హస్తినలో బీజేపీ నేతలు..
 లిక్కర్ స్కాంలో కవితపై ఆరోపణల నేపథ్యంలో అమిత్ షాతో భేటీపై ఆసక్తి 

తెలంగాణ బీజేపీ ముఖ్య నేతలంతా హస్తినకు తరలి వెళ్లారు. అగ్ర నేత, కేంద్ర హోంమంత్రి అమిత్ షా ఆఫీస్ నుంచి ముఖ్యనేతలకు ఫోన్ కాల్స్ వెళ్లడంతో వారంతా హుటాహుటిన బయలుదేరి ఢిల్లీకి వెళ్లారు. 

ఈ రోజు మధ్యాహ్నం 12గంటలకు అమిత్ షాతో భేటీ కానున్నారు. తెలంగాణ రాష్ట్ర బీజేపీ అధ్యక్షుడు బండి‌ సంజయ్ సహా.. హాస్తినలో కిషన్ రెడ్డి, లక్ష్మణ్, డీకే అరుణ, రాజగోపాలరెడ్డి జాతీయ కార్యవర్గ సభ్యులు ఈటల రాజేందర్, జితేందర్ రెడ్డి, గరికపాటి, విజయశాంతి, వివేక్ తదితరులున్నారు. 

ఢిల్లీ ఉప ముఖ్యమంత్రి సిసోడియా అరెస్ట్.. లిక్కర్ స్కాంలో కవితపై ఆరోపణల నేపథ్యంలో అమిత్ షాతో భేటీపై ఆసక్తి నెలకొంది. రాష్ట్ర బీజేపీ నాయకులకు బీజేపీ అగ్ర నాయకత్వం దిశా నిర్దేశం చేయనుంది. రానున్న అసెంబ్లీ ఎన్నికల్లో తెలంగాణలో గెలుపే లక్ష్యంతో కమలం పార్టీ ప్రణాళికలు రచిస్తోంది..

రాజాసింగ్‌ బుల్లెట్‌ ప్రూఫ్‌ వాహనం మార్పిడి


గోషామహల్‌: గోషామహల్‌ ఎమ్మెల్యే రాజాసింగ్‌కు ప్రభుత్వం మరో బుల్లెట్‌ ప్రూఫ్‌ వాహనాన్ని కేటాయించింది. తనకిచ్చిన బుల్లెట్‌ ప్రూఫ్‌ కారు తరచు మొరాయిస్తోందని పలుమార్లు ఆయన సీఎం కేసీఆర్‌, డీజీపీ, హోంమంత్రి దృష్టికి తీసుకెళ్లారు. పాత వాహనాన్ని ఇటీవలే ప్రగతిభవన్‌కు తీసుకువెళ్లి అక్కడే వదిలిపెట్టి వచ్చారు. 

ఈ నేపథ్యంలో రాజాసింగ్‌కు పోలీసులు  సోమవారం వేరే బుల్లెట్‌ ప్రూఫ్‌ వాహనాన్ని సమకూర్చారు. అది 2017 మోడల్‌ది కావడం గమనార్హం. వాహనం కేటాయింపుపై ఎమ్మెల్యే  స్పందించారు. ‘‘ప్రస్తుతం నేను శ్రీశైలం నుంచి హైదరాబాద్‌కు బయలుదేరాను. 

తెలుపు రంగు బుల్లెట్‌ ప్రూఫ్‌ వాహనాన్ని ధూల్‌పేటలోని మా ఇంటికి తీసుకువచ్చి వదిలి వెళ్లినట్లు తెలిసింది. ఇంటికి వెళ్లాక ఆ వాహనం కండిషన్‌ ఎలా ఉందో తెలుసుకుంటా. నాకు కొత్త కారే కావాలని ఏమీ లేదు. మంచి కండిషన్‌లో ఉన్న వాహనం అయితే చాలు’’ అని ఎమ్మెల్యే రాజాసింగ్‌ స్పష్టీకరించారు.

Teachers MLC: ఉపాధ్యాయ ఎమ్మెల్సీ.. బరిలో 21మంది అభ్యర్థులు


హైదరాబాద్‌: మహబూబ్‌ నగర్-రంగారెడ్డి-హైదరాబాద్ ఉపాధ్యాయ ఎమ్మెల్సీ స్థానానికి సోమవారం నామినేషన్ల ఉపసంహరణ గడువు ముగిసింది. మొత్తంగా 21 మంది అభ్యర్థులు నామినేషన్లు దాఖలు చేశారు. ఫిబ్రవరి 27న నామినేషన్ల ఉపసంహరణకు చివరి తేదీ కాగా, నిర్ణీత సమయంలోపు నామినేషన్ వేసిన అభ్యర్థుల్లో ఎవరూ ఉపసంహరించుకోలేదు. 

దీంతో మొత్తం 21 మంది అభ్యర్థులు బరిలో ఉన్నట్లు ఎన్నికల రిటర్నింగ్ అధికారి ప్రియాంక ప్రకటించారు. మార్చి 13న ఉదయం 8 గంటల నుంచి సాయంత్రం 4 వరకు మహబూబ్ నగర్-రంగారెడ్డి-హైదరాబాద్ ఉపాధ్యాయ ఎమ్మెల్సీ స్థానానికి పోలింగ్ జరగనుంది. మార్చి 16న ఓట్ల లెక్కింపు చేయనున్నట్లు రిటర్నింగ్ అధికారి వెల్లడించారు.

స్థానిక సంస్థల ఎమ్మెల్సీ ఎన్నిక ఏకగ్రీవం..
హైదరాబాద్ జిల్లా స్థానిక సంస్థల ఎమ్మెల్సీ ఎన్నిక ఏకగ్రీవం అయింది. ఈ స్థానానికి ఇద్దరు మాత్రమే నామినేషన్లు దాఖలు చేశారు. పరిశీలనలో ఒక నామినేషన్‌ను రిటర్నింగ్‌ అధికారి తిరస్కరించారు. దీంతో మజ్లిస్‌ పార్టీకి చెందిన అభ్యర్థి మిర్జా రహమత్ బేగ్‌ మాత్రమే బరిలో ఉన్నారు. ఇవాళ నామినేషన్ల ఉపసంహరణకు చివరి రోజు కావడంతో ఆయన ఏకగ్రీవంగా ఎన్నికైనట్లు అధికారులు ప్రకటించారు. రహమాత్ బేగ్‌కు ఎమ్మెల్సీగా గెలుపొందినట్లు ధ్రువీకరణ పత్రాన్ని అందించారు.

MLC Election: తెలుగు రాష్ట్రాల్లో ఎమ్మెల్యే కోటా ఎమ్మెల్సీ ఎన్నికల షెడ్యూల్‌ ఖరారు


దిల్లీ: తెలుగు రాష్ట్రాల్లో ఎమ్మెల్యే కోటా ఎమ్మెల్సీ (MLC Elections) ఎన్నికలకు కేంద్ర ఎన్నికల సంఘం (ఈసీ) (EC) షెడ్యూల్‌ విడుదల చేసింది. ఏపీ (AP) లో 7 స్థానాలకు, తెలంగాణ (Telangana)లో 3 మూడు స్థానాలకు ఎన్నిక జరగనుంది. ప్రస్తుతం ఉన్న ఎమ్మెల్సీల పదవీకాలం ముగియనున్న నేపథ్యంలో కేంద్ర ఎన్నికల సంఘం షెడ్యూల్‌ విడుదల చేసింది.

తెలంగాణలో నవీన్‌ రావు, గంగాధర్‌ గౌడ్‌, ఎలిమినేటి కృష్ణారెడ్డి పదవీ విరమణ చేయనున్నారు. అలాగే ఏపీలో నారా లోకేశ్‌, భగీరథరెడ్డి, పోతుల సునీత, బచ్చుల అర్జునుడు, డొక్కా మాణిక్య వరప్రసాద్‌, పెనుమత్స సూర్య నారాయణ పదవీ కాలం ముగియనుంది. ఖాళీ అవనున్న ఈ 10 స్థానాలకు ఎన్నికలు జరగనున్నాయి.

ముఖ్యమైన తేదీలు..

 నోటిఫికేషన్‌ : మార్చి 6
 నామినేషన్ల స్వీకరణ : మార్చి 13 వరకు
 నామినేషన్ల పరిశీలన : మార్చి 14
 పోలింగ్‌, కౌంటింగ్‌ : మార్చి 23

బైరి నరేష్ పుంగి బజాయించిన అయ్యప్ప భక్తులు
 బైరి నరేష్ పై మరోసారి దాడి!

అయ్యప్ప స్వామి పుట్టుక, చరిత్రకు సంబంధించి అనుచిత వ్యాఖ్యలు చేసిన ఘటనలో నాస్తిక సంఘం అధ్యక్షుడు అయిన బైరి నరేష్ పై వరంగల్ లో దాడి చేశారు హిందూ సంఘ కార్యకర్తలు.

గతంలో అయ్యప్ప స్వామి పుట్టుక, చరిత్రపై అనుచిత వ్యాఖ్యలు చేసిన నాస్తిక సంఘం అధ్యక్షుడు బైరి నరేష్ ను అరెస్ట్ చేసిన సంగతి తెలిసిందే. అయితే కొన్ని రోజుల ముందు బైరి నరేష్ కు షరతులతో కూడిన బెయిల్ ను మంజూరు చేసింది కొడంగల్ కోర్టు. ఈ నేపథ్యంలోనే బెయిల్ పై బయటికి వచ్చిన నరేష్ మరోసారి అయ్యప్ప పుట్టుకకు సంబంధించిన ఆధారాలు నాకు కావాల్సిందే అని తాజాగా ఇచ్చిన ఓ ఇంటర్వ్యూలో మళ్లీ అనుచిత వ్యాఖ్యలు చేశాడు. దాంతో ఆగ్రహించిన హిందూ సంఘాల కార్యకర్తలు తాజాగా వరంగల్ లో ఓ కార్యక్రమానికి వచ్చిన బైరి నరేష్ పై మరోసారి దాడి చేశారు. పూర్తి వివరాల్లోకి వెళితే..

అయ్యప్ప స్వామి పుట్టుక, చరిత్రకు సంబంధించి అనుచిత వ్యాఖ్యలు చేసిన ఘటనలో నాస్తిక సంఘం అధ్యక్షుడు అయిన బైరి నరేష్ ను అరెస్ట్ చేశారు పోలీసులు. తాజాగా కొన్ని రోజుల క్రితం షరతులతో కూడిన బైయిల్ పై విడుదల అయ్యాడు బైరి నరేష్. విడుదల అయిన తర్వాత కూడా ఓ టీవీ ఛానల్ కు ఇచ్చిన ఇంటర్వ్యూలో నేను గతంలో చేసిన వ్యాఖ్యలకు కట్టుబడి ఉన్నానని, తనకు అయ్యప్ప పుట్టుకకు గల ఆధారాలు కావాల్సిందే అని మరోసారి వివాదాస్పద వ్యాఖ్యలు చేశాడు బైరి నరేష్. దాంతో ఈ అనుచిత వ్యాఖ్యలపై హిందూ సంఘాలు మరోసారి ఆగ్రహం వ్యక్తం చేశాయి.

ఈ క్రమంలోనే వరంగల్ లోని ఆదర్శ లా కాలేజ్ లో ఓ కార్యక్రమానికి హాజరైన బైరి నరేష్ పై హిందూ సంఘ కార్యకర్తలు దాడికి దిగారు. కార్యక్రమాన్ని ముగించుకుని పోలీస్ వాహనంలో వస్తున్న బైరి నరేష్ పై హిందూ సంఘ నాయకులు దాడికి దిగారు. బైరి నరేష్ ను వెంబడించి, అతడి బట్టలు చింపి పరిగెత్తించి కొట్టారు హిందూ కార్యకర్తలు. తనకు పోలీస్ ప్రొటెక్షన్ కల్పించాలని బైరి నరేష్ పోలీసులకు విన్నవించుకున్నట్లు సమాచారం..

Khushbu Sundar: ఖుష్బుకు కీలక బాధ్యతలు


న్యూఢిల్లీ: తమిళనాడు భారతీయ జనతా పార్టీ (BJP) నాయకురాలు ఖుష్బూ సుందర్‌(Khushbu Sundar)కు కీలక బాధ్యతలు లభించాయి. ఆమెను జాతీయ మహిళా కమిషన్ సభ్యురాలి(National Commission for Women)గా నామినేట్ చేశారు. 

దక్షిణాదిలో నటిగా పాపులర్ అయిన ఆమె వందకు పైగా తమిళ సినిమాల్లో నటించారు. రాజకీయాలంటే ఆసక్తి ఉండటంతో 2010లో ఆమె డీఎంకే పార్టీలో చేరారు. నాలుగేళ్ల తర్వాత హస్తం పార్టీలో చేరారు. 2020 వరకూ కాంగ్రెస్ పార్టీలో ఉంటూ అధికార ప్రతినిధిగా కూడా సేవలందించారు. రాముడు, కృష్ణుడు, హనుమంతుడి బొమ్మలున్న చీర ధరించడం ద్వారా అప్పట్లో కలకలం రేపారు. క్షమాపణలు చెప్పాలంటూ హిందూ సంస్థలు రచ్చ చేశాయి కూడా.

ఖుష్బూ సుందర్‌ కొంతకాలం క్రితం బీజేపీలో చేరారు. 2021 తమిళనాడు అసెంబ్లీ ఎన్నికల్లో పోటీ చేశారు. సోషల్ మీడియాలో యాక్టివ్‌గా ఉంటూ తమిళనాడు ప్రభుత్వ విధానాలను ఎండగడుతూ వస్తున్నారు. బాగా మాట్లాడతారని పేరు తెచ్చుకున్న ఖుష్బూ సుందర్‌ సామాజిక అంశాలపై సోషల్ మీడియాలో స్పందిస్తూ ఉంటారు. మహిళల సమస్యలపై మరింత ఫోకస్ చేసేందుకు అవకాశం లభిస్తుందని ఖుష్బూ అంటున్నారు. మహిళల జోలికి రాజకీయ పార్టీల నేతలు వస్తే ఊరికునేది లేదని ఆమె హెచ్చరించారు.

సీబీఐ కస్టడీకి దిల్లీ డిప్యూటీ సీఎం


దిల్లీ: మద్యం కుంభకోణంలో అరెస్టయిన దిల్లీ ఉప ముఖ్యమంత్రి మనీశ్‌ సిసోదియాకు రౌస్ అవెన్యూ కోర్టు ఐదు రోజుల కస్టడీ విధించింది. 

సిసోదియాను మార్చి 4 వరకు సీబీఐ కస్టడీకి అప్పగించింది. మద్యం కుంభకోణం కేసులో ఆయనను సీబీఐ అరెస్టు చేసి సోమవారం కోర్టులో హాజరుపర్చింది. 

ప్రభుత్వ మద్యం విధానం రూపకల్పన, అమలులో అవకతవకలు చోటుచేసుకున్న వ్యవహారంపై జరుపుతున్న దర్యాప్తులో భాగంగా ఆయనను నిన్న సీబీఐ అదుపులోకి తీసుకుంది.

మారకద్రవ్యాల నుండి యువతను కాపాడుదాం
•PYL మండల మహాసభలో ప్రగతిశీల యువజన సంఘం రాష్ట్ర ప్రధాన కార్యదర్శి ఇందూరు సాగర్ 

ప్రగతిశీల యువజన సంఘం (PYL)మోతే మండల ప్రధమ మహాసభ రాయిపాడు గ్రామంలో కోడి లింగరాజు అధ్యక్షతన జరిగింది. ఈ మహాసభకు ముందుగా బిగిపిడికిలి జెండాను పీవైఎల్ జిల్లా అధ్యక్షులు నల్గొండ నాగయ్య ఆవిష్కరించారు. ఈ మహాసభను ప్రారంబిస్తూ ఐఎఫ్ టి యూ జిల్లా కార్యదర్శి గంట నాగయ్య మాట్లాడారు. 

అనంతరం జరిగిన మహాసభలో ముఖ్య అతిథిగా పివైఎల్ రాష్ట్ర ప్రధాన కార్యదర్శి ఇందూరు సాగర్ పాల్గొని మాట్లాడుతూ దేశంలో, రాష్ట్రంలో యువత మద్యం, గంజాయి,గుట్కా, మారకద్రవ్యాలకు అలవాటు పడి చెడు వ్యసనాలకు గురై జీవితాలను కోల్పోతున్నారని, ప్రభుత్వం వీటిని నియంత్రించడంలో ఘోరంగా విఫలం చెందిందని దుయ్యబెట్టారు. 

ఎంజీఎం మెడికల్ కళాశాలలో ప్రీతి అనే విద్యార్థిని ఆత్మహత్యకు ప్రభుత్వమే బాధ్యత వహించాలని, ప్రీతి కుటుంబానికి కోటి రూపాయలు ఎక్స్గ్రేషియా చెల్లించాలని అన్నారు. విద్యాసంస్థలలో డ్రగ్స్, గంజాయి, మారక ద్రావవ్యాలను విక్రయిస్తున్న పోలీసులు చోద్యం చూస్తున్నారని, తెలంగాణ ప్రభుత్వం ఏర్పాటు చేసిన "షి" టీములు "షో" టీములుగానే మారినాయని పేర్కొన్నారు. వెంటనే ప్రభుత్వం మేల్కొని రాష్ట్రంలో యదేచ్ఛగా సాగుతున్న మద్యం, గంజాయి గుట్కా తదితర మారక ద్రవ్యాలను నిషేధించాలని,    షి టీoలను వివిధ కళాశాలలో నిరంతరం ఉంచాలని డిమాండ్ చేశారు.
 ఐఎఫ్ టి యూ జిల్లా కార్యదర్శి గంట నాగయ్య మాట్లాడుతూ దేశంలో,రాష్ట్రంలో మోడీ, కేసీఆర్ ప్రభుత్వాలు నిరుద్యోగులను గాలికి వదిలేసారని, నిరుద్యోగ సమస్యలను పరిష్కరించడంలో ఘోరంగా విఫలం చెందారని అన్నారు. 26 లక్షల మంది నిరుద్యోగులు ప్రభుత్వానికి దరఖాస్తు చేసుకున్నారని ఇప్పటివరకు భారీ నోటిఫికేషన్ ఇవ్వడంలో తెలంగాణ ప్రభుత్వం ఘోరంగా విఫలం చెందిందని, దేశంలో కోటి ఉద్యోగాలు ఇస్తారన్న మోడీ ప్రభుత్వం హిందుత్వం ముసుగులో ప్రజల ఆస్తులను కార్పొరేట్ శక్తులకు, బహుళ జాతి సమస్యలకు అప్పనంగా కట్టబెట్టి ప్రజలను మభ్యపెడుతున్నదని బియ్యబట్టారు. వెంటనే దేశంలో, రాష్ట్రంలో నిరుద్యోగ సమస్యలను పరిష్కరించకపోతే ప్రగతిశీల యువకులు పెద్ద ఎత్తున ఉద్యమాలు నిర్వహిస్తారని హెచ్చరించారు.
 ఈ కార్యక్రమంలో పి వై ఎల్ జిల్లా అధ్యక్ష ,కార్యదర్శులు నల్లగొండ నాగయ్య, కునుకుంట్ల సైదులు, జిల్లా నాయకులు వీరబోయిన రమేష్, భువనగిరి గిరిబాబు, ధరావత్ రవి, ఏఐకేఎంఎస్ జిల్లా నాయకులు కాకి మోహన్ రెడ్డి, కోట్ల మధుసూదన్ రెడ్డి, ఎర్రబోయిన లింగయ్య, ఎర్రబోయిన పుల్లయ్య, భానోత్ శ్రీకాంత్, ఎర్ర ఎంకన్న, ఇరుగు మల్లయ్య, గుణగంటి నాగరాజు, కోడి లింగరాజు, నాగరాజు తదితరులు హాజరయ్యారు.

ఆయుష్మాన్ భారత్ ను అందరూ సద్వినియోగం చేసుకోవాలిి


 నకిరేకల్ నియోజకవర్గం చిట్యాల మండలం ఉరుమడ్ల గ్రామంలో ఈరోజు కేంద్ర ప్రభుత్వం భారత ప్రధాని నరేంద్ర మోడీ గారు పేద ప్రజల ఆరోగ్యం కోసం ప్రవేశపెట్టిన ఆయుష్మాన్ భారత్ హెల్త్ కార్డ్ ను భారతీయ జనతా పార్టీ నల్లగొండ జిల్లా కార్యవర్గ సభ్యులు పల్లపు బుద్ధుడు గారు ఉరుమడ్లలో పాల్గొని ప్రతి ఒక్కరు ఈ హెల్త్ కార్డును ఉపయోగించుకునే 1100 పైగా అన్ని రకాల వైద్య చికిత్సలు అందే విధంగా పేద ప్రజలకు  చేరువగా ఉరుమడ్ల గ్రామంలో బిజెపి  బూత్ కమిటీల ఆధ్వర్యంలో ఏర్పాట్లు చేసినారు. 

ఉరుమడ్ల గ్రామ ప్రజలు ప్రతి ఒక్కరూ నరేంద్ర మోడీ గారు ఇస్తున్న ABHA హెల్త్ కార్డ్ ను తెల్ల రేషన్ కార్డు ఉన్న ప్రతి కుటుంబం ఐదు లక్షల వరకు ఉచిత ఆరోగ్య చికిత్సల కోసం ఏర్పాటుచేసిన ఈ కార్డును సద్వినియోగం చేసుకోవాలని ఈ ఆయుష్మాన్ భారత్ కార్డు ద్వారా రాష్ట్రంలో ప్రతి హాస్పిటల్ లో ఉచితంగా 1100 రకాల  ఆరోగ్య పరీక్షలు చికిత్సలు చేసుకునే వెసులుబాటు ఉంటుందన్నారు. 

తెలంగాణలో పేద బడుగు బలహీన వర్గాల ప్రజలు ఎవరికోసం ఎదురు చూడకుండా కేంద్ర ప్రభుత్వం ఇస్తున్న ఆయుష్మాన్ భారత్ కార్డు ద్వారా ఆపదలో ఉన్న ప్రతి ఒక్కరూ దగ్గరలోని ఆసుపత్రికి వెళ్లి వైద్య చికిత్సలు చేయించుకునే విధంగా భారత ప్రధాని నరేంద్ర మోడీ గారు ఈ సదా అవకాశాన్ని తెలంగాణ ప్రజలకు అందజేశారన్నారు. కావున ఉరుమడ్ల గ్రామ ప్రజలు ప్రతి ఒక్కరు ఈ యొక్క ఆయుష్మాన్ భారత్ కార్డు పొందాలని ఇట్టి కార్డును ఉచితంగా భారతీయ జనతా పార్టీ బూత్ కమిటీ అధ్యక్షులు  ఇంటి ఇంటికి వచ్చి అందజేస్తామన్నారు. ఇంత గొప్ప అవకాశాన్ని ప్రతి ఒక్కరూ సద్వినియోగం చేసుకోవాలని తెలిపారు. ఈ కార్యక్రమంలో బిజెపి  సీనియర్ నాయకులు ఉయ్యాల లింగస్వామి, యువజన నాయకులు  పాకాల దినేష్, బూత్ కమిటీ అధ్యక్షులు ఈదుల పవన్, సుంకరి మల్లేష్, గంగాపురం వెంకన్న, మల్లేష్, జగన్, రాంబాబు, లింగస్వామి, నరసింహ తదితరులు పాల్గొన్నారు.

ఒక్క రోజులో మూడు ఫోన్లు మార్చిన సిసోదియా..!


దిల్లీ: మద్యం కుంభకోణంలో అరెస్టయిన దిల్లీ ఉపముఖ్యమంత్రి మనీశ్‌ సిసోదియా (Manish Sisodia)ను నేడు కోర్టులో హాజరుపర్చనున్నారు. ప్రభుత్వ మద్యం విధాన రూపకల్పన, అమలులో అవకతవకలు చోటుచేసుకున్న వ్యవహారంపై జరుపుతున్న దర్యాప్తులో భాగంగా సిసోదియాను నిన్న సీబీఐ (CBI) అరెస్టు చేసిన విషయం తెలిసిందే. రాత్రంతా ఆయన కేంద్ర దర్యాప్తు సంస్థ ప్రధాన కార్యాలయంలోనే గడిపారు. ఈ ఉదయం ఆయనకు వైద్య పరీక్షలు నిర్వహించనున్నారు. అనంతరం మధ్యాహ్నం 2 గంటలకు రౌస్‌ అవెన్యూ కోర్టులో సిసోదియాను హాజరుపర్చనున్నారు.

ఛార్జ్‌షీట్‌లో పేరు..
సిసోదియా (Manish Sisodia) అరెస్టుపై సీబీఐ అధికారిక ప్రకటన విడుదల చేసింది. విచారణకు సహకరించకపోవడం వల్లే ఆయనను అరెస్టు చేసినట్లు వెల్లడించింది. కీలకమైన అంశాలపై ఆయన సరిగా సమాధానం ఇవ్వలేదని పేర్కొంది. తప్పించుకునే విధంగా సమాధానాలు ఇచ్చారని, విరుద్ధమైన సాక్ష్యాలను ఎదుర్కొన్నప్పటికీ దర్యాప్తునకు సహకరించలేదని ఆరోపించింది. ఈ కేసులో సిసోదియా నుంచి రాబట్టాల్సిన సమాచారం ఎంతో ఉన్నందున.. ఆయనను తమ కస్టడీకి అప్పగించాలని సీబీఐ.. న్యాయస్థానాన్ని కోరనున్నట్లు తెలుస్తోంది. కాగా.. ఈ కేసులో సీబీఐ దాఖలు చేసిన ఛార్జ్‌షీట్‌లో సిసోదియా పేరు కూడా ఉన్నట్లు సీబీఐ (CBI) వర్గాలు తెలిపాయి. అయితే, ఈ కేసులో ఆయనను నిందితుడిగా పేర్కొనలేదని తెలుస్తోంది. ఆయనకు వ్యతిరేకంగా పక్కా సాక్ష్యాధారాలు సేకరించిన తర్వాతే అరెస్టు చేసినట్లు సదరు వర్గాలు పేర్కొన్నాయి.

18 ఫోన్లు ఉపయోగించిన సిసోదియా..
సిసోదియా (Manish Sisodia) ఇతర వ్యక్తుల పేర్ల మీద అనేక ఫోన్‌ నంబర్లు, ఫోన్లు తీసుకున్నారని, ఆ తర్వాత వాటిల్లో కొన్నింటిని ధ్వంసం చేశారని సీబీఐ (CBI) వర్గాలు ఆరోపించాయి. ఆయన 18 ఫోన్లు, నాలుగు ఫోన్‌ నంబర్లు ఉపయోగించేవారని పేర్కొన్నాయి. ఒక్క రోజులోనే ఆయన మూడు ఫోన్లను మార్చినట్లు తమ దర్యాప్తులో తేలిందని చెప్పాయి. అయితే దీనిపై అధికారిక ప్రకటన లేదు.

ఆప్‌ దేశవ్యాప్త నిరసనలు..
సిసోదియా అరెస్టుకు నిరసనగా ఆమ్‌ ఆద్మీ పార్టీ (AAP) నేడు దేశవ్యాప్త నిరసనలు చేపట్టనుంది. ఈ నేపథ్యంలో దేశ రాజధాని దిల్లీలో భద్రతను కట్టుదిట్టం చేశారు. ఆమ్‌ ఆద్మీ పార్టీ కార్యాలయం వద్ద భద్రతా సిబ్బంది భారీగా మోహరించారు. అటు సీబీఐ (CBI) కార్యాలయం ముందూ భద్రతను పెంచారు.