మొగిలయ్యకు ఇంటి స్థలం పంపిణీపై వివాదం.. సీఎం దృష్టికి తీసుకెళ్తానన్న ఎమ్మెల్యే


హైదరాబాద్‌: తెలంగాణ ప్రభుత్వం గురువారం పలువురికి ఇళ్ల స్థలాలు కేటాయించింది. ఇందులో భాగంగా సీఎం కేసీఆర్‌ ప్రకటన మేరకు పన్నెండు మెట్ల కిన్నెర వాయిద్యకారుడు, పద్మశ్రీ పురస్కార గ్రహీత దర్శనం మొగిలయ్యకు కూడా హైదరాబాద్‌లో ఇంటి స్థలం పత్రాలను అధికారులు అందజేశారు. 

తనకు చెప్పకుండా మొగిలయ్యకు ఇంటి స్థలం పంపిణీ చేశారని నాగర్‌ కర్నూలు జిల్లా అచ్చంపేట బీఆర్‌ఎస్‌ ఎమ్మెల్యే గువ్వల బాలరాజు అసహనం వ్యక్తం చేశారు.

 స్థానిక శాసనసభ్యుడిగా స్థలం పంపిణీ కార్యక్రమం గురించి తనకు సమాచారం ఇవ్వలేదని ఆగ్రహం వ్యక్తం చేశారు. తెలంగాణ జాతి, ఖ్యాతిని జాతీయ.. అంతర్జాతీయ స్థాయికి తీసుకెళ్లిన కొందరికి జూబ్లీహిల్స్‌, బంజారాహిల్స్‌లో స్థలాలు ఇచ్చారన్న బాలరాజు.. మొగిలయ్యకు మాత్రం బీఎన్‌రెడ్డి నగర్‌లో స్థలం ఇవ్వడమేంటని ప్రశ్నించారు. ఈ విషయాన్ని సీఎం కేసీఆర్‌ దృష్టికి తీసుకెళ్తానని పేర్కొన్నారు.

Kohinoor diamond : కోహినూర్‌.. రాజులకు అరిష్టం.. రాణులకు అదృష్టం!


వలస పాలనకు గుర్తుగా బ్రిటన్‌(britain) రాచకుటుంబం చేతిలో ఇప్పటికీ కోహినూర్‌ వజ్రం(Kohinoor diamond) ఉంది. గతేడాది రాణి ఎలిజబెత్‌ 2 కన్నుమూశారు. మరణించే వరకు ఆమె కిరీటంలోనే కోహినూర్‌ వజ్రం ఉండేది. ప్రత్యేక సందర్భాల్లో ఆమె దాన్ని ధరిస్తూ వచ్చారు. రాణి మరణం తరువాత ఆమె కుమారుడు కింగ్‌ ఛార్లెస్‌-3(king charles) పట్టాభిషిక్తుడు కానున్నాడు. విక్టోరియా మహారాణి కోహినూర్‌ గురించి రాసిన వీలునామా ప్రకారం ఛార్లెస్‌ భార్య, బ్రిటన్‌ రాణి కెమిల్లా(camilla) దానిని ధరించాల్సి ఉంటుంది. కానీ కెమిల్లా తన కిరీటంలో కోహినూర్‌ను పోలిన మరో వజ్రం ధరిస్తారని ఇటీవల బకింగ్‌హాం ప్యాలెస్‌ వర్గాలు తెలిపాయి. చరిత్రలో కోహినూర్‌ ధరించిన రాజులందరూ చరిత్రలో కలిసిపోయారు. అందుకే ఛార్లెస్‌-3, కెమిల్లా కోహినూర్‌ను దూరం పెడుతున్నారా? అనే సందేహాలు మొదలయ్యాయి.

తెలుగు నేలపై కోహినూర్‌ పుట్టుక!
కోహినూర్ పుట్టుక గురించి అనేక ఊహాగానాలున్నాయి. చాలా మంది ఆంధ్రప్రదేశ్‌లోని గుంటూరు జిల్లా కొల్లూరులో తొలిసారి కోహినూర్‌ దొరికిందని చెబుతారు. అప్పుడు దాని బరువు గురించి కచ్చితమైన రికార్డులు లేవు. ప్రస్తుతం కోహినూర్‌ 105.6 క్యారెట్లు ఉంది. ఈ వజ్రం కాకతీయుల ఆధీనంలో ఉండేదని చరిత్రకారులు చెబుతున్నారు. వారి ప్రకారం కాకతీయ చక్రవర్తి ప్రతాపరుద్రుడు.. దిల్లీ సుల్తాను పంపిన మాలిక్ కాఫుర్‌తో సంధి చేసుకొని అపారమైన సంపద, కోహినూర్‌ వజ్రం సమర్పించుకున్నాడని అంటారు. 

చేతులు మారుతూ.. రాజ్యాలు తిరుగుతూ..
ఈ వజ్రాన్ని 1304లో దిల్లీ రాజు అల్లావుద్దీన్‌ ఖిల్జీ స్వాధీనం చేసుకున్నాడు. దాన్ని సమర్‌ఖండ్‌కు పంపించారు. 1526 నాటికి ఈ వజ్రం మొఘల్‌ రాజు బాబర్‌ చేతికి వచ్చింది. ఆయన ‘బాబర్‌ నామా’లో ప్రత్యేకంగా వజ్రం గురించి రాశాడు. దానిని సుల్తాన్‌ ఇబ్రహీం లోడి తనకు బహుమతిగా ఇచ్చినట్లు పేర్కొన్నాడు. ప్రపంచంలో ఒక రోజు ఉత్పత్తి అయ్యే సంపదలో సగం ధరకు సమానమైనది కోహినూర్‌ అని బాబర్‌నామాలో వ్యాఖ్యానించాడు. బాబర్‌ నుంచి ఔరంగజేబు వరకు ఈ వజ్రం మొఘల్‌ వారసుల చేతులు మారుతూ వచ్చింది. ఔరంగజేబు మనవడైన సుల్తాన్‌ మహమ్మద్‌ కాలంలో ఇది పరాయివారి సొంతమైంది. 

పర్షియన్‌ జనరల్‌ నాదిర్‌ షా 1739 నాటికి భారత్‌లో అడుగుపెట్టాడు. ఆ వెంటనే సుల్తాన్‌ మహమ్మద్‌ కిరీటంపై కన్నేశాడు. నాదిర్‌ షాకు లొంగిపోయిన సుల్తాన్‌ మహమ్మద్‌ ఖరీదైన వజ్రాన్ని ఆయన చేతుల్లో పెట్టాడు. అప్పుడే నాదిర్‌ షా వజ్రం నాణ్యత, మెరుపును చూసి దానికి కోహినూర్‌గా నామకరణం చేశాడు. పర్షియన్‌ భాషలో కోహినూర్‌ అంటే ‘కాంతిశిఖరం’ అని అర్థం. అయితే కోహినూర్‌ను చేజిక్కించుకుని భారత్‌ విడిచి పర్షియా(ఇరాన్‌) వెళ్లిన నాదిర్‌షా దాన్ని తన బంగారు సింహాసనంలో పొదిగాడు. షా 1747లో హత్యకు గురికావడంతో షా జనరల్స్‌లో ఒకరైన అహ్మద్‌ షా దుర్రాని చేతుల్లోకి కోహినూర్‌ వెళ్లింది. దుర్రానీ వారసుడు షా షుజా దుర్రానీ 1813లో  కోహినూర్‌ను తిరిగి భారత్‌కు తీసుకొచ్చాడు. సిక్కు రాజ్యం స్థాపించిన రంజిత్‌ సింగ్‌కు దానిని అప్పగించాడు. ప్రతిగా అఫ్గాన్‌ సింహాసనం షా షుజా దక్కించుకునేందుకు రంజిత్‌ సింగ్‌ సహాయం చేశాడు. 

ఆంగ్లో-సిక్కు యుద్ధం
బ్రిటిష్‌ వారు పంజాబ్‌ ఆక్రమణకు దండెత్తడంతో సిక్కు రాజులకు, బ్రిటిష్‌ వారికి మధ్య యుద్ధాలు జరిగాయి. 1849 నాటికి బ్రిటిష్‌ పాలకులు పంజాబ్‌ను పూర్తిగా ఆక్రమించి ఆభరణాలను జప్తు చేశారు. రంజిత్‌ సింగ్‌ చనిపోవడంతో ఆయన సతీమణి రాణి జిందన్‌ను ఖైదు చేసి జైలుకు పంపించారు. వారి కుమారుడైన బాలుడు దులీప్‌సింగ్‌తో బ్రిటిష్‌ వారు లాహోర్‌ ఒప్పందం పేరిట సంతకాలు చేయించుకున్నారు. వెంటనే కోహినూర్‌ వజ్రాన్ని లాహోర్‌లోని బ్రిటిష్‌ ఈస్టిండియా కంపెనీ ఖజానాకు తరలించారు. అటు నుంచి భారీ ఓడలో డైమండ్‌ను తరలిస్తుండగా కలరా ప్రబలి చాలా మంది చనిపోయారు. 1850వ సంవత్సరంలో బ్రిటన్‌లో ఉన్న క్వీన్‌ విక్టోరియా వద్దకు డైమండ్‌ చేరింది. ఆమె దాన్ని లండన్‌లో ప్రదర్శనకు ఉంచారు. అయితే కోహినూర్‌ వన్నె తగ్గిందని భావించిన విక్టోరియా 1852లో దానికి మెరుగులు దిద్దించాలని నిర్ణయించారు. డచ్‌కు చెందిన జువెలర్‌ కాంటోర్‌కు ఆ పనిని అప్పగించగా కోహినూర్‌ 108.93 క్యారట్లకు తగ్గిపోయింది. 

విక్టోరియా వీలునామా
కోహినూర్‌ చరిత్రలో దానిని ధరించిన లేదా తమ వద్ద దాచుకున్న రాజులందరూ కాలగర్భంలో కలిసిపోయారు. దాంతో విక్టోరియా జాగ్రత్తపడింది. అరుదైన సందర్భాల్లో మాత్రమే దానిని ధరిస్తూ వచ్చింది. మహారాణులు మాత్రమే ఈ వజ్రాన్ని ధరించాలంటూ ఆమె వీలునామా కూడా రాసింది. ఒక వేళ రాజు పాలిస్తుంటే అతడి భార్యగా రాణికి ఆ వజ్రాన్ని ధరించే హక్కుంటుందని అందులో పేర్కొంది. విక్టోరియా తరువాత దాన్ని క్వీన్‌ అలెగ్జాండ్రా, క్వీన్‌ మేరీ, క్వీన్‌ ఎలిజబెత్‌-2(queen elizabeth) తమ కిరీటంలో ధరించారు. ప్రస్తుతం కోహినూరు వజ్రం టవర్‌ ఆఫ్‌ లండన్‌ వద్దనున్న జువెల్‌ హౌస్‌లో ఉంది. ఈ వజ్రం మాకు ఇవ్వాలని భారత్‌(india) పలుమార్లు విజ్ఞప్తి చేసినా బ్రిటన్‌ తిరస్కరించింది. పాక్‌, అఫ్గాన్‌ దేశాలు కూడా ఈ వజ్రం తమ సొంతమని.. తమకే ఇవ్వాలని అడుగుతున్నాయి.

Kanna Laxminarayana: సోము వీర్రాజు ప్రవర్తన నచ్చకే భాజపాకు రాజీనామా: కన్నా


గుంటూరు: ప్రధాని నరేంద్రమోదీ నాయకత్వం పట్ల ఆకర్షితుడినై భాజపా(BJP)లో చేరానని మాజీ మంత్రి కన్నా లక్ష్మీనారాయణ (Kanna Laxminarayana) చెప్పారు..

చేరినప్పటి నుంచి సామాన్య కార్యకర్తగా పనిచేశానని.. దాన్ని గుర్తించే రాష్ట్ర అధ్యక్షుడిగా నియమించారన్నారు. అయితే ప్రస్తుత రాష్ట్ర అధ్యక్షుడు సోము వీర్రాజు(Somu Veerraju) ప్రవర్తన బాగాలేకనే భాజపాకు రాజీనామా చేస్తున్నట్లు తెలిపారు. అయితే మోదీపై ఉన్న అభిమానం ఎప్పటికీ చెక్కుచెదరని చెప్పారు. త్వరలోనే భవిష్యత్‌ కార్యాచరణను ప్రకటిస్తానన్నారు. గుంటూరులో ముఖ్య అనుచరులతో సమావేశం అనంతరం కన్నా మీడియాతో మాట్లాడారు..

''2014లో భాజపాలో చేరా. ఒక సామాన్య కార్యకర్తగా పనిచేస్తూ వచ్చా. పార్టీ రాష్ట్ర అధ్యక్షుడిగా అవకాశం కల్పించారు. రాష్ట్రంలోని 175 నియోజకవర్గాల్లో పర్యటించి 2019 ఎన్నికలకు అభ్యర్థులను ప్రకటించా. 2024 ఎన్నికల్లో ఏపీలో భాజపాను అధికారంలోకి తీసుకురావడమే లక్ష్యంగా పనిచేశా. సీఎం జగన్‌ అనాలోచిత నిర్ణయాలకు వ్యతిరేకంగా చాలా పోరాటాలు చేశా. ప్రజల తరఫున అనేక సమస్యలపై పోరాడా. కరోనా తర్వాత నన్ను మార్చి సోము వీర్రాజును అధ్యక్షుడిగా చేశారు. ఆయన ప్రవర్తన నచ్చకే రాజీనామా చేశా. స్థానిక నాయకుల వైఖరి కారణంగా పార్టీలో మనుగడ సాగించలేను. నాతో పాటు రాజీనామా చేసిన మిత్రులకు ధన్యవాదాలు'' అని కన్నా లక్ష్మీనారాయణ అన్నారు.

JEE Main: ‘జేఈఈ’ దరఖాస్తు గడువు మార్చి 12


•ఎట్టకేలకు మొదలైన తుది విడత అర్జీ ప్రక్రియ
హైదరాబాద్‌: దేశవ్యాప్తంగా ఏప్రిల్‌లో నిర్వహించనున్న జేఈఈ మెయిన్‌ తుది విడతకు దరఖాస్తు స్వీకరణ ప్రక్రియ ఎట్టకేలకు బుధవారం మొదలైంది. అభ్యర్థులు వచ్చే మార్చి 12వ తేదీ రాత్రి 9 గంటల వరకు దరఖాస్తు చేసుకోవచ్చు. 

ఈ మేరకు జాతీయ పరీక్షల సంస్థ (ఎన్‌టీఏ) ఆన్‌లైన్‌లో దరఖాస్తుల సమర్పణకు లింక్‌ను అందుబాటులోకి తెచ్చింది. గతంలో ప్రకటించిన ప్రకారం అభ్యర్థులు ఫిబ్రవరి 7వ తేదీ నుంచి మార్చి 7 వరకు దరఖాస్తులు సమర్పించాలి. 

అందుకోసం లక్షల మంది విద్యార్థులు ఎదురుచూస్తున్నా ఉలుకూపలుకూ లేని ఎన్‌టీఏ వారం రోజులు ఆలస్యంగా దరఖాస్తుల ప్రక్రియను ప్రారంభించింది. తుది విడత పరీక్షలు ఏప్రిల్‌ 6, 8, 10, 11, 12 తేదీల్లో జరగనున్నాయి. అయితే ఏప్రిల్‌ 13, 15 తేదీలను ఎన్‌టీఏ రిజర్వు చేసింది. పరీక్ష అనంతరం.. ఉత్తమ స్కోరును పరిగణనలోకి తీసుకొని ర్యాంకులను ప్రకటి స్తారు.

5,204 స్టాఫ్‌నర్సు పోస్టుల భర్తీ.. దరఖాస్తు గడువు పొడిగింపు


హైదరాబాద్‌: తెలంగాణలో ప్రభుత్వ ఆసుపత్రులతో పాటు వేర్వేరు విభాగాల్లో 5,204 స్టాఫ్‌నర్సు పోస్టులను భర్తీ చేయడానికి తెలంగాణ వైద్య ఆరోగ్య సేవల నియామక సంస్థ (టీఎంహెచ్‌ఎస్‌ఆర్‌బీ) ఇటీవల నియామక ప్రకటనను విడుదల చేసిన విషయం తెలిసిందే. 

అభ్యర్థులు ఆన్‌లైన్‌లో దరఖాస్తు సమర్పణకు తుది గడువును తొలుత ఫిబ్రవరి 15న సాయంత్రం 5 గంటలుగా ప్రకటించారు. అభ్యర్థుల విజ్ఞప్తి మేరకు టీఎంహెచ్‌ఎస్‌ఆర్‌బీ ఈ గడువును ఫిబ్రవరి 21 వరకు పొడిగించింది. 

దరఖాస్తు చేసుకున్న తర్వాత ఎటువంటి మార్పులు చేర్పులు చేసుకోవడానికి అవకాశాల్లేవని టీఎంహెచ్‌ఎస్‌ఆర్‌బీ వెల్లడించింది. రాత పరీక్ష ద్వారా అభ్యర్థులను ఎంపిక చేస్తారు. పరీక్షలో అన్నీ బహుళ ఐచ్ఛిక (మల్టీపుల్‌ ఛాయిస్‌) ప్రశ్నలే ఉంటాయి. ప్రభుత్వ శాఖల్లో ఇప్పటికే ఒప్పంద, పొరుగు సేవల విధానంలో పనిచేస్తున్న అభ్యర్థులకు వెయిటేజీ ఇవ్వనున్నారు. వీరికి వేతనం స్కేలు రూ.36,750-1,06,990గా పేర్కొన్నారు. ప్రభుత్వం అమలు చేస్తున్న రిజర్వేషన్లు అన్నీ కూడా వర్తిస్తాయి. స్థానిక అభ్యర్థులకు 95% రిజర్వేషన్‌ ఉంటుంది.

Diabetes: సెనగపిండితో మధుమేహం దూరం


లండన్‌: సెనగలు, కాయధాన్యాలు, బీన్స్‌ వంటివి ఆహారంలో భాగమైతే గుండెజబ్బుల ముప్పు తక్కువనే విషయం తెలిసిందే. వీటిలో పెద్ద మొత్తంలో పీచుపదార్థాలు ఉండటమే దీనికి కారణం. 

తాజా పరిశోధనల మేరకు గోధుమ పిండి స్థానంలో సెనగ పిండిని ఆహారంలో భాగంగా చేసుకుంటే కడుపునిండిన భావన కలిగిస్తుందని,  అలాగే ఇన్సులిన్‌, రక్తంలో చక్కెర స్థాయిలను అదుపులో ఉంచుతుందని తేలింది. 

తద్వారా అధిక బరువు సమస్యతో పాటు, టైప్‌-2 మధుమేహం బారిన పడకుండా తప్పించుకోవచ్చని వెల్లడైంది. 30% కొమ్ముసెనగ పిండి కలిపిన గోధుమ పిండితో తయారు చేసిన బ్రెడ్‌ భుజిస్తే.. సాధారణ రొట్టె తిన్నప్పటితో పోలిస్తే రక్తంలో చక్కెర స్థాయిలు 40% తగ్గినట్లు గుర్తించారు. దీనికి ఇందులో ఉండే పిండిపదార్థం అరుగుదల స్థాయిని నెమ్మదింపచేయడమే కారణమని పరిశోధకులు పేర్కొన్నారు.

Birth Control: పురుషులకు సంతానోత్పత్తి నిరోధక మాత్ర!


వాషింగ్టన్‌: మగ ఎలుకల్లో వీర్యకణాల విడుదలను తాత్కాలికంగా అడ్డుకోవడం ద్వారా ఆడ ఎలుకల్లో గర్భధారణను నిరోధించగల రసాయనాన్ని అమెరికాలోని వెయిల్‌ కార్నెల్‌ మెడిసిన్‌ సంస్థ పరిశోధకులు రూపొందించారు. 

ఆ రసాయన మాత్ర పేరు టీడీఐ-11861. గర్భం నివారణ కోసం ప్రస్తుతం పురుషులకు కండోమ్‌లు, వేసెక్టమీ శస్త్రచికిత్స వంటివి అందుబాటులో ఉన్నాయి. 

ఎలుకల మీద ప్రస్తుత ప్రయోగాలు విజయవంతంగా పూర్తయితే మగవాళ్లకూ సంతానోత్పత్తి నిరోధక మాత్రలు అందుబాటులోకి వచ్చే అవకాశాలున్నాయి. 
టీడీఐ-11861 మాత్రను మగ ఎలుకలకు ఇచ్చినప్పుడు వాటి వీర్యకణాలు రెండున్నర గంటలసేపు స్తంభించిపోయాయి. ఆడ ఎలుకల్లో ప్రవేశించిన మూడు గంటల తరవాత కొన్ని వీర్యకణాలు కొంతమేరకు తిరిగి క్రియాశీలమయ్యాయి.

Hyderabad: కింద షీట్లు.. పైన కరెన్సీ నోట్లు


•అప్పు ఇస్తామని మోసానికి యత్నించిన 9 మంది అరెస్టు
•ట్రంకు పెట్టెల్లో పేర్చిన థర్మాకోల్‌ షీట్లు
నాగోలు: పెద్ద మొత్తంలో అప్పులు ఇచ్చే నెపంతో దృష్టి మరల్చి మోసాలకు పాల్పడుతున్న ముఠాలోని 9 మందిని ఎల్బీనగర్‌ పోలీసులు అరెస్టుచేశారు. నిందితుల నుంచి రూ. 1.23 కోట్ల నగదు స్వాధీనం చేసుకున్నారు. ఎస్సై లింగారెడ్డి వివరాల ప్రకారం... 

మహారాష్ట్రలోని పుణెకు చెందిన వైభవ్‌, రాజేష్‌ ఉత్తమ్‌ చందానీలు వ్యాపారులు డబ్బు అవసరం రావడంతో హైదరాబాద్‌లో స్థిరపడిన తమ స్నేహితుడు నీలేష్‌ను ఇటీవల సంప్రదించారు. ఈ క్రమంలో మన్సూరాబాద్‌ సమీపంలోని సాయి సప్తగిరి కాలనీలో 6 శాతం వడ్డీతో అప్పు పుడుతుందన్న విషయం తెలియడంతో.. వారు నగరానికి చేరుకున్నారు. అనంతరం అక్కడి ఓ ఇంట్లో ఫైనాన్స్‌ వ్యాపారం చేస్తున్న తొమ్మిది మందిని కలిశారు. వారిలో మెదక్‌కు చెందిన శ్రీనివాస్‌.. పుణెకు చెందిన వ్యక్తులతో హిందీలో మాట్లాడాడు. రూ.2 కోట్లు అప్పు కావాలని వీరు కోరగా.. తొలుత రూ.20 లక్షలే ఇస్తామని, నమ్మకం కుదిరేందుకు నెలరోజుల్లో మరో రూ.20 లక్షలు కలిపి ఇవ్వాలని శ్రీనివాస్‌ సహా ఇతరులు సూచించారు. 

ఆ తర్వాతే రూ.2 కోట్లు ఇస్తామంటూ నమ్మించేందుకు ప్రయత్నించారు. ఈ క్రమంలో ఇంటి యజమాని శంకరమ్మ ఇంట్లోని రెండు భారీ ట్రంకు పెట్టెలు తెరిచి అందులో పేర్చిన నోట్ల కట్టలను దూరం నుంచే చూపిస్తూ.. రూ.వందల కోట్లు తమ వద్ద ఉన్నాయని నమ్మబలికారు. వారిపై అనుమాన కలిగి పుణె వాసులు ఎల్బీనగర్‌ ఠాణాలో ఫిర్యాదు చేశారు. పోలీసులు వెంటనే ఆ ఇంటిపై దాడిచేశారు. ట్రంకుపెట్టెలు తెరిచి చూడగా... పైన మాత్రమే అసలైన నోట్లు పేర్చి ఉంచారు.. కిందిభాగంలో థర్మాకోల్‌ షీట్లు ఉన్నాయి. దీంతో శ్రీనివాస్‌, శంకరమ్మతోపాటు మెదక్‌కు చెందిన రమేష్‌, రాములు, కొంపల్లికి చెందిన నాగయ్య, నిజామాబాద్‌కు చెందిన భోజన్న, మన్సూరాబాద్‌లో వాసులు రవి, సుంకమ్మ, దుర్గప్పలను అరెస్టు చేశారు.

ఏప్రిల్‌ 1 నుంచే రిటర్నులు: సీబీడీటీ


దిల్లీ: ప్రస్తుత ఆర్థిక సంవత్సరంలో ఆర్జించిన ఆదాయానికి సంబంధించిన రిటర్నులను ఏప్రిల్‌ 1 నుంచే సమర్పించేందుకు అవకాశం కల్పిస్తున్నట్లు కేంద్ర ప్రత్యక్ష పన్నుల బోర్డు (సీబీడీటీ) వెల్లడించింది. 

2023-24 మదింపు సంవత్సరం ప్రారంభం రోజు నుంచే సంబంధిత ఫారాలు అందుబాటులో ఉంటాయని సీబీడీటీ బుధవారం వెల్లడించింది. 

గత ఏడాది ఐటీఆర్‌ పత్రాలతో పోలిస్తే ఈసారి పెద్దగా మార్పులేమీ లేనందున, పన్ను రిటర్నులు దాఖలు చేసేవారు సులభంగా ఈ ప్రక్రియను పూర్తి చేయొచ్చని తెలిపింది. సాధారణంగా జులై 31 వరకు రిటర్నులు దాఖలు చేసేందుకు గడువు ఉంటుంది. అనివార్య సందర్భాల్లో సీబీడీటీ ఈ గడువును పొడిగిస్తూ ఉంటుంది.

1150కోట్లతో 50 లింకు రోడ్లు  ప్రధాన రహదారులపై తగ్గనున్న భారం


ప్రయాణ ప్రయాస, సమయం ఆదా
రోడ్ల నిర్మాణానికి రూ.1150కోట్ల రుణం
ఇండియన్‌ ఓవర్సీస్‌ బ్యాంకు ఆమోదం
మిగిలిన నిధులను సర్దుబాటు చేయనున్న ప్రభుత్వం

విశ్వనగరంగా మారుతున్న హైదరాబాద్‌ నగరం శరవేగంగా విస్తరిస్తున్నది. శివారులో జనావాసాలూ పెరుగుతున్నాయి. పెరుగుతున్న జనసాంద్రతకు తగ్గట్లుగా ప్రభుత్వం వసతులు కల్పిస్తున్నది. ఇందులో భాగంగా ప్రధాన రహదారులపై ట్రాఫిక్‌ ఒత్తిడి తగ్గించేందుకు, గ్రేటర్‌తో పాటు శివారు మున్సిపాలిటీలలో పెద్ద ఎత్తున లింకు రోడ్లను నిర్మిస్తున్నారు. సుమారు రూ.1500 కోట్లతో 120.92 కి.మీమేరలో 50 చోట్ల లింకు రోడ్లను నిర్మించే పనులకు శ్రీకారం చుట్టారు. 5 ప్యాకేజీల్లో చేపడుతున్న ఈ పనులకు నిధుల కోసం ఇండియన్‌ ఓవర్సీస్‌ బ్యాంక్‌ రూ. 1150 కోట్ల రుణం ఇస్తున్నది. ఈ మేరకు ఐవోబీ చీఫ్‌ రీజినల్‌ మేనేజర్‌ రంజయ మిశ్రా బుధవారం పురపాలక శాఖ ప్రత్యేక ప్రధాన కార్యదర్శి అర్వింద్‌కుమార్‌ను కలిసి మంజూరు పత్రాన్ని అందజేశారు. మిగిలిన నిధులను ఆయా మున్సిపాలిటీలు, ప్రభుత్వం నిధులతో పనులను పూర్తి చేయనున్నారు.

హైదరాబాద్‌ నగరం శరవేగంగా విస్తరిస్తున్నది. పెరుగుతున్న జనాభాకు తగ్గట్టు ప్రభుత్వం మౌలిక వసతులను కల్పిస్తున్నది. నగరంలో చేపట్టిన లింకు రోడ్లతో ఫలితాలు ఆశించిన స్థాయిలో రావడంతో విస్తరిత ప్రాంతాలైన శివారు మున్సిపాలిటీల్లోనూ రహదారులను మరింత విశాలంగా ఉండేలా చర్యలు చేపడుతున్నారు. ప్రధాన రహదారులపై ట్రాఫిక్‌ ఒత్తిడిని తగ్గించి, ప్రయాణ దూరాన్ని, సమయాన్ని ఆదా చేసేందుకు అనువుగా గ్రేటర్‌తో పాటు శివారు మున్పిపాలిటీల్లో పెద్ద ఎత్తున లింకు రోడ్లు నిర్మిస్తున్నారు. ఇందులో భాగంగానే 120.92 కి.మీ మేర 50 చోట్ల లింకు రోడ్లను నిర్మించేందుకు సుమారు రూ.1500 కోట్లతో పనులకు శ్రీకారం చుట్టారు. ఐదు ఫ్యాకేజీల్లో చేపడుతున్న ఈ పనులకు కీలకమైన నిధుల అడ్డంకి తొలగిపోయింది. రూ.1150 కోట్ల రుణానికి ఆమోదం తెలుపుతూ ఇండియన్‌ ఓవర్సీస్‌ బ్యాంక్‌ చీఫ్‌ రీజినల్‌ మేనేజర్‌ రంజయ మిశ్రా బుధవారం పురపాలక శాఖ ప్రత్యేక ప్రధాన కార్యదర్శి అర్వింద్‌కుమార్‌ను కలిసి మంజూరు పత్రాన్ని అందజేశారు. కాగా మిగిలిన నిధులను ఆయా మున్సిపాలిటీలు, ప్రభుత్వం నిధులతో పనులను పూర్తి చేయనున్నారు. జీహెచ్‌ఎంసీ, హెచ్‌ఎండీఏ, హెచ్‌ఆర్‌డీసీ విభాగాల ఆధ్వర్యంలో చేపడుతున్న మిస్సింగ్‌ లింకు (లింకు రోడ్ల) పనులకు రుణాలు లైన్‌ క్లియర్‌ కావడంతో పనులపై ఆయా శాఖలు దృష్టి సారించాయి.

జనాభాకు అనుగుణంగా వసతులు…
పెరుగుతున్న జనాభాను దృష్టిలో పెట్టుకొని కొత్త రోడ్ల నిర్మాణం, ఉన్న రోడ్ల పరిరక్షణ, లింకు రోడ్లకు వేర్వేరుగా ప్రణాళికలతో నగరాన్ని సుందరంగా తీర్చిదిద్దుతున్నది. రూ. 2140 కోట్లతో హైదరాబాద్‌ రోడ్‌ డెవలప్‌మెంట్‌ కార్పొరేషన్‌ (హెచ్‌ఆర్‌డీసీఎల్‌) లింకు రోడ్లను అభివృద్ధి చేస్తూ ట్రాఫిక్‌ రహిత నగరంగా తీర్చిదిద్దుతోంది. ఇందులో భాగంగానే తొలి విడతలో రూ. 275.53 కోట్లు ఖర్చు చేసి 22 చోట్ల కలిపి 24.30 కిలోమీటర్ల మేర లింకు రోడ్లను అందుబాటులోకి తీసుకువచ్చింది. ఇందులో ఎక్కువ శాతం వెస్ట్‌జోన్‌లోనే ఉండగా..ఐటీ కారిడార్‌లో ట్రాఫిక్‌కు శాశ్వత పరిష్కారం లభించింది. ఈ క్రమంలోనే కోర్‌ సిటీలోనూ ట్రాఫిక్‌ సమస్య పరిష్కారానికి ఫ్లై ఓవర్లు ఒక్కటే మార్గం కాదని భావించి లింకు రోడ్లు నిర్మించేందుకు మంత్రి కేటీఆర్‌ నిర్ణయం తీసుకున్నారు. ఒక ఫ్లైఓవర్‌కు పెట్టే ఖర్చుతో నాలుగు లింకు రోడ్లు నిర్మితం అవుతుండటంతో ఈ దిశగా అడుగులు వేశారు. ఈ మేరకు కేటీఆర్‌ ఆదేశాలతో రూ. 207 .26 కోట్లతో 20.16 కిలోమీటర్ల మేర పనులు చేపట్టగా..80 శాతం పనులు పూర్తయ్యాయి. తాజాగా ఫేజ్‌-3కి శ్రీకారం చుట్టారు. 50 రోడ్లను 120.92 కి.మీ మేర నిర్మించేందుకు రూ.1500 కోట్లతో పనులు చేపట్టారు. శివారు మున్సిపాలిటీల్లో పనులు పట్టాలెక్కగా..మిగిలిన చోట టెండర్‌ దశలో ఉన్నాయి.

శివారు ప్రాంతాల్లో…
కొత్తూరు, శంషాబాద్‌, బడంగ్‌పేట, ఇబ్రహీంపట్నం, దమ్మాయిగూడ, జవహర్‌నగర్‌, నాగారం, పోచారం, బండ్లగూడ జాగీర్‌, ఘట్‌కేసర్‌ మున్సిపాలిటీలు ఉన్నాయి. కోర్‌ సిటీలో ప్రస్తుతం ఎదురవుతున్న ట్రాఫిక్‌ సమస్యలను దృష్టిలో పెట్టుకొని, అలాంటి పరిస్థితి శివారు ప్రాంతాల్లో తలెత్తకుండా రోడ్డు మార్గాలను అభివృద్ధి చేసే ప్రణాళికలను సిద్ధం చేస్తోంది. వచ్చే 50 ఏండ్ల వరకు ఎలాంటి ట్రాఫిక్‌ చిక్కులు లేకుండా సాఫీగా సాగిపోయేలా రోడ్‌ నెట్‌ వర్క్‌ను కొత్తగా అందుబాటులోకి తీసుకువస్తున్నారు.