Cm Jagan: పవన్‌ కల్యాణ్‌పై సీఎం జగన్‌ మరోసారి వ్యక్తిగత విమర్శలు..
కాకినాడ: జనసేన అధినేత పవన్‌ కల్యాణ్‌పై సీఎం జగన్‌ మరోసారి తన స్థాయి మరిచి వ్యక్తిగత విమర్శలకు దిగారు. కాకినాడ జిల్లా సామర్లకోట సభలో ఈ మేరకు ఆయన తీవ్ర వ్యాఖ్యలు చేశారు..

''చంద్రబాబు, ఆయనను సమర్థించే నాయకులెవరూ ఏపీలో ఉండరు. ఆయన దత్తపుత్రుడు పవన్‌ కల్యాణ్‌ ఇల్లు కూడా హైదరాబాద్‌లోనే. కానీ, ఆ ఇంట్లో ఇల్లాలు మాత్రం ప్రతి 3 - 4 ఏళ్లకోసారి మారుతూ ఉంటారు. ఒకసారి లోకల్‌..

ఇంకోసారి నేషనల్‌.. మరోసారి ఇంటర్నేషనల్‌. ఆడవాళ్లన్నా.. పెళ్లిళ్ల వ్యవస్థ అన్నా.. పవన్‌కు గౌరవం లేదు'' అని జగన్‌ వ్యాఖ్యానించారు..

దారుణం.. కుటుంబ కలహాలతో అత్తను కాల్చి చంపిన కానిస్టేబుల్‌
హనుమకొండ జిల్లాలో దారుణం చోటుచేసుకుంది గుండ్ల సింగారంలో ఓ కానిస్టేబుల్ తన అత్తను తుపాకీతో కాల్చి చంపాడు. తుపాకి శబ్ధం విన్న స్థానికులు కానిస్టేబుల్పై దాడి చేయగా అతడు తీవ్రంగా గాయపడ్డాడు..

ఈ విషయం గురించి తెలుసుకున్న పోలీసులు ఘటనాస్థలికి చేరుకున్నారు. కేసు నమోదు చేసుకుని కానిస్టేబుల్ను ఆస్పత్రికి తరలించారు. అసలేం జరిగిందంటే..?

ఆర్థిక లావాదేవీలతో తలెత్తిన విభేదాల కారణంగా ఓ కానిస్టేబుల్‌ తన అత్తను తుపాకీతో కాల్చిచంపాడు. ఈ ఘటన హనుమకొండ జిల్లా గుండ్ల సింగారంలో చోటు చేసుకుంది. మంచిర్యాలకు చెందిన ప్రసాద్ రామగుండం కమిషనరేట్ పరిధిలోని కోటపల్లి పోలీస్ స్టేషన్‌లో కానిస్టేబుల్‌గా విధులు నిర్వహిస్తున్నాడు. కొన్నాళ్లుగా భార్యాపిల్లలు పుట్టింటి వద్దే ఉంటుండగా… ఉదయం ప్రసాద్‌ గుండ్లసింగారం వచ్చాడు.

అత్త కమలమ్మతో మాట్లాడుతున్న క్రమంలో ఎవరూ లేనిది చూసి.. సర్వీస్ రివాల్వర్‌తో ఆమె ఛాతిపైపై కాల్పులు జరిపారు. దీంతో కమలమ్మ అక్కడికక్కడే కుప్పకూలింది. తుపాకీ శబ్దం విని అక్కడికి పరుగులు తీసిన స్థానికులు.. ప్రసాద్‌పై రాళ్లతో దాడి చేసి, తరిమికొట్టారు. ఘటనాస్థలికి చేరుకున్న పోలీసులు.. కమలమ్మ మృతదేహాన్ని వరంగల్‌ ఎంజీఎంకు తరలించారు. తీవ్రంగా గాయపడిన కానిస్టేబుల్‌ను ఆస్పత్రికి తరలించారు. అత్త, అల్లుడికి మధ్య ఆర్థిక లావాదేవీల కారణంగా వివాదం నెలకొన్నట్టు స్థానికులు చెబుతున్నారు..

సీనియర్ నేత జానారెడ్డికి కీలక బాధ్యతలు
తెలంగాణ ఎన్నికల షెడ్యూల్ విడుదల కావటంతో టీ కాంగ్రెస్ స్పీడ్ పెంచింది. అభ్యర్థుల తొలి జాబితాను విడుదల చేసేందుకు రెడీ అయింది. అభ్యర్థుల ఎంపికపై స్క్రీనింగ్ కమిటీ సుదీర్ఘంగా చర్చలు జరిపి జాబితాను ఓ కొలిక్కి తెచ్చింది. అయినా.. కొన్ని సీట్ల విషయంలో ఏకాభిప్రాయం కుదరలేదని తెలుస్తోంది. టికెట్ కోసం ఆశావహులు ఢిల్లీతో పాటు హైదరాబాద్‌లోని గాంధీభవన్ ముందు ఆందోళనలకు దిగుతున్నారు.

నాగర్ కర్నూల్‌లో నాగం జనార్ధన్ రెడ్డికే టికెట్ కేటాయించాలంటూ మంగళవారం గాంధీ భవన్ ఎదుట కాంగ్రెస్ కార్యకర్తలు టీపీసీసీ రేవంత్ రెడ్డిని అడ్డుకున్నారు. దానికి తోడు టికెట్ల విషయమై సీనియర్ల మధ్య కూడా పొరపచ్చాలు వచ్చినట్లు తెలిసింది.

ఈ నేపథ్యంలో ఏఐసీసీ మరో కీలక నిర్ణయం తీసుకున్నట్టు సమాచారం

తెలంగాణ అసెంబ్లీ సీట్ల సర్ధుబాటు, అసంతృప్త నేతల మధ్య సయోధ్య కుదిర్చేందుకు సీనియర్ నేత జానారెడ్డికి కీలక బాధ్యతలు అప్పగించింది. ఆయన నేతృత్వంలో ఫోర్‌మెన్ కమిటీని ఏర్పాటు చేసింది. టికెట్ దక్కని ఆశావహులు, అసంతృప్తి నేతలను బుజ్జగించే బాధ్యతలను హైకమాండ్ ఈ ఫోర్ మెన్ కమిటీకి అప్పగించింది.

సీనియర్ నేత జానారెడ్డికి కీలక బాధ్యతలు కట్టబెట్టింది. జానారెడ్డితోపాటు రాష్ట్ర వ్యవహారాల ఇన్‌ఛార్జి మాణిక్‌రావు ఠాక్రే, దీపా దాస్ మున్షి, మీనాక్షి నటరాజన్‌లతో ఈ కమిటీని నియమించింది.
ఇవాళ గాంధీభవన్‌లో జానారెడ్డి అధ్యక్షతన సమావేశమై అసంతృప్తులు ఉన్న నియోజకవర్గాలపై కమిటీ సమీక్ష నిర్వహించనున్నట్లు సమాచారం.

ఎన్నికల్లో అభ్యర్థుల ప్రకటన తరువాత అసంతృప్తులను బుజ్జగించే బాధ్యతను ఈ కమిటీకి అప్పగించినట్లు తెలుస్తోంది. టికెట్ ఆశావహులు, అసంతృప్తి నేతలను బుజ్జగించకుండా సీట్లు ప్రకటిస్తే నేతల్లో అసంతృప్తి పెరిగి ఎన్నికల్లో పార్టీకి డ్యామేజ్ అవుతుందని కాంగ్రెస్ భావిస్తోంది.

దీంతో అభ్యర్థుల ప్రకటన ముందే జానారెడ్డి ద్వారా అసంతృప్తి చల్లార్చాలని భావిస్తున్నట్లు తెలుస్తోంది...

రేపటి నుంచే దసరా సెలవులు
తెలుగు రాష్ట్రాల్లో దసరా కళ వచ్చేసింది. తెలంగాణలో అన్ని ప్రభుత్వ, ప్రవేట్ స్కూల్స్‌కి ఈ నెల 13వ తేదీ నుంచి దసరా సెలవులు ప్రారంభం కానున్నాయి.
పండుగ తరువాత అంటే 26వ తేదీన స్కూల్స్ తిరిగి ఓపెన్ అవుతాయి. స్కూల్స్‌లో సమ్మెటివ్ ఎగ్జామ్స్,SA1,నిన్నటితోనే ముగియగా.. ఇవాళ ఒక్క రోజు స్కూల్ ఉంటుంది. మరుసటి రోజు నుంచి అంటే శుక్రవారం నుంచి సెలవులు ఉంటాయి.

ఇక ఫలితాలను స్కూల్స్ పునఃప్రారంభం అయిన తరువాత ప్రకటిస్తారు.  జూనియర్ కాలేజీలకు ఈ నెల 19వ తేదీ నుంచి దసరాలు సెలవు ప్రారంభం కానుంది. 19వ తేదీ నుంచి 26వ తేదీ వరకు వారికి ఈ సెలవులు ఉంటాయి.

ఆ తరువాత రోజు నుంచి యధావిధిగా తరగతులు ప్రారంభం అవుతాయని రాష్ట్ర విద్యాశాఖ వెల్లడించింది..

మంత్రి శ్రీనివాస్‌ గౌడ్‌కు హైకోర్టులో ఊరట
మంత్రి శ్రీనివాస్‌ గౌడ్‌కు మంగళవారం హైకోర్టులో ఊరట లభించింది.
ఆయన ఎన్నికకు సంబంధించి దాఖలైన పిటిషన్‌ను న్యాయస్థానం కొట్టివేసింది. మంత్రి శ్రీనివాస్‌ గౌడ్‌ ఎన్నిక చెల్లదంటూ మహబూబ్‌నగర్‌కు చెందిన రాఘవేంద్రరాజు అనే వ్యక్తి 219లో హైకోర్టులో పిటిషన్‌ దాఖలు చేశారు.

దానిని మంగళవారం కొట్టివేస్తూ న్యాయమూర్తి తీర్పు వెలువరించారు..

ఉప్పల్ స్టేడియం వేదికగా శ్రీలంక పాకిస్తాన్ నేడు కీలక పోరు
వరల్డ్‌కప్‌లో భాగంగా మంగళవారం ఉప్పల్‌లోని రాజీవ్‌గాంధీ అంతర్జాతీయ క్రికెట్ స్టేడియంలో జరిగే పోరులో శ్రీలంకతో పాకిస్థాన్ తలపడనుంది.
లంక ఇప్పటికే తొలి మ్యాచ్‌లో ఓటమి పాలైంది. మరోవైపు నెదర్లాండ్స్‌తో ఉప్పల్‌లోనే జరిగిన మ్యాచ్‌లో పాకిస్థాన్ ఘన విజయం సాదించింది. ఈ మ్యాచ్‌లోనూ అదే జోరును కొనసాగించాలనే పట్టుదలతో ఉంది.

రెండు జట్లలోనూ స్టార్ ఆటగాళ్లకు కొదవలేదు. ఇక ఈ మ్యాచ్ కోసం ఇరు జట్లు కూడా సోమవారం ముమ్మర సాధన చేశాయి. తొలి మ్యాచ్‌లో పరాజయం పాలైన లంక ఈసారి మాత్రం విజయమే లక్షంగా పెట్టుకుంది. మొదటి మ్యాచ్‌లో బౌలర్లు ఘోరంగా విఫలం కావడంతో లంకను కలవరానికి గురిచేస్తోంది.

ఈ మ్యాచ్‌లో బ్యాటింగ్, బౌలింగ్ విభాగాల్లో సమష్టిగా రాణించాలనే పట్టుదలతో ఉంది. సౌతాఫ్రికా మ్యాచ్‌లో రజిత, మధుశంకా, పతిరణ, వెల్లలాగే తదితరులు భారీగా పరుగులు సమర్పించుకున్నారు. అయితే బ్యాటింగ్‌లో మాత్రం లంక కాస్త పర్వాలేదనిపించింది. కుశాల్ మెండిస్ 42 బంతుల్లోనే 76 పరుగులు చేయడం జట్టుకు కలిసి వచ్చే అంశమే.

అసలంక, కెప్టెన్ శనక కూడా బ్యాట్‌ను ఝులిపించారు. ఈ మ్యాచ్‌లో కూడా బ్యాటర్లపై జట్టు భారీ ఆశలు పెట్టుకుంది. మరోవైపు పాకిస్థాన్ కూడా ఈ పోరుకు ఆత్మవిశ్వాసంతో సిద్ధమైంది. నెదర్లాండ్స్ మ్యాచ్‌లో బ్యాటర్లు ఆశించిన స్థాయిలో రాణించలేక పోయారు.

ఓపెనర్లు ఫకర్ జమాన్, ఇమామ్ ఉల్ హక్, కెప్టెన్ బాబర్ ఆజమ్‌లు విఫలమయ్యారు. కానీ వికెట్ కీపర్ రిజ్వాన్, సౌద్ షకిల్, నవాజ్, షాదాబ్‌లు ధాటిగా ఆడడం పాక్‌కు ఊరటనిచ్చే అంశమే. బౌలింగ్‌లో పాక్ చాలా బలంగా ఉంది. దీంతో ఈ మ్యాచ్‌లో పాక్ ఫేవరెట్‌గా బరిలోకి దిగుతోంది...

తిరుమల శ్రీవారిని దర్శించుకున్న సీఎం కేసీఆర్ సతీమణి శోభ
తెలంగాణ సీఎం కేసీఆర్ సతీమణి శోభ తిరుమల శ్రీవారిని దర్శించుకున్నారు. ఇవాళ తెల్లవారుజామున ఆమె సుప్రభాత సేవలో పాల్గొన్నారు.
అనంతరం తిరుమల శ్రీవారి అర్చన సేవలో పాల్గొని స్వామివారి ఆశీస్సులు తీసుకున్నారు.ఉదయం తలనీలాలు సమర్పించి శ్రీవారికి మొక్కులు చెల్లించుకున్నారు.

అనంతరం స్వామి వారి అర్చన సేవలో పాల్గొన్నారు. వైసీపీ MLA, ప్రభుత్వ విప్ చెవిరెడ్డి భాస్కర్ రెడ్డి దగ్గరుండి దర్శనానికి తీసుకెళ్లారు.

కెసిఆర్ కుటుంబ సభ్యులు  హైదరాబాద్ నుంచి ప్రత్యేక విమానంలో రేణిగుంట విమానాశ్రయానికి చేరుకుని అక్కడి నుండి రోడ్డు మార్గంలో తిరుమలకు చేరుకున్నారు. చేరుకున్న కేసీఆర్ కుటుంబ సభ్యులు..ఉదయం తలనీలాలు సమర్పించి శ్రీవారికి మొక్కులు చెల్లించుకున్నారు.

తెలంగాణలో ఎన్నికల నగారా మోగిన నేపథ్యంలో సీఎం కేసీఆర్ ఆరోగ్యంగా ఉండాలని అదేవిధంగా ఎన్నికల్లో బిఆర్ఎస్ పార్టీ విజయం సాధించాలని సీఎం సతీమణి శోభ శ్రీవారిని  కోరుకున్నట్టు తెలిసింది..

తిరుమలలో సర్వ సాధారణంగా భక్తుల రద్దీ
తిరుమల స్వామి వారి ఆలయంలో భక్తుల రద్దీ సాదారణంగా ఉంది. మంగళవారం శ్రీవారి దర్శనం కోసం వచ్చిన భక్తులు 5 కంపార్ట్‌మెంట్లలో వేచి ఉన్నారు.

టోకెన్లు లేని భక్తులకు స్వామివారి సర్వదర్శనానికి 8 గంటల సమయం పడుతుందని ఆలయ అధికారులు వెల్లడించారు.

టైమ్ స్లాట్ దర్శనానికి 4 గంటల సమయం, రూ.300 ప్రత్యేక దర్శనానికి 3 గంటల సమయం పడుతోందని తెలిపారు.

కాగా, సోమవారం శ్రీవారిని 68,828 మంది భక్తులు దర్శించుకుని మొక్కులు చెల్లించుకున్నారు.

తిరుమలలో నిన్న 28,768 మంది భక్తులు నిన్న శ్రీవారికి తలనీలాలు సమర్పించారు. నిన్న శ్రీవారి హుండీ ఆదాయం రూ.3.53కోట్లు వచ్చిందని టిటిడి అధికారులు వెల్లడించారు......

తెలంగాణ లో పోలీసుల ముమ్మర తలిఖీలు పట్టుబడిన 5 లక్షల
తెలంగాణలో అసెంబ్లీ ఎన్నికలకు షెడ్యూల్ విడుదలైంది. ఫలితంగా.. ఎన్నికల కోడ్ కూడా నిన్నటి నుంచే అమల్లోకి వచ్చింది. ఇంకేముంది.. ఓవైపు ఎన్నికల ఏర్పాట్లు చకచకా జరిగిపోతుంటాయి. షెడ్యూల్ ప్రకారం ఎలక్షన్ ప్రక్రియ కొనసాగుతుంటుంది. ఇదంతా ఒకవైపు మాత్రమే.. ఇంకోవైపు రాజకీయ నాయకుల ప్రచారాలు, వ్యూహాలు నడుస్తూనే ఉంటాయి.

ఈ నేపథ్యంలోనే అక్రమ మద్యం, నగదు పెద్ద ఎత్తున తరలిస్తుంటారు. కాగా.. ఈ ఎన్నికల్లో ఇలాంటి వాటికి ఏమాత్రం చోటివ్వకుండా కఠిన బందోబస్తు ఏర్పాటు చేసినట్టు అధికారులు చెప్తున్నారు. ఇప్పటికే ఎన్నికల కోడ్ అమలు కావటంతో.. తనిఖీలు కూడా మొదలుపెట్టేశారు అధికారులు. అంతేనా.. ఎన్నిక కోడ్ అమల్లోకి వచ్చిన కొద్ది సేపటికే తనిఖీల్లో బోణీ నమోదైంది.

రాష్ట్రవ్యాప్తంగా పోలీసులు తనిఖీలు మొదలుపెట్టారు. ఎక్కడికక్కడ చెక్ పోస్టులు ఏర్పాటు చేసి.. అనుమానం వచ్చిన ప్రతి వాహనాన్ని క్షుణ్ణంగా తనిఖీలు చేస్తున్నారు.

ఈ క్రమంలోనే.. ఖమ్మం జిల్లాలోని వైరాలో తనిఖీలు నిర్వహిస్తున్న పోలీసులు.. ఓ కారును ఆపి చెక్ చేశారు. కాగా.. ఆ కారులో రూ.5 లక్షల రూపాయలు పట్టుబడ్డాయి. ఆ నగదుకు సంబంధించి సరైన పత్రాలు లేకపోవటంతో పోలీసులు కేసు నమోదు చేసి ఆ డబ్బును స్వాధీనం చేసుకున్నారు .

ఆంధ్రప్రదేశ్‌లో వెస్ట్ గోదావరి జిల్లాకు చెందిన టీడీపీ నాయకురాలు మాజీ జిల్లా పరిషత్ ఛైర్మన్‌కు ఇమ్మని రాజేశ్వరి తన వ్యవసాయ భూమికి చెందిన 5 లక్షల రూపాయలు తీసుకొని కారులో హైదరాబాద్ వెళ్తుండగా వైరా రింగ్ రోడ్ సెంటర్‌లో వైరా ఎస్సై మేడ ప్రసాద్ వాహనాలు చెకింగ్ చేస్తుండగా.. ఎలాంటి అనుమతి పత్రాలు లేవని నగదు స్వాధీనం చేసుకున్నారు.

స్వాధీనం చేసుకున్న 5 లక్షల రూపాయల నగదును ఐటీ అధికారులకు అప్పగిస్తామని తెలిపారు

ఇదిలా ఉంటే.. ఎన్నికలు సమీపిస్తున్న నేపథ్యంలో ఇప్పటికే ఈసీ అధికారుల ఆదేశాల మేరకు పోలీసులు, ఎక్సైజ్ శాఖ అధికారులు అప్రమత్తమయ్యారు.

షెడ్యూల్ విడుదలకు ముందే.. సుమారు 14 వేల లీటర్లకు పైగా అక్రమ మద్యాన్ని ఎక్సైజ్ శాఖ అధికారులు స్వాధీనం చేసుకుని ధ్వంసం చేశారు. అయితే.. ఇదంతా అక్టోబర్ 5 న జరిగిన సమీక్షా సమావేశం తర్వాత నుంచి చేసిన తనిఖీల్లోనే ఇంత మద్యాన్ని పట్టుకున్నారు. అంతేకాదు 170 కిలోల గంజాయి కూడా పోలీసులు స్వాధీనం చేసుకున్నారు...

తెలంగాణలో ప్రజాశాంతి పార్టీ పోటీ చేస్తుంది: కేఏ పాల్
 తెలంగాణలో ప్రజాశాంతి పార్టీ పోటీ చేస్తుందని ఆ పార్టీ అధ్యక్షులు కేఏ పాల్ వ్యాఖ్యానించారు. సోమవారం నాడు విశాఖపట్నంలోఅయన పర్యటించారు..

ఈసందర్భంగా ఆయన మీడియాతో మాట్లాడుతూ.. తెలంగాణ రాష్ట్రంలో ఎన్నికల నోటిఫికేషన్ విడుదల అయింది. తెలంగాణ ఎన్నికలో మా పార్టీ నుంచి 119 మంది అభ్యర్థులను త్వరలో ప్రకటిస్తామని అన్నారు.

కులమతాలకు అతీతంగా ఎన్నికల్లో గెలిచి అభివృద్ధి చేస్తాను. నేను దేశం, మన తెలుగు రాష్ట్రాలను కాపాడుకుంటున్నాను. కేంద్ర హోంమంత్రి అమిత్ షా, కేంద్ర మంత్రి రూపాల స్టీల్ ప్లాంట్‌ని ప్రైవేటు పరం చేయకుండా ఆపేశారు.

ఏపీలో బీజేపీ పార్టీ లేదు. ఇజ్రాయెల్, పాలస్తీనల గొడవలు ఆగిపోవలని దేవుడికి ప్రార్థన చేశా. శాంతి కోసం మీరందరు కూడా ప్రార్థన చేయాలి. డిసెంబర్10 తేదీన ప్రపంచ గ్లోబల్ క్రిస్మస్ వేడుకలు చేస్తున్నాం.

గ్లోబల్ క్రిస్మస్ వేడుకలకు 5 వేల మందిని ఆహ్వానిస్తున్నాం. డిసెంబర్ 10వ తేదీన ఇక్కడ నుంచే 200 దేశాలకి శాంతి సందేశం ఇస్తాను’’ అని కేఏ పాల్ పేర్కొన్నారు.