NLG: ఘనంగా మెస్ చార్జీల పెంపు కార్యక్రమం.. సహపంక్తి భోజనం చేసిన అధికారులు, పేరెంట్స్ కమిటీ


 
 
  నల్లగొండ: ప్రభుత్వ గురుకుల పాఠశాలలో చదివే విద్యార్థుల మెస్ చార్జీల పెంపు కార్యక్రమాన్ని పండగ వాతావరణంలో నిర్వహించాలని సొసైటీ కార్యదర్శి అలుగు వర్షిణి పిలుపు మేరకు, ఈరోజు తెలంగాణ సాంఘిక సంక్షేమ గురుకుల పాఠశాల/కళాశాల (బాలుర) చండూర్ నందు కార్యక్రమం .ఈ కార్యక్రమంలో విద్యార్థుల తల్లిదండ్రులు, పేరెంట్స్ కమిటి సభ్యులు,  ఉపాధ్యాయినీ ఉపాధ్యాయులు విద్యార్థులు పాల్గొన్నారు. ముఖ్య అతిథిగా  పంచాయతీరాజ్ ఎగ్జిక్యూటివ్ ఇంజనీర్ కే.గిరిధర్ విచ్చేసి పాఠశాల కిచెన్ రూమ్,, డార్మెటరీ మరియు బాత్రూంలు,తరగతి గదులు అన్ని పరిశీలించి సంతృప్తిని వ్యక్తం చేసినారు.
  అనంతరం సమావేశంలో పాల్గొని రాష్ట ప్రభుత్వం విద్యార్థులకు 40% మేర పెంచిన మెస్ చార్జీలను గురించి తల్లిదండ్రులకు వివరించారు. తదుపరి విద్యార్థులు, విద్యార్థుల తల్లిదండ్రులు మరియు ఉపాధ్యాయులతో కలిసి సహపంక్తి భోజనం చేసారు.
  ఈ కార్యక్రమంలో పాఠశాల/కళాశాల ఇన్చార్జ్ ప్రిన్సిపాల్ స్వామి,పేరెంట్స్ కమిటి అధ్యక్షులు గ్యార యాదగిరి, ఉపాధ్యక్షులు సుష్మ, జనరల్ సెక్రెటరీ అద్దంకి కిరణ్, సెక్రెటరీ సుధా, కమిటీ మెంబర్ రాజు, విద్యార్థుల తల్లిదండ్రులు మరియు పాఠశాల అధ్యాపక బృందం పాల్గొన్నారు.
 

ఈ నెల 22 న పుడమి పుత్ర అవార్డుల ప్రధానం

 
 
  నల్లగొండ: డిసెంబర్ 22న యాదగిరిగుట్టలో గాంధీ విజ్ఞాన సదస్సు పేరుతో, గాంధీ గ్లోబల్ ఫ్యామిలీ రాష్ట్ర చైర్మన్ గున్నా రాజేందర్ రెడ్డి సారధ్యంలో, రైతు సదస్సు నిర్వహించనున్నామని.. అందులో ఆదర్శ రైతులకు 'పుడమి పుత్ర' అవార్డు ప్రధానం జరగనున్నదని, గాంధీ గ్లోబల్ ఫ్యామిలీ రాష్ట్ర ప్రధాన కార్యదర్శి యానాల ప్రభాకర్ రెడ్డి అన్నారు,
  శనివారం స్థానిక మైత్రి కోచింగ్ సెంటర్లో నిర్వహించిన విలేకరుల సమావేశంలో వారు మాట్లాడుతూ.. డిసెంబర్ 22న యాదగిరిగుట్ట లోని రెడ్డి సంక్షేమ సంఘ భవనం లో రైతు సదస్సు నిర్వహిస్తున్నామని, పది రాష్ట్రాల నుంచి 115 మంది సేంద్రియ వ్యవసాయం చేస్తున్న రైతులు మరియు ప్రత్యక్షంగా పరోక్షంగా రైతులకు సహకరిస్తున్న శాస్త్రవేత్తలు, జర్నలిస్టు లకు 'కిసాన్ సేవా రత్న' అవార్డులు అందజేయనున్నామని తెలిపారు.
  ఈ మేరకు  రైతు సదస్సు కన్వీనర్ పడమటి పావని మాట్లాడుతూ.. కార్యక్రమంలో రైతుల ఉత్పత్తులు ప్రదరిస్తున్నామని, గ్రామ నిర్మాతల ఉత్పత్తుల ప్రదర్శన, చరఖ ప్రదర్శన మరియు ఫీట్ పొడవు గల 500 మహాత్మా గాంధీ విగ్రహాల ప్రదర్శన నిర్వహించి, గిన్నిస్ బుక్ ఆఫ్ వరల్డ్ రికార్డ్ లో నమోదు కాబోతున్నామని తెలిపారు.
  గాంధీ సుస్థిర విజ్ఞాన సదస్సు లో ముఖ్య అతిథులుగా రాష్ట్ర వ్యవసాయ శాఖ మంత్రి తుమ్మల నాగేశ్వరరావు, రోడ్డు భవనాల శాఖ మంత్రి కోమటిరెడ్డి వెంకటరెడ్డి, ప్రభుత్వ చీప్ విప్  బీర్ల ఐలయ్య ఉమ్మడి జిల్లా శాసనసభ్యులు పాల్గొననున్నారని నిర్వాహకులు తెలిపారు.
  

  
విలేకరుల సమావేశంలో గాంధీ గ్లోబల్ ఫ్యామిలీ రాష్ట్ర ఆర్గనైజింగ్ సెక్రెటరీ మెరుగు మధు, రాష్ట్ర క్రీడా విభాగం కన్వీనర్ బొమ్మ పాల గిరిబాబు, యాదాద్రి భువనగిరి జిల్లా అధ్యక్షులు మాటూరి అశోక్, కొత్త బాలరాజు, యానాల అనిత, పాముల అశోక్ ముదిరాజ్, అజీజ్ ,జ్యోతి, వెంకట్ రెడ్డి,రవి తదితరులు పాల్గొన్నారు.
  

 

నూతన బస్సు సర్వీస్ లను ప్రారంభించిన ఎమ్మెల్యే కోమటిరెడ్డి రాజగోపాల్ రెడ్డి

 
 
  నల్గొండ జిల్లా:
  
మునుగోడు: రాష్ట్ర ప్రభుత్వం ప్రతిష్టాత్మకంగా ప్రవేశపెట్టిన మాహా లక్ష్మి పథకాన్ని నియోజకవర్గంలోని అన్ని గ్రామాల మహిళలు వినియోగించుకోవాలని ఎమ్మెల్యే కోమటిరెడ్డి రాజగోపాల్ రెడ్డి అన్నారు. శనివారం మండల కేంద్రంలో ఎమ్మెల్యే కోమటిరెడ్డి రాజగోపాల్ రెడ్డి.. ఉమ్మడి నల్లగొండ జిల్లా ఆర్టీసీ రీజినల్ మేనేజర్ కే.జానీ రెడ్డి, డిప్యూటీ రీజినల్ మేనేజర్ (యం) శివశంకర్, నల్లగొండ డిఎం శ్రీనాథ్ లతో కలిసి 6 కొత్త బస్సులను రిబ్బన్ కట్ చేసి ప్రారంభించారు.
  మునుగోడు నియోజకవర్గంలో బస్సు సౌకర్యం లేని వివిధ గ్రామాలకు బస్సులను నడిపించాలని, మునుగోడు ఎమ్మెల్యే కోమటిరెడ్డి రాజగోపాల్ రెడ్డి, ఇటీవల  ట్రాన్స్పోర్ట్ మినిస్టర్ పొన్నం ప్రభాకర్ ను కలిసి వినతిపత్రం అందజేశారు. మునుగోడు నియోజకవర్గ ఎమ్మెల్యే కోరిక మేరకు ట్రాన్స్పోర్ట్ మినిస్టర్ 6 కొత్త బస్సులను నల్గొండ రీజియన్ కు ఇవ్వడం జరిగింది.
  

  
నూతనంగా ప్రారంభించిన ఇట్టి బస్సు సర్వీస్ ల  వివరాలు ఈ విధంగా ఉన్నాయి.
  

  
1) దేవరకొండ నుండి మల్లేపల్లి, ముష్టిపల్లి, నాంపల్లి, మర్రిగూడ, శివన్నగూడెం, చౌటుప్పల్, వలిగొండ ద్వారా యాదగిరిగుట్ట.
  

  
2) దేవరకొండ నుండి మల్లేపల్లి, రేవల్లి, నాంపల్లి, మాల్ ద్వారా హైదరాబాద్.
  

  
3) దేవరకొండ నుండి మల్లేపల్లి, ముష్టిపల్లి, నాంపల్లి, చండూర్, మునుగోడు, కాంచనపల్లి ద్వారా నల్గొండ.
  

  
4) నల్గొండ నుండి కొంచనాపల్లి, మునుగోడు, చొల్లేడు, గట్టుప్పల్, శివన్నగూడ, మర్రిగూడ ద్వారా మాల్.
  

  
5) నల్గొండ నుండి కొంచనాపల్లి, మునుగోడు, వెల్మకన్నె, శివన్నగూడ, లోయపల్లి, రంగాపూర్ ద్వారా ఇబ్రహీంపట్నం.
  

  
6) నల్గొండ నుండి కనగల్, చండూర్, లెంకలపల్లి, మర్రిగూడ ద్వారా మాల్
  

  
కాగా, మునుగోడు ఎమ్మెల్యే కోమటిరెడ్డి రాజగోపాల్ రెడ్డి కృషి వల్ల మునుగోడు నియోజకవర్గానికి ఆరు కొత్త బస్సులు రావడం పట్ల ఆయా గ్రామాల ప్రజలు హర్షం వ్యక్తం చేస్తున్నారు.
 

TG: ప్రజా భవన్ లో ప్రజావాణికి 441 దరఖాస్తులు

 
 
  HYD: మహాత్మా జ్యోతిబా పూలే ప్రజాభవన్ లో శుక్రవారం నిర్వహించిన ప్రజావాణి కార్యక్రమంలో మొత్తం 441 దరఖాస్తులు అందాయి.
  

  
పంచాయతీరాజ్ మరియు గ్రామీణాభివృద్ధి శాఖకు సంబంధించి 110, మైనార్టీ సంక్షేమ శాఖకు సంబంధించి 76, రెవెన్యూ పరమైన సమస్యలకు సంబంధించి 71, విద్యుత్ శాఖకు సంబంధించి 57, హోం శాఖకు సంబంధించి 23, ఇతర శాఖలకు సంబంధించి 104 దరఖాస్తులు అందినట్లు అధికారులు తెలిపారు.
  

  
ఈ కార్యక్రమంలో ప్రజాపాలన ప్రత్యేక అధికారి దివ్య ఐఏఎస్ పాల్గొని దరఖాస్తులు స్వీకరించారు. ప్రజా భవన్ కు వచ్చిన వారి సమస్యలు అడిగి తెలుసుకున్నారు.
  

  
ఈ మేరకు సమస్యల పరిష్కారానికి తగు చర్యలు తీసుకోవాలని సంబంధిత అధికారులకు సూచించారు.
 

TG:  బాసర ట్రిపుల్ ఐటీకి కోటి రూపాయల నిధులు మంజూరు చేయాలని కలెక్టర్ ను ఆదేశించిన మంత్రి సీతక్క

 
 
  నిర్మల్ జిల్లా:
  
బాసర ట్రిపుల్ ఐటీని మంత్రి సీతక్క శుక్రవారం సందర్శించారు. కాన్ఫరెన్స్ హాల్లో విద్యార్థులతో ముఖాముఖి భేటీలో పాల్గొన్నారు. నాణ్యమైన ఆహారం, మినీస్టేడియం, ఫ్యాకల్టీ, స్కాలర్షిప్, ల్యాప్టాప్ లు, డ్రైనేజీ వ్యవస్థ, ఆస్పత్రి సిబ్బంది వంటి విషయాలపై చర్చించారు.
  త్వరలోనే విద్యార్థుల సమస్యల గురించి ముఖ్యమంత్రితో చర్చించి సమస్యలను పరిష్కరిస్తామని హామి ఇవ్వడం జరిగింది. తక్షణమే కోటి రూపాయల నిధులు ట్రిపుల్ ఐటీకి మంజూరు చేయాలని జిల్లా కలెక్టర్ ను మంత్రి సీతక్క ఆదేశించారు. అనంతరం విద్యార్థులతో కలిసి మధ్యాహ్న భోజనం చేశారు.
  

  
ఈ కార్యక్రమంలో స్థానిక ఎమ్మెల్యే రామారావు పటేల్, ఎమ్మెల్సీ బల్మూరి వెంకట్, కలెక్టర్ అభిలాష అభినవ్, ఎస్పీ జానకి షర్మిల , ఎమ్మెల్సీ దండే విట్టల్, ట్రిపుల్ ఐటీ వీసీ గోవర్ధన్,  అధికారులు పాల్గొన్నారు.
 

NLG: సమగ్ర శిక్ష కాంట్రాక్ట్ ఉద్యోగులందరినీ పర్మినెంట్ చేయాలి: సిపిఐ

 
 
  నల్గొండ: సమగ్ర శిక్ష ఉద్యోగులందరినీ ప్రభుత్వం వెంటనే రెగ్యులర్ చేయాలని సిపిఐ జిల్లా కార్యదర్శి నెల్లికంటి సత్యం డిమాండ్ చేశారు.శుక్రవారం  జిల్లా కలెక్టర్  కార్యాలయం ముందు ముందు  సమగ్ర శిక్ష ఉద్యోగుల సంఘం ఆధ్వర్యంలో జరుగుతున్న 4వ రోజు నిరవధిక  సమ్మె శిబిరానికి హాజరై మద్దతు ప్రకటించారు.
  

  
ఈ సందర్భంగా నెల్లికంటి సత్యం మాట్లాడుతూ.. విద్యాశాఖలోని సమగ్ర శిక్ష  మన రాష్ట్రంలో విద్యారంగ అభివృద్ధిలో కీలక పాత్ర పోషిస్తున్నదని, ఇందులో పనిచేస్తున్న ఉద్యోగులను రోస్టర్, మెరిట్, రూల్ ఆఫ్ రిజర్వేషన్, మరియు రాత పరీక్ష ద్వారా జిల్లా కలెక్టర్ చైర్మన్ గా ఉన్న కమిటీ చే ఇంటర్వ్యూలలో ప్రతిభ ఆధారంగా ఎంపిక చేసి వివిధ స్థాయిలలో విధులు నిర్వహిస్తున్నారు.
  

  
గత 18 నుండి 20 సంవత్సరాలుగా సర్వ శిక్ష ఉద్యోగులు పాఠశాల విద్య అభివృద్ధి కోసం వారి నైపుణ్యాన్ని మరియు కృషిని అందిస్తున్నారు. వీరిలో చాలామంది ఆర్థికంగా వెనుకబడిన పేద మధ్యతరగతి కుటుంబానికి చెందినవారు. వారి ఇబ్బందులను దృష్టిలో ఉంచుకొని ప్రభుత్వం వెంటనే పర్మినెంట్ చేయాలని కోరారు. పెరుగుతున్న ధరలకు అనుగుణంగా వేతనాలు పెంచాలని,  పే స్కేల్ వర్తింపచేయాలని, ప్రతి ఉద్యోగి కి జీవిత బీమా 10 లక్షలు ,ఆరోగ్య బీమా 10 లక్షలు సౌకర్యం కల్పించాలని, పదవి విరమణ చేస్తున్న వారికి రిటైర్మెంట్ బెనిఫిట్ ఇవ్వాలని డిమాండ్ చేశారు.  
  

  
రాష్ట్ర ముఖ్యమంత్రి ఇచ్చిన హామీ ప్రకారం సర్వ శిక్ష ఉద్యోగుల ను వెంటనే రెగ్యులైజేషన్ కు కావలసిన చర్యలను చేపట్టాలని అనేకమార్లు ముఖ్యమంత్రిని వివిధ రాష్ట్ర ,జిల్లా అధికారులకు విన్నవించినప్పటికీ వారి నుండి ఎలాంటి స్పందన రాకపోవడంతో  రాతపూర్వకంగా సమ్మె నోటిస్ ఇచ్చినప్పటికీ ప్రభుత్వం స్పందించలేదని అన్నారు. ప్రభుత్వం నిర్లక్ష్యం కారణంగానే సమ్మెలోకి వెళ్ళామని.. తక్షణం ప్రభుత్వం చర్చలకు ఆహ్వానించి సమస్య పరిష్కారానికి చొర చూపాలని ప్రభుత్వానికి కోరారు.
  

  
ఏఐటీయూసీ జిల్లా ప్రధాన కార్యదర్శి పల్లా దేవేందర్ రెడ్డి మాట్లాడుతూ.. సమాన పనికి సమాన వేతనం ఇవ్వాలని సుప్రీంకోర్టు చెపుతున్నప్పటికీ, రాష్ట్ర ప్రభుత్వాలు అమలు చేయకుండా శ్రమదోపిడికి పాల్పడుతున్నాయని ఆరోపించారు. కాంట్రాక్టు వ్యవస్థ దోపిడి వ్యవస్థ అని.. కాంట్రాక్టు వ్యవస్థను రద్దుచేసి అందులో పని చేస్తున్న వారందరిని పర్మినెంట్ చేయాలని ప్రభుత్వాన్ని కోరారు.
  

  
ఈ ప్రభుత్వం మీద ఎన్నో ఆశలతో కాంట్రాక్ట్, ఔట్ సోర్సింగ్ ఉద్యోగులు ఓటు వేసి గెలిపించారని, ఆ నమ్మకాన్ని రాష్ట్ర ప్రభుత్వం వమ్ము కాకుండా కాపాడుకోవాలని ప్రభుత్వానికి విజ్ఞప్తి చేశారు. సర్వ శిక్ష ఉద్యోగులు చేస్తున్న పోరాటానికి ఏఐటీయూసీ సంపూర్ణ మద్దతు తెలియజేస్తుందని అన్నారు.
  

  
ఏఐటీయూసీ జిల్లా ప్రధాన కార్యదర్శి పల్లా దేవేందర్ రెడ్డి, తెలంగాణ సమగ్ర శిక్ష ఉద్యోగుల సంఘం జిల్లా అధ్యక్షులు మెలుగురి కృష్ణ, ప్రధాన కార్యదర్శి బొమ్మగాని రాజు, క్రాంతి లింగయ్య, వివిధ కేటగిరి ల ఉద్యోగ కార్మికులు పాల్గొన్నారు.
 

NLG: పాఠశాల విద్యార్థులకు జామెట్రీ బాక్సులు పంపిణీ

 
 
  నల్గొండ: పట్టణంలోని బొట్టుగూడ ఉన్నత పాఠశాలలో ప్రముఖ పారిశ్రామికవేత్త వైఆర్పీ ఫౌండేషన్ వ్యవస్థాపకులు ఎలిశాల రవి ప్రసాద్ జన్మదిన వేడుకలను విద్యార్థుల మధ్యన ఘనంగా నిర్వహించారు.
  ఈ కార్యక్రమానికి ముఖ్యఅతిథిగా మున్సిపల్ కౌన్సిలర్ యామా కవితా దయాకర్ లు పాల్గొన్నారు. అనంతరం కేక్ కట్ చేసి విద్యార్థులందరికీ జామెంట్రీ బాక్స్ లు పంపిణీ చేశారు.
  ఈ సందర్భంగా యామా కవితా దయాకర్ మాట్లాడుతూ.. వై ఆర్ పి ఫౌండేషన్ ద్వారా రవిప్రసాద్ బీద విద్యార్థుల ఉన్నత చదువుల కొరకు చేయూతనివ్వడమే కాకుండా, పర్యావరణ పరిరక్షణకు మట్టి వినాయకుల పంపిణీ మరియు కరోనా కష్టకాలంలో ప్రైవేటు ఉపాధ్యాయులకు చేయూతనివ్వడం ద్వారా ఎన్నో సామాజిక కార్యక్రమాలతో ముందరికి వెళ్తున్నారని, ముఖ్యంగా బీద విద్యార్థుల చదువుల కొరకు ప్రతి సంవత్సరం కొన్ని కోట్ల రూపాయలు ఖర్చు చేస్తున్నారని తెలిపారు.
  

  
ప్రధానోపాధ్యాయులు తీగల శంకరయ్య మాట్లాడుతూ.. వై ఆర్ పి ఫౌండేషన్ వారు ప్రభుత్వ పాఠశాలల్లోని విద్యార్థులకు సహాయ సహకారాలు అందించాలనే సంకల్పంతో ముందరికి రావడం ఎంతో అభినందనీయమని కొనియాడారు.
  

  
ఫిజికల్ డైరెక్టర్ బొమ్మపాల గిరిబాబు మాట్లాడుతూ.. ఎలిషాల రవిప్రసాద్ బహుముఖప్రజ్ఞాశాలిగా, విద్యావేత్తగా, పారిశ్రామికవేత్తగా, పర్యావరణవేత్తగా, ఆధ్యాత్మికవేత్తగా, క్రీడా బాంధవుడిగా ఎన్నో సమాజహిత కార్యక్రమాలతో ముందుకు వెళ్తున్నారని, వారికి పాఠశాల తరఫున ప్రత్యేకమైన పుట్టినరోజు శుభాకాంక్షలు అని తెలిపారు.
  

  
ఈ కార్యక్రమంలో ఉపాధ్యాయులు మన్సూర్అలీ, వినాయక్, రాములు, సుధారాణి, కుశలకుమారి,
  
మైమూన బేగం, పి.ఆర్.టి.యు అర్బన్ శాఖ మాజీ అధ్యక్షులు గాదే వెంకటరెడ్డి, తదితరులు పాల్గొన్నారు.
 

NLG: వర్మి కంపోస్టు తయారీకి కృషి చేయాలి: కలెక్టర్

 
 
  నల్లగొండ: డంపింగ్ యార్డుల ద్వారా సాధ్యమైనంత ఎక్కువ  వర్మి కంపోస్టు తయారీకి కృషి చేయాలని జిల్లా కలెక్టర్ ఇలా త్రిపాఠి అన్నారు. ఇందుకుగాను నూటికి నూరు శాతం తడి చెత్త, పొడి చెత్తను సేకరించాలన్నారు.
  శుక్రవారం మున్సిపాలిటీ పరిధిలోని చందనపల్లి లో ఉన్న డంపింగ్ యార్డ్ ను జిల్లా కలెక్టర్ పరిశీలించారు.
  
డంపింగ్ యార్డ్ వల్ల తాగునీరు  కలుషితం కాకుండా  చూసుకోవాలని, డంపింగ్ యార్డ్ లో చెత్త లేకుండా ఎప్పటికప్పుడు వర్మి కంపోస్టు తయారు పై దృష్టి సారించాలని చెప్పారు. డంపింగ్ యార్డ్ ద్వారా చెత్త రీసైక్లింగ్,  డిస్పోస్ చేయడంపై సూచనలు చేశారు.
  

  
డంపింగ్ యార్డ్ పక్కనే ఉన్న స్థలంలో స్లాటర్ హౌస్ ఏర్పాటు కోసం స్థలాన్ని పరిశీలించారు. స్లాటర్ హౌస్ ఏర్పాటుకు అవసరమైన స్థలాన్ని కేటాయించడం జరుగుతుందని మున్సిపల్ అధికారులకు ఆమె తెలిపారు. అనంతరం జిల్లా కలెక్టర్ శేషమ్మగూడ లో ఉన్న సీవరేజ్ ట్రీట్మెంట్ ప్లాంట్ ను తనిఖీ చేశారు.
  

  
కార్యక్రమంలో మున్సిపల్ చైర్మన్ బుర్రి శ్రీనివాస్ రెడ్డి ,ఆర్డీవో అశోక్ రెడ్డి, మున్సిపల్ కమిషనర్ సయ్యద్ ముసాబ్ అహ్మద్, తహసిల్దార్ శ్రీనివాసులు, మున్సిపల్ ఇంజనీర్లు, సానిటరీ ఇన్స్పెక్టర్లు, తదితరులు  పాల్గొన్నారు.
 

NLG: సయ్యద్ షావలి ఉర్సు ఉత్సవాల సందర్భంగా గంధం ఊరేగింపు

 
 
  నల్లగొండ: హజ్రత్ సయ్యద్ షావలి (సయ్యద్ సాహెబ్) ఉర్సు ఉత్సవాలు సందర్భంగా, గురువారం సాయంత్రం పట్టణంలోని ఆర్పి రోడ్డు చౌరస్తా పాత కలెక్టరేట్ పెట్రోల్ బంక్ బ్యాక్ సైడ్ మజీద్ నుండి గంధం ఊరేగింపు జరిగింది. పెద్ద ఎత్తున భక్తులందరూ కలిసి మునుగోడు రోడ్డు ఈద్గా సమీపం వరకు గంధాన్ని ఊరేగింపు గా తీసుకొని వెళ్లారు.
  

  
ఉర్సు కమిటీ అధ్యక్షులు అడ్వకేట్ కట్టెల శివకుమార్ (ఎస్సీ ఎస్టీ విద్యార్థి సంఘం తెలంగాణ రాష్ట్ర అధ్యక్షులు) కార్యక్రమంలో పాల్గొని మాట్లాడుతూ.. హిందూ ముస్లిం అందరూ సోదర భావంతో కలిసి మెలిసి ఉండాలని, తెలంగాణ రాష్ట్రంలో పంటలు సమృద్ధిగా పండాలని కోరుతున్నట్లు తెలిపారు.
  

  
ఈ కార్యక్రమంలో మతవల్లి షేక్ హాబీ బ్రదర్స్ మరియు లీగల్ అడ్వైజర్ సీనియర్ బిఎస్పి నాయకులు అడ్వకేట్ మస్యుద్దిన్, మాజీ కౌన్సిలర్  మొయినా ఇంతియాజ్ అలీ, సలీం భాయ్, రఫీ, సిరాజ్, సలీం, కాజా ఆమీర్, ఇర్ఫాన్, సెంట్రల్ కమిటీ మెంబర్ కొండేటి నరేష్ కుమార్, గంట సుమంత్, నాగరాజు, అల్లంపల్లి కొండన్న, శ్రీను తదితరులు, పాల్గొన్నారు. 
  

  
ఈరోజు సాయంత్రం దీపారాధన పాతేహా జరుగునని ఉర్సు ఉత్సవ కమిటీ వారు తెలిపారు.
 

సరైన వసతులు లేక ఇబ్బంది పడుతున్న ప్రయాణికులు..

 
 
  చౌటుప్పల్ పట్టణంలోని ప్రయాణికుల ప్రాంగణం వద్ద రోడ్డు పనుల రిపేర్ దృష్ట్యా.. మునుగోడు, గట్టుప్పల్, చండూరు ప్రాంతాలకు వెళ్తున్న బస్సులు బస్టాండు లోకి వెళ్లకుండా ప్రధాన రహదారిపైనే ఆపి ప్రయాణికులకు సేవలు అందిస్తున్నారు.
  కాగా ప్రధాన రహదారిపై బస్సులు ఆగటం వల్ల ట్రాఫిక్ కు ఇబ్బంది కలగడంతో పాటు, బస్సుల కోసం గంటల తరబడి వెయిటింగ్ చేస్తున్న ప్రయాణికులకు కూర్చోవడానికి కనీస సదుపాయాలు వసతులు లేవని, అధికారులు దృష్టిసారించి ప్రయాణికుల సౌకర్యార్థం తాత్కాలికంగా బెంచీ లను ఏర్పాటు చేయాలని ప్రయాణికులు కోరుచున్నారు.