NLG: 'దానధర్మ చారిటబుల్ ట్రస్ట్ సేవలు అభినందనీయం'
యాదాద్రి జిల్లా: 
నారాయణపూర్ మండలంలోని సర్వేల్ ప్రభుత్వ ఉన్నత పాఠశాల మరియు కాంప్లెక్స్ పరిధిలోని మరో 4 పాఠశాలకు 'దానధర్మ చారిటబుల్ ట్రస్ట్' ఆధ్వర్యంలో ప్రభుత్వ పాఠశాల విద్యార్థులకు సేవా కార్యక్రమంలో భాగంగా ప్రతి ఒక్కరికి ఎగ్జామ్ ప్యాడ్, నోటు బుక్స్, పెన్స్ ను అందజేశారు. 
ఈ కార్యక్రమంలో పాఠశాల ప్రధానోపాధ్యాయులు గోలి శ్రీనివాస్ మాట్లాడుతూ.. దానధర్మ చారిటబుల్ ట్రస్ట్ సేవలు అభినందనీయం అని, వారి సేవా కార్యక్రమాలను కొనియాడారు. ట్రస్ట్ సభ్యులు, ఉపాధ్యాయులు, విద్యార్థులు పాల్గొన్నారు.

NLG: హత్య కేసులో ముగ్గురు నిందితులు అరెస్ట్ 
నల్లగొండ: జిల్లా ఎస్పీ కార్యాలయంలో పోలీసులు మీడియా సమావేశంలో మాట్లాడుతూ.. కేతపల్లి మండలం ఇప్పలగూడెం గ్రామంలో వంటల సైదులు ను హత్య చేసిన ముగ్గురు నిందితులను అరెస్టు చేసినట్లు తెలిపారు. పోలీసులు మాట్లాడుతూ.. ఇప్పలగూడెం గ్రామంలో మోదల శ్రవణ్ కుమార్ కు చెందిన వ్యవసాయ భూమిలో, వంటల సైదులు కూలి పని చేసేవాడు. ఈ క్రమంలో శ్రవణ్ కుమార్ భార్యతో సైదులు చనువుగా ఉండేవాడని, దీంతో తన భార్యకు సైదులు కు అక్రమ సంబంధం ఉందని భావించిన శ్రవణ్.. ఎలాగైనా సైదులను చంపాలని తన సొంత బామ్మర్ది అయిన బండారి వెంకటేశ్వర్లు, మరో వ్యక్తి సాయికుమార్ ని కలిసి మర్డర్ కి ప్లాన్ చేశాడు. 

  


అందరూ కలిసి శ్రవణ్ కుమార్ వ్యవసాయ భూమి వద్ద మద్యం సేవించి పథకంలో భాగంగా సైదులు ను చంపుటకు వ్యవసాయ పొలం వద్ద వాడే ఇనుప సుత్తె ను బండిలో తీసి పెట్టుకొని, రాత్రి 7:30 గంటల సమయంలో సైదులు ఊర్లో బెల్ట్ షాపు వద్ద మద్యం సేవిస్తుండగా వెంకటేష్, సాయి ఇద్దరు అక్కడికి వెళ్లి సైదులు తో కలిసి మనం బయటకు వెళ్లి మాట్లాడుకుంటూ మద్యం సేవిద్దామని నమ్మబలికి, గ్రామంలోని ఐకెపి సెంటర్ వద్దకు తీసుకెళ్లారు. 

అక్కడ అందరూ కలిసి మద్యం సేవిస్తూ తన భార్య వెంట ఎందుకు పడుతున్నావని సైదులు ను శ్రవణ్ ప్రశ్నిస్తూ ఉండగా మాట మాట పెరిగింది. దీంతో శ్రవణ్ కుమార్, వెంకటేష్ తమతో పాటు తెచ్చుకున్న సుత్తితో సైదులు మీద దాడి చేసి కొట్టి సైదులు ను చంపినట్లు పోలీసులు తెలిపారు. సైదులు ను చంపేటప్పుడు సాయికుమార్ రోడ్డుపై ఎవరూ రాకుండా కాపలా ఉన్నట్లు తెలిపారు. మృతుని కుమారుడు చందు ఇచ్చిన ఫిర్యాదు మేరకు కేతపల్లి ఎస్సై కేసు నమోదు చేసి విచారణ జరిపి, నిందితులను అరెస్టు చేసినట్లు తెలిపారు.

NLG: ఈనెల 14 నుండి 21 వరకు చెరువుగట్టు జాతర
నార్కట్ పల్లి మండలం, చెరువుగట్టు గ్రామం:
నల్లగొండ జిల్లాలో ప్రసిద్ధిగాంచిన శైవక్షేత్రం శ్రీ శ్రీ పార్వతి జడల రామలింగేశ్వర స్వామి దేవస్థానం వార్షిక బ్రహ్మోత్సవాలు ఈనెల 14 నుండి 21 వరకు జరగనుంది. 14 నగరోత్సవం, 16న స్వామివారి కల్యాణ మహోత్సవం, 18న అగ్నిగుండాల, 19న దోపోత్సవం- అశ్వవాహన సేవ, 20న మహా పూర్ణాహుతి, పుష్పోత్సవం, 21న గ్రామోత్సవం నిర్వహిస్తున్నట్లు కార్యనిర్వహణ అధికారి నవీన్ తెలిపారు.

NLG: నల్లగొండ డిపిఆర్ఓ శ్రీనివాస్ బదిలీ
నల్లగొండ డిపిఆర్ఓ శ్రీనివాస్ బదిలీ అయ్యారు. మహబూబ్ నగర్ జిల్లాకు బదిలీ చేస్తూ సమాచార కమిషనర్ హనుమంతరావు ఆదేశాలు జారీ చేశారు. మహబూబ్ నగర్ డిపిఆర్ఓ వెంకటేశ్వర్లు నల్లగొండకు బదిలీ అయ్యారు.

NLG: ప్రేమ జంటలను బెదిరించి ఆభరణాలు, డబ్బులు దోపిడీ చేస్తున్న ముఠా అరెస్ట్
నల్లగొండ: గత కొద్ది రోజులుగా నల్లగొండ శివారులో ప్రేమ జంటలను బెదిరించి సెల్ ఫోన్లు నగదు బంగారు ఆభరణాలు దోపిడీ చేస్తున్న ఆరుగురి ముఠాను అరెస్టు చేసినట్లు నల్గొండ ఎస్పీ చందనా దీప్తి తెలిపారు.

  


బుధవారం ఎస్పీ కార్యాలయంలో ఏర్పాటు చేసిన విలేకరుల సమావేశంలో ఎస్పీ చందనా దీప్తి మాట్లాడుతూ.. నల్లగొండ పట్టణంలోని నరసింహారెడ్డి కాలనీకి చెందిన కున్చెం సైదులు, కున్చెం ప్రశాంత్, కొత్తగూడెం గ్రామానికి చెందిన చింతా నాగరాజు, రాంనగర్ కు చెందిన లక్ష్మణ్, శివరాత్రి ముఖేష్ , నర్సింహారెడ్డి కాలనీకి చెందిన కున్చెం రాజు ఒక ముఠాగా ఏర్పడి ప్రేమ జంటలను దోపిడీ చేస్తున్నట్లు తెలిపారు.

బుధవారం ఉదయం నల్గొండ టు టౌన్ సిఐ మరియు వారి సిబ్బంది, విశ్వసనీయ సమాచార మేరకు నల్గొండ శివారులో ఉన్న నరసింహారెడ్డి కాలనీలో ఉన్న నేరస్తుడు కున్చెం చందు ఇంటికి వెళ్లి అతని ఇంటిలో ఉన్న మిగతా ఐదుగురు వ్యక్తులను పట్టుకొని విచారించగా.. వారు గత కొద్దిరోజులుగా నార్కట్పల్లి అద్దంకి హైవేపై పోయే ప్రయాణికులు , ప్రేమ జంటలు , ఖాళీ స్థలంలోకి వచ్చి ఏకాంతంగా ఉన్న సమయంలో వారిని సెల్ఫోన్లలో వీడియో తీసి బెదిరించి కొట్టి వారి దగ్గర ఉన్న నగలు సెల్ ఫోన్లు డబ్బులు తీసుకునేవారమని ఒప్పుకున్నట్లు తెలిపారు.

  

ఈ విషయం బాధితులు భయపడి ఎవరికి చెప్పకుండా వెళ్ళిపోయేవారని దోచుకున్న డబ్బును మద్యానికి ఇతర విలాసాలకు ఖర్చు చేసుకునే వారని నిందితులు ఒప్పుకున్నట్లు తెలిపారు. వీరిపై కేసు నమోదు చేసి అరెస్టు చేసినట్లు ఎస్పీ తెలిపారు .వీరి వద్ద నుండి రెండు సెల్ ఫోన్లు, రెండు ఉంగరాలు, రెండు టీవీలు, ఆపిల్ వాచ్, మూడు ఫ్యాన్లు, డ్రిల్లింగ్ మిషన్ , ఒక ఇన్వర్టర్, హోమ్ థియేటర్, గ్యాస్ స్టవ్, మోటార్ సైకిల్ ను స్వాధీనం చేసుకున్నట్లు  ఎస్పీ తెలిపారు.

TS: తాగునీటి సమస్య తలెత్తకుండా చర్యలు చేపట్టాలి: మంత్రి పొన్నం ప్రభాకర్
హైదరాబాద్:రా నున్న వేసవి అధికంగా ఉష్ణోగత్రలు నమోదయ్యే అవకాశం ఉంది. ఈ నేపథ్యంలో మంత్రి పొన్నం ప్రభాకర్ జీహెచ్‌ఎంసీ ప్రధాన కార్యాలయంలో ఈరోజు సమీక్ష సమావేశం నిర్వహించారు.
కమిషనర్ రొనాల్డ్ రోస్, కలెక్టర్ అనుదీప్, మేయర్ గద్వాల్ విజయలక్ష్మి, డిప్యూటీ మేయర్ శ్రీలత, జోనల్ కమిషనర్లు, అధికారులతో కలిసి హైదరాబాద్ నగర అభివృద్ధి, సమస్యలపై ఆయన తొలిసారిగా ఈరోజు సమీక్షించారు.

  


ఈ సందర్భంగా ఆయన మాట్లాడుతూ.. నగరంలో ప్రజలకు తాగునీటి సమస్య తలెత్తకుండా చూసుకోవాలని జలమండలి అధికారులను ఆదేశించారు.
వేసవిలో తాగునీరు సక్రమంగా సరఫరా కాని ప్రాంతాలను ముందుగానే గుర్తించి సరఫరా చేయాలని సూచించారు. అధికారులు యుద్ధ ప్రాతిపదికన పనులు చేపట్టి సమస్యలను పరిష్కరించాలని ఆదేశించారు.
SB NEWS TELANGANA 

YDD: అనుమానాస్పద స్థితిలో విద్యార్థుల ఆత్మహత్య పై ప్రభుత్వం సమగ్ర విచారణ జరిపి బాధ్యులను కఠినంగా శిక్షించాలి: మేడి ప్రియదర్శిని
ప్రభుత్వం విద్యార్థినులకు ఎక్స్ గ్రేషియా ప్రకటించి ఇవ్వాలి
బి ఎస్ పి నకిరేకల్ నియోజకవర్గ ఇంచార్జి మేడి ప్రియదర్శిని

  


భువనగిరి ఎస్సీ హాస్టల్ విద్యార్థుల మృతి పై బీఎస్పీ నకిరేకల్ ఇన్చార్జి మేడి ప్రియదర్శిని స్పందించారు. ఈ ఘటనపై సమగ్ర విచారణ జరిపి దోషులను కఠినంగా శిక్షించాలని డిమాండ్ చేశారు. ఆమె మాట్లాడుతూ.. విద్యార్థినులను కౌన్సెలింగ్ పేరుతో పిఈటి, వార్డెన్, ఆటో డ్రైవర్ కలిసి నిబంధనలకు విరుద్ధంగా విచారణ చేసినారని, కనీసం తల్లిదండ్రులకు తెలియజేయలేదని, కౌన్సిలింగ్ పేరుతో విద్యార్థులు మనస్థాపానికి గురయ్యారని అన్నారు. 

జిల్లా కలెక్టర్, అధికారులు స్పందించకపోవడం, కనీసం పరామర్శించకపోవడం అన్యాయమని పేర్కొన్నారు. రాష్ట్ర ప్రభుత్వం ద్వారా బాధిత కుటుంబాలను పూర్తిగా ఆదుకుని ఎక్స్గ్రేషియా చెల్లించాలని, అలాగే ఇలాంటి ఘటనలు పునరావృతం కాకుండా ప్రభుత్వం కఠినమైన చర్యలు తీసుకోవాలని డిమాండ్ చేశారు.

NLG: స్పెషల్ ఆఫీసర్ కు సమ్మె నోటీసు ఇచ్చిన గ్రామపంచాయతీ కార్మికులు
మర్రిగూడ మండలం, రాంరెడ్డి పల్లి గ్రామపంచాయతీలో కార్మికులు, గ్రామపంచాయతీ స్పెషల్ అధికారి వెంకటేశ్వర్లు, పంచాయతీ కార్యదర్శి మాలతి కి, ఫిబ్రవరి 16న జరిగే దేశవ్యాప్త సమ్మె నోటీసు ఇచ్చారు. కనీస వేతనం అమలు చేయాలని, రిటైర్మెంట్ బెనిఫిట్స్, ఉద్యోగ భద్రత కల్పించాలని, 51 జిఓ ను సంవరించాలని సమ్మె నోటీసు ఇచ్చారు. సిఐటియు జిల్లా సహాయ కార్యదర్శి ఏర్పుల యాదయ్య, జిపి వర్కర్స్ ముత్తయ్య, యాదయ్య, సందమ్మ, నరసింహ, తదితరులు పాల్గొన్నారు.

NLG: విద్యార్థులకు స్వచ్ఛందంగా ఫిజికల్ ఫిట్నెస్, క్రికెట్ కోచింగ్ ప్రోగ్రాం
నల్గొండ: మాధవ్ నగర్ జేబిఎస్ ప్రభుత్వ ఉన్నత పాఠశాల విద్యార్థులకు, వ్యాయామ ఉపాధ్యాయులు బొమ్మపాల గిరిబాబు ప్రతిరోజు ఉదయం 6 గంటల నుండి 8 గంటల వరకు ఫిజికల్ ఫిట్నెస్  మరియు క్రికెట్ కోచింగ్ శిక్షణ కార్యక్రమాల్ని నిర్వహిస్తున్నట్లు తెలిపారు. గ్రాస్ రూట్ స్పోర్ట్స్ కల్చర్ డెవలప్మెంట్ ప్రోగ్రాంలో భాగంగా ఈ కార్యక్రమాన్ని చత్రపతి శివాజీ స్పోర్ట్స్ క్లబ్ పర్యవేక్షణలో నిర్వహిస్తున్నట్లు తెలిపారు

TS: మేడారం జాతరకు ఆరువేల ప్రత్యేక బస్సులు
ఆసియాలోనే అతిపెద్ద గిరిజన జాతర మేడారానికి వెళ్లే భక్తుల సౌకర్యార్థం టీఎస్‌ ఆర్టీసీ ప్రత్యేక ఏర్పాట్లు చేస్తున్నది. భక్తులను తరలించేందుకు ఆరు వేల ప్రత్యేక బస్సులను నడపనున్నట్టు మంగళవారం ప్రకటించింది.

  


మేడారం జాతర 21 నుంచి 24 వరకు జరుగనుండగా, భక్తుల రద్దీ దృష్ట్యా ఈ నెల 18 నుంచి 25 వరకు ప్రత్యేక బస్సులను నడుపనున్నట్టు తెలిపింది.

ములుగు జిల్లా తాడ్వాయి మండలం, మేడారం సమక్క-సారలమ్మ జాతర సందర్భంగా టీఎస్‌ఆర్టీసీ ఆధ్వర్యంలో జరుగుతున్న పనులను ఉన్నతాధికారులతో కలిసి సోమవారం రవాణాశాఖ మంత్రి పొన్నం ప్రభాకర్‌, పంచాయతీ రాజ్‌శాఖ మంత్రి సీతక్క పరిశీలించినట్టు ఆ సంస్థ ఎండీ వీసీ సజ్జనార్‌ తెలిపారు.

  

16న మేడారంలో టీఎస్‌ఆర్టీసీ బేస్‌క్యాంప్‌ను ప్రారంభిస్తామని పేర్కొన్నారు. మేడారం జాతరలో దాదాపు 14 వేల మంది ఆర్టీసీ సిబ్బంది విధులు నిర్వహిస్తారని చెప్పారు.30 లక్షల మంది భక్తులు హాజరవుతారని అంచనా వేస్తున్నామని, భక్తుల రద్దీకి అనుగుణంగా బస్సులు ఏర్పాటు చేస్తున్నామని వెల్లడించారు.

ఉమ్మడి వరంగల్‌, కరీంనగర్‌, ఖమ్మం, ఆదిలాబాద్‌ జిల్లాల నుంచి మేడారానికి భక్తుల రద్దీ ఎక్కువగా ఉంటుందని తెలిపారు.ఆయా జిల్లాల భక్తులకు సరిపడా బస్సులు ఏర్పాటు చేస్తామని సజ్జనార్‌ చెప్పారు...