NLG: కస్తూరిబా బాలికల విద్యాలయాలకు చేయుతనిస్తున్న కస్తూరి ఫౌండేషన్


  

 
 
  గుర్రంపోడ్: మండల కేంద్రంలోని కస్తూర్భా గాంధీ బాలికల విద్యాలయంలో కనీస వసతులు లేక విద్యార్థులు ఇబ్బందులు పడుతున్న విషయాన్ని పాఠశాల సిబ్బంది ద్వారా కస్తూరి ఫౌండేషన్ వారు తెలుసుకొని సుమారు 3 లక్షల వ్యయంతో సానిటరీ వర్క్స్ మరమ్మత్తులు చేపట్టినారు. ఈ సందర్భంగా ఈరోజు పాఠశాలలో పుష్పలత అధ్యక్షతన ఏర్పాటు చేసిన ఆత్మీయ సన్మాన కార్యక్రమంలో కస్తూరి ఫౌండేషన్ చైర్మన్ కస్తూరి శ్రీ చరణ్ కు ఘన సన్మానం నిర్వహించారు. శ్రీ చరణ్ మాట్లాడుతూ.. 2017లో కస్తూరి ఫౌండేషన్ ప్రారంభించినపుడు విద్యారంగాన్ని సేవా రంగంగా ఎంచుకొని 6 సంవత్సరాల నుండి అనేక సేవా కార్యక్రమాలు నిర్వహిస్తున్నామని అన్నారు.
  పేదరికంతో ఏ విద్యార్థి కూడా చదువుకు దూరం కావొద్దనే ఉద్దేశ్యంతోనే మా ఫౌండేషన్ ఆధ్వర్యంలో పలు సేవా కార్యక్రమాలు నిర్వహిస్తున్నామని తెలిపారు. మన ఊరి బడులను మనమే బాగుపర్చుకోవాలని, తరగతి గదిలోనే దేశ భవిష్యత్తు నిర్మాణం ఉంటుందన్నారు. ఈ విద్యా సంవత్సరంలో తమ ఫౌండేషన్ బాలికల విద్యపై, అంగన్వాడి పాఠశాలలపై ప్రత్యేక శ్రద్ధ పెట్టినామని తెలిపారు. ఇప్పటికైనా ప్రభుత్వం కస్తూర్భా విద్యాలయాలను పట్టించుకొని, మౌలిక సదుపాయాలు కల్పించాలని కోరారు.
  నేటి సమాజంలో అన్ని రంగాల్లో మహిళలు ముందున్నారని గుర్తు చేస్తూ.. మీరు కష్ట పడి చదివి ఉన్నత స్థాయికి ఎదిగి సమాజ సేవా చేయాలని విద్యార్థులకు సూచించారు. మనలో బలమైన సంకల్పం ఉంటే ఏదైన సాధించగలమని అదే సంకల్పంతో విద్యార్థులు కష్ట పడి చదివితే మంచి మార్కులు సాధిస్తారన్నారు.
  కస్తూరి శ్రీ చరణ్  చేతుల మీదగా  పాఠశాలోని విద్యార్దినులకు స్టేషనరీ సామగ్రి, జూట్ బాగ్స్, గ్రామర్ బుక్స్, డిక్షనరీ బుక్స్, మైక్ సెట్ లు అందజేశారు. ఈ కార్యక్రమంలో ఫౌండేషన్ సభ్యులు రామకృష్ణ, మహేష్, పిన్నింటి నరేందర్ రెడ్డి, సమ్మిడి నవీన్ రెడ్డి, వీరమళ్ల కార్తీక్ గౌడ్, రవి, టీచర్లు హేమలత, జ్యోతి, కవిత, ఉమాదేవి, నేహా, గ్రామ యువకులు, గ్రామ పెద్దలు, తదితరులు పాల్గొన్నారు.
 

చౌటుప్పల్: జరుగుతున్న అభివృద్ధి పనులను పర్యవేక్షించిన ఎమ్మెల్యే కూసుకుంట్ల


  

 
 
  మునుగోడు నియోజకవర్గ ఎమ్మెల్యే కూసుకుంట్ల ప్రభాకర్ రెడ్డి మంగళవారం నియోజకవర్గంలోని యాదాద్రి జిల్లా, చౌటుప్పల్ మున్సిపాలిటీ పరిధిలోని 12 మరియు 13 వార్డులలో పర్యటించారు. 
  ఈ సందర్భంగా అక్కడ మహిళలు వారికి ఘన స్వాగతం పలికారు. స్థానికంగా ఉన్న ప్రజా సమస్యలను ఎమ్మేల్యే అడిగి తెలుసుకున్నారు. అదేవిధంగా జరుగుతున్నటువంటి అభివృద్ధి పనులైన చౌటుప్పల్ మెయిన్ డ్రైనేజీ మరియు సీసీ రోడ్ల పనులను ఎమ్మేల్యే పర్యవేక్షించారు. 
  త్వరితగతిన అభివృద్ధి పనులను పూర్తిచేయాలని అధికారులను ఆదేశించారు. కార్యక్రమంలో స్థానిక ప్రజలు, ప్రజాప్రతినిధులు, నాయకులు, కార్యకర్తలు, తదితరులు పాల్గొన్నారు. 
 

NLG: గట్టు నెమలిపూర్ రైతుల సమస్యలు పరిష్కరించాలి: రామావత్ రమేష్ నాయక్


  

 
 
  నల్లగొండ జిల్లా, పెద్దఅడిశర్లపల్లి: బహుజన్ సమాజ్ పార్టీ మండల అధ్యక్షులు ధర్మాపురం శ్రీనివాస్ ఆధ్వర్యంలో దేవరకొండ నియోజకవర్గ బీఎస్పీ అధ్యక్షులు రామావత్ రమేష్ నాయక్, పెద్ద అడిశర్లపల్లి మండలంలోని గట్టునెమలిపూర్ గ్రామంలో పర్యటించారు. ఈ సందర్భంగా గ్రామానికి చెందిన కొంతమంది రైతులు, వారి సమస్యను రామావత్ రమేష్ నాయక్ దృష్టికి తీసుకెళ్ళారు, వారి సమస్యను విని అనంతరం రామావత్ రమేష్ మాట్లాడుతూ..   ధరణి అనే పోర్టల్ తీసుకువచ్చి, ధరణి పొరపాట్ల వల్ల, రైతుల్ని పొలాల్లో ఉండనివ్వకుండా ఎమ్మార్వో ఆఫీసులో చుట్టూ తిరిగేటట్టు చేసిన ప్రభుత్వం తప్పిదం వల్ల, ఎంతో మంది రైతులు ఇబ్బంది పడాల్సిన పరిస్థితి ఏర్పడిందని అన్నారు.
  గట్టు నెమలిపూర్ గ్రామస్తుల భూ సమస్యను పరిష్కరించాలని, లేనియెడల బహుజన్ సమాజ్ పార్టీ ఆధ్వర్యంలో దేవరకొండ ఆర్డీవో ఆఫీస్, నల్లగొండ జిల్లా కలెక్టర్ కార్యాలయం ముందు ధర్నా చేస్తామని హెచ్చరించారు. ఈ కార్యక్రమంలో బహుజన్ సమాజ్ పార్టీ నియోజకవర్గ కార్యదర్శి బాలునాయాక్, సాయి, లోకేష్, కృష్ణయ్య, దత్తు నాయక్ తదితరులు పాల్గొన్నారు
 

చర్లపల్లి: గురుకుల మహిళా డిగ్రీ కళాశాల యందు స్పాట్ అడ్మిషన్స్


  

 
 
  నల్గొండ జిల్లా కేంద్రంలోని చర్లపల్లిలో గల తెలంగాణ సాంఘిక సంక్షేమ గురుకుల మహిళా డిగ్రీ కళాశాల యందు, స్పాట్ అడ్మిషన్స్ ప్రక్రియ ప్రారంభం అయినట్లు కళాశాల ప్రిన్సిపల్ ఎస్.కె. సుల్తానా ఒక ప్రకటనలో తెలిపారు.
  2023- 2024 విద్యాసంవత్సరానికి గాను  మొదటి సంవత్సరం ఎంపిసి, ఎం.ఎస్.డి.ఎస్, ఎం.ఎస్.సి.ఎస్, ఎం.పి.సి.ఎస్ గ్రూపుల్లో ఖాళీగా ఉన్న సీట్ల భర్తీ కొరకు స్పాట్ అడ్మిషన్స్ నిర్వహించడం జరుగుతుందని, 2022- 2023 విద్యాసంవత్సరం లో ఇంటర్మీడియట్ పూర్తి చేసిన ఎస్సీ విద్యార్థినిలు.. తమ ధ్రువీకరణ పత్రాలతో కళాశాల లో తేదీ 09-08-2023 నుండి 10-8-2023 వరకు దరఖాస్తు చేసుకోవాలని తెలిపారు.
   11-8-2023 న మెరిట్ ఆధారంగా కౌన్సిలింగ్ ప్రక్రియ జరుగుతుందని కళాశాల ప్రిన్సిపల్ తెలిపారు.
 

NLG: లెంకలపల్లిలో తల్లిపాల వారోత్సవాలు


  

 
 
  మర్రిగూడెం మండలం, లెంకలపల్లి గ్రామంలోని అంగన్వాడీ కేంద్రంలో మంగళవారం తల్లిపాల వారోత్సవాలను నిర్వహించారు. ఈ సందర్భంగా అంగన్వాడీ టీచర్ పద్మ మాట్లాడుతూ.. శిశువుకు తల్లిపాలు ఇవ్వడం వల్ల, శిశువు ఆరోగ్య ఎదుగుదలకు తోడ్పడుతుందని అన్నారు.   
  స్థానిక ప్రజలకు ఈ సందర్భంగా అవగాహన కల్పించారు. ఈ కార్యక్రమంలో అంగన్వాడీ టీచర్ పద్మ, ఆశా వర్కర్లు ఏర్పుల పద్మ, సైదాబీ, మహిళా సంఘం సభ్యులు, చిన్నారులు పాల్గొన్నారు.
  
 

ప్రజా యుద్ధనౌక' ప్రయాణాన్ని కొనసాగిద్దాం:
టివివి, డిటిఎఫ్, కెవిపిఎస్ నేతలు



  

 
 
  NLG: రాజ్య హింస పైన, ప్రజా సమస్యలపై ప్రజా ఆకాంక్షల కోసం రాజ్యంతో యుద్ధం చేసిన ప్రజా యుద్ధనౌక గద్దర్ ప్రయాణాన్ని కొనసాగిద్దామని డి.టి.ఎఫ్ రాష్ట్ర అధ్యక్షులు ఎం.సోమయ్య, కెవిపిఎస్ జిల్లా కార్యదర్శి పాలడుగు నాగార్జున, విద్యావంతుల వేదిక జిల్లా అధ్యక్షుడు పందుల సైదులు అన్నారు. గద్దర్ అకాల మరణం సందర్భంగా నల్లగొండ జిల్లా కేంద్రంలోని అమరవీరుల స్థూపం వద్ద సోమవారం గద్దర్ చిత్ర పటం ముందు కొవ్వొత్తులతో ప్రదర్శన నిర్వహించి, ప్రజాసంఘాల ఆధ్వర్యంలో స్మరించుకోవడం జరిగింది.
  ఈ సందర్భంగా వారు మాట్లాడుతూ.. తన గళంతో ఉర్రూతలూగించి, కోట్లాదిమంది ప్రజల అభిమానాన్ని చూరగొన్న  ప్రజా ఉద్యమ గొంతుక మూగబోవడం తెలంగాణ సమాజానికి తీరని లోటు అన్నారు. నాలుగు దశాబ్దాల పోరాట జీవితంలో, ఏనాడు కూడా పాలకులకు తలవంచ లేదన్నారు. గద్దర్ ఆడితే తెలంగాణ ఆడిందని, గద్దర్ పాడితే తెలంగాణ పాడిందని, గద్దర్ కదిలితే తెలంగాణ యావత్ సమాజం కదిలిందన్నారు. ఎంతోమంది కవులను, కళాకారులను తయారుచేసి తెలంగాణ ఉద్యమానికి అందించిన గొప్ప యోధుడు గద్దర్ అన్నారు. 
  సాంస్కృతిక విప్లవోద్యమానికి గద్దర్ చేసిన మార్గ నిర్దేశం విప్లవ పోరాటాలలో మైలురాయి గా నిలిచిందని అన్నారు. అజ్ఞాతంలో ఉన్నా, ప్రజాక్షేత్రంలో ఉన్నా, నిరంతరం ప్రజల హృదయాలలో చెరగని ముద్ర వేసుకున్నారు అన్నారు. తన జీవిత ప్రయాణంలో ఏ సమస్య ఎదురైనా ఆ సమస్యను పాట రూపంలోకి మలిచి ప్రజా చైతన్యాన్ని కూడగట్టడంలో గద్దర్ దిట్ట అన్నారు. రాజ్యం తుపాకితో కాల్చినా, హత్య చేయడానికి ప్రయత్నం చేసినా, సమాజంలో జరుగుతున్న ఆడపిల్లల హత్యల పైన, అత్యాచారాల పైన, దోపిడీ పీడల పైన గొంతు విప్పడంలో ఏనాడు వెనకంజ వేయలేదని తెలిపారు. గద్దర్ హృదయం ఉద్యమాల హృదయముగా పేరుగాంచిందన్నారు. గద్దర్ పోరాట పఠిమను, వారి ఉద్యమ స్ఫూర్తిని కొనసాగించాల్సిన బాధ్యత రెండు తెలుగు రాష్ట్రాలలోని ప్రజల పై ఉందని అన్నారు.
  గద్దర్ ఆకాంక్షించిన ప్రజాస్వామిక తెలంగాణ ప్రయాణాన్ని కొనసాగించాల్సిన బాధ్యత తెలంగాణలోని కవులు, కళాకారులు మేధావులు, విద్యావంతులు, బుద్ది జీవులందరి పైన ఉందని చెప్పారు.
  ఈ కార్యక్రమంలో  డిటిఎఫ్ జిల్లా అధ్యక్ష కార్యదర్శులు ఖుర్షీద్ మీయా, పి.వెంకులు, యుటిఎఫ్ జిల్లా అధ్యక్షులు ఎడ్ల సైదులు, కార్యదర్శి పెరుమాల వెంకటేశం, టిపిటిఎఫ్ జిల్లా అధ్యక్షుడు రత్నయ్య, రిటైర్డ్ ప్రిన్సిపాల్ కాశయ్య, తెలంగాణ ప్రదేశ్ ఎరుకల సంఘం జిల్లా అధ్యక్షులు మానుపాటి బిక్షమయ్య, ఏఎం.ఎస్పీ నియోజకవర్గ ఇన్చార్జ్ బొజ్జ చిన్న, ఎం.ఆర్.పి.ఎస్ జిల్లా కో-కన్వీనర్ ఇరిగి శ్రీశైలం తెలంగాణ స్టూడెంట్ యూనియన్ జిల్లా అధ్యక్షులు కొండేటి మురళి, కత్తుల చందన్, సోహేల్, సామాజిక కార్యకర్త పలస యాదగిరి, డి టి ఎఫ్ జిల్లా బాధ్యులు టి.వెంకటేశ్వర్లు, ఈద అంజయ్య, ఇమ్మడి జగతి, కె.విజయ్ కుమార్ తదితరులు పాల్గొన్నారు.
 

TS: గద్దర్ పార్ధీవదేహానికి నివాళులర్పించిన సీఎం కేసీఆర్


  

 
 
  హైద‌రాబాద్: ప్ర‌జా గాయ‌కుడు గ‌ద్ద‌ర్ పార్ధీవదేహానికి సోమవారం సాయంత్రం, ముఖ్య‌మంత్రి కేసీఆర్ నివాళుల‌ర్పించారు. అల్వాల్‌ లోని గ‌ద్ద‌ర్ నివాసానికి సిఎం కేసీఆర్ చేరుకొని గ‌ద్ద‌ర్ పార్థివ‌దేహానికి నివాళుల‌ర్పించి, వారి కుటుంబ స‌భ్యులను ఓదార్చారు.
  సీఎంతో పాటు మంత్రులు హ‌రీశ్‌రావు, త‌ల‌సాని శ్రీనివాస్ యాద‌వ్, వేముల ప్ర‌శాంత్ రెడ్డి, ప్ర‌ణాళిక సంఘం ఉపాధ్య‌క్షుడు వినోద్ కుమార్, ఎమ్మెల్యేలు ర‌స‌మ‌యి బాల‌కిష‌న్,  బాల్క సుమ‌న్, మైనంప‌ల్లి హ‌న్మంత్ రావు, ఎమ్మెల్సీ గోరెటి వెంక‌న్న‌, బీఆర్ఎస్ నాయ‌కులు మోత్కుప‌ల్లి న‌ర్సింహులు, తదితరులు  నివాళుల‌ర్పించారు.
 

NLG: న్యాయం చేయమని బీఎస్పీ అధ్వర్యంలో కలెక్టర్ కు పిర్యాదు


  

 
 
  నల్లగొండ జిల్లా, కేతేపల్లి మండల పరిధిలోని ఇనుపాముల గ్రామానికి చెందిన మేకల బిక్షమయ్య అనే వ్యక్తికి 70 సంవత్సరాల క్రితం సర్వే నెంబర్ 96, పట్టా నెంబర్ 559 లో  రెండు ఎకరాల అసైన్డ్ భూమిని పంపిణీ చేయడం జరిగిందని, అప్పటి నుండి అట్టి భూమిని సేద్యం చేసుకుని జీవనం సాగిస్తున్నట్టు, తర్వాత ఆర్ధిక పరిస్థితులు సరిగ్గా లేకపోవడం వల్ల 8 సంవత్సరాల క్రితం తమ గ్రామస్తుడైన బత్తుల నర్సింహా రెడ్డి (రిటైర్డ్ టీచర్) కి కౌలు కి ఇవ్వడంతో  నిరక్షరాస్యులైన నన్ను మోసం చేసి కౌలు కాగితం రాయాలని చెప్పి రూ.100/- బాండ్ పేపర్ పై రూ.40,000/- కి విక్రయించినట్టు పేపర్ రాసి సంతకం చేయించడం జరిగిందని, ఇప్పుడు అట్టి భూమి అతనిది అని అప్పటి కాగితం తీసుకవచ్చి ఇబ్బందులకు పెడుతున్నారని, ఇంతకముందు జిల్లా కలెక్టర్ కార్యాలయం ఎదుట ధర్నా చేయగా అప్పటి కలెక్టర్ మండల తహశీల్దార్, అర్ఐ లను పంచనామా చేసి రిపోర్ట్ ఇవ్వాలని కోరారు. వారు మా బాధ వినకుండా అతను చెప్పిందే విని రిపోర్ట్ పంపించారని, మీము చెప్పంది రికార్డు చేయకుండా ఎలా రిపోర్ట్ ఇస్తారని ప్రశ్నించగా.. మరల ఆర్ఐ ను అక్కడి ప్రదేశం కి వెళ్లి మరల రిపోర్టు ఇవ్వమని కోరగా అక్కడ ఆర్ఐ దురుసుగా ప్రవర్తిస్తూ, మా కుటుంబ సభ్యుల పట్ల అసభ్య పదజాలంతో ఏమీ చేసుకుంటారో చేసుకొమ్మని బెదిరిస్తున్నారని, తమకు న్యాయం చేయాలని బీఎస్పీ నకిరేకల్ నియోజకవర్గం ఇంచార్జి మేడి ప్రియదర్శిని ని కోరగా.. బాధితులకు న్యాయం చేయాలని సోమవారం జిల్లా కలెక్టర్ కార్యాలయంలో జరిగిన గ్రీవెన్స్ లో ప్రియదర్శిని ఆధ్వర్యంలో పిర్యాదు చేశారు.
  ఈ కార్యక్రమంలో బీఎస్పీ కేతెపల్లి మండల అధ్యక్షులు ఎడ్ల విజయ్, మేకల నర్సింహా, మేకల బిక్షం, మేకల భారతమ్మ, మేకల రవి, వంటేపాక వెంకటేష్ తదితరులు పాల్గొన్నారు
 

గురుకులాలు, సంక్షేమ వసతిగృహాలకు సోంత భవనాలు నిర్మించాలి: ఎస్ఎఫ్ఐ


  

 
 
  నల్లగొండ జిల్లా, దేవరకొండ: భారత విద్యార్థి ఫెడరేషన్ ఎస్ఎఫ్ఐ డివిజన్ కమిటీ ఆధ్వర్యంలో స్థానిక ఆర్డీఓ కార్యాలయంను ముట్టడి చేశారు. అనంతరం విద్యార్థుల సమస్యలను పరిష్కరించాలని ఆర్డీవో కార్యాలయంలో వినతిపత్రం అందజేశారు. 
  ఎస్ఎఫ్ఐ డివిజన్ అధ్యక్ష, కార్యదర్శులు రామావత్ లక్షణ్ నాయక్, బుడిగ వెంకటేష్ మాట్లాడుతూ... రాష్ట్ర ముఖ్యమంత్రి సంక్షేమ వసతి గృహాలు, గురుకులాలు, కస్తూర్బా గాంధీ బాలికల పాఠశాల విద్యార్థులకు మెస్ చార్జీలు పెంచుతున్నామని పత్రిక ప్రకటన మాత్రమే ఇచ్చి విద్యార్థుల కడుపులు మాత్రం మాడుస్తున్నారని ఆరోపించారు. రాష్ట్రంలో గత మూడేళ్ళుగా పెండింగ్ లో ఉన్న స్కాలర్ షిప్స్ మరియు ఫీజు రీయంబర్స్ మెంట్స్ విడుదల చేయాలని విద్యార్ధి సమస్యలపై ప్రభుత్వం స్పందించాలని డిమాండ్ చేశారు.
  తెలంగాణ రాష్ట్రంలో గత మూడేళ్ళుగా 5,177 కోట్లు రూపాయలు స్కాలర్ షిప్స్ మరియు ఫీజు రీయంబర్స్ మెంట్స్ ప్రభుత్వం విడుదల చేయకుండా, విద్యార్థులు ఉన్నత విద్యకు వెళ్ళకుండా నిర్లక్ష్యం చేస్తుందని, బడ్జెట్లో 0.1 శాతం కూడా కాదు ఈ నిధులు విడుదల చేయడానికి అని అన్నారు. మూడేళ్ళ నుండి నిర్లక్ష్యం చేస్తున్నారన్నారు. ఈ రాష్ట్రంలో ముఖ్య మంత్రికి కానీ, ఒక్కమంత్రి, ఎమ్మెల్యే కి కానీ  ఒక్కనెల కూడా వాళ్ళు జీతాలు పెండింగ్ లేవు మరి విద్యార్థులకు ఎందుకు అని ప్రశ్నించారు. తక్షణమే పెండింగ్ ఫీజు బకాయిలు విడుదల చేయాలని డిమాండ్ చేశారు.
  -విద్యాసంవత్సరం ప్రారంభం అయ్యి రెండు నెలలు గడుస్తున్నా ఇప్పటికి యూనిఫామ్ ఇవ్వలేదు, ఇంటర్ విద్యార్థులకు పాఠ్యపుస్తకాలు లేవు, లెక్చరర్స్, టీచర్స్ ఖాళీలు భర్తీ లేదు, పంద్రాగస్టు కూడా పాత బట్టలతోనే విద్యార్థులు విద్యాసంస్థలకు వెళ్ళాలా అని ప్రశ్నించారు.
  
- ప్రభుత్వం గోప్పగా చెప్పుకుంటున్న గురుకులాలు మరింత ఆధ్వానంగా ఉన్నాయి. 1008 గురుకులాలు అద్దె భవనాల్లో నడుస్తున్నాయి. కనీసం సౌకర్యాలు లేవు, సన్నబియ్యం పెడుతున్నామని చెబుతున్నా, ఆచరణలో అమలు లేదని విమర్శించారు.
  
- మెనూ అమలు లేదు, మెస్ బిల్లులు రాక నాణ్యమైన భోజనం పెట్టక విద్యార్థులు తీవ్ర ఇబ్బందులు పడుతున్నారు. కాస్మోటిక్ ఛార్జీలు నెలకు హస్టల్స్ విద్యార్ధులకు 62/- బాలురు, 150/- బాలికలకు  ఇస్తున్నా, గత 8 నెలలుగా పెండింగులో ఉన్నాయని,  ఎలా విద్యార్ధులు చదువుకోవాలని ఎస్ఎఫ్ఐ అడుగుతుందన్నారు.
  - 2018లో ఇంటర్ విద్యార్థులకు మధ్యాహ్నం భోజన పథకం ప్రారంభించిన ప్రభుత్వం ఇప్పటికీ అమలుకు నోచుకోవడం లేదు. గోప్పగా అసెంబ్లీలో ప్రకటించిన పథకం అమలు జరగడం లేదు. తక్షణమే ఇంటర్ విద్యార్థులకు మధ్యాహ్నం భోజనం అమలు చేయాలని అన్నారు.
  
- తక్షణమే విద్యా రంగం సమస్యలు పరిష్కారం చేయకుంటే అధికార పార్టీ ఎమ్మెల్యే లను మంత్రులను  అడ్డుకుంటామని హెచ్చరించారు.
  కార్యక్రమంలో ఎస్ఎఫ్ఐ  నాయకులు కిరణ్, శ్రీకాంత్, రాజేష్, మల్లేశ్వరి మౌనిక, రోజా, శ్రీవాణి, మంజుల రాహుల్, శ్రవణ్, చందు తదితరులు పాల్గొన్నారు.
 

NLG: సెకండ్ ఏఎన్ఎం లను రెగ్యులరైజ్ చేయాలని కలెక్టర్ కు వినతి పత్రం


  

 
 
  నల్లగొండ: సెకండ్ ఏఎన్ఎం లను రెగ్యులరైజ్ చేయాలని జిల్లాలోని సెకండ్ ఏఎన్ఎం లు సోమవారం జిల్లా కేంద్రంలోని కలెక్టర్ కార్యాలయంలో కలెక్టర్ ఆర్.వి కర్ణన్ కు వినతి పత్రం అందజేశారు. ఎన్ హెచ్ ఎం లలో పనిచేస్తున్న సెకండ్ ఏఎన్ఎం లుగా గత 15 సంవత్సరాలుగా, పిఎస్సీలలో పనిచేస్తున్న తమను పర్మినెంట్ చేయాలని, లేదా సమాన పనికి సమాన వేతనం ఇవ్వాలని ప్రభుత్వాన్ని కోరారు.
  ఏఎన్ఎం లు మాట్లాడుతూ.. వీఆర్ఏ పంచాయతీ కార్యదర్శిలతో పాటు, ఈ మధ్య కాలంలో ఆర్టీసీ ఉద్యోగులు కూడా ప్రభుత్వ పరం చేయడం జరిగింది. కానీ కరోనా కష్టకాలంలో అనేక ఇబ్బందులను ఎదుర్కొన్న మమ్మల్ని మాత్రమే ప్రభుత్వం చిన్న చూపు చూస్తుందని ఆవేదన వ్యక్తం చేశారు. 
  ఎంతో మంది ఏఎన్ఎంలు చనిపోయిన కానీ ప్రభుత్వం కనీసం పట్టించుకోలేదని, వారి కుటుంబాలు  ఈరోజు రోడ్డున పడ్డాయని ఆవేదన వ్యక్తం చేశారు. ఈ విషయాన్ని నిరసిస్తూ ఏఐటియుసి ఆధ్వర్యంలో, ఈ నెల 4వ తేదీన ఇచ్చిన పిలుపు మేరకు చలో అసెంబ్లీ కార్యక్రమం చేపట్టడం జరిగిందని, కార్యక్రమంలో సుమారు 3500 మంది సెకండ్ ఏఏఎంలను అరెస్ట్ చేయడాన్ని నిరసిస్తూ జిల్లా కలెక్టర్ కార్యాలయం ఎదుట నిరసన తెలియజేశారు.
  కార్యక్రమంలో ఏఐటియుసి జిల్లా అధ్యక్షుడు పల్లా దేవేందర్ రెడ్డి, ఏఎన్ఎంలు స్వప్న, సుచిత్ర, సరిత, పద్మ , రోజా, మమత, మంజుల, సుమలత, అనురాధ, తదితరులు పాల్గొన్నారు.