NLG: ఈ నెల 20న అయోధ్యకు ప్రత్యేక రైలు 
నల్లగొండ: అయోధ్యలో శ్రీరాముడిని దర్శించుకోవడానికి నల్లగొండ పార్లమెంట్ పరిధిలోని భక్తుల కోసం, ఈ నెల 20న ప్రత్యేక రైలు ను ఏర్పాటు చేసినట్లు, బిజెపి నల్లగొండ కన్వీనర్ బండారు ప్రసాద్ ఒక ప్రకటనలో తెలిపారు. అయోధ్యకు వెళ్ళాలనుకునే వారు సొంత ఖర్చులతో భువనగిరి స్టేషన్ కు 20న మధ్యాహ్నం 2 గం.ల వరకు చేరుకోవాలని, ఒక వ్యక్తికి రూ.1340/- టికెట్ చార్జి అని, బిజెపి ఆధ్వర్యంలో వసతి సౌకర్యం కల్పిస్తామని అన్నారు.

 NLG:  నేడు  పిఎం విశ్వకర్మ యోజన పై అవగాహన సదస్సు 
నల్లగొండ: పిఎం విశ్వకర్మ యోజన పై ఈరోజు ఉదయం 10 గంటలకు కలెక్టరేట్ లోని ఉదయాదిత్య భవన్లో అవగాహన సదస్సు నిర్వహిస్తున్నట్లు జిల్లా కలెక్టర్ హరిచందన ఒక ప్రకటనలో తెలిపారు. 
ఈ సదస్సుకు జిల్లా వ్యాప్తంగా అన్ని మండలాల నుండి 18 రకాల చేతివృత్తుల వారు హాజరు కావాలని కోరారు. విశ్వకర్మ సంఘం నాయకులు ఈ సదస్సు గురించి సంఘ సభ్యులకు తెలియజేసి సదస్సుకు హాజరయ్యేలా చూడాలని సూచించారు.

NLG: ప్రయాణీకులు సహకరించాలి: ఆర్టీసీ అసిస్టెంట్ మేనేజర్
దేవరకొండ: ఆర్టీసీ డిపో నుండి మేడారం జాతరకు 61 బస్సులు జాతర స్పెషల్ డ్యూటీకి వెళ్తున్నందున, ఈ నెల 18 నుండి 25వ తేదీ వరకు డిపోలో బస్సుల కొరత ఏర్పడనుందని అసిస్టెంట్ మేనేజర్ భారతీ భాయి తెలిపారు. డిపో ఆవరణలో ఆమె మాట్లాడుతూ.. డిపో పరిధిలో ప్రయాణీకులు గమనించి సహకరించాలని కోరారు.

NLG: నిరుపేదలకు  ప్రభుత్వ భూములు పంపిణీ చేయాలి: తెలంగాణ వ్యవసాయ కార్మిక సంఘం రాష్ట్ర అధ్యక్షులు నాగయ్య
నల్లగొండ: భూమిలేని నిరుపేదలకు ప్రభుత్వ భూములు పంపిణీ చేయాలని జరుగు పోరాటాలకు ప్రజలు సిద్ధం కావాలని, తెలంగాణ వ్యవసాయ కార్మిక సంఘం రాష్ట్ర అధ్యక్షులు నాగయ్య  పిలుపునిచ్చారు. పట్టణంలోని దొడ్డి కొమరయ్య భవన్లో తెలంగాణ వ్యవసాయ కార్మిక సంఘం జిల్లా ఆఫీస్ బ్యారియర్స్ సమావేశాన్ని నిర్వహించారు. కార్యక్రమంలో సంఘ నాయకులు కంబాలపల్లి ఆనంద్, తదితరులు పాల్గొన్నారు.

TS: డ్వాక్రా మహిళలకు శుభవార్త చెప్పిన రాష్ట్ర ప్రభుత్వం 
భద్రాచలం: డ్వాక్రా మహిళలకు తెలంగాణ ప్రభుత్వం శుభవార్త చెప్పింది. రాష్ట్రంలో గత కొన్నేళ్లుగా నిలిపివేసిన డ్వాక్రా మహిళలకు రుణాలను తిరిగి ప్రారంభిస్తామని ఉప ముఖ్యమంత్రి మల్లు భట్టి విక్రమార్క తెలిపారు. భద్రాచలంలోని ఐటీడీఏ కార్యాలయంలో జరిగిన పాలకమండలి సమావేశంలో డిప్యూటీ సీఎంతో పాటు మంత్రులు కోమటిరెడ్డి వెంకటరెడ్డి, తుమ్మల నాగేశ్వరరావు పాల్గొన్నారు. 
భద్రాద్రి కొత్తగూడెం, ఖమ్మం, మహబూబాబాద్‌, ములుగు జిల్లాల ప్రజాప్రతినిధులు హాజరుకాగా.. ఐటీడీఏ పరిధిలోని గిరిజనుల అభివృద్ధి కార్యాచరణపై చర్చించారు. ఈ సందర్భంగా భట్టి విక్రమార్క మాట్లాడుతూ.. గత నాలుగేళ్లుగా ఐటీడీఏలో పాలకమండలి సమావేశం జరగలేదని, ఇప్పటి నుంచి ప్రతి 3 నెలలకు ఒకసారి సమావేశం నిర్వహిస్తామని చెప్పారు.
‘‘భద్రాచలం సీతారామచంద్రస్వామి ఆలయం సాక్షిగా డ్వాక్రా మహిళలకు తీపి కబురు చెబుతున్నాం. ఇప్పటికే మహిళలకు పెద్దపీట వేసి, ఉచిత బస్సు ప్రయాణ సౌకర్యం కల్పించాం. త్వరలో డ్వాక్రా మహిళలందరికీ వడ్డీలేని రుణాలు అందిస్తాం. చాలా కాలం నుంచి నెలనెలా జీతాలు రాక ఇబ్బందులు పడుతున్నామని ఆశా వర్కర్లు నా దృష్టికి తెచ్చారు. వారికి జీతాలు అందే విధంగా కృషి చేస్తా’’ అని తెలిపారు.

NLG:  శ్రీ అభయాంజనేయ స్వామి దేవాలయ నిర్మాణానికి విరాళం అందించిన మంత్రి కోమటిరెడ్డి 


  


నల్లగొండ: పట్టణంలోని హనుమాన్ నగర్ లో నూతనంగా నిర్మించే, శ్రీ శ్రీ అభయాంజనేయ స్వామి దేవాలయ నిర్మాణానికి మంత్రి కోమటిరెడ్డి వెంకట్ రెడ్డి, నేడు 10 లక్షల రూపాయల విరాళం ను  మున్సిపల్ చైర్మన్ బుర్రి శ్రీనివాస్ రెడ్డి, కాంగ్రెస్ పార్టీ పట్టణ అధ్యక్షులు గుమ్ముల మోహన్ రెడ్డి, మున్సిపల్ వైస్ చైర్మన్ అబ్బగోని రమేష్ గౌడ్ ద్వారా ఆలయ కమిటీ సభ్యులకు అందజేశారు.
18 అడుగుల హనుమాన్ విగ్రహం కూడా మంత్రి కోమటిరెడ్డి వెంకట్ రెడ్డి ఇప్పించడం జరిగింది. ఈ కార్యక్రమంలో కమిటీ చైర్మన్ భైరగోని రాజా గౌడ్, జడ్పీటీసీ వంగూరి లక్ష్మయ్య, కౌన్సిలర్ కేసాని వేణుగోపాల్ రెడ్డి, గుండెబోయిన వెంకటేశ్వర్లు, తదితరులు పాల్గొన్నారు.

NLG: కౌంటింగ్ కేంద్రంలో అన్ని ఏర్పాట్లు పూర్తి చేయాలి: కలెక్టర్ హరిచందన 


  


నల్లగొండ: రానున్న పార్లమెంట్ ఎన్నికల నేపథ్యంలో, తిప్పర్తి మండలం అనిశెట్టి దుప్పలపల్లి లో ఉన్న గోదాములో ఏర్పాటు చేయనున్న ఎన్నికల కౌంటింగ్ కేంద్రంలో, అవసరమైన అన్ని ఏర్పాట్లు చేయాలని జిల్లా కలెక్టర్, జిల్లా ఎన్నికల అధికారి హరిచందన అధికారులను ఆదేశించారు. శనివారం జిల్లా రెవెన్యూ అదనపు కలెక్టర్ శ్రీనివాస్, సంబంధిత అధికారులతో కలిసి కౌంటింగ్ కేంద్రాన్ని పరిశీలించారు. 
ఇక్కడ ఏర్పాటు చేసే కౌంటింగ్ కేంద్రంలో 7 నియోజకవర్గాలకు సంబంధించి కౌంటింగ్ నిర్వహిస్తున్న విషయం తెలిసిందే ఇందులో భాగంగా స్ట్రాంగ్ రూములను సైతం ఈ కేంద్రంలోనే ఏర్పాటు చేయనున్నారు. ఇదివరకే 6 స్ట్రాంగ్ రూములు ఉండగా మరో స్ట్రాంగ్ రూమును ఏర్పాటు చేయాలని పంచాయతీరాజ్ అధికారులను జిల్లా కలెక్టర్ ఆదేశించారు. 
ఈ కార్యక్రమంలో అడిషనల్ ఎస్పీ రాములు నాయక్, సర్వే ల్యాండ్ రికార్డ్స్ అసిస్టెంట్ డైరెక్టర్ శ్రీనివాసులు, పంచాయతీరాజ్ డిఈ నాగయ్య, ట్రాన్స్కో  
అధికారులు, తదితరులు పాల్గొన్నారు 

సూర్యాపేట జిల్లాలో మరో గురుకుల పాఠశాల విద్యార్థిని మృతి
సూర్యాపేట: ఇమాంపేట ఎస్సీ బాలికల గురుకుల పాఠశాలకు చెందిన ఓ విద్యార్థిని మృతి చెందిన ఘటన మరువకముందే, మరో విద్యార్థిని శనివారం ఫిబ్రవరి 17న చనిపోయింది.  పదవ తరగతి విద్యార్థిని, స్వగ్రామం మోతే మండలం, బురకచర్ల గ్రామం కాగా, హైదరాబాదులో తల్లి దగ్గరకు వెళ్ళింది. తల్లి పనికి వెళ్ళినప్పుడు ఇంటి వద్ద ఉరి వేసుకొని చనిపోయింది. బాలిక మృతి పట్ల పూర్తి వివరాలు తెలియాల్సి ఉంది.

NLG: రాష్ట్రస్థాయి కరాటే పోటీల్లో గోల్డ్ మెడల్ సాధించిన  జేబిఎస్ ప్రభుత్వ పాఠశాల విద్యార్థిని 
నల్గొండ: జపాన్ కరాటే అసోసియేషన్ ఆధ్వర్యంలో ఇటీవల నిర్వహించిన రాష్ట్రస్థాయి షోటోకాన్ మార్షల్ ఆర్ట్స్ ఛాంపియన్ షిప్ పోటీల్లో.. పట్టణంలోని జేబీఎస్ హైస్కూల్లో, 6వ తరగతి చదువుతున్న జిడ్డి నాగేశ్వరి 'కటా విభాగం'లో అత్యున్నత ప్రతిభను కనబరిచి, రాష్ట్రస్థాయిలో గోల్డ్ మెడల్ తో పాటు స్పోర్ట్స్ సర్టిఫికెట్స్ కూడా సాధించిందని పాఠశాల ప్రధానోపాధ్యాయులు
నిమ్మల నిర్మల్ రెడ్డి తెలిపారు. ఈ సందర్భంగా విద్యార్థిని ఉపాధ్యాయులు అభినందించారు.
ఈ సందర్భంగా ఈరోజు పాఠశాల ప్రార్థన సమయంలో ఆయన మాట్లాడుతూ.. జేబీఎస్ ఉన్నత పాఠశాలలో విద్యార్థినీ విద్యార్థులు చదువుతోపాటు అన్ని రంగాల్లో రాణించడానికి ఉపాధ్యాయులందరూ సమిష్టిగా కృషి చేస్తున్నారని తెలియజేస్తూ విద్యార్థిని నాగేశ్వరి ని ఉపాధ్యాయులు విద్యార్థులు అందరూ కలిసి ప్రత్యేకంగా అభినందించి శుభాకాంక్షలు తెలిపారు.

NLG: SVEEP పై అవగాహన సదస్సు
నల్లగొండ: స్థానిక నాగార్జున ప్రభుత్వ కళాశాల నందు రాజనీతి శాస్త్రం మరియు జిల్లా ఎన్నికల విభాగాల సంయుక్త ఆధ్వర్యంలో SVEEP ఓటరు అవగాహన సదస్సు నిర్వహించారు. ముఖ్య అతిథిగా జిల్లా కలెక్టర్ హరి చందన దాసరి హాజరై విద్యార్థులను ఉద్దేశించి మాట్లాడుతూ.. ప్రతి 18 సంవత్సరాలు నిండిన విద్యార్థినీ విద్యార్థులు ఓటరుగా నమోదు చేసుకోవాలని, వివిధ స్థాయిలలో జరిగే ఎన్నికలలో నిష్పక్షపాతంగా, నిజాయితీగా, ఓటు హక్కును ఉపయోగించుకోవాలని, ఓటరు చైతన్యమే ప్రజాస్వామ్య వ్యవస్థను బలోపేతం చేస్తుందని సూచించారు. 
జిల్లా అడిషనల్ కలెక్టర్ శ్రీనివాస్ మాట్లాడుతూ.. ప్రజాస్వామ్యంలో ప్రతి ఒక్కరూ ఎన్నికల ప్రక్రియ పై అవగాహన పెంచుకోవాలని ఓటింగ్ శాతాన్ని పెంచేందుకు కృషి చేయాలని కోరారు. 
జిల్లా పరిషత్ సీఈవో మరియు SVEEP నోడల్ ఆఫీసర్ ప్రేమ్ కరణ్ రెడ్డి మాట్లాడుతూ.. విద్యార్థిని విద్యార్థులు ఎలాంటి ప్రలోభాలకు లోను కాకుండా ఓటు హక్కును ఉపయోగించుకోవాలని తెలుపుతూ విద్యార్థినీ విద్యార్థులు అందరి చేత "ఓటరు ప్రతిజ్ఞ" చేయించారు. 
ఈ కార్యక్రమానికి కళాశాల ప్రిన్సిపాల్ సముద్రాల ఉపేందర్ అధ్యక్షత వహించగా, వైస్ ప్రిన్సిపల్ సయ్యద్ మునీర్, రాజనీతి శాస్త్ర విభాగాధిపతి ఎస్.యాదగిరి, అధ్యాపకులు ఈ. యాదగిరి రెడ్డి, ఎన్. వేణు, ఏ మల్లేష్, లక్ష్మణ్ గౌడ్, నారాయణరావు, ప్రవీణ్ రెడ్డి, తిరుమలేష్, కళాశాల ఫిజికల్ డైరెక్టర్ కే. మల్లేష్, బాలరాజు, శ్రీనివాస్ రెడ్డి, డిఆర్డిఏ ఏపిఎం అరుణ్ కుమార్ మరియు ఇతర అధ్యాపకులు విద్యార్థినీ విద్యార్థులు పాల్గొన్నారు.