ఉప్పల్‌లో మరో మణిహారం నేడు ప్రారంభించనున్న మంత్రి కేటీఆర్
మహా నగరానికి తూర్పు దిక్కున మరో మణిహారం సిద్ధమైంది. ఉప్పల్‌లో వద్ద పాదచారులు రోడ్డు దాటేందుకు ప్రభుత్వం ఎంతో ప్రతిష్టాత్మకంగా ఏర్పాటు చేసిన ఆకాశ నడక మార్గం సోమవారం నుంచి అందుబాటులోకి రానుంది. మంత్రి కేటీఆర్‌ నేడు ఈ ప్రాజెక్టును ప్రారంభించనున్నారు. 

రామంతాపూర్‌, సికింద్రాబాద్‌ వైపు నుంచి ఎల్‌బీనగర్‌ వైపు, ఉప్పల్‌ నుంచి రామంతాపూర్‌, సికింద్రాబాద్‌ వైపు.. ప్రతి రోజు వేలాది మంది పాదచారులు రోడ్డు దాటేందుకు తీవ్ర ఇబ్బందులకు గురవుతున్నారు. ముఖ్యంగా దూరప్రాంతాల నుంచి నగరానికి చేరుకొనే ప్రయాణికులు ఉప్పల్‌ రింగురోడ్డు వద్ద రోడ్డు దాటేందుకు ఎంతో ప్రయాస పడుతుండేవారు. 

ఉప్పల్‌ మెట్రో స్టేషన్‌ నుంచి రాకపోకలు సాగించే సుమారు 30 వేల మందికి పైగా ప్రయాణికులు సైతం ఎటు వైపు వెళ్లాలన్నా ఎంతో ఇబ్బందిగానే ఉండేది. ఈ క్రమంలో ఈజీగా రోడ్డు దాటేందుకు వీలుగా ఏర్పాటు చేసిన స్కైవాక్‌తో ఉప్పల్‌ రింగురోడ్డు వద్ద పాదచారులు ఎలాంటి ఆటంకం లేకుండా రాకపోకలు సాగించనున్నారు.

నగరంలోనే మొదటిది..
దాదాపు రూ.25 కోట్లతో హెచ్‌ఎండీఏ ఉప్పల్‌ స్కైవాక్‌ను నిర్మించింది. 660 మీటర్ల పొడవు ఉన్న ఈ ఆకాశ నడక మార్గం నగరంలో మొట్టమొదటి నిర్మాణం. రాబోయే వందేళ్ల పాటు వినియోగంలో ఉండేలా ప్రజల అవసరాలకు అనుగుణంగా స్కైవాక్‌ను ఎంతో పటిష్టంగా నిర్మించినట్లు హెచ్‌ఎండీఏ ఉన్నతాధికారి ఒకరు తెలిపారు. దీనికోసం సుమారు వెయ్యి టన్నులకు పైగా స్ట్రక్చరల్‌ స్టీల్‌ను వినియోగించారు. వివిధ రకాల స్కైవాక్‌ నమూనాలను పరిశీలించిన అనంతరం హెచ్‌ఎండీఏ ప్రస్తుతం ఉన్న ఏర్పాటును ఖరారు చేసింది. ఇందుకోసం హెచ్‌ఎండీఏ కమిషనర్‌ అర్వింద్‌కుమార్‌ ప్రత్యేక శ్రద్ధ తీసుకున్నారు. 2020లోనే పనులు ప్రారంభించినప్పటికీ కోవిడ్‌ కారణంగా నిర్మాణంలో జాప్యం నెలకొంది. ఎట్టకేలకు ప్రస్తుతం నిర్మా ణం పూర్తి చేసుకొని వినియోగంలోకి రానుంది.......

కారు ఎక్కుతాం ప్లీజ్‌..లిఫ్ట్!
రాష్ట్రంలోని రాజకీయ పార్టీల్లో ఎన్నికల మూడ్‌ వచ్చేసింది. సర్వేలు, సీట్ల పంపకం అంటూ ఏదో ఒక అంశంపై నిత్యం చర్చలు జరుగుతూనే ఉన్నాయి. 

ఇతర పార్టీల సంగతేమో కానీ అధికార బీఆర్‌ఎస్‌ నుంచి టికెట్‌ ఆశిస్తున్న వారి జాబితా రోజురోజుకి పెరిగిపోతోంది. ప్రభుత్వంలో కీలక బాధ్యతలు నిర్వహిస్తున్న పలువురు అధికారులు కూడా ఈసారి బీఆర్‌ఎస్‌ టికెట్‌ ఆశిస్తున్నారు.

 కొలువు వదిలి కారు ఎక్కి ప్రజాక్షేత్రంలోకి రావాలని ఆరాటపడుతున్నారు. రాష్ట్ర వైద్య ఆరోగ్య శాఖలో ఇలాంటి వారు ఐదారుగురు ఉన్నారు. ఎన్నికల టికెట్‌ ఆశిస్తున్న వీరంతా పార్టీ పెద్దలను ప్రసన్నం చేసుకునే పనిలో ఉన్నారని ఆ శాఖ వర్గాల్లో విస్తృత ప్రచారం జరుగుతోంది. నిజానికి, ప్రజారోగ్య సంచాలకుడు డాక్టర్‌ గడల శ్రీనివాసరావు పేరే ఇన్నాళ్లూ ఎన్నికల రేసులో వినిపించేది. తాజాగా వైద్యవిద్య సంచాలకుడు డాక్టర్‌ రమేశ్‌రెడ్డి పేరు ఈ జాబితాలో చేరింది. 

అంతేకాక, రమేశ్‌ రెడ్డికి టికెట్‌ దక్కే అవకాశాలు ఉన్నాయనే ప్రచారం కూడా జరుగుతోంది. 2017 జూన్‌ నుంచి డీఎంఈగా కొనసాగుతున్న రమేశ్‌రెడ్డికి సీఎం కేసీఆర్‌ వద్ద మంచి పేరుందనే ప్రచారమే ఇందుకు కారణం. ఉమ్మడి రాష్ట్రంలో గవర్నమెంట్‌ డాక్టర్స్‌ అసోసియేషన్‌ తరపున ప్రధాన కార్యదర్శిగా పోటీ చేసి గెలిచిన రమేశ్‌రెడ్డికి విద్యార్థి నాయకునిగా పనిచేసిన అనుభవమూ ఉంది. ఈ నేపథ్యంలో రాజకీయాలపై ఆసక్తి పెంచుకున్న రమేశ్‌రెడ్డి బీఆర్‌ఎస్‌ నుంచి టికెట్‌ ఆశిస్తున్నారని ఆయన సన్నిహిత వర్గాలు వెల్లడించాయి. ఇక, తెలంగాణ రాష్ట్ర వైద్య సేవలు మౌలిక సదుపాయాలభివృద్ధి సంస్థ(టీఎ్‌సఎంఎ్‌సఐడీసీ) చైర్మన్‌ ఎర్రోళ్ల శ్రీనివాస్‌ కూడా రాబోయే ఎన్నికల్లో పోటీ చేసే ఆలోచనలో ఉన్నారు. జహీరాబాద్‌ లేదా కంటోన్మెంట్‌ నుంచి ఆయన టికెట్‌ ఆశిస్తున్నట్లు సన్నిహిత వర్గాలు చెబుతున్నాయి.

 నిజానికి, 2018లో ఎర్రోళ్ల ఉమ్మడి మెదక్‌ జిల్లా అందోల్‌ సీటు ఆశించినా అధిష్ఠానం టికెటివ్వలేదు. రంగారెడ్డి డీఎంహెచ్‌వో ఆఫీసులో పనిచేస్తున్న టీఎన్‌జీవో రాష్ట్ర అధ్యక్షుడు మామిళ్ల రాజేందర్‌.. సంగారెడ్డి నియోజకవర్గం నుంచి బీఆర్‌ఎస్‌ టికెట్‌ ఆశిస్తున్నారు. రాజేందర్‌ ఇప్పటికే ఎన్నికల ప్రచారాన్ని కూడా ప్రారంభించారని ఉద్యోగ సంఘాల నేతలు చెబుతున్నారు. ఉమ్మడి వరంగల్‌ జిల్లాలోని ఓ డీఎంహెచ్‌వోతోపాటు నీలోఫర్‌లో డిప్యూటీ సివిల్‌ సర్జన్‌ డాక్టర్‌ లాలూప్రసాద్‌ రాథోడ్‌ కూడా బీఆర్‌ఎస్‌ టికెట్‌ ఆశిస్తున్నారు. డాక్టర్‌ లాలూ ఉమ్మడి నల్గొండ జిల్లాలో ఎస్టీ స్థానమైన దేవరకొండ నుంచి పోటీ చేయాలనుకుంటున్నారు.

కొత్తగూడెం బరిలో డీహెచ్‌ గడల
రాష్ట్ర ప్రజారోగ్య సంచాలకుడు డాక్టర్‌ గడల శ్రీనివాసరావు తన సొంత నియోజకవర్గం కొత్తగూడెం నుంచి పోటీ చేసేందుకు ఆసక్తి చూపుతున్నారు. ఇప్పటికే తండ్రి పేరిట ఓ ట్రస్ట్‌ ఏర్పాటు చేసి విస్తృత సేవా కార్యక్రమాలు చేస్తున్నారు. అంతేకాక, ఆ నియోజకవర్గంలో డీహెచ్‌ గడల సామాజికవర్గపు ఓట్లు 35వేల వరకు ఉన్నాయి. ఇప్పటికే సామాజిక వర్గ పెద్దలతో పలుమార్లు భేటి అయిన ఆయన వారి మద్దతు కూడగట్టినట్లు వైద్యవర్గాల్లో ప్రచారం జరుగుతోంది. ప్రభుత్వ ఆశీస్సులతోనే గడల ఈ కార్యక్రమాలు నిర్వహిస్తున్నారని అంటున్నారు. మరోపక్క, కొత్తగూడెం సిటింగ్‌ ఎమ్మెల్యే వనమా వెంకటేశ్వరరావుకు వయసు పైబడటం, ఆయన కుమారుడిపై తీవ్రమైన ఆరోపణలుండటంతో ఈసా రి ఆ కుటుంబానికి టికెట్‌ దక్కదని బీఆర్‌ఎస్‌ వర్గాలు భావిస్తున్నాయి. అదే జరిగి తే ఆ స్థానంలో గులాబీ పార్టీకి మరో బలమైన నాయకుడు లేరు. దీంతో ఆ టికెట్‌ ఆశిస్తున్న గడల ఎన్నికల బరిలో నిలవాలని పట్టుదలగా ఉన్నారని సమాచారం...

పాఠశాలల్లో నో "బ్యాగ్" డే ప్రవేశపెట్టనున్న  సర్కార్?
 విద్యార్థులకు పుస్తకాల భారాన్ని, ఒత్తిడిని తగ్గించేందుకు రాష్ర్టంలోని అన్ని పాఠశాలల్లో ‘నో బ్యాగ్ డే’ను ప్రవేశపెట్టారు. ప్రభుత్వ పాఠశాల విద్యార్థులకు మరింత ఆహ్లాదకర వాతావరణంలో విద్యాబోధన అందించేందుకు ఈ విద్యా సంవత్సరం నుంచి ఈ విధానాన్ని అమలు చేస్తున్నారు. అన్ని పాఠశాలల్లో ప్రతినెలా నాలుగో శనివారం ‘నో బ్యాగ్ డే’గా పాటించనున్నారు.

28 రకాల కార్యకలాపాలు
ప్రైమరీ విభాగంలో షో టైమ్, ఫన్ స్టేషన్, క్రియేటివ్ సర్కిల్ అనే మూడు సెషన్లు ఉంటాయి. 1వ మరియు 2వ తరగతి విద్యార్థులు తమ కుటుంబం గురించి మాట్లాడడం, కుటుంబ సభ్యుల్లో ఒకరిలా నటించడం వంటి టాస్క్ ఉంటుంది. దీంతోపాటు కమ్యూనికేషన్ స్కిల్స్, సృజనాత్మకతను పెంపొందించుకునే కుటుంబ సభ్యుని స్కెచ్‌ని గీయమని కోరతారు. వీటితో పాటు విద్యార్థుల సామర్థ్యాన్ని బట్టి ఉపయోగించుకునే అవకాశం కల్పించారు. ఇందులో మ్యూజియంలు, చారిత్రక ప్రదేశాలు, గ్రామ పంచాయతీ కార్యాలయాల సందర్శనలు, సైన్స్ ప్రయోగాలు, డూడ్లింగ్, మోడల్ అసెంబ్లీ, మోడల్ ఎలక్షన్స్ వంటి ఇండోర్ కార్యకలాపాలు ఉంటాయి.

3 నుంచి 5వ తరగతి విద్యార్థులకు
మూడు నుంచి ఐదు తరగతులు చదివే విద్యార్థులకు కార్యాచరణ ఆధారిత అభ్యాసంలో భాగంగా, జీవనోపాధిపై ఒక థీమ్‌ను అభివృద్ధి చేశారు. వృత్తిలో ఉపయోగించే పనిముట్లను గీయడం, నచ్చిన వృత్తిపై మాట్లాడడం, ఆ పనిని చేయడంపై అసైన్‌మెంట్ ఇస్తారు.

సెకండరీ స్థాయిలో
సెకండరీ స్థాయిలో 6 నుంచి 10వ తరగతి విద్యార్థులకు కుటుంబ బడ్జెట్ సర్వే, పోస్ట్ ఆఫీస్, నిర్మాణ స్థలాలు, రేషన్ షాపుల సందర్శన, ఫీల్డ్ విజిట్‌లు, మోడల్ అసెంబ్లీ, మోడల్ ఎలక్షన్, అవుట్‌డోర్ మరియు ఇండోర్ కార్యకలాపాలు ఉంటాయి. సెకండరీ స్కూల్ స్థాయి విద్యార్థులకు ఆర్టిఫిషియల్ ఇంటెలిజెన్స్‌కు సంబంధించిన ప్రాథమిక అంశాలు, దాని అప్లికేషన్లు, కెరీర్ అవకాశాలను సైతం పరిచయం చేయనున్నారు. పా శాలలు ఆరంభమై 12 రోజులు కావడంతో విద్యార్థుల హాజరు శాతం తక్కువగా ఉంది. జులై నుంచి కచ్చితంగా అమలు చేసేందుకు పాఠశాలల యాజమాన్యాలు సిద్ధమవుతున్నాయి...

తిరుమలలో కొనసాగుతున్న భక్తుల రద్దీ
తిరుమల :జూన్ 26
కలియుగ ప్రత్యేక్షదైవం తిరుమలలో సోమవారం రోజు భక్తుల రద్దీ కొనసాగుతుంది. 9 కంపార్టుమెంట్లలో భక్తులు వేచిఉన్నారు. 

శ్రీవారి సర్వదర్శనానికి 8 గంటల సమయం పడుతుందని టీటీడీ (TTD) అధికారులు తెలిపారు.

 నిన్న ఆదివారం శ్రీవారి హుండీ ఆదాయం రూ.4.47 కోట్లు వచ్చినట్లు తిరుమల తిరుపతి దేవస్థానం వెల్లడించింది.

 నిన్న ఒక్కరోజే 87,407 మంది భక్తులు శ్రీవారిని దర్శించుకోగా.. 31,713 మంది భక్తులు తలనీలాలు సమర్పించుకున్నారు...

పొంగులేటి అనుచరులకు షాక్‌.. పాత కేసులపై పోలీసుల నోటీసులు?
తెలంగాణలో రాజకీయాలు రసవత్తరంగా మారిపోయాయి. ఇక, ఖమ్మం జిల్లాలో పాలిటిక్స్‌లో కీలక పరిణామం చోటుచేసుకుంది. 

అయితే, పొంగులేటి శ్రీనివాస్‌ కాంగ్రెస్‌ పార్టీలో చేరడం ఖాయమైన విషయం తెలిసిందే. ఈ నేపథ్యంలో ఆయన అనుచరులను అధికార బీఆర్‌ఎస్‌ పార్టీ టార్గెట్‌ చేసినట్టు తెలుస్తోంది. 

తాజాగా పొంగులేటి అనుచరులపై పాత కేసులు తిరగదోడుతున్నారు. అందులో భాగంగానే పొంగులేటి శ్రీనివాస్‌ ప్రధాన అనుచరులు తుళ్లూరి బ్రహ్మయ్య, డీసీసీబీ మాజీ ఛైర్మన్‌ మువ్వా విజయ్‌ బాబుపై పోలీసులు నాన్‌బెయిలబుల్‌ కేసులు నమోదు చేశారు. ఈ క్రమంలో ఏడాది క్రితం ఓ ఘటన ఆధారంగా కేసు నమోదు చేసినట్టు తెలుస్తోంది. ఇక, డీసీసీబీ మాజీ ఛైర్మన్‌ విజయ్‌ బాబు బ్యాంకు కేసును సీఐడీకి అప్పగించే అవకాశం కూడా ఉన్నట్టు సమాచారం.  ఈ నేపథ్యంలో పొంగులేటి మద్దతుదారులు స్పందించారు. రాజకీయ ఎత్తుగడలో భాగంగానే కక్షపూరితంగా బీఆర్‌ఎస్‌ ప్రభుత్వం కేసులు నమోదు చేసినట్టు ఆగ్రహం వ్యక్తం చేస్తున్నారు. 

ఇదిలా ఉండగా.. టీపీసీసీ చీఫ్‌ రేవంత్‌ రెడ్డితో పొంగులేటి నేడు ఆదివారం ఢిల్లీకి వెళ్లనున్నారు. పార్టీలో చేరికపై రాహుల్‌ గాంధీతో వీరు చర్చించనున్నారు. ఈ క్రమంలో ఖమ్మంపై కాంగ్రెస్‌ పార్టీ ఫుల్‌ ఫోకస్‌ పెట్టింది. వచ్చే ఎన్నికల్లో పదికి పది స్థానాల్లో గెలుపే లక్ష్యంగా ముందుకు సాగుతోంది. దీంతో, అధికార బీఆర్‌ఎస్‌ పార్టీ అలర్డ్‌ అయ్యింది. సీఎం కేసీఆర్‌ కూడా ఖమ్మంపై ప్రత్యేకంగా ఫోకస్‌ చేశారు. మంత్రి పువ్వాడ అజయ్‌తో మాట్లాడుతూ అక్కడి పొలిటికల్‌ సమీకరణాలను తెలుసుకుంటున్నారు. అటు, బీజేపీ కూడా ఖమ్మం రాజకీయాలను పరిశీలిస్తోంది. దీంతో, ఖమ్మంలో పొలిటికల్‌ వాతావరణం హీటెక్కింది.......

శేపూరి రవీందర్ గారికి చిట్యాల మున్సిపాలిటీ కేంద్రంలో ఘనంగా సన్మానం
•బిజెపి జిల్లా కార్యవర్గ సభ్యులు పల్లపు బుద్ధుడు ఆధ్వర్యంలో

బిజెపి రాష్ట్ర కార్యవర్గ సభ్యులు గా నియమితులైన చిట్యాల మున్సిపాలిటీ కౌన్సిలర్ చిట్యాల మండలం మాజీ జెడ్పిటిసి శేపూరి రవీందర్ గారికి ఈరోజు మున్సిపాలిటీ కేంద్రంలో బిజెపి జిల్లా కార్యవర్గ సభ్యులు పల్లపు బుద్ధుడు ఆధ్వర్యంలో ఘనంగా  సన్మానించి శుభాకాంక్షలు తెలియజేశారు.

 నకిరేకల్ నియోజకవర్గంలో బిజెపి బలోపేతానికి అహర్నిశలు కృషి చేస్తున్న శేపురి రవీందర్ గారికి ప్రతి ఒక్కరం అండగా నిలుస్తామని నకిరేకల్ నియోజకవర్గం లో బిజెపి జెండా ఎగరవేసే వరకు కలిసికట్టుగా పోరాటం చేస్తామని తెలియజేశారు.

 ఈ ప్రాంత ప్రజా సమస్యలపై పోరాటం చేస్తూ అనునిత్యం అందుబాటులో ఉంటూ పార్టీ బలోపేతానికి కృషి చేస్తున్న శేపూరి రవీందర్ కు రాష్ట్ర కార్యవర్గ సభ్యుడిగా నియమించినందుకు నకిరేకల్ బిజెపి కేడర్లో జోష్ వచ్చిందని తెలియజేశారు.
 ఈ కార్యక్రమంలో చిట్యాల మున్సిపాలిటీ ప్రధాన కార్యదర్శి గంజి గోవర్ధన్, బిజెపి జిల్లా నాయకులు ముడుసు బిక్షపతి, నార్కట్ పల్లి మండల ప్రధాన కార్యదర్శి తరాల శ్రీనివాస్, మీడియా సెల్ కన్వీనర్ ఉయ్యాల లింగస్వామి గౌడ్, యువజన నాయకులు పాకల దినేష్, మర్రి హరీష్ రెడ్డి, వెంకన్న, నరసింహ, లింగయ్య, యాదయ్య, సందీప్, నవీన్, అశోక్, నాగరాజు, శేఖర్, రవి తదితరులు పాల్గొన్నారు.

విపక్ష కూటమి పేరు యూపీఏ కాదు పీడీఏ అని సిమ్లా మీటింగ్‌లో ముద్ర వేయనున్నారు
2024 లోక్‌సభ ఎన్నికల కోసం విపక్షాల కూటమి ప్రయత్నాలు ముమ్మరంగా సాగుతున్నాయి. శుక్రవారం బీహార్ ముఖ్యమంత్రి నితీశ్ కుమార్ నివాసంలో 15 విపక్షాలు ఏకతాటిపైకి వచ్చి సమావేశమయ్యాయి.

 ఈ సమావేశంలో వివిధ అంశాలపై చర్చించారు. ఈసారి కూడా ఈ కూటమి పేరు యుపిఎ అంటే యునైటెడ్ ప్రోగ్రెసివ్ అలయన్స్ లేదా యుపిఎ అని ఊహాగానాలు జరుగుతున్నాయి, అయితే అలాంటి అవకాశం తక్కువ. సీపీఐ విడుదల చేసిన పత్రికా ప్రకటనలో కూటమి పేరు పీడీఏ అంటే పేట్రియాటిక్ డెమోక్రటిక్ అలయన్స్ అని పేర్కొన్నారు.

సీపీఐ పత్రికా ప్రకటనలో పేరు ప్రస్తావనకు వచ్చింది
సిమ్లాలో జరిగే సమావేశంలో కూటమి పేరు ఖరారవుతుందని సీపీఐ విడుదల చేసిన పత్రికా ప్రకటనలో పేర్కొంది. ఈ పత్రికా ప్రకటనలో సీపీఐ నేత డి రాజాను ఉటంకిస్తూ కొత్త కూటమి పేరును పిడిఎగా పేర్కొన్నారు. గతంలో సమాజ్‌వాదీ పార్టీ అధినేత అఖిలేష్ యాదవ్ కూడా పీడీఏ పేరుతో వెనుకబడిన, దళిత, మైనారిటీల కూటమి గురించి చెప్పిన సంగతి తెలిసిందే. దీని తర్వాత, సీపీఐ పత్రికా ప్రకటనలో కూడా ఈ పేరును ప్రస్తావిస్తూ ఈసారి ప్రతిపక్ష పార్టీల కూటమి పేరు UPA నుండి PDA గా మారనుంది.

నితీష్ కుమార్ కసరత్తు ప్రారంభించారు
2024 లోక్‌సభ ఎన్నికల కోసం, బీహార్ ముఖ్యమంత్రి నితీష్ కుమార్ పాట్నాలో జరిగిన ఈ సమావేశానికి హాజరు కావాలని అన్ని ప్రతిపక్ష పార్టీల నేతలను ఆహ్వానించారని, ఆ తర్వాత ఈ సమావేశం శుక్రవారం జరిగిందని మీకు తెలియజేద్దాం. ఇప్పుడు తదుపరి సమావేశం కొన్ని రోజుల తర్వాత హిమాచల్ ప్రదేశ్‌లోని సిమ్లాలో జరగనుంది. శుక్రవారం జరిగిన ఈ సమావేశంలో 15 పార్టీల నేతలు పాల్గొన్నారు. ఈ సమావేశం అనంతరం విపక్ష నేతలంతా సంయుక్తంగా మీడియాతోనూ మాట్లాడారు.అయితే ఈ మీడియా సమావేశానికి ఆమ్ ఆద్మీ పార్టీ నేతలు తప్పుకోవడం గమనార్హం.

Train Accident: పశ్చిమబెంగాల్‌లో రెండు రైళ్లు ఢీ.. పట్టాలు తప్పిన 12 వ్యాగన్లు
బంకురా: పశ్చిమబెంగాల్‌లోని బంకురా జిల్లాలో రైలు ప్రమాదం జరిగింది. అడ్రా డివిజన్‌ పరిధిలోని ఓండా స్టేషన్‌కు సమీపంలో గూడ్స్‌ రైలు, మెయింటెనెన్స్‌ రైలును ఢీకొంది..

ఈ ఘటనతో 12కిపైగా వ్యాగన్లు పట్టాలు తప్పాయి. ప్రమాద తీవ్రతకు గూడ్స్‌ రైలు ఇంజిన్‌.. మరో రైలు వ్యాగన్‌ పైకి చేరింది. ఈ ఘటనతో ఆ మార్గంలో రైళ్ల రాకపోకలకు అంతరాయం ఏర్పడింది. రైల్వే సిబ్బంది ఘటనాస్థలికి చేరుకుని పునరుద్ధరణ చర్యలు చేపట్టారు. ఈ ప్రమాదంలో ఓ రైలు డ్రైవర్‌ స్వల్ప గాయాల పాలయ్యాడు.

ప్రమాదం ఎలా జరిగిందంటే..?
తెల్లవారుజామున 4.05 గంటల సమయంలో ఓండా స్టేషన్‌ వద్ద రైల్వే మెయింటెనెన్స్‌ రైలు (బీఆర్‌ఎన్‌) షంటింగ్‌ పని జరుగుతోంది. ఆ సమయంలో గూడ్స్‌ రైలుకు రెడ్‌ సిగ్నల్‌ పడింది. కానీ, గూడ్స్‌ రైలు ఆగకుండా ముందుకు వెళ్లిపోయింది. ఆ తర్వాత బీఆర్‌ఎన్‌ మెయింటెనెన్స్‌ రైలును ఢీకొంది. దీంతో 12 వ్యాగన్లు పట్టాలు తప్పాయి. ఉదయం 7 గంటల సమయానికి అప్‌ మెయిల్‌, అప్‌ లూప్‌ లైన్లను పునరుద్ధరించారు. 

ఈ విషయాన్ని ఆగ్నేయ రైల్వే సీపీఆర్‌వో వెల్లడించారు.
ఈ ప్రమాదంపై రైల్వే అధికారులు మాట్లాడుతూ.. రెండు రైళ్లలో ఎటువంటి లోడు లేదని వెల్లడించారు. ప్రమాదానికి గల కారణాలను తెలియాల్సి ఉందని పేర్కొన్నారు. ఈ ఘటన చోటు చేసుకొన్న అడ్రా డివిజన్‌.. పశ్చిమబెంగాల్‌లో నాలుగు జిల్లాలైన వెస్ట్‌ మిడ్నాపుర్‌, బంకురా, పురులియా, బృందావన్‌లో రైళ్ల రాకపోకలకు కీలకమైంది. ఇక ఝార్ఖండ్‌లోని ధన్‌బాద్‌, బొకారో, సింగభూమ్‌ పై కూడా కొంత ప్రభావం పడవచ్చు. ప్రమాదం జరిగిన మార్గంలో వీలైనంత త్వరగా రాకపోకలను

పునరుద్ధరించి.. పురులియా ఎక్స్‌ప్రెస్‌ వంటి సర్వీసులను పునరుద్ధరించేలా రైల్వే అధికారులు తక్షణమే ప్రయత్నాలు మొదలుపెట్టారు..

హైదరాబాద్ బయలుదేరిన కేటీఆర్ బృందం
రెండు రోజుల ఢిల్లీ పర్యటన ముగించుకొని మంత్రి కేటీఆర్ బృందం ఆదివారం ఉదయం హైదరాబాద్  బయలు దేరింది. రెండు రోజుల్లో ముగ్గురు కేంద్ర మంత్రులతో విడివిడిగా సమావేశం అయి రాష్ట్రానికి సంబంధించిన అనేక అంశాలపై కేటీఆర్ చర్చించారు.

 కేంద్ర రక్షణ మంత్రి రాజనాథ్ సింగ్  కేంద్ర పట్టణాభివృద్ధి శాఖ మంత్రి హరీదీప్ సింగ్ పురి  కేంద్ర వాణిజ్య శాఖ మంత్రి పియూష్ గోయల్‌ లతో కేటీఆర్ బృందం భేటీ అయింది.

హైదరాబాదులో పలు ప్రాంతాల్లో రక్షణ శాఖ భూములను రాష్ట్ర ప్రభుత్వానికి ఇచ్చే అంశంపై రాజనాథ్ సింగ్‌తో మంత్రి కేటీఆర్ చర్చించారు. హైదరాబాద్ మెట్రో రెండో దశకు అనుమతి ఇవ్వాలని, ట్రాఫిక్ రద్దీని తగ్గించేందుకు అణువుగా స్కై వేలు ఫ్లై ఓవర్ నిర్మాణం జరిపేందుకు పూర్తిస్థాయి సహకారం అందించాలని హరిదీప్ సింగ్ పురికి కేటీఆర్ విజ్ఞప్తి చేశారు. దేశవ్యాప్తంగా పట్టణాల్లో కార్మికుల సంఖ్య పెరుగుతున్నందున పట్టణ ఉపాధి హామీ పథకాన్ని ప్రారంభించాలని కేటీఆర్ ప్రతిపాదించారు.

తెలంగాణ నుంచి అదనంగా 20 లక్షల టన్నుల ఉప్పుడు బియ్యం సేకరించాలని కేంద్ర వాణిజ్య శాఖ మంత్రి పియూష్ గోయల్‌కు మంత్రి కేటీఆర్ విజ్ఞప్తి చేశారు. కేంద్ర మంత్రులతో చర్చించిన సందర్భంలో కొంత సానుకూలత కొంత ప్రతికూలత వచ్చిందని మంత్రి తెలిపారు. తర్వాత రాష్ట్ర విభజన చట్టంలోని పెండింగ్‌లో ఉన్న అంశాలు, హోంశాఖ పరిధిలోని భూములను అభివృద్ధి అవసరాల నిమిత్తం రాష్ట్రానికి బదలాయించాలని, ఇతర విషయాలపై చర్చించేందుకు తొలుత కేంద్ర హోంశాఖ మంత్రి అమిత్ షా  సమయం ఖరారు చేశారు. అయితే మణిపూర్ ఘటనలపై అఖిలపక్ష సమావేశం, ముందుగా నిర్ణయించుకున్న కార్యక్రమాలు ఆలస్యం అవ్వడంతో... అపాయింట్‌మెంట్ రద్దు చేసినట్లు కేటీఆర్‌కు హోంశాఖ మంత్రి కార్యాలయ అధికారులు సమాచారం పంపారు. దీంతో రెండు రోజుల పర్యటన ముగియడంతో ఆదివారం ఉదయం ఎంపీలతో కలిసి మంత్రి కేటీఆర్ హైదరాబాదు బయలుదేరారు...

విఠలేశ్వరుడి దర్శనానికి సీఎం కేసీఆర్‌?
బీఆర్‌ఎస్‌ అధినేత, సీఎం కేసీఆర్‌ ఈ నెల 26, 27 తేదీల్లో మహారాష్ట్రలో పర్యటించనున్నారు. 

సోమవారం ఉదయం హైదరాబాద్‌ నుంచి రోడ్డు మార్గాన బయలుదేరి సాయంత్రానికి సోలాపూర్‌ చేరుకుంటారు. 

ఆయన వెంట మంత్రులు, ఎమ్మెల్యేలు, ఎమ్మెల్సీలు ఇతర ప్రజా ప్రతినిధులు భారీ కాన్వాయ్‌గా తరలి వెళ్లనున్నారు. ఆ రాత్రి అక్కడే బసచేస్తారు. ఈ సందర్భంగా సోలాపూర్‌లోని పలువురు మహారాష్ట్ర నేతలు, తెలంగాణ నుంచి వెళ్లిన చేనేత కార్మికుల కుటుంబాలు సీఎం కేసీఆర్‌ను కలిసే అవకాశం ఉన్నట్టు పార్టీ వర్గాలు తెలిపాయి.

మంగళవారం ఈనెల 27న ఉదయం సోలాపూర్‌ జిల్లాలో పండరిపూర్‌కు చేరుకొని అక్కడి విఠోభారుక్మిణి మందిర్‌లో ప్రత్యేక పూజలు నిర్వహించనున్నారు. సోలాపూర్‌ జిల్లా ప్రముఖ నాయకుడు భగీరథ్‌ బాల్కే సహా పలువురు నేతలు సీఎం కేసీఆర్‌ సమక్షంలో బీఆర్‌ఎస్‌లో చేరనున్నారు. అనంతరం అక్కడి నుంచి హైదరాబాద్‌ తిరిగి ప్రయాణం కానున్నారు. హైదరాబాద్‌ వస్తు న్న క్రమంలో దారాశివ్‌ జిల్లాలోని శక్తిపీఠమైన తుల్జాభవానీ అమ్మవారిని దర్శించుకొని ప్రత్యేక పూజలు చేసిన అనంతరం హైదరాబాద్‌కు అదే రోడ్డుమార్గాన చేరుకుంటారని పార్టీ వర్గాలు తెలిపాయి....