May 14 2024, 13:46

రాష్ట్రంలో డబుల్ డిజిట్ బీజేపీకే !
- కేంద్రమంత్రి కిషన్ రెడ్డి కీలక వ్యాఖ్యలు
- మోదీపై దుష్ప్రచారం చేస్తే పెద్ద నేతలు కాలేరు
- హైదరాబాద్‌లో ఓటర్‌ లిస్ట్‌ అస్తవ్యస్తం: కిషన్‌రెడ్డి
- ఓటమి భయంతో రేవంత్‌ కోడ్‌ ఉల్లంఘించారు - బండి సంజయ్
 తెలంగాణలో బీజేపీ కొత్త శక్తిగా అవతరించబోతోందని ఆ పార్టీ రాష్ట్ర అధ్యక్షుడు, కేంద్ర మంత్రి కిషన్‌రెడ్డి అన్నారు. తమ లక్ష్యానికి అనుగుణంగా రాష్ట్రంలో డబుల్‌ డిజిట్‌ ఖాయమని స్పష్టం చేశారు. ఏపీలో ఎన్నికలు ఉండటం వల్ల కూడా హైదరాబాద్‌లోని పలు ప్రాంతాల్లో ఓటింగ్‌ శాతం తగ్గిందని చెప్పారు.

పార్టీ రాష్ట్ర కార్యాలయంలో కిషన్‌రెడ్డి మీడియాతో మాట్లాడారు. రాష్ట్రవ్యాప్తంగా పట్టణ ప్రాంతాల్లో పోలింగ్‌ శాతం కొంత తగ్గినా, మెజారిటీ ఓటర్లు బీజేపీ వైపే మొగ్గుచూపారని తెలిపారు. అన్ని నియోజకవర్గాల్లో బీజేపీకి సానుకూల స్పందన లభించిందని తెలిపారు. ఓటింగ్‌ శాతంతో సంబంధం లేకుండా సికిందరాబాద్‌లో బీజేపీ విజయం సాధిస్తుందని ధీమా వ్యక్తం చేశారు. సమ్మక్క-సారక్క గిరిజన వర్సిటీలో ఈ విద్యా సంవత్సరంలోనే కొన్ని కోర్సులకు అడ్మిషన్లు ఉంటాయని చెప్పారు. రాష్ట్ర ప్రభుత్వం భూమి కేటాయించగానే వర్సిటీ భవనాలకు ప్రధాని శంకుస్థాపన చేస్తారని తెలిపారు.

సీఎం సార్ ది మిడిమిడి జ్ఞానం !
సీఎం రేవంత్‌రెడ్డి మిడిమిడి జ్ఞానంతో ప్రధానిపై సవాళ్లు చేస్తున్నారని విమర్శించారు. స్థాయి మరచి ప్రధానిపై విమర్శలు చేయొద్దని హితవు పలికారు. బీజేపీపై, కేంద్రంపై తప్పుడు ప్రచారం చేసినంత మాత్రాన పెద్ద నాయకులు కాబోరని అన్నారు. ‘‘పీఎం అయ్యాక పెళ్లి చేసుకోవాలని రాహుల్‌ అనుకున్నారు. కానీ ప్రధాని అయ్యే అవకాశం లేదని ఆయనకు తెలిసిపోయింది. అందుకే పెళ్లి చేసుకోవాలనుకుంటున్నారు.. మంచిదే కదా’’ అని అన్నారు. కాగా, మునిసిపల్‌ అధికారుల వైఖరి వల్ల హైదరాబాద్‌లో ఓటరు జాబితా అస్తవ్యస్తంగా మారిందని కిషన్‌రెడ్డి మండిపడ్డారు. 

సీఎం రేవంత్‌రెడ్డి మిడిమిడి జ్ఞానంతో ప్రధానిపై సవాళ్లు చేస్తున్నారని విమర్శించారు. స్థాయి మరచి ప్రధానిపై విమర్శలు చేయొద్దని హితవు పలికారు. బీజేపీపై, కేంద్రంపై తప్పుడు ప్రచారం చేసినంత మాత్రాన పెద్ద నాయకులు కాబోరని అన్నారు. ‘‘పీఎం అయ్యాక పెళ్లి చేసుకోవాలని రాహుల్‌ అనుకున్నారు. కానీ ప్రధాని అయ్యే అవకాశం లేదని ఆయనకు తెలిసిపోయింది. అందుకే పెళ్లి చేసుకోవాలనుకుంటున్నారు.. మంచిదే కదా’’ అని అన్నారు. కాగా, మునిసిపల్‌ అధికారుల వైఖరి వల్ల హైదరాబాద్‌లో ఓటరు జాబితా అస్తవ్యస్తంగా మారిందని కిషన్‌రెడ్డి మండిపడ్డారు. తమకు ఓ చోట, తమ కుమారుడికి మరో చోట ఓటు కేటాయించారని.. దీనిపై కేంద్ర మంత్రిగా లేఖ రాసినా పట్టించుకోలేదన్నారు. ఒక వర్గం వారి కోసం షేక్‌పేటలో ఏకంగా 3 వేల ఓట్లను తొలగించారని ధ్వజమెత్తారు. షేక్‌పేటలో ఓట్లు గల్లంతయిన పోలింగ్‌ కేంద్రాన్ని కిషన్‌రెడ్డి సందర్శించారు. దీనిపై జిల్లా ఎన్నికల అధికారికి ఫిర్యాదు చేశామని.. కేంద్ర, రాష్ట్ర ఎన్నికల సంఘాలకు ఫిర్యాదు చేస్తామన్నారు.

May 14 2024, 13:43

తెలంగాణ వ్యాప్తంగా స్ట్రాంగ్ రూమ్స్ వద్ద భద్రత కట్టుదిట్టం...!
 తెలంగాణ వ్యాప్తంగా స్ట్రాంగ్‌ రూమ్స్‌ వద్ద పటిష్ట పోలీస్ బందోబస్తును ఏర్పాటు చేశారు. ఈవీఎం, వీవీ ప్యాట్ల స్ట్రాంగ్ రూమ్ వద్ద కేంద్ర బలగాలు మోహరించారు. ఆయా స్ట్రాంగ్‌ రూముల వద్ద మూడంచెల భద్రత ఏర్పాటు చేశారు. కౌంటింగ్ కేంద్రాలు, స్ట్రాంగ్‌ రూమ్స్‌ వద్ద రౌండ్ ది క్లాక్ సీసీ కెమెరాలతో నిఘా పెట్టారు. అలాగే స్ట్రాంగ్‌ రూముల వద్ద 144 సెక్షన్‌ అమలులో ఉంది.

కాగా.. రాష్ట్ర వ్యాప్తంగా లోక్‌సభ పోలింగ్ (Loksabha Polls 2024) ప్రక్రియ ముగిసింది. నిన్న ఉదయం 7 గంటల పోలింగ్ మొదలవగా సాయంత్రం 6 గంటల వరకు కొనసాగింది.

 కొన్ని చోట్ల సరైన సమయానికే పోలింగ్ ముగియగా.. మరికొన్ని పోలింగ్ బూత్‌ల వద్ద మాత్రం రాత్రి 11 గంటల వరకు పోలింగ్ కొనసాగింది. 

6 గంటల లోపు క్యూలో నిల్చున్న ఓటర్లకు నిర్ణీత సమయం ముగిసిన తర్వాత కూడా కూడా ఓటు వేసే అవకాశం కల్పించారు. దీంతో పలు ప్రాంతాల్లో రాత్రి 11 గంటల వరకు పోలింగ్ ప్రక్రియ జరిగింది. రాష్ట్ర వ్యాప్తంగా మొత్తం 64.74శాతం పోలింగ్ నమోదు అయ్యింది.

May 14 2024, 10:21

PM Modi: నేడు వారణాసిలో నామినేషన్ దాఖలు చేయనున్న ప్రధాని మోడీ 
PM Modi: ఉత్తరప్రదేశ్ రాష్ట్రంలోని వారణాసి లోక్ సభ స్థానం నుంచి నేడు ( మంగళవారం ) భారత ప్రధాన మంత్రి నరేంద్ర మోడీ నామినేషన్ దాఖలు చేయబోతున్నారు.

అట్టహాసంగా జరిగే ఈ కార్యక్రమంలో బీజేపీ పాలిత, మిత్రపక్షాల రాష్ట్రాల సీఎంలు, కేంద్ర మంత్రులు, సీనియర్ నాయకులు హాజరు కాబోతున్నారు. ఈ నేపథ్యంలో పోలీసులు భారీగా భద్రతా ఏర్పాట్లు చేశారు. కాగా, వారణాసిలో ప్రధాని నరేంద్రమోడీ నామినేషన్‌ వేసే కార్యక్రమానికి ఆహ్వానాలు అందుకున్న ముఖ్యమంత్రులు వీరే.. 

ఉత్తరప్రదేశ్ సీఎం యోగి ఆదిత్యనాథ్, బీహార్ ముఖ్యమంత్రి నితీశ్ కుమార్, పుష్కర్ ధామి (ఉత్తరాఖండ్ ), మోహన్ యాదవ్ (మధ్యప్రదేశ్‌), విష్ణు దేవ్ సాయ్ (ఛత్తీస్ గఢ్ ), ఏక్ నాథ్ షిండే (మహారాష్ట్ర), భజన్ లాల్ శర్మ (రాజస్థాన్), హిమంత బిశ్వ శర్మ (అస్సాం), నయాబ్ సైనీ (హర్యానా), ప్రమోద్ సావంత్ (గోవా), ప్రేమ్ సింగ్ తమంగ్‌ (సిక్కిం), మాణిక్ సాహా (త్రిపుర)తో పాటు ఎన్డీఏ పక్షాల నేతలు, కేంద్ర మంత్రులు ప్రధాని మోడీ నామినేషన్ కార్యక్రమంలో పాల్గొననున్నారు.

May 14 2024, 10:20

EVMS: ఇబ్రహీంపట్నం నిద్రా, నోవా ఇంజనీరింగ్, మెడికల్ కాలేజీ వద్ద భారీ భద్రత 
ఎన్టీఆర్ జిల్లా: ఇబ్రహీంపట్నంలోని నిమ్రా, నోవా ఇంజనీరింగ్, మెడికల్ కాలేజీ వద్ద పోలీసులు భారీగా భద్రత ఏర్పాట్లు చేశారు. ఏపీ (AP)లో పోలింగ్ (Polling) పూర్తి అయిన నేపథ్యంలో ఈవీఎంలు ( EVMs) మైలవరం (Mailavaram) నియోజకవర్గంలోని ఇబ్రహీంపట్నం, నిమ్రా కాలేజ్ స్ట్రాంగ్ రూంలకు అధికారులు తరలిస్తున్నారు..

ఈ ఏర్పాట్లను రిటర్నింగ్ అధికారి సంపత్ కుమార్ (Sampath Kumar) పరిశీలిస్తున్నారు. తిరువూరు, నందిగామ, విజయవాడ వెస్ట్, విజయవాడ సెంట్రల్, నియోజకవర్గాలకు సంబంధించిన ఈవీఎంలను నోవా ఇంజనీరింగ్ కాలేజీకి తరలిస్తున్నారు.

మైలవరం నియోజకవర్గం ఈవీఎంలను నిమ్రా మెడికల్ కాలేజీకి తరలిస్తున్నట్లు రిటర్నింగ్ అధికారి సంపత్ కుమార్ చెప్పారు. విజయవాడ ఈస్ట్, జగ్గయ్యపేట నియోజకవర్గం ఈవీఎంలను ఇంజనీరింగ్ కాలేజీకి తరలిస్తున్నట్లు తెలిపారు. ఏడు నియోజకవర్గ ఈవీఎంలను ఇబ్రహీంపట్నంలోని నిమ్రా, నోవా ఇంజనీరింగ్, మెడికల్ కాలేజీలకు తరలిస్తున్నామని రిటర్నింగ్ అధికారి సంపత్ కుమార్ చెప్పారు.

May 14 2024, 10:19

తెలంగాణలో మరో మూడు రోజులు పాటు భారీ వర్షాలు..
తెలంగాణలో మరో మూడు రోజులు పాటు భారీ వర్షాలు..

తెలంగాణలో మరో మూడు రోజుల పాటు భారీ నుంచి మోస్తరు వర్షాలు పడతాయని హైదరాబాద్‌ వాతావరణ శాఖ హెచ్చరించింది. పలు జిల్లాలలకు అలర్ట్‌ జారీ చేసిన వాతావరణ శాఖ… హైదరాబాద్‌లో నేడు, రేపు జల్లులు పడే అవకాశం ఉందని తెలిపింది.

May 13 2024, 20:34

హైదరాబాద్‌లో బీజేపీ అభ్యర్థి మాధవి లతపై కేసు నమోదు, మొత్తం విషయం ఏంటో తెలుసా?
హైదరాబాద్ లోక్‌సభ నియోజకవర్గం బీజేపీ అభ్యర్థి మాధవి లతపై మలక్‌పేట పోలీస్ స్టేషన్‌లో ఎఫ్‌ఐఆర్ నమోదైంది. మాధవి లత ఎన్నికల ప్రక్రియను ప్రభావితం చేసిందని మరియు డ్యూటీలో ఉన్న ప్రభుత్వ అధికారికి భంగం కలిగించారని ఆరోపించిన బిజెపి అభ్యర్థి మాధవి లత యొక్క వీడియో సోషల్ మీడియాలో వైరల్ అవుతోంది. ఆమె పోలింగ్ కేంద్రంలో ఓటర్ల గుర్తింపు కార్డులను పరిశీలిస్తున్నారు. ముస్లీం ఓటర్ల బురఖా తొలగించి ముఖాలు చూపించాలని పలువురు తమ ముఖాలను కార్డులతో సరిపెడుతున్నారు.

ఓటింగ్ సమయంలో, బీజేపీ అభ్యర్థి అజంపూర్‌లోని పోలింగ్ స్టేషన్ నంబర్ 122కి చేరుకున్నారు. పోలింగ్ బూత్ వద్ద ఉన్న ముస్లిం మహిళా ఓటర్ల గుర్తింపు కార్డులను ఆయన తనిఖీ చేశారు. ముస్లిం మహిళ ముఖంపై నుంచి బురఖా తీసేయమని బలవంతం చేశాడనేది ఆరోపణ. ఆయన తరలింపుపై తీవ్ర దుమారం రేగింది. ఈ విషయాన్ని ధృవీకరించినట్లు హైదరాబాద్ జిల్లా కలెక్టర్, జిల్లా మేజిస్ట్రేట్ అనుదీప్ దురిశెట్టి తెలిపారు. దురిశెట్టి హైదరాబాద్ లోక్‌సభ నియోజకవర్గానికి రిటర్నింగ్ అధికారిగా కూడా ఉన్నారు.

విషయం తీవ్రరూపం దాల్చడంతో బీజేపీ అభ్యర్థి ఓ క్లారిటీ ఇచ్చారు. మహిళలు తమ గుర్తింపును ధృవీకరించుకోవాలని తాను అభ్యర్థిస్తున్నానన్నారు. అందులో తప్పేమీ లేదు.. 'నేను అభ్యర్థిని. చట్టం ప్రకారం ID కార్డును తనిఖీ చేసే హక్కు అభ్యర్థికి ఉంది. నేను పురుషుడిని కాదు స్త్రీని. చాలా మర్యాదపూర్వకంగా నేను వారిని అభ్యర్థించాను, నేను ID కార్డ్‌ని చూసి వెరిఫై చేయవచ్చా? ఎవరైనా దీన్ని పెద్ద ఇష్యూగా చేయాలనుకుంటే, వారు భయపడుతున్నారని అర్థం.

May 13 2024, 16:49

ఓటు హక్కును వినియోగించుకున్న కట్టెకోలు దీపెందర్
పార్లమెంట్ ఎన్నికల నేపథ్యంలో నేడు జరుగుతున్న ఎన్నికల్లో బీసీ యువజన సంక్షేమ సంఘం రాష్ట్ర ప్రధాన కార్యదర్శి కట్టెకోలు దీపెందర్ నల్లగొండ పట్టణంలోని రామగిరి ప్రభుత్వ బాలుర ఉన్నత పాఠశాల పోలింగ్  కేంద్రంలోని 139 వ పోలింగ్ బూత్ లో తన ఓటుహక్కును వినియోగించుకున్నారు. 

ప్రజాస్వామ్యంలో ఓటు ప్రజల చేతిలో ఒక వజ్రాయుధమని ప్రతి ఒక్కరు బాధ్యతగా తమ ఓటు హక్కును వినియోగించుకోవాలని బీసీ యువజన సంక్షేమ సంఘం రాష్ట్ర ప్రధాన కార్యదర్శి కట్టెకోలు దీపెందర్ కోరారు.

May 11 2024, 12:39

మాజి మంత్రి ఎరబెల్లి దయాకర్ రావు కిలక వాఖ్యలు !
మాజి మంత్రి ఎరబెల్లి దయాకర్ రావు కిలక వాఖ్యలు !
- సీఎం రేవంత్‍రెడ్డి నా శిష్యుడే.. 
- బజార్లో ఉన్న వ్యక్తిని ఎంపీ చేశారు: ఎర్రబెల్లి

తెలంగాణ ముఖ్యమంత్రి రేవంత్ రెడ్డి తన శిశ్యుడే అని మాజీ మంత్రి, బీఆర్ఎస్ కీలక నేత ఎర్రబెల్లి దయాకర్ రావు అన్నారు. మూడుసార్లు మాత్రమే గెలిచిన రేవంత్ సీఎం అయ్యాడని.. ఏడు సార్లు గెలిచిన తాను ఇలా మిగిలానని చెప్పుకొచ్చారు. పార్టీ మారిన ఎంపీ పసునూరి దయాకర్, ఎమ్మెల్యే కడియం శ్రీహరిపైనా ఎర్రబెల్లి ఘాటు విమర్శలు చేశారు.

తెలంగాణ సీఎం రేవంత్ రెడ్డికి రాజకీయ భవిష్యత్తు ఎవరిచ్చారనేదానిపై ప్రస్తుతం జోరుగా చర్చ జరుగుతోంది. గతంలో ఆయన టీడీపీ పార్టీలో పని చేయగా.. చంద్రబాబే ఆయనకు రాజకీయ గురువు అనే వ్యాఖ్యానాలు వినిపిస్తున్నాయి. ఇదే ప్రశ్నను ఇటీవల ఓ మీడియా ఛానెల్ నిర్వహించిన ఇంటర్వ్యూలో జర్నలిస్టులు సంధించారు. దానికి సమాధానం చెప్పిన రేవంత్ రెడ్డి తనకు రాజకీయ గురువు అంటూ ఎవరూ లేరని చెప్పారు. తాను చంద్రబాబు శిశ్యుడిని అంటే ము* తంతా అంటూ కాస్త పరుషంగానే రియాక్ట్ అయ్యారు. చంద్రబాబు తనకు గురవు కాదని.. ఇద్దరం ఒకే పార్టీలో పని చేశామని రాజకీయ సహచరుడు మాత్రమే అని చెప్పుకొచ్చారు.

ఈ నేపథ్యంలో రేవంత్ రెడ్డితో కలిసి గతంలో టీడీపీలో పని చేసి ఆ తర్వాత బీఆర్ఎస్‌లో చేరిన మాజీ మంత్రి ఎర్రబెల్లి దయాకర్ రావు కీలక కామెంట్స్ చేశారు. శిశ్యరికంపై రేవంత్ ఘాటు వ్యాఖ్యలు చేసి వారం గడవకముందే.. ఎర్రబెల్లి అగ్నికి ఆజ్యం పోసేలా మాట్లాడారు. రేవంత్ రెడ్డి ఎవరో కాదని.. తన శిశ్యుడే అని చెప్పుకొచ్చారు. వర్ధన్నపేటలో పార్టీ నియోజకవర్గ స్థాయి సమావేశంలో మాట్లాడిన ఆయన రేవంత్ తన శిశ్యుడే అని కామెంట్లు చేశారు. అంతే కాదు రేవంత్‌పై తీవ్ర విమర్శలు చేశారు.

రేవంత్ రెడ్డి మోసాలు చేస్తడని.. అబద్ధాలు, జిమ్మిక్కులు చేస్తడని విమర్శించారు. మూడుసార్లు గెలిచినోడు సీఎం అయ్యారని.. ఏడుసార్లు గెలిచినోన్ని ఇక్కడ మీ ముందున్నానని చెప్పారు. అబద్ధాలాడేటోడే ముందుకుపోతున్నడని.. న్యాయమనేది లేదని నిట్టూర్చారు. అయినా రేవంత్ ఎక్కువ రోజులు సీఎంగా కొనసాగరని... తక్కువ టైంలోనే కాంగ్రెస్‍ పార్టీపై జనాల్లో వ్యతిరేకత వచ్చిందని చెప్పారు. ప్రస్తుత ప్రభుత్వం ఏడాదిలోనే కూలిపోతుందని సంచలన కామెంట్స్ చేశారు.

ఇక వరంగల్ ఎంపీ పసునూరి దయాకర్‌పైనా ఘాటు వ్యాఖ్యలు చేశారు. బజార్‌లో ఉన్న దయాకర్‍ను తీసుకొచ్చి.. రూపాయి లేకున్నా ఎంపీ చేసిన మహనుభావుడు కేసీఆర్‍ అని కొనియాడారు. అట్లాంటి పసునూరి కూడా పార్టీ మారాడని మండిపడ్డారు. బీఆర్ఎస్ పార్టీకి నమ్మక ద్రోహం చేసిన కడియం శ్రీహరిని తన తండ్రే చదివించాడని చెప్పారు. ఎంపీ, ఎమ్మెల్సీ, ఎమ్మెల్యే అవకాశాలను తీసుకుని బీఆర్ఎస్ పార్టీకి నమ్మకద్రోహం చేసిన చరిత్ర కడియం శ్రీహరిది అని ఎర్రబెల్లి మండిపడ్డారు.

May 11 2024, 12:35

పార్లమెంట్ ఎన్నికలపై మావోయిస్టుల లేఖ కలకలం
- తెలంగాణలో పార్లమెంట్ ఎన్నికలు
- ప్రజలకు మావోయిస్టుల కీలక పిలుపు
- పార్లమెంట్ ఎన్నికల్లో ఓటేయవద్దని పిలుపు
 
తెలంగాణ పార్లమెంట్ ఎన్నికల వేళ మావోయిస్టుల వాల్‌పోస్టర్లు కలకలం రేపుతున్నాయి. తెలంగాణ- ఛత్తీస్‌ఘడ్ సరిహద్దుల్లోని ములుగు జిల్లా వాజేడు మండలంలోని పలు గ్రామాల్లో ఈ వాల్‌పోస్టర్లు దర్శనమిచ్చాయి. ఈ పార్లమెంట్ ఎన్నికలను బహిష్కరించాలని మావోయిస్టులు పిలుపునిచ్చారు.

తెలంగాణ పార్లమెంట్ ఎన్నికలు తుది అంకాని చేరుకున్నాయి. నేడు సాయంత్రంతో ప్రచార పర్వానికి తెరపడనుంది. గత 50 రోజులకు పైగా ఊదరగొట్టిన మైకులు మూగబోనున్నాయి. మే 13న ఉదయం 7 గంటల నుంచి సాయంత్రం 6 గంటల వరకు పోలింగ్ జరగనుంది. ఈసీ గుర్తించిన సమస్యాత్మక ప్రాంతాల్లో మాత్రం సాయంత్రం 4 గంటలకే పోలింగ్ పూర్తవుతుంది. మెుత్తం 17 పార్లమెంట్ స్థానాలు, సికింద్రాబాద్ కంటోన్మెంట్ అసెంబ్లీ స్థానానికి ఉప ఎన్నికలకు జరగనుండగా.. జూన్ 4న ఫలితాలు వెల్లడి కానున్నాయి.

పార్లమెంట్ ఎన్నికల నేపథ్యంలో మావోయిస్టుల కరపత్రాలు రాష్ట్రంలో కలకలం రేపాయి. ఈ కరపత్రాల్లో ఓటర్లకు మావోయిస్టు పార్టీ కీలక పిలుపునిచ్చింది. ప్రస్తుతం జరగుతున్న పార్లమెంట్ ఎన్నికలను బహిష్కరించాలని ప్రజలకు సూచించింది. ఈ మేరకు శనివారం తెలంగాణ ఛత్తీస్‌గఢ్ సరహద్దుల్లో ఈ కరపత్రాలు కలకలం రేపాయి. ములుగు జిల్లా వాజేడు మండలం జగన్నాథపురం వై జంక్షన్ సమీపంలో మావోయిస్టుల పేరిట వాల్ పోస్టర్లు, కరపత్రాలు దర్శనమిచ్చాయి.

పార్లమెంట్ ఎన్నికలను ఓటర్లు బహిష్కరించాలని ఈ కరపత్రాల ద్వారా మావోయిస్టులు పిలుపునిచ్చారు. వెంకటాపురం-వాజేడు ఏరియా కమిటీ పేరుతో వాల్ పోస్టర్లను మావోయిస్టు పార్టీ విడుదల చేసింది. పోలింగ్‌కు మరికొన్ని గంటల సమయం మాత్రమే నేపథ్యంలో మావోయిస్టుల కరపత్రాలు స్థానికంగా కలకలం రేపుతున్నాయి. దీంతో పోలీసులు, కేంద్రబలగాలు అలర్ట్ అయ్యాయి. ఏజెన్సీ ఏరియాలో భారీగా భద్రత బలగాలను మోహరించారు. సమీప గ్రామాల్లో విస్తృతంగా తనిఖీలు చేపట్టారు. ఎలాంటి అవాంఛనీయ ఘటనలు జరగకుండా ప్రశాంతంగా పోలింగ్ జరిగేలా కట్టుదిట్టమైన భద్రతా ఏర్పాట్లు చేస్తున్నారు. కాగా సమస్యాత్మక ప్రాంతాల్లో సాయంత్రం 4 గంటలకే పోలింగ్ ముగియనుంది.

May 11 2024, 12:08

సీఎం రేవంత్‌ రెడ్డికి ఈసీ నోటీసులు
- 48 గంటలు డెడ్‌‌లైన్.. దాటితే చర్యలే..! 

ఓవైపు లోక్ సభ ఎన్నికలకు రెండు రోజులు మాత్రమే సమయం ఉండగా.. మరోవైపు తెలంగాణ సీఎం రేవంత్ రెడ్డికి (Anumula Revanth Reddy) ఎలక్షన్ కమిషన్ షాక్ ఇచ్చింది. ఎన్నికల ప్రచారంలో రేవంత్ రెడ్డి ఉపయోగిస్తున్న భాష, మాజీ సీఎం కల్వకుంట్ల చంద్రశేఖర్ రావు (Kalvakuntla Chandrashekar Rao) పై వ్యక్తిగత దూషణలపై బీఆర్ఎస్ పార్టీ ఎన్నికల సంఘానికి ఫిర్యాదు చేసింది. ఈ మేరకు.. సీఎం రేవంత్ రెడ్డికి శుక్రవారం (మే 10న) షోకాజు నోటీసులు జారీ చేసింది. ఎన్నికల ప్రచారంలో భాగంగా బీఆర్ఎస్ అధినేత కేసీఆర్‌ను వ్యక్తిగతంగా దూషించినందుకు, అసభ్యపదజాలం వాడినందుకు రేవంత్ రెడ్డికి ఎన్నికల సంఘం నోటీసులు జారీ చేసింది.

బీఆర్ఎస్ పార్టీ ఇచ్చిన ఫిర్యాదుపై కాంగ్రెస్ ఎలక్షన్ కమిటీ ఛైర్మన్ నిరంజన్‌కు ఎన్నికల సంఘం నోటీసులు జారీ చేసింది. అయితే.. ఈ నోటీసులపై 48 గంటల్లో వివరణ ఇవ్వాలని నిరంజన్‌ను ఈసీ ఆదేశించింది. గడువు ముగిసేసరికి వివరణ ఇవ్వకపోతే రేవంత్ రెడ్డిపై చర్యలు తీసుకుంటామని ఎన్నికల సంఘం అధికారులు హెచ్చరించారు.

కాగా.. ఎన్నికల ప్రచారంలో భాగంగా సీఎం రేవంత్ రెడ్డి మాట్లాడుతూ.. "కేసీఆర్ మతి ఉండి మాట్లాడుతుండో.. మందు వేసి మాట్లాడుతుండో తెలియట్లేదు. సోయిలేనోడు, సన్నాసోడు, చవట, దద్దమ్మ, దిక్కుమాలినోడు.." అంటూ కేసీఆర్‌పై రేవంత్ రెడ్డి తీవ్రపదజాలాన్ని ఉపయోగించారు. రైతుబంధు సాయం, రైతురుణమఫీ విషయంలో కేసీఆర్, రేవంత్ రెడ్డి మధ్య విమర్శలు, ప్రతివిమర్శలు చోటుచేసుకున్న క్రమంలో రేవంత్ రెడ్డి ఘాటు వ్యాఖ్యలు చేశారు. దీంతో.. సీఎ రేవంత్ రెడ్డిపై బీఆర్ఎస్ నేతలు ఈసీకి ఫిర్యాదు చేశారు. ఈ మేరకు ఇవాళ సీఎంకు ఈసీ నోటీసులు ఇచ్చింది.