడ్డి ఆవిష్కరిస్తారని అందరూ భావించారు. కానీ తెలంగాణ తల్లి విగ్రహాన్ని మహిళల చేతులు మీదుగా ఆవిష్కరింపజేయాలని సీఎం రేవంత్ రెడ్డి యోచిస్తున్నట్లు తెలుస్తోంది. వివిధ వర్గాలకు చెందిన మహిళలకు ఇప్పటికే ఆహ్వానాలు పంపినట్లు సమాచారం. కాగా ఈ కార్యక్రమానికి ‌కు ఏఐసీసీ నుంచి ఎవరు వస్తారనేది తెలియరాలేదు.

ప్రస్తుత పరిస్థితుల్లో సోనియాగాంధీ హైదరాబాద్ కు వచ్చే అవకాశం లేదు. రాహుల్ లేదా ప్రియాంకాగాంధీలో ఎవరో ఒకరు వస్తారని భావించారు. కానీ వారి రాకకు సంబంధించి ఎలాంటి షెడ్యూల్ ఖరారు కాలేదు.

కాంగ్రెస్ ఏడాది పాలనపై ఛార్జ్ షీట్
కాంగ్రెస్ ఏడాది పాలనపై మాజీ మంత్రి టిఆర్ఎస్ నాయకులు హరీష్ రావు ఆదివారం తెలంగాణ భవన్లో చార్ సీట్ విడుదల చేశారు.

కాంగ్రెస్ ఏడాది పాలనపై మాజీ మంత్రి టిఆర్ఎస్ నాయకులు హరీష్ రావు ఆదివారం తెలంగాణ భవన్లో చార్ సీట్ విడుదల చేశారు. ఏడాది పాలన ఎడతెగని వంచన పేరుతో ఆ పార్టీ ఛార్జిషీట్‌ను విడుదల చేసింది. ఏడాదిపాలనలో ప్రజాస్వామ్యం అపాస్యమైందని ఆయన విమర్శించారు. కాంగ్రెస్ పాలనలో ఎప్పుడూ చూడని నిర్బంధాన్ని చూస్తున్నామని ఆయన చెప్పారు.

ముఖ్యమంత్రి సొంత ఊరుకు వెళ్లాలంటే పోలీస్ స్టేషన్లో అనుమతి తీసుకోవాల్సిన పరిస్థితి నెలకొందని ఆయన విమర్శించారు. రాష్ట్రంలో శాంతిభద్రతలు దిగజారాయని ఆయన ఆరోపించారు. ఖమ్మం లో వర్షాలకు వరద సహాయక చర్యలు చేపట్టడంలో ప్రభుత్వం వైఫల్యం చెందిందని ఆయన విమర్శించారు. ఏడాదిలో రాష్ట్ర ప్రభుత్వం వైఫల్యాలను ఆయన ఈ సందర్భంగా ప్రస్తావించారు.

భారత్‌ను అస్థిరపరిచే కుట్ర
అమెరికా విదేశాంగ శాఖపై బీజేపీ నిప్పులు చెరిగింది. భారతదేశాన్ని అస్థిరపరిచే కుట్ర చేస్తున్నారని విమర్శలు గుప్పించింది.

అమెరికా విదేశాంగ శాఖపై బీజేపీ నిప్పులు చెరిగింది. భారతదేశాన్ని అస్థిరపరిచే కుట్ర చేస్తున్నారని విమర్శలు గుప్పించింది. పరిశోధనాత్మక జర్నలిస్టులు సహా భారత విపక్ష నాయకుడు రాహుల్‌గాంధీతో కలిసి ఈ కుట్రలు, కుతంత్రాలు చేస్తున్నారని ఆరోపించింది. ఈ విమర్శలు రాజకీయంగా పెను సంచలనానికి దారి తీశాయి. అమెరికా-భారత్‌ల మధ్య రెండు దశాబ్దాలుగా సుహృద్భావ సంబంధాలు కొనసాగుతున్న నేపథ్యంలో ప్రముఖ పారిశ్రామిక వేత్త గౌతం అదానీ కేంద్రంగా అమెరికా దర్యాప్తు సంస్థ చేసిన ఆరోపణలు.. ప్రస్తుతం బీజేపీ చేసిన వ్యాఖ్యలు అందరినీ విస్మయానికి గురి చేశాయి. ఆర్గనైజ్డ్‌ క్రైం, కరప్షన్‌ రిపోర్టింగ్‌ ప్రాజెక్ట్‌ (ఓసీసీఆర్‌పీ) కథనాలను ప్రస్తావిస్తూ కాంగ్రెస్‌ పార్టీ అదానీ గ్రూపుపై ఏకపక్షంగా విమర్శలు చేస్తోందని బీజేపీ దుయ్యబట్టింది. మోదీ ప్రభుత్వాన్ని అణిచివేయాలని భావిస్తోందని సంచలన వ్యాఖ్యలు చేసింది. అదానీ గ్రూపుపై ఎఫ్‌బీఐ చేసిన లంచాల ఆరోపణలను బీజేపీ నిరాధారమైనవని కొట్టిపారేసింది.

అదేవిధంగా ఇజ్రాయెల్‌కు చెందిన పెగాసస్‌ స్పైవేర్‌ ద్వారా భారత ప్రభుత్వాన్ని విమర్శిస్తున్న వారిని.. ప్రభుత్వ ప్రాయోజిత హ్యాకర్లు దుయ్యబడుతున్నారన్న ఓసీసీఆర్‌పీ కథనాలను కూడా ఖండించింది. తాజాగా ఓసీసీఆర్‌పీ, 92ఏళ్ల జార్జ్‌ సొరో్‌సలపై స్పందిస్తూ.. వీరికి అమెరికానే నేరుగా 50 శాతం నిధులు సమకూరుస్తోందని, ఈ విషయాన్ని ఫ్రెంచ్‌ మీడియా పేర్కొందని బీజేపీ తెలిపింది. ప్రధాని మోదీని లక్ష్యంగా చేసుకుని భారత్‌ను అస్థిరపరిచేందుకు డీప్‌ స్టేట్‌ లక్ష్యంగా పెట్టుకుందని ఆరోపించింది. ఈ మొత్తం వ్యవహారం వెనుక.. అమెరికా విదేశాంగ శాఖ అజెండా స్పష్టంగా కనిపిస్తోంది అని బీజేపీ ఎక్స్‌లో పేర్కొంది. కాగా బీజేపీ వ్యాఖ్యలపై అమెరికా విదేశాంగ శాఖ అధికార ప్రతినిధి స్పందించారు. 

వృత్తిపరమైన అభివృద్ధి కోసం జర్నలిస్టులకు అమెరికా ప్రభుత్వం మద్దతిస్తుందని పేర్కొన్నారు. దీనర్థం. ఆయా పత్రికల ఎడిటోరియల్‌ నిర్ణయాలను ప్రభావితం చేయడం కాదని తెలిపారు భారత అధికార పార్టీ(బీజేపీ) ఇలాంటి ఆరోపణలు చేయడం మమ్మల్ని తీవ్ర నిరాశకు గురిచేసింది అని పేర్కొన్నారు. పత్రికా స్వేచ్ఛకు పెద్దపీట వేస్తున్న దేశం తమదేనని తెలిపారు.

చోర కళ నేర్పుతారిక్కడ
ఆ బడిలో పాఠాలు మంచి బుద్ధులు బోధించరు. దొంగతనం ఎలా చేయాలి దోపిడీలకు ఎలా పాల్పడాలి ఒకవేళ దొంగతనం చేస్తుండగా పట్టుబడితే చాకచక్యంగా ఎలా తప్పించుకోవాలి అనే చోరకళ నేర్పిస్తారు.

కడియా, గుల్‌ఖేడి, హుల్‌ఖేడి... మధ్యప్రదేశ్‌ రాజధాని భోపాల్‌కు 117 కిలోమీటర్ల దూరంలో ఉన్న మారుమూల గ్రామాలవి. చీకటి పడగానే ఆ ఊళ్లలో పిల్లలందరూ భుజాన బ్యాగులు తగిలించుకుని గబగబా బడికి పరుగులు తీస్తారు. అయితే వాళ్లు వెళ్లేది ఏ నైట్‌ స్కూల్‌కో అనుకునేరు... చేతిలో పెన్ను, పుస్తకం పట్టుకోవాల్సిన వయసులో కత్తెర, బ్లేడు, స్ర్కూడైవర్‌తో దొంగల బడిలో అడుగుపెడుతున్నారు. దొంగతనం, దోపిడీ వంటి చోరకళలో నిష్ణాతులవుతున్నారు.

దొంగలబడిలో విద్య ఉచితంగా నేర్పుతారనుకుంటే తప్పులో కాలేసినట్టే. ఆయా ఊళ్లలో తల్లిదండ్రులు తమ పిల్లలకు 12 ఏళ్లు రాగానే రూ. 2 లక్షల నుంచి రూ. 3 లక్షల అడ్మిషన్‌ ఫీజు చెల్లించి మరీ చేర్పిస్తున్నారు. ఒక దొంగల ముఠా ఏడాదికాలం కోర్సుతో ఈ బడిని నడుపుతోందట. ఇంతకీ అక్కడ ఏం నేర్పుతారంటే... రద్దీ ప్రదేశాల్లో పిక్‌ పాకెటింగ్‌ ఎలా చేయాలి? బ్యాగులు ఎలా లాక్కోవాలి? బ్యాంకులను ఎలా దోచుకోవాలి? వేగంగా పరిగెత్తడం, పోలీసుల నుంచి తప్పించుకోవడంతో పాటు

ఒకవేళ పట్టుబడితే లాఠీ దెబ్బలను ఎలా తట్టుకోవాలి? వంటి విషయాల్లో పిల్లల్ని సుశిక్షితులను చేస్తారు. శిక్షణ అనంతరం వారిని దేశంలోని వివిధ ప్రాంతాలకు పంపించి, వాళ్లు కొట్టుకొచ్చిన సొమ్మును ఆ దొంగల ముఠాయే తీసుకుని, సదరు పిల్లల తల్లిదండ్రులకు ఏడాదికి రూ. 3 లక్షల నుంచి రూ. 5 లక్షల వరకు ఇస్తుంది. దీంతో ఇదేదో బాగుందని భావిస్తున్న ఆ చుట్టుపక్కల ఊళ్ల జనం నానా తిప్పలు పడి ఫీజులు చెల్లించి తమ పిల్లలను దొంగల బడిలో చేర్పించేందుకు పోటీ పడుతున్నారు.

ఈ బడిలో అడ్మిషన్‌ పొందాలంటే కొన్ని అర్హతలు కూడా ఉండాలి. అయితే అవి చదువు, మార్కులు, ర్యాంకులో కాదు... కేవలం వయసు. ఇక్కడ చేరాలంటే పిల్లాడి వయసు 12 ఏళ్ల నుంచి 17 ఏళ్ల మధ్యనే ఉండాలి. అంతకన్నా ఎక్కువ ఉంటే అడ్మిషన్‌ ఇవ్వరు. దీనికో పకడ్బందీ కారణం ఉంది. ఒకవేళ దొంగతనం చేస్తూ కుర్రాళ్లు పట్టుబడితే... మైనర్లనే కారణంతో ఎక్కువ శిక్ష పడకూడదనే ఈ వయసును నిర్ణయించారట.

దొంగలబడి విద్యార్థుల ప్రధాన ఫోకస్‌ అంతా బడా బాబుల మీదనే ఉంటుంది. కోటీశ్వరులు, పారిశ్రామికవేత్తలే లక్ష్యంగా వీళ్లు ఎక్కువ చోరీలకు పాల్పడుతుంటారు. వారి ఇళ్లలో జరిగే పెళ్లిళ్లు, పేరంటాలు, ఫంక్షన్లకు వెళ్లి... నగలు, డబ్బు, ఖరీదైన వస్తువులు చాకచక్యంగా కొట్టేస్తుంటారు. దొంగిలించిన తర్వాత ఆయా వస్తువులతో వారు తమ స్వగ్రామానికి చేరుకోకముందే ఆ కేటుగాళ్లను పోలీసులు పట్టుకోవాలి. లేదంటే వారు దొరకడం కష్టమే. ఆ ఊళ్లోకి పోలీసులు ఎవరైనా అడుగుపెడితే చాలు... ఊరి జనమంతా ఏకమై అడ్డుకుంటారు. ఈ గ్రామాల్లో నివసిస్తున్న దాదాపు 2 వేల మందిపై దేశంలోని పలు స్టేషన్లలో ఇప్పటిదాకా 8 వేలకు పైగా కేసులు నమోదయ్యాయంటే అర్థం చేసుకోవచ్చు. అంతేకాదు.. ఈ గ్రామాల్లోకి ఎవరైనా కొత్తగా వచ్చినా, వారి వద్ద కెమెరాలు, సెల్‌ఫోన్లు ఉన్నట్లు గ్రామస్థులు గమనించినా వెంటనే అలర్ట్‌ అయిపోతారట. మొత్తానికి అన్ని కళల్లాగే ‘చోర’కళలో శిక్షణ ఇవ్వటం విచిత్రమే కదా

తెలంగాణ తల్లి విగ్రహంపై చర్చ అవసరమా
తెలంగాణ తల్లి విగ్రహంపై చర్చ అవసరమా అని విమలక్క ప్రశ్నించారు. తెలంగాణ తల్లిపై చర్చ జరగడం బాధగా ఉందన్నారు. నిత్యం ప్రజల సమస్యలపై పోరాడుతూనే ఉన్నామన్నారు. ప్రభుత్వాలు ప్రజల కోసం ఆలోచించాలని కోరుకుంటున్నట్లు తెలిపారు.

తెలంగాణ తల్లి విగ్రహం (Telangana Talli Statue) అంశం ఇప్పుడు రాష్ట్రంలో హాట్ టాపిక్‌గా నిలిచింది. తెలంగాణ తల్లి విగ్రహంపై ప్రజా గాయకురాలు విమలక్క (Vimalakka) శనివారం ఏబీఎన్-ఆంధ్రజ్యోతితో మాట్లాడుతూ.. తెలంగాణ తల్లి విగ్రహంపై చర్చ అవసరమా అని ప్రశ్నించారు. తెలంగాణ తల్లిపై చర్చ జరగడం బాధగా ఉందన్నారు. నిత్యం ప్రజల సమస్యలపై పోరాడుతూనే ఉన్నామన్నారు. ప్రభుత్వాలు ప్రజల కోసం ఆలోచించాలని కోరుకుంటున్నట్లు తెలిపారు.

ప్రజల ఆకాంక్ష మేరకు కాంగ్రెస్ ప్రభుత్వం పాలించడం లేదన్నారు. ప్రభుత్వంపై నిరసన మొదలైందన్నారు. ఎక్కడ విజయం సాధించారని విజయోత్సవాలు చేస్తున్నారని ప్రశ్నించారు. ప్రభుత్వం తన పనితీరుపై సమీక్షించుకోవాలని హితవుపలికారు. ఏం హామీలు ఇచ్చాం.. ఏం చేస్తున్నామని ప్రభుత్వ పెద్దలు ఆలోచించాలన్నారు. ఎన్ కౌంటర్లు లేని తెలంగాణ కావాలని పోరాడితే వరుసగా ఎన్ కౌంటర్లు జరుగుతున్నాయని మండిపడ్డారు. రాష్ట్రంలో జరుగుతున్న పరిణామాలపై ప్రభుత్వం సమీక్షించుకోవాలని విమలక్క వ్యాఖ్యలు చేశారు.

ఈనెల 9న తెలంగాణ తల్లి విగ్రహాన్ని ప్రభుత్వం ఆవిష్కరించనుంది. బీఆర్‌ఎస్ ప్రభుత్వం రూపొందించిన తెలంగాణ తల్లి విగ్రహం దొరసానిలా ఉందని.. తాము అధికారంలోకి రాగానే అసలైన తెలంగాణ విగ్రహాన్ని రూపొందిస్తామని ఎన్నికల్లో చెప్పిన విధంగానే నూతన తెలంగాణ తల్లి విగ్రహాన్ని రూపొందించింది కాంగ్రెస్ సర్కార్. అలాగే విగ్రహ ఆవిష్కరణకు కూడా అంతా సిద్ధమైంది. ఈ విగ్రహావిష్కరణకు బీఆర్‌ఎస్ అధినేత, మాజీ ముఖ్యమంత్రి కేసీఆర్‌ను ఆహ్వానించాలని కూడా సర్కార్ నిర్ణయించింది. కాగా.. తెలంగాణ తల్లి రూపం మార్పు రాజకీయంగా చర్చకు దారి తీసింది.

3 అడుగుల గద్దెపై 17 అడుగుల ఎత్తులో ఏర్పాటు చేస్తున్న తెలంగాణ తల్లి కాంస్య విగ్రహ నమూనాను తెలంగాణ ప్రభుత్వం నిన్న( శుక్రవారం) విడుదల చేసింది. బంగారు రంగు అంచుతో ఆకుపచ్చ చీర! రెండు చేతులకు ఎరుపు, ఆకు పచ్చ రంగు గాజులు! ఎడమ చేతిలో వరి, జొన్న, మొక్కజొన్న, సజ్జ కంకులు! కాళ్లకు మెట్టెలు, పట్టీలు! మెడలో బంగారపు గొలుసులు! నుదుట రూపాయి కాసంత ఎర్రటి బొట్టుతో నిండైన గ్రామీణ మహిళ రూపంతో తెలంగాణ తల్లి తాజా విగ్రహాన్నిరేవంత్ ప్రభుత్వం రూపొందించింది. సబ్బండ వర్గాల ఆకాంక్షలకు అనుగుణంగా ఈ విగ్రహం రూపుదిద్దుకుంది.

మరోవైపు ఈనెల 9న సెక్రటేరియట్ ఆవరణలో ఆవిష్కరణ కానున్న తెలంగాణ తల్లి విగ్రహావిష్కరణను ఆపాలంటూ హైకోర్టులో పిల్ దాఖలైంది. నూతన తెలంగాణ తల్లి విగ్రహం ఏర్పాటుపై జూలూరి గౌరీ శంకర్.. హైకోర్టును ఆశ్రయించారు. డిసెంబర్ 9న సచివాలయం వద్ద తెలంగాణ తల్లి విగ్రహ ప్రతిష్టను నిలిపివేయాలని పిల్ వేశారు.

మూడు సార్లు భూకంపం
ఈరోజు తెల్లవారుజామున హిమాచల్ ప్రదేశ్‌లో భూమి కంపించింది. మండి నగరంలో ఒకదాని తర్వాత ఒకటిగా మూడు సార్లు భూకంపం సంభవించింది. భూకంప తీవ్రత తక్కువగా ఉన్నప్పటికీ వరుసగా మూడు సార్లు ప్రకంపనలు రావడంతో ప్రజల్లో భయాందోళన వాతావరణం నెలకొంది.

హిమాచల్ ప్రదేశ్‌(Himachal Pradesh)లోని మండి జిల్లాలో ఈరోజు తెల్లవారుజామున భారీ భూకంపం (Earthquake) సంభవించింది. ఈ కారణంగా ప్రజలు ఇళ్ల నుంచి బయటకు పరుగులు తీశారు. భూకంప తీవ్రత రిక్టర్ స్కేలుపై 3.3గా నమోదైంది. దీని కేంద్రం భూమికి 5 కిలోమీటర్ల దిగువన ఉంది. తెల్లవారుజామున 2:30 గంటల ప్రాంతంలో చాలా మంది గాఢ నిద్రలో ఉన్న సమయంలో ఈ ఘటన జరిగింది. మండి నగరాన్ని భూకంపం తాకింది. ఆ క్రమంలో ఒకదాని తర్వాత ఒకటిగా 3 బలమైన ప్రకంపనలు వచ్చాయి. ప్రకంపనల తర్వాత, ప్రజలు పిల్లలు, కుటుంబాలతో సహా వీధుల్లోకి వచ్చారు.

మూడు సార్లు భూకంపం
ఈరోజు తెల్లవారుజామున హిమాచల్ ప్రదేశ్‌లో భూమి కంపించింది. మండి నగరంలో ఒకదాని తర్వాత ఒకటిగా మూడు సార్లు భూకంపం సంభవించింది. భూకంప తీవ్రత తక్కువగా ఉన్నప్పటికీ వరుసగా మూడు సార్లు ప్రకంపనలు రావడంతో ప్రజల్లో భయాందోళన వాతావరణం నెలకొంది.

హిమాచల్ ప్రదేశ్‌(Himachal Pradesh)లోని మండి జిల్లాలో ఈరోజు తెల్లవారుజామున భారీ భూకంపం (Earthquake) సంభవించింది. ఈ కారణంగా ప్రజలు ఇళ్ల నుంచి బయటకు పరుగులు తీశారు. భూకంప తీవ్రత రిక్టర్ స్కేలుపై 3.3గా నమోదైంది. దీని కేంద్రం భూమికి 5 కిలోమీటర్ల దిగువన ఉంది. తెల్లవారుజామున 2:30 గంటల ప్రాంతంలో చాలా మంది గాఢ నిద్రలో ఉన్న సమయంలో ఈ ఘటన జరిగింది. మండి నగరాన్ని భూకంపం తాకింది. ఆ క్రమంలో ఒకదాని తర్వాత ఒకటిగా 3 బలమైన ప్రకంపనలు వచ్చాయి. ప్రకంపనల తర్వాత, ప్రజలు పిల్లలు, కుటుంబాలతో సహా వీధుల్లోకి వచ్చారు.