యూపీఐ సరికొత్త రికార్డ్
భారత ప్రభుత్వం 2016లో తీసుకొచ్చిన యూనిఫైడ్ పేమెంట్స్ ఇంటర్‌ఫేస్ (UPI) డిజిటల్ పేమెంట్లలో ఒక సంచలనం అని చెప్పొచ్చు. దీనిని ఒక వ్యక్తి నుంచి మరో వ్యక్తికి, వ్యక్తి నుంచి మర్చంట్‌కు ట్రాన్సాక్షన్స్ రూపంలో చేయొచ్చు. ఈ యూపీఐ ట్రాన్సాక్షన్స్.. రోజురోజుకు పెరిగిపోతుండటం సహా వీటి విలువ కూడా పెరుగుతూనే ఉంది. ఇప్పుడు సరికొత్త రికార్డు కూడా నమోదైంది.

  


ఇప్పుడు అంతా డిజిటల్ పేమెంట్ల హవానే నడుస్తోంది. 10 రూపాయల ఛాయ్ దగ్గర్నుంచి.. వేల రూపాయల షాపింగ్ ఇలా ఏదైనా యూపీఐ ద్వారానే ట్రాన్సాక్షన్స్ చేస్తున్నారని చెప్పొచ్చు. చాలా వరకు క్యాష్ అసలు క్యారీ చేయట్లేదంటేనే పరిస్థితి అర్థం చేసుకోవచ్చు. ఫోన్ తీసి స్కానర్ ఓపెన్ చేసి ట్రాన్సాక్షన్ చేయడమే. చిటికెలో డబ్బులు ట్రాన్స్‌ఫర్ అవుతాయి. క్రమక్రమంగా ఈ డిజిటల్ ట్రాన్సాక్షన్స్ పెరుగుకుంటూ పోతూనే ఉన్నాయి. ఇంటర్నెట్ లేకున్నా.. పిన్ అవసరం లేకున్నా కూడా యూపీఐ పేమెంట్లు చేసేందుకు కొత్త కొత్త ఫీచర్లను రిజర్వ్ బ్యాంక్ ఆఫ్ ఇండియా (RBI) తీసుకొస్తూనే ఉందని చెప్పొచ్చు. అయితే.. ఇప్పుడు దీపావళి పండగ సీజన్‌లో.. యూపీఐ పేమెంట్స్ ఊపందుకున్నాయి.

సంఖ్యా పరంగా మాత్రమే కాకుండా.. విలువ పరంగా కూడా యూపీఐ సరికొత్త రికార్డుల్ని సృష్టిస్తూనే ఉంది. అక్టోబర్ నెలలో ఈ యూపీఐ ట్రాన్సాక్షన్స్ సంఖ్య 1658 కోట్లకు చేరినట్లు నేషనల్ పేమెంట్స్ కార్పొరేషన్ ఆఫ్ ఇండియా (NPCI) తెలిపింది. ఈ ట్రాన్సాక్షన్స్ విలువ రూ. 23.5 లక్షల కోట్లకు చేరినట్లు పేర్కొంది. అంతకుముందు ఎన్నడూ లేని విధంగా యూపీఐ ట్రాన్సాక్షన్స్ ఇప్పుడు వృద్ధి చెందినట్లు వెల్లడించింది.

  

వార్షిక ప్రాతిపదికన చూస్తే.. యూపీఐ లావాదేవీల్లో సంఖ్యా పరంగా 45 శాతం వృద్ధి కనిపించగా.. విలువ పరంగా 34 శాతం పెరిగాయి. సెప్టెంబర్ నెలలో యూపీఐ ట్రాన్సాక్షన్స్ సంఖ్య 1500 కోట్లుగా నమోదైంది. కాగా.. ఇప్పుడు అక్టోబర్ నెలలో ఆ సంఖ్యను దాటేసింది. రోజువారీగా సగటు లావాదేవీలు సెప్టెంబర్ నెలలో 5 కోట్లుగా ఉండగా.. ఇప్పుడు అక్టోబర్ నెలలో చూస్తే ఆ సంఖ్య 5.35 కోట్లకు చేరింది.

మరోవైపు ఫాస్టాగ్, ఆటోమేటెడ్ టోల్ పేమెంట్ సిస్టమ్ ద్వారా జరిగే ట్రాన్సాక్షన్స్ సంఖ్య 8 శాతం పెరిగి 34 కోట్లకు చేరాయి. ఇదే సమయంలో IMPS, బ్యాంక్ ఆధారంగా జరిపే ఐఎంపీఎస్ లావాదేవీలు 5 శాతం తగ్గి 46 కోట్లుగా నమోదయ్యాయి. డిజిటల్ ట్రాన్సాక్షన్స్‌వైపు ఎక్కువ మంది ఆసక్తి కనబరుస్తున్నారు. దీంతో ఎన్నో బ్యాంకులు ఈ సేవల్ని అందించేందుకు సిద్ధమవుతున్నాయి. గతేడాదిలో యూపీఐ సేవల్ని అందిస్తున్న బ్యాంకుల సంఖ్య 492 గా ఉండగా.. ఈసారి ఆ సంఖ్య 622 కు పెరిగింది.

TCS కీలక ప్రకటన
దేశీయ ఐటీ ఉద్యోగులకు మళ్లీ మంచి రోజులు వచ్చాయి. ఇన్నాళ్లు సరైన ప్రాజెక్టుల లేక ఇబ్బందులు ఎదుర్కొన్న కంపెనీలకు పెద్ద పెద్ద డీల్స్ వస్తున్నాయి. తాజాగా టాటా గ్రూప్ సంస్థ టాటా కన్సల్టెన్సీ సర్వీసెస్ టీసీఎస్ 2 బిగ్ డీల్స్‌పై సంతకాలు చేసినట్లు ప్రకటించింది. రెండు దేశాల్లో 15 ఏళ్ల పాటు ప్రత్యేక సేవలు అందించనున్నట్లు తెలిపింది. ఆ వివరాలు ఇప్పుడే తెలుసుకుందాం.

  


దేశీయ ఐటీ రంగంలో పరిస్థితులు క్రమంగా చక్కపడుతున్నాయి. ఐటీ ఉద్యోగులకు మళ్లీ మంచి రోజులు వచ్చాయి. ఎందుకంటే దిగ్గజ కంపెనీలు పెద్ద పెద్ద ప్రాజెక్టులు అందుకుంటున్నాయి. దీంతో ఐటీ ఉద్యోగులకు డిమాండ్ పెరుగుతుంది. కొత్త వారిని కంపెనీలు నియమించుకునేందుకు ఈ ప్రాజెక్టులు దోహద పడనున్నాయి. తాజాగా టాటా గ్రూప్ ఐటీ సేవల కంపెనీ టాటా కన్సల్టెన్సీ సర్వీసెస్ (TCS) రెండు పెద్ద ప్రాజెక్టులు దక్కించుకున్నట్లు ప్రకటించింది. ఐర్లాండ్‌కు చెందిన డిపార్ట్‌మెంట్‌ ఆఫ్ సోషల్ ప్రొటెక్షన్ సహా బ్రెజిల్ నుంచి మరో డీల్ వచ్చినట్లు తెలిపింది. వీటి విలువ 250 మిలియన్ డాలర్లకుపైగా ఉంటుందని తెలిపింది. ఆ వివరాలు తెలుసుకుందాం.

ఐర్లాండ్‌కు చెందిన సామాజిక భద్రత విభాగం నుంచి 15 ఏళ్ల కాంట్రాక్ట్ దక్కించుకున్నట్లు టీసీఎస్ మంగళవారం ప్రకటించింది. మై ఫ్యూచర్ ఫండ్ అనే రిటైర్మెంట్ సేవింగ్స్ స్కీమ్‌లో కొత్త ఆటో ఎన్‌రోల్మెంట్ విధానాన్ని అమలు చేయడం, నిర్వహించేందుకు ఈ డీల్ లభించినట్లు తెలిపింది. ఈ మేరకు బీఎస్ఈ స్టాక్ ఎక్స్చేంజీ ఫైలింగ్‌లో వివరాలు వెల్లడించింది. ఐర్లాండ్‌లో మొత్తం 8 లక్షల మంది ఉద్యోగుల పేర్లను ఆటోమెటిక్‌గా రిటర్మెంట్ ఫండ్‌లో నమోదు చేసేందుకు ఎండ్ టూ ఎండ్ డిజిటల్ సొల్యూషన్స్ అందించనున్నట్లు తెలిపింది. అయితే, ఈ డీల్ విలువను టీసీఎస్ వెల్లడించలేదు. కానీ, గత జూన్ నెలలోనే ఐరిష్ టైమ్స్ 10 ఏళ్ల కాలానికి 150 మిలియన్ ఐరిష్ కరెన్సీ డీల్ చేసుకున్నట్లు తెలిపింది. అయితే, ఈ కాంట్రాక్ట్ 15 ఏళ్ల పాటు ఉంటుందని టీసీఎస్ తెలిపింది. సుమారు 245 మిలియన్ డాలర్లు అంటే భారత దేశ కరెన్సీలో రూ.2 వేల కోట్లకుపైగా ఉంటుంది.

  

ఐర్లాండ్‌తో 15 ఏళ్ల కాంట్రాక్ట్ కుదుర్చుకున్న మరుసటి రోజునే మరో డీల్ పైనా టీసీఎస్ ప్రకటన చేసింది. బ్రెజిల్‌లోని ప్రముఖ ఉన్నత విద్యా, పరిశోధన సంస్థల్లో ఒకటైన ఇన్‌స్పెర్ (Insper)‌తో 10 ఏళ్ల వ్యూహాత్మక భాగస్వామ్యాన్ని ఏర్పాటు చేసుకున్నట్లు బుధవారం ఓ ప్రకటన చేసింది. ఈ భాగస్వామ్యంలో భాగంగా 8.6 మిలియన్ డాలర్లు పెట్టుబడులు పెడుతున్నట్లు తెలిపింది. అంటే భారత కరెన్సీలో రూ.72 కోట్లకుపైగా ఉంటుంది.

సౌత్ అమెరికా వ్యాప్తంగా సరికొత్త టెక్నాలజీని వేగవంతం చేయడమే ఈ భాగస్వామ్యం లక్ష్యమని తెలిపింది. ఏఐ, జెన్ ఏఐ, ఐఓటీ, స్పాషియల్ కంప్యూటింగ్ వంటి సరికొత్త టెక్నాలజీల ద్వారా దక్షిణ అమెరికాలోని టీసీఎస్ కస్టమర్లకు అధునాత ఇండస్ట్రీ ఇన్నోవేషన్ అందించాలనే లక్ష్యాంగా ఈ పెట్టుబడులు పెడుతున్నట్లు తెలిపింది. ఈ మేరకు బీఎస్ఈ ఫైలింగ్‌లో ఈ వ్యూహాత్మక భాగస్వామ్యం వివరాలను టీసీఎస్ వెల్లడించింది.

గూగుల్‌కు రష్యా బిగ్ షాక్
రష్యా ప్రభుత్వ మీడియాకు చెందిన కొన్ని ఛానళ్లను యూట్యూబ్‌లో బ్యాన్ చేయడంపై రష్యా ఆగ్రహించింది. దీంతో గూగుల్‌కు మాతృసంస్థ అయిన ఆల్ఫాబెట్‌ యాజమాన్యంలోని యూట్యూబ్‌కు ఏకంగా 20 డెసిలియన్‌ డాలర్ల జరిమాన విధిస్తూ రష్యా కోర్టు తీర్పునిచ్చింది. 20 డెసిలియన్ డాలర్లు అంటే 2 అంకె తర్వాత ఏకంగా 34 సున్నాలు ఉంటాయి.

  


రష్యా ప్రభుత్వ మీడియాకు చెందిన కొన్ని ఛానళ్లను యూట్యూబ్‌లో బ్యాన్ చేయడంపై రష్యా ఆగ్రహించింది. గూగుల్‌ మాతృసంస్థ ఆల్ఫాబెట్‌ యాజమాన్యంలోని యూట్యూబ్‌కు ఏకంగా 20 డెసిలియన్‌ డాలర్ల జరిమానా విధిస్తూ రష్యా కోర్టు సంలచన తీర్పునిచ్చింది.

20 డెసిలియన్ డాలర్లు అంటే 2 అంకె తర్వాత ఏకంగా 34 సున్నాలు ఉంటాయి. ఈ స్థాయి నంబర్లను ఖగోళ శాస్త్రాల్లో ఎక్కువగా ఉపయోగిస్తుంటాయి. ఈ భారీ జరిమానాను భూమిపై జరిగే లావాదేవీలతో పోల్చలేం. ప్రస్తుత ప్రపంచ ఆర్థిక వ్యవస్థకు అనేక రెట్లు ఉంటుంది. యూట్యూబ్‌లో రష్యా ప్రభుత్వ మద్దతున్న మీడియా ఛానళ్లను నియంత్రించి గూగుల్ తప్పు చేసిందని, రష్యా జాతీయ ప్రసార నిబంధనలను ఉల్లంఘించిందని రష్యన్ కోర్టు ఆగ్రహం వ్యక్తం చేసింది. బ్యాన్ చేసిన ఛానళ్లను పునరుద్ధరించాలని, 9 నెలల వ్యవధిలో తీర్పుని పునరుద్ధరించకపోతే జరిమానా ప్రతిరోజూ రెట్టింపు అవుతుందని న్యాయస్థానం హెచ్చరించింది.

  

కాగా ఉక్రెయిన్‌పై దాడి తర్వాత రష్యా ప్రభుత్వ ఆధ్వర్యంలో నడిచే మీడియా ఛానెల్‌లను యూట్యూబ్ నియంత్రించింది. ఆర్‌టీ, స్పుత్నిక్‌తో పాటు పలు రష్యా ప్రభుత్వ ఆధ్వర్యంలోని ఛానెళ్లపై అంతర్జాతీయంగా నిషేధం విధించింది. ఈ వివాదం మార్చి 2022లో మొదలైంది. ఉక్రెయిన్‌పై రష్యా యుద్ధం మొదలుపెట్టాక కంటెంట్ పాలసీలకు వ్యతిరేకంగా హింసాత్మక కంటెంట్‌ను చూపిస్తున్నారంటూ యూట్యూబ్ ఈ నిషేధం విధించింది. గైడ్‌లైన్స్ పాటించలేదంటూ తన నిర్ణయాన్ని సమర్థించుకుంది. ప్రపంచవ్యాప్తంగా 1,000 యూట్యూబ్ ఛానళ్లు, 15,000 కంటే ఎక్కువ వీడియోలను తొలగించింది.

ఉక్రెయిన్ వివాదం నేపథ్యంలో రష్యాను సమర్థించే కథనాలను ప్రసారం చేసిన ఛానెళ్లకు వ్యతిరేకంగా యూట్యూబ్ ఈ నిర్ణయం తీసుకుంటుందని రష్యా ఆరోపించింది. యూరప్‌తో పాటు ప్రపంచవ్యాప్తంగా ఛానళ్లపై నిషేధం విధించడానికి ముందే రష్యన్ ప్రభుత్వ మీడియా ఛానళ్లపై ఆంక్షలు విధించిందని పేర్కొంది. యూట్యూబ్ చర్యలు తమ దేశ సెన్సార్‌షిప్, ప్రభుత్వ-ప్రాయోజిత మీడియా అణచివేతగా రష్యా అభివర్ణించింది.

యూట్యూబ్ ఆంక్షలపై రష్యాకు చెందిన 7 బ్రాడ్‌కాస్టింగ్ సంస్థలు ఉమ్మడిగా చట్టపరంగా కోర్టును ఆశ్రయించాయి. గూగుల్‌కి వ్యతిరేకంగా కోర్టులో దావాలు దాఖలు చేశాయి. తమ ఛానెళ్లను పునరుద్ధరించాలని బ్రాస్ట్ కాస్టర్లు డిమాండ్ చేశారు. కాగా గూగుల్ కంపెనీ 2020 నుంచి రష్యా జరిమానాలను ఎదుర్కుంటోంది. రష్యా ప్రభుత్వ అనుబంధ మీడియా సంస్థలు త్సాన్‌గ్రాడ్, రియా ఫాన్‌లను యూట్యూబ్‌లో బ్లాక్ చేసినందుకుగానూ రోజుకు సుమారు 1,028 డాలర్ల చొప్పు జరిమానాను ఎదుర్కొంది.

2022లో ఉక్రెయిన్‌పై పూర్తి స్థాయి యుద్ధం మొదలుపెట్టాక రష్యాలో కార్యకలాపాలను గూగుల్ గణనీయంగా తగ్గించింది. అయితే పూర్తిగా ఆ దేశం నుంచి నిష్క్రమించలేదు. యూట్యూబ్, గూగుల్ సెర్చింగ్ వంటి సేవలు కొనసాగుతున్నాయి. అమెరికాకు చెందిన టెక్ కంపెనీలు రష్యాలో తమ కార్యాకలాపానలు పూర్తిగా ఉపసంహరించుకున్నప్పటికీ గూగుల్ మాత్రం పాక్షికంగా కార్యకలాపాలు కొనసాగిస్తోంది.

రష్యా ప్రభుత్వం తమ బ్యాంక్ అకౌంట్లను సీజ్ చేసిన కొన్ని నెలల తర్వాత అక్కడి గూగుల్ విభాగం కోర్టులో దివాళా పిటిషన్ కూడా దాఖలు చేసింది. ఈ పిటిషన్‌ కోర్టులో నడుస్తున్నప్పటికీ పాక్షిక సేవలను కొనసాగిస్తూనే ఉండడం గమనార్హం. ప్రస్తుతం రష్యాలో యూట్యూబ్ అందుబాటులో ఉన్నప్పటికీ రష్యన్ మీడియా ఛానెల్‌పై ఆంక్షలను కొనసాగిస్తే ప్లాట్‌ఫారమ్‌ను పూర్తిగా బ్లాక్ చేస్తామని రష్యా అధికారులు హెచ్చరిస్తున్నారు. కాగా ఉక్రెయిన్‌పై దాడి మొదలైన నాటి నుంచి రష్యా వ్యతిరేక లేదా ఉక్రెయిన్ అనుకూల కంటెంట్‌ని ప్రసారం చేసిన విదేశీ టెక్ ప్లాట్‌ఫామ్స్‌పై రష్యా అనేక రకాల జరిమానాలు విధించడం గమనార్హం.

కేటీఆర్ సంచలన నిర్ణయం.. తెలంగాణ వ్యాప్తంగా
మాజీ మంత్రి కేటీఆర్ సంచలన నిర్ణయం తీసుకున్నారు. సామాజిక మాధ్యమం ఎక్స్‌లో ప్రజలతో సంభాషించిన ఆయన.. కాంగ్రెస్ ప్రభుత్వం తెలంగాణకు శాపంగా మారిందని విమర్శలు గుప్పించారు. కాంగ్రెస్ పార్టీ పాలన ఫ్రమ్ ఢిల్లీ, టూ ఢిల్లీ, ఫర్ ఢిల్లీ అన్నట్లుగా తయారైందని ఎద్దేవా చేశారు. ఈ క్రమంలో ప్రజలు, కార్యకర్తల ఆకాంక్ష మేరకు కీలక నిర్ణయం తీసుకున్నట్లు కేటీఆర్ తెలిపారు.

  


బీఆర్‌ఎస్ వర్కింగ్ ప్రెసిడెంట్, మాజీ మంత్రి కేటీఆర్ (BRS Working President KTR) కీలక నిర్ణయం తీసుకున్నారు. తెలంగాణ వ్యాప్తంగా పాదయాత్ర చేయాలని మాజీ మంత్రి నిర్ణయించారు. పార్టీ కార్యకర్తల ఆకాంక్షల మేరకు రాష్ట్రవ్యాప్తంగా పాదయాత్ర చేస్తానని ఆయన చెబుతున్నారు. ఈ విషయాన్ని సోషల్ మీడియా ఎక్స్ వేదికగా ప్రజలతో కేటీఆర్ స్పష్టం చేశారు. కాంగ్రెస్ ప్రభుత్వం తెలంగాణకు శాపంగా మారిందని విమర్శలు గుప్పించారు. కాంగ్రెస్ పార్టీ పాలన ఫ్రమ్ ఢిల్లీ, టూ ఢిల్లీ, ఫర్ ఢిల్లీ అన్నట్లుగా తయారైందని ఎద్దేవా చేశారు.

కాంగ్రెస్ పాలనలో జరిగిన పతనం నుంచి తెలంగాణ కోలుకోవడం అసాధ్యమని చెప్పుకొచ్చారు. ప్రజల పక్షాన కోట్లాడడమే ప్రస్తుత తన ముందున్న బాధ్యత అని తెలిపారు. బీఆర్ఎస్ తిరిగి అధికారంలోకి రావాడం ఖాయమని ధీమా వ్యక్తం చేశారు. పార్టీ కార్యకర్తలు అంతా కోరుతున్నందున కచ్చితంగా రాష్ట్రవ్యాప్తంగా విస్తృత స్థాయి పాదయాత్రను నిర్వహిస్తానని ప్రకటించారు. బీఆర్‌ఎస్ అధినేత, మాజీ ముఖ్యమంత్రి కేసీఆర్ (Former CM KCR) సంపూర్ణ ఆరోగ్యంతో ఉన్నారని.. పార్టీకీ మార్గదర్శనం చేస్తున్నారని తెలిపారు. పార్టీ నేతలపై వేధింపులు, అక్రమ కేసులు పెడుతున్న పోలీసులపై కఠిన చర్యలు తప్పవని హెచ్చరించారు. రాష్ట్రంలో శాంతి భద్రతలు పూర్తిగా క్షీణించాయన్నారు. బీఆర్ఎస్ సోషల్ మీడియా వారియర్లు అద్భుతంగా పనిచేస్తున్నారని కొనియాడారు. ఈ మేరకు సామాజిక మాధ్యమం ఎక్స్‌లో ప్రజలతో సంభాషించారు కేటీఆర్.

  

తెలంగాణ ఎన్నికల్లో బీఆర్‌ఎస్ పార్టీ ఓడిపోయి.. కాంగ్రెస్ పార్టీ అధికారంలోకి వచ్చింది. అయితే ఎన్నికల సమయంలో కాంగ్రెస్ ఇచ్చిన హామీలు నెరవేర్చాలంటూ కేటీఆర్ గట్టిగానే పోరాడుతున్నారు. కాంగ్రెస్ పాలనపై విమర్శలు గుప్పిస్తూనే ఉన్నారు. ప్రతీరోజు ఏదో ఒక అంశంపై ఎక్స్‌ వేదికగా పోస్టులు పెడుతూ విమర్శనాస్త్రాలు సంధిస్తున్నారు. ముఖ్యంగా రుణమాఫీ, రైతు బంధు విషయంలో ప్రభుత్వానికి కేటీఆర్ ప్రశ్నల వర్షం కురిపిస్తున్నారు. అలాగే మూసీ సుందరీకరణ పేరుతో పేదల ఇళ్లు కూల్చివేయాలని చూస్తున్నారంటూ మాజీ మంత్రి మండిపడ్డారు. మూసీ సుందరీకరణకు తాము వ్యతిరేకం కాదని.. ఆ ప్రాజెక్టు పేరుతో పేదలను ఖాళీ చేయించి కూల్చివేయడానికి తాము వ్యతిరేకమని స్పష్టం చేశారు. ఇదిలా ఉండగా కాంగ్రెస్‌‌పై పోరాడేందుకు కేటీఆర్ మరో అడుగు ముందుకు వేశారు. రాష్ట్ర వ్యాప్తంగా పాదయాత్ర చేయాలని నిర్ణయించిన ఆయన ప్రజల పక్షాన పోరాడటమే ప్రస్తుత బాధ్యత అని చెప్పుకొచ్చారు.

కాంగ్రెస్ దళారి ప్రభుత్వం రైతులను నిండా ముంచిందని మాజీ మంత్రి కేటీఆర్ ఆగ్రహం వ్యక్తం చేశారు. ఎక్స్ వేదికగా స్పందిస్తూ.. వానాకాలం వరికోతలు సాగుతున్నాయని.. కానీ నేటి వరకు రైతుబంధు వేయలేదని.. రూ.15 వేల రైతు భరోసా ఊసే లేదని మండిపడ్డారు. కనీసం హార్వెస్ట్ చేసిన పంటను కొనుగోలు కూడా చేయడం లేదన్నారు. దీంతో రైతులు నానా ఇబ్బందులు పడుతున్నారని తెలిపారు. అకాల వర్షాలకు చాలా చోట్ల కల్లాలలో, మార్కెట్ యార్డుల్లో ధాన్యం తడిసి ముద్దైందన్నారు. ఈ సీజన్లో 91.28 లక్షల టన్నుల ధాన్యాన్ని సేకరిస్తామన్నారని.. అక్టోబరు నెలలో 8.16 లక్షల టన్నుల ధాన్యం కొనుగోలు చేయాలని పౌరసరఫరాల శాఖ లక్ష్యంగా పెట్టుకుందన్నారు. కానీ, అక్టోబర్ 28 నాటికి వరకు 913 మంది రైతుల నుంచి కేవలం 7,629 టన్నుల ధాన్యాన్ని కొనుగోలు చేశారని... రైతన్న అంటే ఎంత నిర్ల్యక్షం చూడండి అంటూ వ్యాఖ్యలు చేశారు. దళారులతో కుమ్మక్కైన ఈ కాంగ్రెస్ ప్రభుత్వం ధాన్యం కొనుగోలు కేంద్రాలను ఏర్పాటు చేయడంలేదని ఆరోపించారు. నేటి వరకు పూర్తి స్థాయిలో మిల్లుల కేటాయింపు జరగనేలేదన్నారు. కొనుగోలు కేంద్రాల ద్వారా సేకరించిన ధాన్యాన్ని ఏ మిల్లుకు పంపాలో తెలియక.. ప్రారంభించిన ఐకేపీ కేంద్రాల్లోను కొనుగోలు ప్రక్రియ నిలిచిందన్నారు. రైతులు కల్లాల్లో కన్నీళ్లు పెడుతుంటే రాష్ట్ర ముఖ్యమంత్రి చిట్టి నాయుడు మాత్రం రోత పుట్టించే కూతలతో డైవర్షన్ పాలిటిక్స్‌తో బిజీబిజీగా ఉన్నారంటూ కేటీఆర్ తీవ్రస్థాయిలో ధ్వజమెత్తారు.

ఢిల్లీ తరహాలోనే
తెలంగాణ రాజధాని హైదరాబాద్‌లో (Hyderabad) డేంజర్ బెల్స్ మోగుతున్నాయి. ఢిల్లీ తరహాలోనే హైదరాబాద్‌లో వాయు కాలుష్యం పెరిగిపోతుండటం నగరవాసులను కలవరపెడుతోంది. హైదరాబాద్‌లో వాయు కాలుష్యం కారణంగా గత దశాబ్దకాలంలో 6000 మందికి పైగా మరణాలు సంభవించాయి. లాన్సెట్ ప్లానెట్ హెల్త్ సంస్థ విడుదల చేసిన రిపోర్ట్ ప్రకారం హైదరాబాద్‌లో ఒక్క 2023లోనే వాయు కాలుష్యానికి సంబంధించి మరణాల సంఖ్య 1,597గా ఉంది. వాయు కాలుష్యం తీవ్రంగా ఉన్న టాప్ -10 నగరాలలో హైదరాబాద్ ఆరో స్థానంలో ఉంది. ఢిల్లీ నంబర్ వన్ స్థానంలో ఉండగా.. తరువాత స్థానాల్లో ముంబయి, బెంగళురు, పుణె, చెన్నై నగరాలు ఉన్నాయి.

  


తెలంగాణ రాష్ట్ర కాలుష్య నియంత్రణ మండలి వివరాల ప్రకారం హైదరాబాద్‌లోని సనత్ నగర్, పంజాగుట్ట, ఖైరతాబాద్, కొంపల్లి, ఆబిడ్స్, గచ్చి బౌలి, జూబ్లీహిల్స్ ప్రాంతాల్లో అధిక వాయు కాలుష్యం ఉంది. గత గంటల సమయంలో పీఎం 2.5 కాలుష్యాలు 60 పాయింట్లలోపు ఉండాల్సి ఉండగా సోమాజిగూడలో 105, హెచ్‌సీయూ, న్యూమలక్‌పేటలలో 99, హైదరాబా ద్‌ యూఎస్‌ కాన్సులేట్‌ వద్ద 92, జూపార్క్‌ వద్ద 91, కేపీహెచ్‌బీ ఫేజ్‌–2 వద్ద 84, కోకాపేట వద్ద 81 పాయింట్లుగా నమోదు అయ్యింది. దీపావళి టపాసులతో వాయు నాణ్యతలో క్షీణత ఏ మేరకు జరిగిందో దీనిని బట్టి అర్థం చేసుకోవచ్చు. పొల్యూషన్ వల్ల దీర్ఘకాలిక రోగులపై తీవ్ర ప్రభావం చూపే అవకాశం ఉంది.

గుండె, శ్వాసకోశ, మూత్రపిండాలు, కాలేయం, ఇతర దీర్ఘకాలిక జబ్బులు, సమస్యలున్న వారిపై వాయు కాలుష్యం తీవ్ర ప్రభావం చూపనుంది. అప్పర్‌ రెస్పిరేటరీ సమస్యలు, ముక్కులు కారడం, తుమ్ములు, గొంతు పొడిబారడం, గొంతు నొప్పి వల్ల కేసులు పెరుగుతున్న పరిస్థితి.

  

మరోవైపు దేశరాజధాని ఢిల్లీలోనూ కాలుష్యం పెరిగిపోయింది. ఢిల్లీలోని పలు ప్రాంతాల్లో ఎయిర్ క్వాలిటీ ఇండెక్స్ 408 పాయింట్లుగా నమోదు అయ్యింది. సోని విహార్ లో 408 పాయింట్లుగా ఎయిర్ క్వాలిటీ ఇండెక్స్ నమోదు అయ్యింది.

అలాగే మందిర్ మార్గ్ లో 375, మేజర్ ధ్యాన్ చంద్ నేషనల్ స్టేడియం 371, ఐటీఓలో 335 పాయింట్లుగా నమోదు అయ్యింది. ఢిల్లీలో బాణాసంచాపై నిషేధం విధించినప్పటికీ నగరవాసులు అధిక సంఖ్యలో బాణాసంచాను వినియోగించారు. బాణాసంచా వినియోగంతో కాలుష్యం ఢిల్లీని కమ్మేసింది. కాళింది కుంజ్‌లోని యమునా నదిలో విషపూరిత నురుగు భారీగా చేరింది.

ముడిచమురు ఎగుమతిలో భారత్ ముందంజ
యూరప్‌కు అతి పెద్ద ముడి చమురు సరఫరాదారుగా భారత్ నిలిచింది. దీంతో సౌదీ అరేబియా వెనక్కు వెళ్లిపోయింది. కెప్లర్ నివేదిక ప్రకారం .. యూరోపియన్ యూనియన్ దేశాలకు భారతీయ రిఫైనరీల నుంచి శుద్ధి చేసిన ముడి చమురు ఎగుమతిలో గణనీయంగా పెరుగుదల నమోదైంది. యూరోపియన్ దేశాలకు భారత్ ప్రతి రోజూ 3.60 లక్షల బ్యారెల్స్ శుద్ధి చేసిన ముడి చమురు ఎగుమతి చేసింది.

  


రాబోయే సంవత్సరం ఏప్రిల్ నాటికి ఎగుమతులు 20 లక్షల బ్యారెల్స్‌ను దాటుతుందని మార్కెట్ వర్గాల అంచనా. రష్యా – ఉక్రెయిన్ యుద్ధ సమయంలో యూరప్‌కు భారత్ రోజుకు 1.54 లక్షల బ్యారెల్స్ శుద్ధి చేసిన చమురు ఎగుమతి చేసింది. యుద్ధం ప్రారంభమైన తర్వాత 2 లక్షల బ్యారెల్స్‌కు పెరిగింది.  
 
2023 ఆర్ధిక సంవత్సరంలో రష్యాకు భారత్ కీలక మార్కెట్‌గా మారింది. ఉక్రెయిన్‌తో యుద్ధం నేపథ్యంలో పలు దేశాలు రష్యాపై ఆంక్షలు విధించిన సంగతి తెలిసిందే. ఈ నేపథ్యంలో రష్యా భారీ తగ్గింపుతో ముడి చమురును భారత్‌కు అందించింది. పలు దేశాల నుండి విమర్శలు వచ్చినప్పటికీ రష్యా నుంచే భారత్ ముడి చమురును దిగుమతి చేసుకుంటోంది.

రష్యా నుంచి 3.35 బిలియన్లు, సౌదీ నుంచి 2.30 బిలియన్లు, ఇరాక్ నుంచి 2.03 బిలియన్ డాలర్ల ముడి చమురును భారత్ దిగుమతి చేసుకుంటుంది.

  

దీంతో భారతీయ రిఫైనరీలు హైక్వాలిటీ పెట్రోల్, డీజిల్ ఇతర శుద్ధి చేసిన ఉత్పత్తులతో సరఫరా గణనీయంగా పెరిగింది. ఈ కారణంగా సౌదీ ఆరిబియాను కాదని భారత్ వైపు దృష్టి సారిస్తున్నాయి.

రైతుల పట్ల రాష్ట్ర ప్రభుత్వానికి చిత్తశుద్ధి లేదు
రాష్ట్ర ప్రభుత్వానికి ముందు చూపు లేకపోవడం ,రైతుల పట్ల చిత్తశుద్ధి లేని కారణంగా వరి ధాన్యం కోనుగోలు కేంద్రాలలో రైతులు అనేక ఇబ్బందులు పడుతున్నారు అని బీజేపి ఓబీసీ మోర్చ రాష్ట్ర అధికార ప్రతినిధి, నల్గొండ పార్లమెంట్ కాంటెస్ట్ అభ్యర్థి పాలకూరి రవిగౌడ్ రాష్ట్ర ప్రభుత్వాన్ని విమర్శించారు..
అకాల వర్షానికి వచ్చిన, వరదలకు వరి ధాన్యం కొట్టుకపోవడంతో రైతులు విలపిస్తున్నారు అని రవిగౌడ్ ఆవేదన వ్యక్తం చేశారు..
ప్రభుత్వానికి అవగాహన లేక ముందస్తు చర్యలు చేపట్టకపోవడంతో గత ఇరవై రోజుల కింద కొనుగోలు కేంద్రాలకు రైతులు తమ ధాన్యాన్ని తీసుకొస్తే ప్రభుత్వం నేటికీ కొనలేని పరిస్థితి కనిపిస్తోంది..

  


గత యాసంగి సీజన్లో రైస్ మిల్లర్లకు ఇచ్చిన ధాన్యం విషయంలో అటు మిల్లర్లకు ఇటు ప్రభుత్వం మధ్యలో నడుస్తున్న విభేదాల కారణంగా కొనుగోలు కేంద్రాలకు రైస్ మిల్లులను నేటికీ కేటాయించలేదు ..

అదే ప్రభుత్వముకు రైతుల పట్ల చిత్తశుద్ధి ఉన్నట్లయితే ఈ వ్యవహారం అంతా ఎప్పుడో జరగాల్సిఉండేది అలాకాకుండా కొనుగోలు కేంద్రాలకు దాన్యం వచ్చిన తర్వాత ఇప్పుడు రైస్ మిల్లర్స్ తో చర్చలు నడుపుతూ ఆ చర్చలు ఒక కొలిక్కి రాకపోవడంతో కొనుగోలు కేంద్రాలకు సంబంధించిన దాన్యాన్ని ఏ ఏ మిల్లులకు కేటాయించేపరిస్థితి కనబడకపోవడంతో కొనుగోలు కేంద్రాలలోనే ధాన్యం నిలిచిపోయింది..

  

నిన్న సాయంత్రం కురిసిన భారీ వర్షానికి నల్గొండ జిల్లా వ్యాప్తంగా అనేక కొనుగోలు కేంద్రాలలో ధాన్యం తడిచి, కొన్నిచోట్ల ధాన్యం కొట్టుకపోయింది...

ధాన్యం వరద పాలు కావడంతో పండుగ రోజు రైతుల కళ్ళల్లో కన్నీళ్లు చూడాల్సిన పరిస్థితి ఏర్పడింది ఆ రైతులు దీపావళి పండుగ చేసుకునే పరిస్థితి లేదు ప్రభుత్వం అధికారులు వెంటనే స్పందించి ఎఫ్సిఐ గోదాం లాంటి సంస్థలలో ధాన్యాన్ని భద్రపరిచే విధంగా చర్యలు చేపట్టి తక్షణమే కొనుగోలు కేంద్రాల నుండి ధాన్యాన్ని తరలించే విధంగా ఏర్పాటు చేయాలని రవిగౌడ్ కోరారు...

ఐపీఎల్ 2025 మెగా వేలం
వివిధ ఇండియన్ ప్రీమియర్ లీగ్-ఐపీఎల్ ఫ్రాంచైజీలు తమ ప్లేయర్ల రిటెన్షన్‌ లిస్ట్లను గురువారం అధికారికంగా ప్రకటించాయి. మొత్తం 10 జట్లు 46 మంది ప్లేయర్లను రిటైన్ చేశాయి. అందులో కోల్కతా, రాజస్థాన్ జట్లు ఆరు రిటెన్షన్ల పూర్తి కోటాను ఉపయోగించుకున్నాయి.

  


పంజాబ్ జట్టు తక్కువ సంఖ్యలో ఆటగాళ్లను తమ అట్టిపెట్టుకుంది. అంటే ఈ జట్టు అతిపెద్ద పర్స్ వ్యాల్యూతో వేలానికి వెళుతోంది. ఇక ఐదుగురు క్యాప్డ్ ప్లేయర్లు సహా ఆరుగురిని రిటైన్ చేసుకున్న రాజస్థాన్ రాయల్స్ రూ.41 కోట్ల అతి తక్కువ పర్స్తో వేలంలోకి దిగనుంది. ఐపీఎల్ 2025 వేలంలో పాల్గొన్న ఫ్రాంచైజీల పర్స్ వ్యాల్యులు ఎంతో ఇప్పుడు తెలుసుకుందాం.

IPL 2025 వేలం- టీమ్స్ పర్స్ వ్యాల్యూ
చెన్నై సూపర్ కింగ్స్ - రూ. 55 కోట్లుముంబయి ఇండియన్స్ - రూ. 45 కోట్లుకోల్‌కతా నైట్ రైడర్స్ - రూ. 51 కోట్లురాజస్థాన్ రాయల్స్ - రూ. 41 కోట్లుసన్‌రైజర్స్ హైదరాబాద్ - రూ. 45 కోట్లుగుజరాత్ టైటాన్స్ - రూ. 69 కోట్లురాయల్ ఛాలెంజర్స్ బెంగళూరు - రూ. 83 కోట్లుదిల్లీ క్యాపిటల్స్ - రూ. 73 కోట్లుపంజాబ్ కింగ్స్ - రూ. 110.5 కోట్లులఖ్నవూ సూపర్ జెయింట్స్ - రూ. 69 కోట్లు

  

అదరగొట్టిన హైదరాబాద్ ఆటగాడు!
కాగా, రిటెన్షన్‌లో హైదరాబాద్ ఆటగాడు హెన్రిచ్‌ క్లాసెన్‌ (రూ.23 కోట్లు) అత్యధిక ధర దక్కించుకున్నాడు. స్టార్ బ్యాటర్ విరాట్ కోహ్లీని బెంగళూరు టీమ్ (రూ.21 కోట్లు) రిటైన్ చేసుకుంది. ఇక ముంబయి స్టార్ రోహిత్ శర్మ (రూ.16.30 కోట్లు), చెన్నై మాజీ కెప్టెన్ ఎంఎస్ ధోనీ అన్‌క్యాప్‌డ్ ప్లేయర్‌గా (రూ.4 కోట్లు) అందుకోనున్నారు. అయితే రిషభ్‌ పంత్‌, కేఎల్ రాహుల్‌, శ్రేయస్ అయ్యర్‌ను ఆయా జట్లు రిటైన్ చేసుకోలేదు. ఇక మ్యాక్స్‌వెల్, కామెరూన్‌ గ్రీన్‌, సిరాజ్‌లను ఆర్సీబీ వదులుకుంది. నవంబర్‌ రెండు లేదా మూడో వారంలో ఐపీఎల్ మెగా వేలం జరగనుంది.

సరిహద్దుల్లో స్వీట్లు పంచుకున్న భారత్-చైనా
భారత్, చైనా మధ్య సరిహద్దుల్లో రెండేళ్లుగా సాగుతున్న ప్రతిష్టంభనకు క్రమంగా తెరపడుతోంది. తాజాగా భారత్, చైనా దేశాధినేతల మధ్య బ్రిక్స్ సదస్సులో జరిగిన భేటీ తర్వాత పరిణామాలు వేగంగా మారుతున్నాయి.

  


మోడీ, జిన్ పింగ్ చర్చల తర్వాత సరిహద్దుల్లో బలగాల ఉపసంహరణ కొనసాగుతోంది. ఈ క్రమంలో ఇవాళ మరో కీలక పరిణామం చోటు చేసుకుంది. ఇన్నాళ్లూ కలహించుకున్న ఇరుదేశాల బలగాలు ఇవాళ స్వీట్లు పంచుకుని వేడుకలు చేసుకున్నాయి.

భారత్-చైనా సరిహద్దుల్లో ఉన్న వాస్తవాధీన రేఖ వెంబడి ఉన్న ఐదు పాయింట్లలో ఇవాళ ఇలాంటి ఆసక్తికర దృశ్యాలు కనిపించాయి.

  

ఇందులో లడఖ్ లోని రెండు పాయింట్లు కూడా ఉన్నాయి. తాజాగా ఇరుదేశాల మధ్య కుదిరిన అనధికార ఒప్పందంలో భాగంగా డెప్సాంగ్, డెమ్చోక్ ప్రాంతాల నుంచి ఇరు బలగాలు వెనక్కి తగ్గాయి. ఈ పరిణామం జరిగిన రెండు రోజుల తర్వాత ఇవాళ భారత్, చైనా సైనికులు దీపావళి సందర్భంగా స్వీట్లు పంచుకున్నారు.

లడఖ్‌లోని చుషుల్ మాల్డో , దౌలత్ బేగ్ ఓల్డి, అరుణాచల్ ప్రదేశ్‌లోని బంచా , బుమ్లా , సిక్కింలోని నాథులాలో ఇరు దేశాల బలగాలు ఇవాళ స్వీట్లు పంచుకున్నాయి. పెట్రోలింగ్ ఒప్పందంలో డెప్సాంగ్ మైదానాలు , డెమ్‌చోక్ నుండి తాత్కాలిక శిబిరాలతో సహా సైనిక సిబ్బందిని , మౌలిక సదుపాయాలను తొలగించాలని అలాగే 2020 ఏప్రిల్ కు ముందున్న చోట్లకు ఆయా బలగాలు వెళ్లిపోవాలని నిర్ణయించారు.ఈ ప్రక్రియ దాదాపు పూర్తయింది. దీంతో సరిహద్దుల్లో ఉద్రిక్తతలు గణనీయంగా తగ్గుతాయని భావిస్తున్నారు.

ఎల్లో అలెర్ట్‌ జారీ చేసిన ఐఎండీ
తెలంగాణలో రెండురోజులు వానలు కొనసాగుతాయని వాతావరణ విభాగం హెచ్చరించింది. తేలికపాటి నుంచి మోస్తరు వర్షాలు కురుస్తాయని.. పలుచోట్ల ఉరుములు, మెరుపులు, ఈదురుగాలులతో కూడిన వానలు పడే అవకాశాలున్నాయని హెచ్చరించింది.

  


తెలంగాణలో రెండురోజులు వానలు కొనసాగుతాయని వాతావరణ విభాగం హెచ్చరించింది. తేలికపాటి నుంచి మోస్తరు వర్షాలు కురుస్తాయని.. పలుచోట్ల ఉరుములు, మెరుపులు, ఈదురుగాలులతో కూడిన వానలు పడే అవకాశాలున్నాయని హెచ్చరించింది. నైరుతి బంగాళాఖాతం, దక్షిణాంధ్ర తీరంలో ఉన్న ఉపరితల ఆవర్తనం సగటు సముద్రమట్టానికి 3.1 కిలోమీటర్ల నుంచి 5.8 కిలోమీటర్ల వరకు విస్తరించి ఉందని తెలిపింది. దీంతో పలు జిల్లాలకు వాతావరణశాఖ ఎల్లో అలెర్ట్‌ను జారీ చేసింది.

గురువారం ఆదిలాబాద్‌, ఆసిఫాబాద్‌, మంచిర్యాల, నిర్మల్‌, నిజామాబాద్‌, జగిత్యాల, రాజన్న సిరిసిల్ల, కరీంనగర్‌, పెద్దపల్లి, జయశంకర్‌ భూపాలపల్లి, సిద్దిపేట, హైదరాబాద్‌, మేడ్చల్‌ మల్కాజ్‌గిరి, వికారాబాద్‌, సంగారెడ్డి, మెదక్‌, కామారెడ్డి జిల్లాల్లో అక్కడక్కడ వానలు పడే ఉరుములు మెరుపులతో వానలు పడే ఛాన్స్‌ ఉందని చెప్పింది.

  

శుక్రవారం ఆసిఫాబాద్‌, మంచిర్యాల, నిజామాబాద్‌, జగిత్యాల, రాజన్న సిరిసిల్ల, కరీంనగర్‌, పెద్దపల్లి, కామారెడ్డి జిల్లాల్లో తేలికపాటి నుంచి మోస్తరు వానలు పడుతాయని హెచ్చరించింది. ఆయా జిల్లాలకు ఎల్లో అలెర్ట్‌ను జారీ చేసింది. అలాగే, నవంబర్‌ 4 వరకు రాష్ట్రంలో వానలు కొనసాగేందుకు అవకాశాలున్నాయని వివరించింది.