యాసంగి సాగు రికార్డు.. రాష్ట్రంలో 68 లక్షల ఎకరాల్లో పంటలు..
సరిగ్గా ఎనిమిదేండ్లలో తెలంగాణ వ్యవసాయ ముఖ చిత్రం పూర్తిగా మారిపోయింది. అద్దెకరం పారితే గొప్ప అనుకొనే రోజులు పోయి, ఏకంగా పదెకరాల పంటలను పారిస్తున్నరు మన తెలంగాణ రైతన్నలు.

53.08 లక్షల ఎకరాల్లో వరి
8 ఏండ్లలో కొత్తగా 49 లక్షల ఎకరాల సాగు
యాసంగి పంటలకు జీవధారగా కాళేశ్వరం
సీఎం కేసీఆర్‌ కృషితో సాగునీరు పుష్కలం
నిరంతర విద్యుత్తు, ఆపై పెట్టుబడి సాయం
యాసంగి వచ్చిందంటే భూములన్నీ బీడు పెట్టి రైతులంతా ఇంటికాడ కూర్చునేటోళ్లు. లేదంటే కూలీనాలీ పనులకు వెళ్లేటోళ్లు.. ఇది ఎనిమిదేండ్ల కిందటి ముచ్చట. ఇప్పుడు సాగు సీజన్‌ సీన్‌ మారింది. జీవధార కాళేశ్వరంతో పుష్కలమైన సాగునీరు, నిరంతర ఉచిత విద్యుత్తు, పెట్టుబడిసాయంతో మండుటెండల్లోనూ పసిడి పంటలు పండుతున్నాయి. ఈసారి యాసంగిలో ఏకంగా 68.53 లక్షల ఎకరాల్లో పంటలు సాగయ్యాయి. తెలంగాణ యాసంగి చరిత్రలో ఇదే ఆల్‌టైమ్‌ రికార్డు.

సరిగ్గా ఎనిమిదేండ్లలో తెలంగాణ వ్యవసాయ ముఖ చిత్రం పూర్తిగా మారిపోయింది. అద్దెకరం పారితే గొప్ప అనుకొనే రోజులు పోయి, ఏకంగా పదెకరాల పంటలను పారిస్తున్నరు మన తెలంగాణ రైతన్నలు. ఇది ముఖ్యమంత్రి కేసీఆర్‌ కృషి ఫలితం. ఆ ఫలితం ఎంతటిదంటే.. ఈ యాసంగి సీజన్‌ పంటల సాగులో ఆల్‌టైం రికార్డు నమోదు చేసింది. ఉమ్మడి పాలనలోనూ ఎప్పుడూ లేనివిధంగా ఈసారి రాష్ట్రంలో రికార్డు స్థాయిలో 68.53 లక్షల ఎకరాల విస్తీర్ణంలో వివిధ పంటలు సాగయ్యాయి. 2020-21 రికార్డును బద్ధలు కొడుతూ సరికొత్త రికార్డు నమోదైంది. మొత్తం పంటల సాగుతో పాటు వరి సాగు కూడా నయా రికార్డులను సృష్టించింది. ఏకంగా 53.08 లక్షల ఎకరాల్లో వరి నాట్లు పడ్డాయి. ఈ మేరకు రాష్ట్రవ్యాప్తంగా సాగు విస్తీర్ణం లెక్కలను బుధవారం వ్యవసాయ శాఖ విడుదల చేసింది. సాగుకు ఇంకా 10 రోజుల సమయం ఉన్నది. ఈ నేపథ్యంలో సాగు విస్తీర్ణం మరింత పెరిగే అవకాశం ఉన్నది.

49 లక్షల ఎకరాల్లో పెరిగిన సాగు
సాగునీటికి కరువుండే యాసంగిలోనూ రాష్ట్రంలో అనూహ్య రీతిలో పంట సాగు పెరుగుతుండటం గమనార్హం. ఎనిమిదేండ్లలోనే రాష్ట్రంలో యాసంగి పంటల సాగు విస్తీర్ణం ఏకంగా 48.61 లక్షల ఎకరాలు పెరిగింది. 2015-16 యాసంగిలో సీజన్‌లో తెలంగాణ అంతటా 19.92 లక్షల ఎకరాలే సాగైంది. అదిప్పుడు 68.53 లక్షల ఎకరాలకు పెరిగింది. ఇక, యాసంగి వరి గత ఎనిమిదేండ్లలో 45.73 లక్షల ఎకరాలు పెరగటం విశేషం. 2015-16 యాసంగిలో 7.35 లక్షల ఎకరాల్లో మాత్రమే వరి సాగైంది. అంటే.. వరి సాగు ఏడింతలు పెరిగింది.

అంచనాలను మించి..
ఉమ్మడి ఏపీ, తెలంగాణ వ్యవసాయ చరిత్రలో 2020-21 యాసంగిలో అత్యధిక సాగు నమోదైంది. ఆ సీజన్‌లో మొత్తం 68.17 లక్షల ఎకరాల్లో వివిధ పంటలు సాగయ్యాయి. ఇదే స్థాయిలో వరి కూడా రికార్డు స్థాయిలో 52.80 లక్షల ఎకరాల్లో సాగైంది. ఇక భవిష్యత్తులో ఈ సాగును మించి కాబోదని అందరూ అంచనా వేశారు. కానీ ఈ సీజన్‌లో సాగు 68.53 లక్షలకు చేరుకోగా, వరి సాగు 53.08 లక్షలకు చేరింది.

సీఎం కేసీఆర్‌ కృషి ఫలితమే
అంతంత మాత్రంగా ఉన్న రాష్ట్ర వ్యవసాయ ముఖ చిత్రం పూర్తిగా మారిపోవటానికి ప్రధాన కారణం.. ముఖ్యమంత్రి కేసీఆర్‌. ఆయన నిరంతర శ్రమ, పట్టుదల వల్లే నేడు తెలంగాణ సస్యశ్యామలంగా మారింది. వ్యవసాయాన్ని గాడిలో పెట్టి రైతులు సగర్వంగా జీవించేలా ప్రణాళికలు అమలు చేశారు. మిషన్‌ కాకతీయ, కాళేశ్వరం ప్రాజెక్టుతో సాగు నీరు, కరెంటు గోస తీర్చారు. రైతుబంధు అందించి రైతులకు అండగా నిలిచారు. వ్యవసాయ రంగంలో ఒక్కో సమస్యను పరిష్కరిస్తూ రికార్డు స్థాయిలో పంటలు సాగు చేసేలా చేశారు. సీఎం కేసీఆర్‌ చేయూతతో ఇప్పుడు తెలంగాణ రైతులు అధిక పంటలు సాగు చేస్తూ దేశానికే ఆదర్శంగా నిలుస్తున్నారు.

ఇకపై పెంపుడు కుక్కలకు గుర్తింపు కార్డులు..కీలక నిర్ణయం


హైదరాబాద్: గ్రేటర్‌తో పాటు శివారు మున్సిపాలిటీల పరిధిలో వీధి కుక్కల బెడదను నివారించడానికి యుద్ధ ప్రాతిపదికన చర్యలు చేపట్టాలని రాష్ట్ర ప్రభుత్వ ప్రత్యేక ప్రధాన కార్యదర్శి అర్వింద్‌ కుమార్‌ మున్సిపల్‌ అధికారులను ఆదేశించారు.
జీహెచ్‌ఎంసీ పరిధిలో ప్రస్తుతం ఐదున్నర లక్షల వీధి కుక్కలున్నాయని, గతంలో 8 లక్షల 50వేలు ఉండేవని (2011) స్టెరిలైజేషన్‌ ఆపరేషన్స్‌ నిర్వహించడం వల్ల వాటి సంఖ్య ఐదు లక్షల 50వేలకు తగ్గిందని అర్వింద్‌కుమార్‌ తెలిపారు. 

వాటికి వెంటనే ఏబీసీ (యానిమల్‌ బర్త్‌ కంట్రోల్‌) స్టెరిలైజేషన్‌ ఆపరేషన్లు నిర్వహించాలని, ఆయా కాలనీల్లో కొన్ని నీటి నిల్వ సదుపాయాలను ఏర్పాటు చేయాలని ఆదేశించారు. జీహెచ్‌ఎంసీ పరిధిలో ఉన్న హోటల్స్‌, రెస్టారెంట్స్‌, ఫంక్షన్‌ హాల్స్‌, చికెన్‌ , మటన్‌ సెంటర్లు వ్యర్థాలను వీధుల్లో వేయకుండా కట్టడి చేయాలని మున్సిపల్‌ అధికారులకు సూచించారు. నగరంలో కుక్కల సంఖ్యను నిరోధించడానికి తగిన చర్యలు చేపట్టాలని తెలిపారు.

పెంపుడు జంతువుల నమోదుకు ప్రత్యేక యాప్‌
పెంపుడు జంతువుల నమోదుకు ప్రత్యేక మొబైల్‌ యాప్‌ను సిద్ధం చేయాలని అధికారులకు అర్వింద్‌కుమార్‌ సూచించారు. వీటికి సంబంధించిన ఫిర్యాదులను 'మై జీహెచ్‌ఎంసీ' యాప్‌, 040 21111111 ద్వారా నమోదు చేసేందుకు చర్యలు తీసుకోవాలని తెలిపారు. నగర పరిధిలో, పరిసర మున్సిపాలిటీల పరిధిలో పెంపుడు కుకల సంఖ్యను గుర్తించడానికి త్వరలో మొబైల్‌ యాప్‌ను కూడా రూపొందిస్తున్నామని ఆయన పేర్కొన్నారు. ఆ యాప్‌లో సంబంధిత యాజమానులు నమోదు చేసుకోవాలని, తద్వారా గుర్తింపు కార్డును మంజూరు చేస్తామని చెప్పారు. ఎకువగా కేసులు నమోదవుతున్న ప్రాంతాల్లో వెటర్నరీ బృందాలను తరలించి కుక్కలను కట్టడి చేయడానికి తగు చర్యలు చేపట్టాలని సూచించారు. మూసీ పరివాహక ప్రాంతంలో కూడా ప్రత్యేక దృష్టి సారించాలని అధికారులను ఆదేశించారు.

ఆరేళ్లు నిండితేనే 1వ తరగతిలోకి


రాష్ట్రాలకు కేంద్ర విద్యాశాఖ నిర్దేశం
దిల్లీ: నూతన విద్యావిధానాన్ని అనుసరించి ఇకపై ఒకటో తరగతిలో ఆరేళ్లు నిండిన (6+) పిల్లలకే ప్రవేశాలు కల్పించాలని కేంద్ర విద్యాశాఖ రాష్ట్రాలను కోరింది. అన్ని రాష్ట్రాలు, కేంద్రపాలిత ప్రాంతాలకు ఈ మేరకు లేఖ రాసింది. ‘‘చిన్నారుల పునాది దశ విద్యాభ్యాసాన్ని బలోపేతం చేయడానికి తొలి ప్రాధాన్యం ఇవ్వాలని జాతీయ విద్యావిధానం-2020 సిఫార్సు చేసింది. 

పునాది దశలో విద్యార్థులకు అయిదేళ్లపాటు అభ్యాస అవకాశాలు కల్పించాల్సి ఉంటుంది. అందులో 3 ఏళ్లు పాఠశాల ముందస్తు విద్య (ప్రీ స్కూల్‌ ఎడ్యుకేషన్‌), 2 ఏళ్లు ప్రాథమిక విద్యలో తొలిదశ అయిన 1, 2వ తరగతులు ఉంటాయి. ప్రీ స్కూల్‌ నుంచి 2వ తరగతి వరకు పిల్లలకు ఎలాంటి అవాంతరాలు లేని అభ్యాస పద్ధతిని ప్రోత్సహించాలన్నది ఈ విధానం ముఖ్య ఉద్దేశం. 

అందువల్ల అంగన్‌వాడీలు, ప్రభుత్వ/ ప్రభుత్వ ఎయిడెడ్‌, ప్రైవేటు, ఎన్‌జీవోలు నిర్వహించే ప్రీ స్కూల్‌ కేంద్రాల్లో మూడేళ్లపాటు పిల్లలకు నాణ్యమైన విద్యను అందుబాటులోకి తెచ్చినప్పుడే ఇది సాధ్యం. ఈ లక్ష్యం సాకారం కావాలంటే దేశవ్యాప్తంగా ఉన్న అన్ని రాష్ట్ర ప్రభుత్వాలు, కేంద్రపాలిత ప్రాంతాలు ఒకటో తరగతిలోకి ఆరేళ్లు నిండిన విద్యార్థులకు మాత్రమే ప్రవేశం కల్పించాలి. ఇందుకు అనుగుణంగా ప్రవేశ ప్రక్రియ నిబంధనల్లో సవరణలు చేయాలి. 

అలాగే రాష్ట్ర ప్రభుత్వాలు తమ పరిధిలో ప్రీ స్కూల్‌ విద్యార్థులకు తగిన విధంగా బోధించే టీచర్లను తయారుచేయడానికి వీలుగా ప్రీ స్కూల్‌ ఎడ్యుకేషన్‌లో రెండేళ్ల డిప్లొమా కోర్సును రూపొందించి, అమలుచేయాలి. ఈ కోర్సును స్టేట్‌ కౌన్సిల్‌ ఆఫ్‌ ఎడ్యుకేషన్‌ రీసెర్చ్‌ అండ్‌ ట్రైనింగ్‌ (ఎస్‌సీఈఆర్‌టీ) ద్వారా రూపొందించి, డిస్ట్రిక్ట్‌ ఇన్‌స్టిట్యూట్‌ ఆఫ్‌ ఎడ్యుకేషన్‌ అండ్‌ ట్రైనింగ్‌ల (డైట్‌) ద్వారా అమల్లో పెట్టాలి. ఈ కార్యక్రమాన్ని ఎస్‌సీఈఆర్‌టీ పర్యవేక్షణలో నిర్వహించాలి’’ అని కేంద్ర విద్యాశాఖ రాష్ట్రాలకు సూచించింది.

Viveka Murder Case: వివేకా రాజకీయాలు అవినాష్‌ రెడ్డి, భాస్కర్‌ రెడ్డికి నచ్చలేదు అందుకే: సీబీఐ


హైదరాబాద్: మాజీ మంత్రి వివేకా హత్య కేసులో నిందితుడు సునీల్‌ యాదవ్‌ బెయిల్‌ పిటిషన్‌పై తెలంగాణ హైకోర్టులో సీబీఐ కౌంటర్‌ దాఖలు చేసింది. ఈ కేసుకు సంబంధించి పలు కీలక అంశాలను కౌంటర్‌లో సీబీఐ పేర్కొంది.

‘‘వైఎస్‌ అవినాష్ రెడ్డి, భాస్కర్‌రెడ్డి, శివశంకర్‌రెడ్డితో వివేకాకు రాజకీయ వైరుధ్యం పెరిగింది. ఎంపీ టికెట్ అవినాష్‌కు బదులుగా తనకు ఇవ్వాలని వివేకా కోరుకున్నారు. తనకు ఇవ్వకపోయినా షర్మిల, విజయమ్మకు ఇవ్వాలని పట్టుబట్టారు. 

ఈ విషయంలో వివేకా రాజకీయ కదలికలు అవినాష్‌ రెడ్డి, భాస్కర్‌ రెడ్డికి నచ్చలేదు. శివశంకర్‌రెడ్డితో కలిసి అవినాష్‌ రెడ్డి, భాస్కర్‌రెడ్డి.. వివేకా హత్యకు కుట్ర పన్నినట్లు తెలుస్తోంది. దీంతో వివేకాను సునీల్‌ యాదవ్‌ ఇతర నిందితులతో కలిసి హత్య చేశాడు. హత్య జరిగిన రోజు రాత్రి వైఎస్‌ అవినాష్‌రెడ్డి, భాస్కర్‌రెడ్డి ఇంటికి సునీల్‌ యాదవ్‌ వెళ్లాడు. 
ఐదుగురితో కలిసి అవినాష్‌రెడ్డి హత్యాస్థలానికి వెళ్లారు. వివేకా గుండెపోటుతో చనిపోయారని సీఐకి సమాచారం ఇచ్చారు. హత్యను ఉద్దేశపూర్వకంగానే దాచిపెట్టాలని ప్రయత్నించినట్లు తెలుస్తోంది. కుట్రలో భాగంగానే గుండెపోటు, విరేచనాల కథ అల్లినట్లు కనిపిస్తోంది. నిందితులు హత్య జరిగిన స్థలాన్ని శుభ్రం చేశారు. వివేకా శరీరంపై ఉన్న గాయాలు కనిపించకుండా బ్యాండేజ్‌ కట్టారు’’ అని కోర్టుకు సమర్పించిన కౌంటర్‌లో సీబీఐ పేర్కొంది.

ఉమ్మడి జిల్లాలో రైలు పట్టాలపై 145 మరణాలు
ప్రమాదాల కంటే బలవన్మరణాలే ఎక్కువ
 కృష్ణా రైల్వేస్టేషను పరిధి చేగుంట వద్ద గతేడాది డిసెంబరు 24న ఓ ప్రేమజంట రైలు కింద పడి ఆత్మహత్యకు పాల్పడింది. పెద్దలు పెళ్లికి అంగీకరించరని వారు బలవన్మరణానికి పాల్పడటం ఇరు కుటుంబాల్లో విషాదం నింపింది.

పాఠశాలకు సక్రమంగా వెళ్లమని, పరీక్షల్లో ఎందుకు తక్కువ మార్కులు వచ్చాయని తల్లి మందలించడంతో డిసెంబరు 7న హన్వాడ మండలానికి చెందిన ఓ బాలుడు రైలు కిందపడి ఆత్మహత్యకు పాల్పడ్డాడు. ఒక్కగానొక్క కుమారుడు మృతిచెందటం తల్లికి తీరని శోకాన్ని మిగిల్చింది.

మహబూబ్‌నగర్‌ పట్టణం బండమీదిపల్లి పాలిటెక్నిక్‌ కళాశాల వద్ద రైలు పట్టాల పక్క నుంచి నడుచుకుంటూ వెళ్తున్న యాదగిరి(57) అనే ప్రభుత్వ ఉద్యోగి అక్టోబరు 21న రైలు ఢీకొని మృతిచెందాడు.

ఎంత పెద్ద సమస్య అయినా తప్పక పరిష్కారం ఉంటుంది. పెద్దలు, మిత్రుల సమక్షంలో చర్చించి దానికి మార్గం అన్వేషించాలే తప్ప తొందరపాటు నిర్ణయాలు తీసుకోవద్దు. కానీ చాలా మంది యువతీ యువకులు క్షణికావేశంతో తమ ప్రాణాలు తీసుకుంటున్నారు. ఇందుకు రైలుపట్టాలను వేదిక చేసుకోవటం అందరినీ తీవ్ర ఆందోళనకు, ఆవేదనకు గురిచేస్తోంది. మహబూబ్‌నగర్‌ రైల్వే పోలీసు స్టేషను పరిధిలో ఏడాది కాలంగా రైల్వే ప్రమాదాలు, బలవన్మరణాల సంఖ్య చాలా పెరిగిన నేపథ్యంలో Streetbuzz ప్రత్యేక కథనం.

పూర్వ మహబూబ్‌నగర్‌ జిల్లా పరిధి తిమ్మాపూర్‌(ప్రస్తుతం రంగారెడ్డి జిల్లా) నుంచి గద్వాల జిల్లాలోని జోగులాంబ హాల్టు వరకు, వాడి మార్గంలో నారాయణపేట జిల్లా కృష్ణా మండలంలోని కొన్ని గ్రామాలు మహబూబ్‌నగర్‌ రైల్వే పోలీసుస్టేషన్‌ పరిధిలోకి వస్తాయి. దాదాపు 250 కి.మీ.లకు పైగా పొడవైన రైలుమార్గం ఉంది. దీని పరిధిలో 2022లో రైలుపట్టాలపై ఆత్మహత్యలు, ప్రమాదాల్లో కలిపి 129 మంది చనిపోయారు. ఇందులో 76 ఆత్మహత్యలు కాగా 53 ప్రమాద మరణాలు. 2023లో ఇప్పటివరకు 7 ఆత్మహత్యలు, 9 ప్రమాద మరణాలు జరిగాయి. 14 నెలల్లో ప్రమాదాల కంటే ఆత్మహత్యలే ఎక్కువగా ఉండటం కలచివేసే అంశం. పెద్దలు మందలించారని, ప్రేమ విఫలమైందని, ఉద్యోగం రాలేదని, జబ్బు నయం కాలేదని ఆత్మహత్యలకు పాల్పడుతున్నారు. ముఖ్యంగా చరవాణిలో మాట్లాడుతూ పట్టాలు దాటి, మూలమలుపుల్లో రైలు రాకను పసిగట్టక ప్రమాదానికి గురై చనిపోతున్నారు.

ఢిల్లీ మేయర్ ఎన్నికల్లో ఆప్ విజయం.. బాధ్యతలు చేపట్టనున్న షెల్లీ ఒబెరాయ్


దేశ రాజధాని ఢిల్లీ మేయర్‌ పదవిని ఆమ్‌ ఆద్మీ పార్టీ సొంతం చేసుకుంది. మేయర్‌ ఎన్నికల్లో ఆప్ విజయం సాధించింది. బీజేపీపై ఆప్‌ 34 ఓట్ల ఆధిక్యంతో విజయం సాధించింది. దీంతో, బీజేపీకి ఊహించని షాక్‌ తగిలినట్టు అయ్యింది. హోరాహోరీగా సాగిన ఎన్నికల తర్వాత 34 ఓట్ల తేడాతో బీజేపీ అభ్యర్థి రేఖా గుప్తాను ఓడించి ఆమ్ ఆద్మీ పార్టీకి చెందిన షెల్లీ ఒబెరాయ్ ఢిల్లీ కొత్త మేయర్‌గా నియమితులు కానున్నట్లు అధికారులు బుధవారం ప్రకటించారు. ఈ నేపథ్యంలో షెల్లీ ఒబెరాయ్ ఢిల్లీ కొత్త మేయర్‌గా బాధ్యతలు చేపట్టనున్నారు. అనంతరం, ఆప్‌ నేతలు ఒబెరాయ్‌కు అభినందనలు తెలిపారు. ఈ సందర్బంగా ఢిల్లీ డిప్యూటీ సీఎం మనీష్‌ సిసోడియా మాట్లాడుతూ.. ప్రజాస్వామ్యమే గెలిచిందన్నారు.

షెల్లీ ఒబెరాయ్‌(39).. గతంలో ఢిల్లీ యూనివర్సిటీలో అసిస్టెంట్‌ ప్రొఫెసర్‌గా పని చేశారు. ఢిల్లీ స్థానిక సంస్థల ఎన్నికల్లో మొట్టమొదటిసారిగా ఆమె కౌన్సిలర్‌గా గెలిచారు. పశ్చిమ ఢిల్లీ ఈస్ట్‌ పటేల్‌ నగర్‌ నుంచి ఆమె నెగ్గారు. ఇండియన్‌ కామర్స్‌ అసోషియేషన్‌లో లైఫ్‌టైం మెంబర్‌గా ఉన్నారు. ఇందిరా గాంధీ ఓపెన్‌ యూనివర్సిటీ నుంచి ఆమె స్కూల్‌ మేనేజ్‌మెంట్‌ స్టడీస్‌లో పీహెచ్‌డీ చేశారు. ఐసీఏ కాన్ఫరెన్స్‌ నుంచి గోల్డ్‌ మెడల్‌ను అందుకున్నారు. పలు దేశీయ, అంతర్జాతీయ సదస్సుల నుంచి ప్రశంసలు సైతం దక్కించుకున్నారు.

ఎన్నికల్లో మూడుసార్లు విఫలయత్నాల తర్వాత, సుప్రీంకోర్టులో ఆప్‌కి అనుకూలంగా తీర్పు వచ్చిన తర్వాత బుధవారం ఓటింగ్ జరిగింది. డిసెంబరులో పౌర ఎన్నికలు జరిగినప్పటి నుండి, ఆప్, బీజేపీల మధ్య సుదీర్ఘ వాగ్వాదాల మధ్య మేయర్ ఎన్నికలు మూడుసార్లు వాయిదా పడ్డాయి. లెఫ్టినెంట్ గవర్నర్ నామినేట్ చేసిన 10 మంది సభ్యులను ఎన్నికల్లో ఓటు వేసేందుకు అనుమతించారన్న బీజేపీ వాదనను సవాలు చేస్తూ ఆప్ అభ్యర్థి షెల్లీ ఒబెరాయ్ సుప్రీంకోర్టును ఆశ్రయించారు. భారత ప్రధాన న్యాయమూర్తి జస్టిస్ డీవై చంద్రచూడ్ నేతృత్వంలోని న్యాయమూర్తులు నామినేటెడ్ సభ్యులు ఎన్నికల్లో ఓటు వేయరాదని చెప్పారు. “నామినేటెడ్ సభ్యులు ఎన్నికలకు వెళ్లలేరు. రాజ్యాంగ నిబంధన చాలా స్పష్టంగా ఉంది” అని కోర్టు పేర్కొంది. మేయర్, డిప్యూటీ మేయర్ ఎన్నిక అనంతరం ఆరుగురు స్టాండింగ్ కమిటీ సభ్యులను ఎన్నుకుంటారు. స్టాండింగ్ కమిటీకి జరిగిన ఎన్నికల్లో ఆప్‌కి మూడు, బీజేపీకి రెండు సీట్లు వచ్చే అవకాశం ఉంది. ఆరో సీటుపై పోరు నెలకొంది.

పాతబస్తీకి ఓటు వేసేందుకు అనుమతిస్తే, బీజేపీ బలం 113 నుంచి 123కి చేరి ఉండేది. 274 మంది సభ్యుల సభలో ఆప్‌కు 150 ఓట్లు ఉన్నాయి. ఇక్కడ మెజారిటీ మార్క్ 138గా ఉంది. కనుక ఇది మేయర్ ఎన్నికల ఫలితాలను ప్రభావితం చేయనప్పటికీ, పౌర సంఘంలో అత్యంత శక్తివంతమైన పార్టీగా స్టాండింగ్ కమిటీలో బీజేపీ కీలకమైన భాగాన్ని కైవసం చేసుకోగలిగింది. ఈ ఎన్నికకు తాము దూరంగా ఉంటామని కాంగ్రెస్ ప్రకటించింది. మేయర్ కోసం ఎలక్టోరల్ కాలేజీలో 250 మంది ఎన్నికైన కౌన్సిలర్లు, ఏడుగురు లోక్‌సభ, ముగ్గురు రాజ్యసభ ఎంపీలు, 14 మంది ఎమ్మెల్యేలు ఉన్నారు. ఢిల్లీ అసెంబ్లీ స్పీకర్ 13 మంది ఆప్ ఎమ్మెల్యేలను, ఒక బీజేపీ సభ్యుడిని పౌరసంఘానికి నామినేట్ చేశారు.

గత సంవత్సరం ఎంసీడీ విలీనం, నియోజకవర్గాల రీడ్రాయింగ్ తర్వాత జరిగిన మొదటి మున్సిపల్ ఎన్నికల్లో 250 వార్డులలో 134 వార్డులను ఆప్‌ గెలుచుకుంది. 15 ఏళ్ల పాటు పౌరసరఫరాల శాఖను నియంత్రించిన బీజేపీ రెండో స్థానంలో నిలిచింది. ఢిల్లీ ప్రభుత్వాన్ని సంప్రదించకుండా లెఫ్టినెంట్ గవర్నర్ వీకే సక్సేనా 10 మంది ఆల్డర్‌మెన్‌ల పేర్లను పేర్కొనడంపై ఆప్ గతంలో అభ్యంతరం వ్యక్తం చేసింది. నామినేట్ చేయబడిన 10 మంది ఆల్డర్‌మెన్ ప్రమాణం చేయడం, వారి ఓటింగ్‌పై సందిగ్ధం వల్ల మూడుసార్లు మేయర్ ఎన్నిక నిలిచిపోయింది. సుప్రీంకోర్టు విచారణకు అనుగుణంగా ఎన్నికలను నాలుగోసారి వాయిదా వేశారు. ఈ సారి ఎన్నిక జరగడంతో ఆప్ మేయర్‌ సీటును సొంతం చేసుకుంది.

TTD: ఆర్జిత సేవా టికెట్ల కోసం పోటెత్తిన భక్తులు.. తితిదే వెబ్‌సైట్‌ సర్వర్‌ డౌన్‌


తిరుమల: ఆన్‌లైన్‌లో తిరుమల శ్రీవారి ఆర్జిత సేవాటికెట్ల జారీకి సంబంధించి బుధవారం సాంకేతిక సమస్యలు తలెత్తడంతో భక్తులు ఇబ్బందులు ఎదుర్కొన్నారు..

మార్చి, ఏప్రిల్‌, మే నెలలకు సంబంధించిన కల్యాణోత్సవం, ఊంజల్‌ సేవ, ఆర్జిత బ్రహ్మోత్సవం, సహస్ర దీపాలంకరణ సేవల టికెట్లను ఈరోజు సాయంత్రం 4గంటలకు తితిదే ఆన్‌లైన్‌లో విడుదల చేసింది. 

ఈ టికెట్ల కోసం తితిదే అధికారిక వెబ్‌సైట్‌లో ప్రవేశించిన భక్తులు.. టికెట్లు బుక్‌ చేసుకోవడంలో తీవ్ర ఇబ్బందులు ఎదుర్కొన్నారు. ముఖ్యంగా వెబ్‌సైట్‌ తరచూ హ్యాంగ్‌ అవడం, ఓపెన్‌ కాకపోవడంతో తీవ్ర ఇబ్బందులు పడ్డారు.

బ్యాంకు మీ మ్యుటిలేటెడ్ నోట్లను మార్చకపోతే, 14440కి మిస్డ్ కాల్ ఇవ్వండి


 మ్యుటిలేటెడ్ నోట్లను మార్చుకోవడానికి ఏ బ్యాంకు కూడా వెనుకాడదు. బ్యాంకు నోటు మార్చుకోకుంటే ఆర్‌బీఐ టోల్ ఫ్రీ నంబర్ 14440కి మిస్డ్ కాల్ ఇవ్వవచ్చని రిజర్వ్ బ్యాంక్ ఆఫ్ ఇండియా (ఆర్‌బీఐ) ఆదేశాలు జారీ చేసింది. సంబంధిత అధికారిపై ఆర్‌బీఐ చర్యలు తీసుకుంటుంది. బ్యాంకులో డబ్బులు జమ చేసేందుకు వచ్చే వారు కూడా చిరిగిన నోట్లను తీసుకురావడం తరచుగా బ్యాంకులో కనిపిస్తూనే ఉంది.

బ్యాంకులో నోట్లను డిపాజిట్ చేసేందుకు నిరాకరించారు. కొన్ని కారణాల వల్ల డిపాజిట్లు తీసుకున్నా, ఆ నోట్లను డబ్బు తీసుకున్న వ్యక్తికి అందజేస్తారు. బ్యాంకులో వచ్చే ప్రతి నోటును తనిఖీ చేయడం మరియు మ్యుటిలేటెడ్ నోట్లను వేరు చేయడం RBI మార్గదర్శకం. వాటిని డ్రాయర్‌కి ఇవ్వకూడదు.

నోటు మార్పిడికి అయిష్టతపై మిస్డ్ కాల్ ఇచ్చినప్పుడు, RBI అధికారులు సంబంధిత కాలర్ నుండి సమాచారం తీసుకుని, నోటును మార్చుకోమని సంబంధిత బ్యాంకుకు సూచిస్తారు. డిస్ట్రిక్ట్ లీడింగ్ బ్యాంక్ (ఎల్‌డిఎం) మేనేజర్ విశాల్ దీక్షిత్ మాట్లాడుతూ మ్యుటిలేటెడ్ నోట్లను మార్చడంపై ఆర్‌బిఐ సీరియస్‌గా ఉందన్నారు.

RBI గైడ్ లైన్
 ఒక నోటు నాలుగు ముక్కలుగా ఉంది, నోటులోని ఒక ముక్క లేదు మరియు నోటుపై నంబర్ ముద్రించబడింది. అలాంటి నోట్లను బ్యాంకు మార్పిడి చేస్తుంది. చాలా పాత మరియు బెంట్ నోట్లు బ్యాంకు ద్వారా మార్పిడి చేయబడతాయి. ఐదు ముక్కల నోట్లు, కాలిపోయిన నోట్లు వాటి నంబర్లు కనిపించవు. అటువంటి నోటును కలిగి ఉన్న వ్యక్తిని బ్యాంక్ సమీపంలోని RBI కార్యాలయానికి పంపుతుంది. అక్కడ నోటును తనిఖీ చేసి, ఆ నోటు సరైనదైతే, బ్యాంకులో డిపాజిట్ చేయమని అడుగుతారు.

Andhra News: వాచిపోయిన చేతులు చూపించిన పట్టాభి.. జడ్జి ముందు హాజరుపర్చిన పోలీసులు


గన్నవరం: తెదేపా(TDP) జాతీయ అధికార ప్రతినిధి కొమ్మారెడ్డి పట్టాభిరామ్‌,(pattabhi) దొంతు చిన్నా, గురుమూర్తి సహా అరెస్టు చేసిన 11 మంది తెలుగుదేశం నేతలను గన్నవరం (Gannavaram) కోర్టుకు తీసుకువచ్చారు..

స్థానిక అదనపు జూనియర్‌ సివిల్‌ జడ్జి కోర్టులో న్యాయమూర్తి ఎదుట వారిని పోలీసులు హాజరుపర్చారు. కోర్టుకు వెళ్తూ పట్టాభి వాచిపోయిన చేతులు చూపించారు. చేతులు కమిలిపోయాయని చూపిస్తూ కోర్టు లోపలికి వెళ్లారు. కృష్ణా జిల్లా గన్నవరంలో నిన్న జరిగిన ఘటనల నేపథ్యంలో పట్టాభితో పాటు తెదేపా నేతలను అరెస్టు చేసిన విషయం తెలిసిందే. 

గన్నవరం పీఎస్‌లోనే తెదేపా నేతలకు వైద్యపరీక్షలు నిర్వహించిన అనంతరం కోర్టులో హాజరుపర్చారు. పోలీసులు తన భర్త పట్టాభిరామ్‌ను దారుణంగా హింసించారని ఆయన భార్య చందన ఆరోపించారు. ఉన్నతాధికారుల సహకారంతోనే ఇదంతా జరిగిందని విమర్శించారు. తోట్లవల్లూరు పీఎస్‌లో తన భర్తను ముసుగు ధరించిన ముగ్గురు కొట్టారని ఆగ్రహం వ్యక్తం చేశారు. పట్టాభి ఇంత ఆందోళనగా ఎప్పుడూ కనిపించలేదన్నారు. 

తెదేపా నేతలను కోర్టుకు తరలించే క్రమంలో గన్నవరం పోలీస్‌ స్టేషన్‌ వద్ద తెలుగుదేశం శ్రేణులు నిరసనకు దిగారు. పోలీసుల ఆంక్షలు ఛేదించుకుని కేశినేని చిన్ని, వెనిగండ్ల రాము ఆధ్వర్యంలో తెలుగుదేశం కార్యకర్తలు పీఎస్‌కు చేరుకుని ప్రభుత్వానికి వ్యతిరేకంగా నినాదాలు చేశారు. అక్రమ కేసులు వెంటనే ఉప సంహరించుకోవాలని డిమాండ్‌ చేశారు. మాజీ ఎమ్మెల్యే రావి వెంకటేశ్వరరావు గన్నవరం కోర్టు వద్దకు చేరుకున్నారు.

ఏపీ: కొత్త గవర్నర్‌ జస్టిస్‌ అబ్దుల్‌ నజీర్‌ ప్రమాణానికి ముహూర్తం ఖరారు


కృష్ణా: ఆంధ్రప్రదేశ్‌ నూతన గవర్నర్‌గా జస్టిస్‌ అబ్దుల్‌ నజీర్‌ను కేంద్రం నియమించిన సంగతి తెలిసిందే. ఈ నెల 24వ తేదీన గవర్నర్‌గా ఆయన బాధ్యతలు చేపట్టనున్నారు..

ఈ మేరకు కొత్త గవర్నర్‌ ప్రమాణ స్వీకారానికి ఏర్పాట్లు చేస్తున్నట్లు రాజ్‌భవన్‌ వర్గాలు వెల్లడించాయి. 

మరోవైపు రేపు(బుధవారం) అబ్దుల్‌ నజీర్‌, ఏపీకి రానున్నారు. సతీసమేతంగా సాయంత్రం ఢిల్లీ ఎయిర్ పోర్టు నుంచి బయలుదేరి గన్నవరం ఎయిర్ పోర్టుకి చేరుకుంటారాయన.