తిరుమలలో శుక్రవారం పెరిగిన భక్తుల రద్దీ


తిరుపతి :ఆగస్టు 25
తిరుమలలో నేడు శుక్రవారం భక్తుల రద్దీ  పెరిగింది. శ్రావణ శుక్రవారం వరలక్ష్మీ వ్రతం కావడంతో పెద్ద ఎత్తున భక్తులు శ్రీవారి దర్శనానికి వచ్చారు.

శ్రీవారి టోకెన్ రహిత సర్వదర్శనం కోసం భక్తులు 18 కంపార్టుమెంట్లలో వేచి ఉన్నారు. స్వామివారి సర్వదర్శనానికి 10 గంటల సమయం పడుతోంది.

ఇక గురువారం శ్రీవారిని 67,308 మంది భక్తులు దర్శించుకుని మొక్కులు చెల్లించుకున్నారు. నిన్న శ్రీవారి హుండీ ఆదాయం 3.82 కోట్ల రూపాయలు వచ్చినట్టు తిరుమల తిరుపతి దేవస్థానం వెల్లడించింది.

స్వామివారికి 26,674 మంది భక్తులు తలనీలాలు సమర్పించి మొక్కులు చెల్లించుకున్నారు...

తెలంగాణ ఎన్నికలకు సర్వం సిద్ధం !
- తెలంగాణ ఎన్నికల కోసం కసరత్తు ప్రారంభించిన ఈసీ
- అక్టోబర్ రెండో వారంలో షెడ్యూల్ విడుదల చేసే అవకాశం
- డిసెంబర్ రెండో వారంలోగా ఎన్నికలు నిర్వహించే ఛాన్స్.

 తెలంగాణ అసెంబ్లీ ఎన్నికలు ఈ ఏడాది చివరిలోగా జరగనున్న సంగతి తెలిసిందే. ఈ నేపథ్యంలోనే రాజకీయ పార్టీలు అప్రమత్తం అవుతున్నాయి. బీఆర్ఎస్ ఇప్పటికే 115 మంది అభ్యర్థులతో తొలి జాబితాను ప్రకటించింది. బీజేపీ, కాంగ్రెస్ సైతం తొలి జాబితాను ప్రకటించేందుకు కసరత్తులు చేస్తున్నాయి. మరోవైపు ఎన్నికల సంఘం కూడా అసెంబ్లీ ఎన్నికల విషయమై కసరత్తు ప్రారంభించింది. అక్టోబర్ రెండో వారంలో ఎన్నికల షెడ్యూల్ విడుదల చేయాలని భావిస్తోంది. డిసెంబర్ రెండో వారంలోగా ఎన్నికలు నిర్వహించేందుకు ఎన్నికల సంఘం ప్రణాళికలు రూపొందిస్తోంది.

తెలంగాణ అసెంబ్లీ గడువు 2024 జనవరి 16 వరకు ఉంది. 2014లో సార్వత్రిక ఎన్నికలతోపాటు ఉమ్మడి రాష్ట్రంలోనే చివరి ఎన్నికలు జరిగాయి. కానీ ఐదేళ్లు పూర్తి కాకుండానే కేసీఆర్ 2018లో ముందస్తు ఎన్నికలకు వెళ్లారు. దీంతో 2018 అక్టోబర్ 6న ఈసీ షెడ్యూల్ విడుదల చేసింది. సరిగ్గా రెండు నెలలకు అంటే డిసెంబర్ 7న పోలింగ్ నిర్వహించారు. ఎమ్మెల్యేలంతా జనవరి 17న అసెంబ్లీలో ప్రమాణ స్వీకారం చేశారు. దీంతో జనవరి 16వ తేదీ వరకు ప్రస్తుత అసెంబ్లీ మనుగడ సాగించే అవకాశం ఉంది.

 తెలంగాణతోపాటు ఛత్తీస్‌గఢ్, రాజస్థాన్, మధ్యప్రదేశ్, మిజోరాం రాష్ట్రాల అసెంబ్లీలకు కూడా ఒకేసారి నోటిఫికేషన్ విడుదలయ్యే అవకాశం ఉంది.ఎన్నికల షెడ్యూల్ ప్రకటించే ముందు కేంద్ర ఎన్నికల సంఘం రెండు సార్లు రాష్ట్రంలో పర్యటించనుంది. ఎన్నికల సన్నద్ధతను పరిశీలించడానికి ఓసారి.. నామినేషన్ల గడువు ముగిసిన తర్వాత మరోసారి సీఈసీ బృందం రాష్ట్రానికి రానుంది. అక్టోబర్ 4న ఓటర్ల తుది జాబితాను ప్రకటించిన తర్వాత ఏ క్షణమైనా ఎన్నికల నోటిఫికేషన్ వెలువడే అవకాశం ఉంది.దక్షిణాది రాష్ట్రాల్లో ఎన్నికల డబ్బు ప్రభావం ఎక్కువగా ఉంటోంది. తెలంగాణలోనూ డబ్బు ప్రభావం పెరిగిందని మునుగోడు, హుజూరాబాద్ ఉపఎన్నికలను బట్టి చెప్పొచ్చు. ఈ ఉపఎన్నికల్లో పార్టీలు భారీగా డబ్బును పంచాయనే ప్రచారం జరిగింది. దీంతో ఎన్నికల్లో నగదు ప్రభావాన్ని అరికట్టడానికి నిఘాను పెంచనుంది. ఎన్‌ఫోర్స్‌మెంట్ ఏజెన్సీలను సైతం ఎన్నికల సంఘం రంగంలోకి దింపనుంది.

BJP: 27న తెలంగాణలో కేంద్ర హోం మంత్రి అమిత్‌ షా పర్యటన: కిషన్‌రెడ్డి


హైదరాబాద్‌: కేంద్ర హోం మంత్రి అమిత్‌ షా ఈనెల 27న తెలంగాణలో పర్యటిస్తారని కేంద్రమంత్రి, భాజపా రాష్ట్ర అధ్యక్షుడు కిషన్‌రెడ్డి తెలిపారు. దిల్లీ నుంచి ప్రత్యేక విమానంలో విజయవాడ చేరుకుని అక్కడి నుంచి హెలికాప్టర్‌లో భద్రాచలం వస్తారని తెలిపారు..

భద్రాచలంలో శ్రీరామచంద్రుని దర్శించుకుంటారు. అనంతరం మధ్యాహ్నం 2గంటలకు భాజపా ఆధ్వర్యంలో ఖమ్మంలో నిర్వహించే 'రైతు గోస.. భాజపా భరోసా' బహిరంగ సభలో అమిత్ షా పాల్గొంటారని వెల్లడించారు..

ధాన్యం కొనుగోలులో కేసీఆర్‌ ప్రభుత్వం విఫలమైందని కిషన్‌రెడ్డి విమర్శించారు. సమగ్రమైన పంటల బీమా పథకం తెలంగాణలో అమలు చేయకపోవడంతో రైతులు తీవ్రంగా నష్టపోతున్నారన్నారు. రైతులకు ఉచిత ఎరువులు ఇస్తామని చెప్పి భారాస ప్రభుత్వం వెన్నుపోటు పొడిచిందన్నారు. ఎన్నికల ముందు ఓటు బ్యాంకు రాజకీయాల కోసం రుణమాఫీ పేరుతో మరోసారి మోసం చేస్తున్నారని విమర్శించారు. 

వ్యవసాయ పనిముట్ల సబ్సిడీలను కేసీఆర్‌ సర్కారు ఇవ్వడం లేదన్నారు. సకల సమస్యలకు రైతు బంధు పరిష్కారం కాదన్నారు. లక్షలాది కౌలు రైతులను ప్రభుత్వం పట్టించుకోకపోవడంతో తీవ్రంగా నష్టపోయారన్నారు. మహిళా రిజర్వేషన్లపై మాట్లాడే నైతిక హక్కు కేసీఆర్‌ కుటుంబానికి లేదన్నారు. తొలి మంత్రివర్గంలో మహిళా మంత్రి లేకుండా ఐదేళ్లు పాలించిన కేసీఆర్‌కు కేంద్రాన్ని విమర్శించే అర్హత లేదన్నారు..

Chandrayaan-3: చంద్రయాన్‌-3 ల్యాండింగ్‌తో.. '45 ట్రిలియన్‌' ట్రెండింగ్‌..!
జాబిల్లి దక్షిణ ధ్రువంపై చంద్రయాన్‌-3 (Chandrayaan-3) విజయవంతంగా అడుగుపెట్టడం యావత్‌ ప్రపంచం దృష్టిని ఆకర్షించింది. అసాధ్యమనుకున్న ఈ యాత్రను సుసాధ్యం చేసిన భారత్‌ (India), ఇస్రో (ISRO) శాస్త్రవేత్తలపై అన్ని దేశాలూ ప్రశంసల జల్లు కురిపిస్తున్నాయి..

అయితే, చంద్రయాన్‌-3 (Chandrayaan-3) ల్యాండింగ్‌ నేపథ్యంలో ఇప్పుడు '45 ట్రిలియన్‌ (45 Trillion)' అనే పదం నెట్టింట తెగ ట్రెండ్‌ అవుతోంది. మన చారిత్రక ప్రయోగంపై బ్రిటిష్‌ (British) జర్నలిస్టులు చేసిన వ్యాఖ్యలే ఇందుక్కారణం. ఇంతకీ ఏం జరిగిందంటే..

చంద్రయాన్‌-3 ప్రయోగంపై ప్రపంచవ్యాప్తంగా హర్షాతిరేకలు వెల్లువెత్తుతున్న వేళ.. కొందరు బ్రిటన్‌ (Britain) జర్నలిస్టులు భారత్‌పై అక్కసు వెళ్లగక్కారు. ''జాబిల్లి దక్షిణ ధ్రువంపైకి రాకెట్లను పంపించేలా అంతరిక్ష రంగంలో పురోగతి సాధించిన దేశాలకు యూకే (UK) ఆర్థిక సాయం పంపించాల్సిన అవసరం లేదు'' అని యూకేకు చెందిన సోఫీ అనే జర్నలిస్టు సోషల్‌మీడియాలో పోస్ట్‌ చేశారు. జీబీ న్యూస్‌కు చెందిన మరో మీడియా ప్రజెంటేటర్‌ స్పందిస్తూ.. ''రూల్‌ ప్రకారం.. జాబిల్లికి అవతలివైపు రాకెట్లను ప్రయోగించే మీరు.. విదేశీ సాయం కోసం మా వద్దకు రావొద్దు. అంతేగాక, మేమిచ్చిన 2.3 బిలియన్‌ పౌండ్లను మాకు తిరిగిచ్చేయాలి'' అని అన్నారు..

దీంతో వీరి పోస్టులపై భారతీయులు తీవ్ర ఆగ్రహం వ్యక్తం చేశారు. రెండు శతాబ్దాల పాటు భారత్‌ను పాలించిన యూకే.. తమ నుంచి దోచుకున్న మొత్తం 45 ట్రిలియన్‌ డాలర్లను తిరిగిచ్చేయాలంటూ నెట్టింట కామెంట్లు చేస్తున్నారు. దీంతో ఇప్పుడు '45 ట్రిలియన్‌' అనే పదం సోషల్‌మీడియాలో ట్రెండ్‌ అవుతోంది.

ఈ 45 ట్రిలియన్‌ ఎలా తెలిసిందంటే..?
భారత్‌కు చెందిన ప్రముఖ ఆర్థికవేత్త ఉత్సా పట్నాయక్‌ ఇటీవల కొలంబియా యూనివర్శిటీ ప్రెస్‌లో ఓ అధ్యయనాన్ని ప్రచురించారు. 1765 నుంచి 1938 వరకు బ్రిటన్‌.. భారత్‌ నుంచి 45 ట్రిలియన్‌ డాలర్లు సంపాదించిందని పట్నాయక్‌ పేర్కొన్నారు. రెండు శతాబ్దాల కాలంలో పన్నులు, వాణిజ్యంపై ఉన్న డేటాను అధ్యయనం చేసి ఆమె ఈ లెక్క చెప్పారు. ఈ మొత్తం.. ప్రస్తుతం యూకే జీడీపీ కంటే 15 రెట్లు ఎక్కువ..

ఇదిలా ఉండగా.. అంతరిక్ష ప్రయోగాలకు యూకే నుంచి ఆర్థిక సాయాన్ని భారత్‌ 2015లోనే నిలిపివేసిందని ఈ ఏడాది మార్చిలో గార్డియన్‌ ఓ కథనం వెలువరించింది. అయితే, ఆ తర్వాత ఇండిపెండెంట్‌ కమిషన్‌ ఫర్‌ ఎయిడ్ ఇంపాక్ట్‌ సమీక్ష చేపట్టి.. 2016 నుంచి 2021 వరకు యూకే.. భారత్‌కు 2.3 బిలియన్‌ పౌండ్లు సాయంగా ఇచ్చిందని ప్రకటించింది. దీన్ని ఉద్దేశిస్తూనే యూకే జర్నలిస్టులు పోస్టులు చేశారు..

Nara Lokesh: సైకో పాలనలో కంపెనీలు తరలిపోతున్నాయ్‌: లోకేశ్‌
గన్నవరం: తెదేపా హయాంలో ఇండస్ట్రియల్‌ ఎస్టేట్‌ ఏర్పాటు చేశామని ఆ పార్టీ జాతీయ ప్రధాన కార్యదర్శి నారా లోకేశ్‌ అన్నారు. ఉమ్మడి కృష్ణా జిల్లా గన్నవరం నియోజకవర్గం పరిధిలోని మల్లవల్లిలో పేదలకు ఇళ్లు నిర్మించేందుకు 100 ఎకరాలు కేటాయించినట్లు చెప్పారు..

జగన్‌ వచ్చిన తర్వాత ఆ భూముల్లో వైకాపా నేతలు మట్టి తవ్వుకుంటున్నారు తప్ప.. ఇళ్లు కట్టలేదని విమర్శించారు. మల్లవల్లి గ్రామస్థులతో నిర్వహించిన రచ్చబండ కార్యక్రమంలో నారా లోకేశ్‌ పాల్గొన్నారు. తెదేపా సైకిల్‌ గుర్తులో ముందు చక్రం సంక్షేమానికి, వెనుక చక్రం అభివృద్ధికి నిదర్శనమన్నారు. రూ.200 పెన్షన్‌ని రూ. 2000కి పెంచిన ఘనత తెదేపాకే చెల్లుతుందన్నారు..

''పెళ్లి కానుక, పసుపు కుంకుమ, చంద్రన్న బీమా లాంటి ఎన్నో సంక్షేమ కార్యక్రమాలను తెదేపా అమలు చేసింది. మల్లవల్లిలో 1400 ఎకరాల భూములను కాంగ్రెస్‌ అధికారంలో ఉన్నప్పుడు కొంత మంది నాయకులు కొట్టేయాలని ప్రయత్నిస్తే తెదేపా పోరాడింది. మల్లవల్లిలో భూములు కాపాడి ఇండస్ట్రియల్ ఎస్టేట్ ఏర్పాటు చేసింది కూడా తెదేపానే. విధ్వంసంతో జగన్‌ పరిపాలన మొదలు పెట్టారు. ప్రజావేదికనును కూల్చి వేసి పాలన మొదలు పెట్టారు. మీరు పాలిచ్చే ఆవుని వద్దనుకొని తన్నే దున్నపోతుని తెచ్చుకున్నారు. మల్లవల్లి ఇండస్ట్రియల్ ఎస్టేట్‌లో 75 వేల మందికి ఉద్యోగాలు వచ్చే అవకాశాలు ఉన్నాయి. కేవలం సైకో పాలన వలన పరిశ్రమలు ఇతర రాష్ట్రాలకు తరలిపోతున్నాయి. అశోక్‌ లేలాండ్‌ లాంటి అనేక కంపెనీలను తెదేపా తీసుకొస్తే.. జగన్‌ వాటిని తరిమేస్తున్నారు.'' అని లోకేశ్‌ విమర్శించారు..

తెదేపా హయాంలో పసుపుకుంకుమ కింద రూ.20 వేలు ఇచ్చేవారని, ఈ ప్రభుత్వంలో మాకు సాయం అందలేదని మల్లవల్లి మహిళలు లోకేశ్‌ ఎదుట మొరపెట్టుకున్నారు.'' పండగ కానుకలు కూడా జగన్‌ ప్రభుత్వం ఆపేసింది. ఇళ్లు నిర్మించుకున్న వారికి జగన్‌ ప్రభుత్వం బిల్లులు ఇవ్వడం లేదు. గ్రామంలో కొన్ని కాలనీల్లో సీసీ రోడ్లు, డ్రైనేజీ, తాగునీరు లేదు. జగన్ ప్రభుత్వం మల్లవల్లి ఇండస్ట్రియల్ ఎస్టేట్‌ని నాశనం చేసింది. మాకు ఉద్యోగాలు లేకుండా చేశారు. ఉన్న కంపెనీలు అన్ని ఇతర రాష్ట్రాలకు తరలిపోయాయి. 2వేల మందికి ఉద్యోగాలు కల్పించిన అశోక్‌ లేలాండ్‌ కంపెనీ జగన్‌ పాలనలో వెళ్లిపోయింది. గ్రామంలో వైఎస్‌ఆర్‌ జలకళ కింద బోర్లు వేయిస్తామని లంచం తీసుకొని బోర్లు వెయ్యకుండా మోసం చేశారు.'' అని మల్లవల్లి గ్రామస్థులు లోకేశ్‌ ఎదుట వాపోయారు..

భార్య ప్రసూతికి గవర్నమెంట్ జాబ్ లో ఉన్న భర్తకు సెలవు ఇవ్వాల్సిందే: మద్రాస్ హైకోర్టులోని మధురై ధర్మాసనం
ప్రసూతి సమయంలో భార్య పక్కన ఉండేందుకు 90 రోజుల సెలవులు పెట్టిన సీఐ

తొలుత మంజూరు చేసి ఆ తర్వాత మెమో ఇచ్చిన ఉన్నతాధికారులు
మధురై ధర్మాసనాన్ని ఆశ్రయించిన సీఐ మెమోను రద్దు చేస్తూ ఉత్తర్వులు...

భార్య ప్రసూతి సమయంలో భర్తకు సెలవు మంజూరు చేయాల్సిందేనని మద్రాస్ హైకోర్టులోని మదురై ధర్మాసనం పేర్కొంది. గర్భంతో ఉన్న తన భార్య ప్రసూతి సమయంలో ఆమె పక్కన ఉండేందుకు తనకు మే 1 నుంచి 90 రోజులు సెలవులు కావాలంటూ తెన్‌కాశీ జిల్లా కడైయం పోలీస్ స్టేషన్ ఇన్‌స్పెక్టర్ శరవణ్ ఉన్నతాధికారులకు దరఖాస్తు చేసుకున్నారు. 

తొలుత సెలవులు మంజూరు చేసిన ఉన్నతాధికారులు ఆ తర్వాత మెమో ఇవ్వడంతో ఆయన మద్రాస్ హైకోర్టులోని మదురై ధర్మాసనాన్ని ఆశ్రయించారు. విచారించిన ధర్మాసనం ప్రసూతి సమయంలో భార్య బాగోగులను చూసుకోవాల్సిన అవసరం భర్తకు ఉందని, కాబట్టి ఆయన సెలవు దరఖాస్తును పరిశీలించాలంటూ ఉత్తర్వులు జారీ చేసింది. పిటిషన్‌దారుడు బాధ్యతాయుతమైన భర్తగా వ్యవహరించారని, కాబట్టి ఆయనకు ఇచ్చిన మెమోను రద్దు చేస్తున్నట్టు పేర్కొంటూ మెమోను రద్దు చేస్తూ ఉత్తర్వులు జారీ చేసింది.

మలక్‌పేట యశోద ఆసుపత్రిలో బ్లడ్ క్యాన్సర్ కు అరుదైన చికిత్స
•క్యాన్సర్‌ను పూర్తిగా నయం చేసిన వైద్య బృందం

నల్లగొండ :హైదరాబాదులోని మలక్‌పేట యశోద ఆసుపత్రిలో బ్లడ్ క్యాన్సర్ కు అరుదైన చికిత్స చేసి యువకుడి ప్రాణాలు కాపాడినట్లు ఆసుపత్రి డైరెక్టర్ డాక్టర్ గోరుకంటి పవన్, ప్రముఖ ఆంకాలజిస్ట్ డాక్టర్ ఎల్ రోహిత్ రెడ్డిలు తెలిపారు. 

గురువారం జిల్లా కేంద్రంలో మనోరమ హోటల్లో ఏర్పాటు చేసిన విలేకరుల సమావేశంలో వారు మాట్లాడారు. నల్లగొండ జిల్లా కేంద్రానికి చెందిన యువకుడు అత్యంత క్లిష్ట పరిస్థితుల్లో  నిరంతరం జ్వరం, రక్త స్రావంతో  బాధపడుతూ ఆసుపత్రికి రాగా అతడికి పరీక్షలు జరిపి  ఆక్యూట్  మై లో ఈడు లుకేమియా  బ్లడ్ క్యాన్సర్ ఉన్నట్లుగా  గుర్తించినట్లు తెలిపారు. 

వెంటనే అతడికి ఆప్యాధునిక వైద్య పరికరాలతో ఐదు రౌండ్ల కీమోథెరపీ చేసి , బ్లడ్ నుండి క్యాన్సర్ ను వేరు చేసి, ప్రాణాలు కాపాడినట్లు తెలిపారు. ప్రాణాంతకమైన వ్యాధుల్లో క్యాన్సర్ కూడా ఒకటని, దానికి మెరుగైన వైద్యం, నిరంతర వైద్య పర్యవేక్షణ చాలా ముఖ్యమన్నారు . క్యాన్సర్ వచ్చినా కూడా ప్రాణాలు కాపాడుకోవచ్చని వారు తెలిపారు. క్యాన్సర్ అనగానే భయపడవద్దు అన్నారు. ఈ సమావేశంలో మలక్పేట యూనిట్ హెడ్ కే శ్రీనివాస్ రెడ్డి, జనరల్ మేనేజర్ చిరుద. శ్రీనివాస్ , సిబ్బంది వాసు కిరణ్ రెడ్డి తదితరులు పాల్గొన్నారు.

ఉత్త‌మ న‌టుడిగా అల్లు అర్జున్…పుష్పకు రెండు జాతీయ ఫిల్మ్ అవార్డ్
69వ జాతీయ ఫిల్మ్ అవార్డుల‌ను నేడు జ్యూరీ ప్ర‌క‌టించింది.. 31 అవార్దుల కోసం మొత్తం 28 భాష‌ల‌లో 280 చిత్రాలు పోటీ ప‌డ్డాయి..

ఈసారి అవార్డుల‌లో తెలుగు సినిమాలు కొత్త చ‌రిత్ర‌ను లిఖించాయి.. ఉత్త‌మ న‌టుడు, ఉత్త‌మ వినోదాత్మ‌క‌ చిత్రం, ఉత్త‌మ సంగీతం, ఉత్తమ బ్యాంక్ గ్రౌండ్ సంగీతం, ఉత్త‌మ కొరియో గ్రఫీ, ఉత్త‌మ స్టంట్ కొరియో గ్రఫీ, ఉత్త‌మ గీత ర‌చయిత‌, ఉత్త‌మ స్పెష‌ల్ ఎఫెక్ట్ అవార్డులు తెలుగు మూవీలు ఎగ‌రేసుకుపోయాయి..

69 సంవ‌త్స‌రాల జాతీయ అవార్దుల‌లో తొలిసారిగా తెలుగు హీరో అల్లు అర్జున్ ఉత్త‌మ న‌టుడిగాఅవార్దు కైవ‌సం చేసుకుని టాలీవుడ్ కీర్తీని మరింత పెంచారు.. ఉప్పెన మూవీకి ఉత్త‌మ ప్రాంతీయ చిత్రంగా ఎంపికైంది..ఇక ఉత్తమ క్రిటిక్ అవార్డు ను తెలుగు మూవీ పురుషోత్తమ్ కు లభించగా, ఉత్తమ లిరిసిస్ట్ గా చంద్రబోస్ కొండపాలెం మూవీ ద్వారా ఎంపికయ్యారు

ఫీచ‌ర్ ఫిల్మ్ విభాగం …
స్టంట్ కొరియో గ్ర‌ఫి సాల్మ‌న్ RRR మూవీ 

ఉత్త‌మ కొరియోగ్రాఫ‌ర్ ప్రేమ్ ర‌క్షిత్ RRR మూవీ 

విజువ‌ల్ ఎఫెక్ట్ వి శ్రీనివాస్ RRR మూవీ 

ఉత్త‌మ లిరిసిస్ట్ – చంద్ర‌బోస్- కొండ‌పాలెం మూవీ

బెస్ట్ సంగీత ద‌ర్శ‌కులు … ఫుష్ష . .. దేవీశ్రీ ప్ర‌సాద్ ,

బ్యాక్ గ్రౌండ్ సంగీతం ఎం ఎం కీర‌వాణి. RRR

ఉత్త‌మ గాయ‌ని – శ్రీయా ఘోష‌ల్
ఉత్త‌మ గాయ‌కుడు – కాల‌భైర‌వ 

RRR మూవీ ఉత్త‌మ న‌టి .. అలియా భ‌ట్

గంగుభాయి వాడియా కీర్తి,స‌న‌న్,మిమి మూవీ

ఉత్త‌మ న‌టుడు – అల్లు అర్జున్ పుష్ప‌

ఉత్త‌మ చిత్రం – రాకెట్రీ ..ద నంబి తమిళం

ఉత్త‌మ వినోదాత్మ‌క చిత్రం RRR మూవీ 
  
ఉత్త‌మ ప్రాంతీయ చిత్రాలు
ఉత్త‌మ హిందీ చిత్రం స‌ర్దార్ ఉద్దమ్
క‌న్న‌డ చిత్రం 777 చార్లీ
మ‌ల‌యాళం చిత్రం – హోమ్
త‌మిళ చిత్రం క‌దాసి వ్య‌వ‌సాయి
తెలుగు ఫిల్మ్ .. ఉప్పెన.........

నోటిఫికేషన్ కాపీలను దహనం చేసిన ఏఎన్ఎంలు
జగిత్యాల జిల్లా:ఆగస్టు 24
తమ ఉద్యోగాలను రెగ్యులరైజ్ చేయాలని తొమ్మిది రోజులుగా దీక్షలు చేస్తున్న రెండో ఏఎన్ఎంలు ప్రభుత్వ వైఖరి పట్ల తీవ్ర అసహనం వ్యక్తం చేస్తున్నారు.

ఏఎన్ఎంల రిక్రూట్ మెంట్ కోసం ప్రభుత్వం ఇచ్చిన నోటిఫికేషన్ కాపీలను గురువారం దీక్ష శిబిరం ఎదుట దహనం చేశారు. అనంతరం ఏఐటీయూసీ అనుబంధ ఏఎన్ఎంల సంఘం రాష్ట్ర ప్రధాన కార్యదర్శి గాండ్ల మధురిమ మాట్లాడుతూ.. సుదీర్ఘ కాలంగా సేవలు అందిస్తున్న తమని ప్రభుత్వం పట్టించుకోకపోవడం బాధాకరమన్నారు.

ఆర్టీసీ కార్మికులను,వీఆర్ఏ, పంచాయితీ కార్యదర్శులను కాంట్రాక్ట్ లెక్చలర్లను రెగ్యులరైజ్ చేసిన ప్రభుత్వం మమ్మల్ని ఎందుకు విస్మరించిదో అర్థం కావడం లేదన్నారు. కరోనా సమయంలో ప్రాణాలకు తెగించి సర్వీస్ చేసామని గుర్తు చేశారు.

రాష్ట్ర ప్రభుత్వం దిగివచ్చి ఇతర శాఖల్లో చేసిన మాదిరిగానే ఏఎన్ఎంలను రెగ్యులరైజ్ చేసి ఇటీవల విడుదల చేసిన నోటిఫికేషన్ రద్దు చేయాలని రాష్ట్రంలోని కాంట్రాక్ట్, ఔట్ సోర్సింగ్ ఏఎన్ఎంల పక్షాన మధురిమ డిమాండ్ చేశారు.

ఈ కార్యక్రమంలో సుప్రియ, నీరజ, పద్మ,రాజమని, మేరీ, ఎలిజబెత్, శిరీష, ప్రశాంతి, శైలజ, శిరీష, శారద, జమున, జయప్రద, చిలుకమ్మ, విజయలక్ష్మి, మహేశ్వరి, సుజాత, సరోజ, సుగుణ, ఊర్మిల, సమత, రాధ, ప్రశాంతి, సునీత, రమాదేవి, లక్ష్మికాంత, రజిత, సౌజన్య, పుష్ప, స్వరూప, సుమలత, జ్యోతి, తదితరులు పాల్గొన్నారు....

శాంతి భద్రతల పరిరక్షణలో తెలంగాణ పోలీస్ నెంబర్ వన్
రాష్ట్రంలో శాంతి భద్రతల పరిరక్షణలో తెలంగాణ పోలీసులు దేశంలోనే నెంబర్‌ వన్‌ అని రాష్ట్ర హోంమంత్రి మహముద్‌ అలీ అన్నారు.

నూతనంగా నిర్మించిన మైలార్‌దేవ్‌పల్లి పోలీస్‌ స్టేషన్‌ను  చేవెళ్ల ఎంపీ రంజిత్‌ రెడ్డి, ఎమ్మెల్యే ప్రకాష్‌ గౌడ్‌, డీజీపీ అంజనికుమార్‌, సీపీ స్టీఫెన్‌ రవీంద్రతో కలిసి గురువారం ప్రారంభించారు. అనంతరం మంత్రి మాట్లాడారు. రాష్ట్ర ప్రభుత్వం జనాభా పెరుగుదలకు అనుకూలంగా నూతన పోలీస్‌ స్టేషన్లను నిర్మిస్తున్నదని అన్నారు.

తెలంగాణ రాష్ట్రం ఏర్పాటు తర్వాత సీఎం కేసీఆర్‌ పోలీసు వ్యవస్థను పటిష్ట పరిచారని పేర్కొన్నారు. దేశంలో ఎక్కడా లేనటువంటి కమండ్‌ కంట్రోల్‌ వ్యవస్థను హైదరాబాద్‌ నడిబొడ్డులో ఏర్పాటు చేశామని వెల్లడించారు.

ప్రభుత్వ హయాంలో ఎలాంటి అవాంఛనీయ సంఘటనలు , కర్ఫ్యూలు జరగలేదంటే పోలీసుల పనితీరు ఎలా ఉందో అర్థం చేసుకోవాలని సూచించారు. రాష్ట్రంలో నేరాల సంఖ్య గణనీయంగా తగ్గిందని పేర్కొన్నారు..