StreetBuzz మళ్లీ హంగ్‌ తప్పదా..? Yadagiri Goud

May 10 2023, 21:33

మళ్లీ హంగ్‌ తప్పదా..?

కర్ణాటక అసెంబ్లీలో మొత్తం 224 స్థానాలున్నాయి. తాజాగా వచ్చిన ఎగ్జిట్‌ పోల్స్‌ ఫలితాలను చూస్తే కాంగ్రెస్‌ పార్టీ ఈసారి అతిపెద్ద పార్టీగా అవతరిస్తుందని అంచనా వేశాయి. అయితే ప్రభుత్వ ఏర్పాటుకు అవసరమైన 113 సీట్లు వచ్చే అవకాశాలు తక్కువగానే కనిపిస్తున్నాయి.

దీంతో కన్నడనాట మళ్లీ హంగ్‌ తప్పకపోవచ్చనే పరిస్థితి కనిపిస్తోంది. జేడీఎస్‌కు 20 నుంచి 30 సీట్లు వచ్చే అవకాశాలున్నాయని ఎగ్జిట్‌ పోల్స్‌ చెబుతుండటంతో ఎప్పటి మాదిరిగానే దేవేగౌడ పార్టీ కింగ్‌ మేకర్‌గా మారే అవకాశాలు కనిపిస్తున్నాయి.

SB NEWS

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 21:32

Cyclone Mocha: బంగాళాఖాతంలో బలపడుతున్న అల్పపీడనం...అండమాన్ అప్రమత్తం

న్యూఢిల్లీ: బంగాళాఖాతంలో ఏర్పడిన అల్పపీడనం బుధవారం బలపడి వాయుగుండంగా మారనుంది.(Bay of Bengal) దీంతో అండమాన్ దీవుల్లో(Andaman) ప్రజలు అప్రమత్తంగా ఉండాలని హెచ్చరిక(alert) జారీ చేశారు.మత్స్యకారులు, చిన్న ఓడలు, పడవలు, ట్రాలర్ల నిర్వాహకులు ఆగ్నేయ, ఆనుకుని ఉన్న మధ్య బంగాళాఖాతంలోకి చేపలవేటకు వెళ్లవద్దని సూచించారు.మే 12వతేదీ ఉదయం వరకు అల్పపీడనం మొదట ఉత్తర వాయువ్య దిశగా బంగ్లాదేశ్-మయన్మార్ తీరాల వైపు కదులుతుందని అంచనా..

ఈ అల్పపీడనం బుధవారం తుఫానుగా మారుతుందని వాతావరణ కార్యాలయం తెలిపింది.ఆగ్నేయ బంగాళాఖాతంలో గంటకు 45 నుంచి 55 కిలోమీటర్ల వేగంతో గాలులు వీస్తున్నాయి.ఈ అల్పపీడనం రానున్న 12 గంటల్లో మోచా తుఫానుగా(Cyclone Mocha) మారుతుందని, గంటకు 80-90 కిలోమీటర్ల వేగంతో గాలులు వీస్తాయని వాతావరణ శాఖ తెలిపింది.అండమాన్,నికోబార్ దీవుల్లో మంగళవారం నుంచి గురువారం వరకు చాలా చోట్ల తేలికపాటి నుంచి ఓ మోస్తరు వర్షాలు కురిసే అవకాశం ఉందని వాతావరణ శాఖ వెల్లడించింది..

SB NEWS

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 21:30

Pawan Kalyan: కడియంలో పాడైన పంటలను పరిశీలించిన పవన్‌ కల్యాణ్‌

కడియం: ఇటీవల కురిసిన అకాల వర్షాలకు పంట నష్టపోయిన రైతులను జనసేన అధినేత పవన్‌కల్యాణ్‌ పరామర్శించారు. ఉమ్మడి తూర్పుగోదావరి జిల్లా పర్యటనలో భాగంగా బుధవారం ఉదయం రాజమహేంద్రవరం ఎయిర్‌పోర్టుకు చేరుకున్న జనసేనానికి ఆ పార్టీ కార్యకర్తలు, నేతలు ఘనస్వాగతం పలికారు..

అనంతరం పవన్‌.. కడియం ఆవలో దెబ్బతిన్న పంట పొలాలను సందర్శించి రైతులతో మాట్లాడారు. మొలకలు వచ్చిన ధాన్యాన్ని ఆయన పరిశీలించారు. నష్టపోయిన రైతుల నుంచి వివరాలను పవన్‌ కల్యాణ్‌ అడిగి తెలుసుకున్నారు..

SB NEWS

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 21:27

Karnataka Elections: కొనసాగుతున్న పోలింగ్‌.. లైన్‌లో నిల్చుని ఓటేసిన కన్నడ ప్రముఖులు

బెంగళూరు: కర్ణాటక అసెంబ్లీ ఎన్నికల (Karnataka Assembly elections) పోలింగ్ బుధవారం ప్రశాంతంగా కొనసాగుతోంది. ఎన్నికల్లో ఓటు హక్కును వినియోగించుకునేందుకు ప్రజలు ఉదయం నుంచే పోలింగ్‌ కేంద్రాల వద్ద బారులు తీరారు..

ఓటేసిన ప్రముఖులు

తొలి గంటల్లో పలువురు రాజకీయ, సినీ, వ్యాపార రంగానికి చెందిన పలువురు ప్రముఖులు తమ ఓటు హక్కును వినియోగించుకున్నారు. కేంద్ర మంత్రి నిర్మలా సీతారామన్‌, రాష్ట్ర ముఖ్యమంత్రి బసవరాజ్‌ బొమ్మై, మాజీ సీఎం యడియూరప్ప, మైసూరు రాజమాత ప్రమోదా దేవి వడియార్‌, నటులు ప్రకాశ్‌రాజ్‌, ఉపేంద్ర, రమేశ్ అరవింద్‌, ఇన్ఫోసిస్‌ సహ వ్యవస్థాపకుడు నారాయణ మూర్తి దంపతులు, భాజపా ఎంపీ తేజస్వీ సూర్య తదితరులు తొలి గంటల్లో తమ ఓటు హక్కు వినియోగించుకున్నారు. వీరంతా క్యూ లైన్లలో నిల్చుని తమ వంతు వచ్చేవరకు వేచి చూసి ఓటు వేశారు.

SB NEWS

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 11:28

విద్య.. వైద్యాన్ని జాతీయం చేయాలి : ఆర్ నారాయణ మూర్తి

‘‘పేపర్‌ లీకేజ్‌ వ్యవహారాలు తెలుగు రాష్ట్రాల్లోనే కాదు.. గుజరాత్, మధ్యప్రదేశ్, రాజస్థాన్‌లో కూడా జరిగాయి. ఇలాగైతే నిరుద్యోగులు ఏమైపోవాలి? అందుకే విద్య, వైద్యాన్ని జాతీయం చేయాలని చెప్పే చిత్రమే ‘యూనివర్సిటీ’’ అన్నారు ఆర్‌. నారాయణ మూర్తి. స్నేహచిత్ర పిక్చర్స్‌పై ఆర్‌. నారాయణ మూర్తి నటించి, స్వీయ దర్శకత్వంలో నిర్మించిన చిత్రం ‘యూనివర్సిటీ’. ఈ నెల 26న ఈ చిత్రం రిలీజ్‌ కానుంది.

ఈ సందర్భంగా ఈ సినిమాను ప్రత్యేకంగా ప్రదర్శించారు. అనంతరం విలేకరుల సమావేశంలో ఆర్‌. నారాయణ మూర్తి మాట్లాడుతూ– ‘‘భారత దేశంలో చాలా చోట్ల పేపర్‌ లీకేజీలు జరుగుతున్నాయి.. దీన్ని జాతీయ సమస్యగా పరిగణించాలని ఆర్.నారాయణమూర్తి అభిప్రాయపడ్డారు..

SB NEWS

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 11:23

కొండగట్టు అంజన్న చెంతకు కాళేశ్వరం నీళ్లు

జగిత్యాల జిల్లా : మహిమాన్విత క్షేత్రం, 400 ఏండ్ల చరిత్ర గల కొండగట్టు అంజన్న స్వామి చెంత నీటి సమస్యకు శాశ్వత పరిష్కారం చూపేందుకు ప్రభుత్వం సిద్ధమైంది. ముఖ్యమంత్రి కేసీఆర్‌ దిశానిర్దేశనంలో ప్రణాళికలు సిద్ధం చేసింది. ఎస్సారెస్పీ వరదకాలువ నుంచి శాశ్వత నీటి వనరు కల్పించి, తద్వారా కాళేశ్వర జలాలను అంజన్న చెంతకు చేర్చి 365 రోజులు నీరు పుష్కలంగా అందుబాటులో ఉంచేందుకు కార్యాచరణను రూపొందించింది. తాజాగా రూ.13.45 కోట్లతో పనులకు శ్రీకారం చుట్టింది. ఆరు నెలల్లో పనులు పూర్తి చేయడమే లక్ష్యంగా అడుగులు వేస్తున్నది.

ముఖ్యమంత్రి దిశానిర్దేశం

కొండగట్టు క్షేత్రం గతంలో అభివృద్ధికి నోచుకోలేదు. దేవస్థానం పరిధిలో భక్తులు ఎదుర్కొంటున్న సమస్యలకు శాశ్వత పరిష్కారం చూపడం, అలాగే అద్భుత క్షేత్రంగా తీర్చిదిద్దాలన్న సంకల్పంతో సీఎం కేసీఆర్‌.. ఈ ఏడాది ఫిబ్రవరి 15న కొండగట్టులో స్వయంగా పర్యటించారు. దానికి ముందుగానే జగిత్యాలలో జరిగిన ఓ బహిరంగ సభలో కొండగట్టు అభివృద్ధికి రూ.100 కోట్లు కేటాయిస్తున్నట్టు ప్రకటించారు. ఇక్కడ చేపట్టాల్సిన అభివృద్ధి పనులపై అధికారులతో సుదీర్ఘంగా చర్చించారు. కొండగట్టును సమూలంగా అభివృద్ధి చేసేందుకు దశల వారీగా రూ.వెయ్యి కోట్లయినా కేటాయిస్తామని అక్కడే ప్రకటించారు.

నీటి సమస్యకు శాశ్వత విముక్తి

దేవస్థానం పరిధిలో నీటి కొరత వెంటాడుతున్నది. పకడ్బందీ ప్రణాళికలు లేకపోవడం వల్ల కొండపై నిత్యావసరాలతో పాటు తాగునీటికి అవస్థలు ఏర్పడుతున్నాయి. తెలంగాణ ప్రభుత్వం అధికార పగ్గాలు చేపట్టాక.. మిషన్‌ భగీరథ కింద కొంత మేరకు పరిష్కారం చూపింది. అయితే భవిష్యత్‌లో నీటి కొరత పునరావృతం కాకుండా కొండగట్ట్టును ఆనుకొని ఉన్న ‘సంతలోని లొద్ది’కి వరద కాలువ నుంచి నీటిని పంపింగ్‌ చేయడానికి ప్లాన్‌ చేశారు. ఇందుకోసం మల్యాల మండలం ముత్యాల గ్రామ శివారులోని వరదకాలువ 81 కిలోమీటర్‌ వద్ద ప్రత్యేకంగా పంపు హౌస్‌ నిర్మిస్తున్నారు.

అక్కడి నుంచి 1.7 కిలోమీటర్ల మేర పైపులైన్‌ వేసి ప్రెజర్‌ పంపు ద్వారా లొద్దికి పంపిస్తారు. ఇందుకోసం లొద్ది ప్రస్తుత సామర్థ్యాన్ని పెంచుతున్నారు. ప్రస్తుతం 358 ఉన్న ఎఫ్‌టీఎల్‌ (ఫుల్‌ ట్యాంకు లెవల్‌) నుంచి 370కి పెంచుతున్నారు. పాత బండ్‌కు ఆనుకొని కొత్త బండ్‌ నిర్మిస్తున్నారు. వీటి ద్వారా ప్రస్తుతం 2.50 ఎంసీఎఫ్‌టీ ఉన్న లొద్ది సామర్థ్యం 13 ఎంసీఎఫ్‌టీకి పెరుగుతుంది. ఈ పనులన్నింటినీ ఆరు నెలల్లో పూర్తి చేయాలని ప్రభుత్వం భావిస్తున్నది. సాయిల్‌ టెస్టింగ్‌ వంటి పలు పరీక్షల నిమిత్తం ఎన్‌ఐటీ వరంగల్‌కు పంపించారు. ఈ పనులు పూర్తయితే కొండగట్టు చెంతకు కాళేశ్వరం జలాలు వచ్చి నీటి సమస్యకు శాశ్వత విముక్తి కలుగనున్నది.

సీఎం దూరదృష్టికి నిదర్శనం

ముఖ్యమంత్రి కేసీఆర్‌ దూరదృష్టి వల్లే కొండగట్టులో నీటి సమస్యకు శాశ్వత పరిష్కారం దొరుకుతున్నది. కొండగట్టు క్షేత్రస్థాయి పర్యటన రోజే సీఎం కేసీఆర్‌ అధికారులకు దిశానిర్దేశం చేశారు. ఆ ప్రకారంగానే పనులకు శ్రీకారం చుట్టారు. ఆరు నెలల్లో పనులు పూర్తి చేసేందుకు అధికారులు ప్రయత్నాలు చేస్తున్నారు. ప్రస్తుత నీటి సమస్యే కాదు కొండగట్టును అద్భుతంగా తీర్చిదిద్దేందుకు అనుమతిచ్చిన ముఖ్యమంత్రికి రుణపడి ఉంటాం.

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 11:21

ఆల్ సో మేష్ కుమార్

అంతా ఆయనొక్కడే

మూడు నెలల విరామంతో సీఎస్ సోమేశ్ కుమార్ మళ్లీ ప్రభుత్వంలోకి ఎంట్రీ అయ్యారు. సీఎస్‌గా పని చేస్తున్న సమయంలో జనవరి రెండోవారంలో హైకోర్టు ఇచ్చిన తీర్పుతో ఏపీకి వెళ్లారు. అక్కడ పోస్టింగ్ ఇవ్వకపోవడంతో వీఆర్ఎస్ తీసుకున్నారు.

కాగా, సోమేశ్ కుమార్ మొదటి నుంచే సీఎం కేసీఆర్‌కు అత్యంత సన్నిహితుడుగా ముద్రపడ్డారు. దీంతోనే కేడర్ విషయంలో న్యాయస్థానాల్లో కేసులున్నా, వాటన్నింటిని పక్కన పెట్టి సీఎం ఆయనకు సీఎస్ బాధ్యతలు అప్పగించారని చర్చ ఉన్నది. ఇప్పుడు ఏదైనా కీలక పోస్టు ఇస్తారనే హామీతోనే సోమేశ్ కుమార్ వీఆర్ఎస్ తీసుకున్నారని ప్రచారం జరిగింది. మహారాష్ట్ర బీఆర్ఎస్ పబ్లిక్ మీటింగ్ వేదికపై సోమేశ్ ప్రత్యక్షం కావడంతో త్వరలో ఆయనకు ప్రభుత్వంలో కీలక పదవి ఇస్తారని టాక్ నడిచింది.

కీలకం కానున్న సోమేశ్

సీఎం ముఖ్య సలహాదారుడిగా అపాయింట్ కావడంతో సర్కారులో మళ్లీ సోమేశ్ శకం వస్తుందనే ప్రచారం జరుగుతున్నది. ఆయన సీఎస్‌గా పనిచేసినప్పుడు అడ్మినిస్ట్రేషన్ అంతా ఆయన కనసన్నల్లోనే జరిగేది. ఆయనకు తెలియకుండా ఏ సెక్రటరీ సొంతంగా నిర్ణయం తీసుకునే అవకాశం లేదు. ఇప్పుడు సీఎం చీఫ్ అడ్వయిజర్‌గా అపాయింట్ కావడంతో సీఎస్ ఆఫీసు, సీఎంఓ సెక్రటరీల పనితీరుపై ఎఫెక్ట్ పడుతుందేమోనని చర్చ జరుగుతున్నది.

అనధికారిక ప్రొటోకాల్ ప్రకారం సీఎస్ శాంతికుమారి, సీఎంఓ సెక్రటరీలు అందరూ ఇప్పటి నుంచే ఆయన గైడెన్స్ ప్రకారం పనిచేయాల్సి ఉంటుందేమోనని అనుమానాలు వ్యక్తమవుతున్నాయి. ప్రతి ఫైల్‌ను సోమేశ్ కుమార్ పరిశీలించాకే, సీఎం సంతకం కోసం వెళ్లేవిధంగా ఏర్పాట్లు చేస్తారేమోనని టాక్ వినిపిస్తున్నది.

భిన్నాభిప్రాయాలు

సోమేశ్ నియామకంపై అధికారులు, మంత్రుల్లో భిన్నాభిప్రాయాలు వ్యక్తమవుతున్నాయి. కోర్టు తీర్పుతో సోమేశ్ ఏపీకి వెళ్లడంతో ఊపిరి పీల్చుకున్న కొందరు అధికారుల్లో మళ్లీ ఆందోళన మొదలైంది. అయితే ఆయన నియామకాన్ని స్వాగతించే ఆఫీసర్లు, మంత్రులు కూడా ఉన్నారు. సోమేశ్ హయాంలో సీఎస్ ఆఫీసుకు ప్రత్యేక గుర్తింపు వచ్చిందని, ఆయన సీఎస్‌గా ఉండి ఉంటే, సెక్రటేరియట్ ప్రారంభోత్సవంలో ఎంప్లాయీస్‌కు అవమానాలు జరిగేవి కావని కొందరు అభిప్రాయపడుతున్నారు. ఎంతటి కష్టమైన పనినైనా, ఎంతో దీక్షతో పూర్తి చేసేవారిని మంత్రులు కితాబిస్తున్నారు.

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 11:18

ప్రియాంక గాంధీ తెలంగాణలో పోటీ చేయనున్నారా ❓️

తెలంగాణలో గులాబీ పార్టీ హ్యాట్రిక్ కొట్టకూడదు.. ఎట్టి పరిస్థితుల్లో, ఏం చేసైనా సరే కేసీఆర్‌ను గద్దె దించాల్సిందే.. బీఆర్ఎస్‌ కారుకు బ్రేక్‌లు వేసి చావు దెబ్బ రుచి చూపించాలి.. ఇదే కాంగ్రెస్, బీజేపీ పార్టీల ముందున్న ముందున్న ఏకైక లక్ష్యం. ఇందుకు ఇరు పార్టీలు శక్తికి మించి మరీ ప్రయత్నాలు చేస్తున్నాయి.

ఢిల్లీ పెద్దలు మోదీ, అమిత్‌ షా డైరెక్షన్‌లో కమలనాథులు.. ప్రత్యేక రాష్ట్రం ఇచ్చిన పార్టీగా కాంగ్రెస్, గాంధీ కుటుంబం చరీష్మాతో పూర్వవైభవం తీసుకొచ్చి అధికారంలోకి రావాలని నేతలు తహతహలాడుతున్నారు. సరిగ్గా ఇదే టైమ్‌లో తెలంగాణ నుంచే ప్రియాంక గాంధీని పోటీ చేయించాలనే యోచనలో కాంగ్రెస్ పెద్దలు ఉన్నట్లు విశ్వసనీయ వర్గాల సమాచారం. ఈ విషయాన్ని తెలంగాణ నేతలు.. సోనియా గాంధీ రాహుల్ గాంధీలకు చెవిన వేసినట్లు తెలుస్తోంది. ఎక్కడ్నుంచి పోటీ చేయించవచ్చు..? ఎంపీ అయితే బాగుంటుందా..? ఎమ్మెల్యే అయితే బాగుంటుందా..? అని సమాలోచనలు కూడా చేశారట.

ఇందుకు రెండు నియోజకవర్గాలను ఎంపిక చేశామని.. ఎంపీగా అయితేనే కరెక్ట్‌గా ఉంటుందని వివరించారట. మహబూబ్‌నగర్ లేదా మెదక్ నుంచి పోటీ చేయించాలని ఏఐసీసీ భావిస్తున్నట్లు ఇటు తెలంగాణలో.. అటు ఢిల్లీ వర్గాల్లో విస్తృత చర్చ జరుగుతోంది. ప్రియాంకను తెలంగాణ రాజకీయాల్లోకి తీసుకురావడం వల్ల ఇక్కడ రాజకీయ సమీకరణలు మార్చవచ్చన్నది టీపీసీసీ చీఫ్ రేవంత్ రెడ్డి మాస్టర్ ప్లానట. ఒక్కమాటలో చెప్పాలంటే.. ప్రియాంకను ‘ఫేస్ ఆఫ్ ది తెలంగాణ కాంగ్రెస్’ అని రాష్ట్ర నేతలు భావిస్తున్నారట.

అటు నుంచి ఇటు..!

కర్ణాటకలో కాంగ్రెస్‌కు విజయావకాశాలు ఉన్నాయని అగ్రనేతలు గట్టిగా నమ్ముతున్నారు. మరోవైపు బీజేపీ కూడా కచ్చితంగా కాషాయ జెండా ఎగరేస్తామని కమలనాథులు ధీమాగా చెబుతున్నారు. ఇక్కడ ఎన్నికలు పూర్తవ్వగానే ఈ రెండు పార్టీలకు టార్గెట్ తెలంగాణ మాత్రమే. అక్కడ.. ఇక్కడ తాడేపేడో తేల్చుకోవాలని జాతీయ పార్టీలు విశ్వప్రయత్నాలు చేస్తున్నాయి. ఇందులో భాగంగానే జాతీయ స్థాయి నేతలు తెలంగాణ నుంచి బరిలోకి దిగాలని భావిస్తున్నారట. ఇప్పటికే ప్రధాని మోదీ మహబూబ్‌నగర్ నుంచి పోటీచేస్తారని పెద్ద ఎత్తున వార్తలు వచ్చాయి. ఆ తర్వాత సోనియాగాంధీ కూడా మల్కాజిగిరి నుంచి పోటీచేస్తారని ఆ మధ్య ప్రచారం జరిగింది. ఇప్పుడు ఏకంగా ప్రియాంక గాంధీ గురించి వార్తలు గుప్పుమంటున్నాయి. మెదక్ లేదా మహబూబ్‌నగర్ నుంచి పోటీచేసే ఛాన్స్ ఉందని కాంగ్రెస్ వర్గాలు చెప్పుకుంటున్నాయి. ఎమర్జెన్సీ తర్వాత జరిగిన ఎన్నికల్లో ఘోర పరాజయాన్ని మూటగట్టుకున్న ఇందిరాగాంధీ 1980లో మెదక్ నుంచి ఎంపీగా పోటీచేసి విజయకేతనం ఎగురవేశారు. అప్పటికే అత్యవసర పరిస్థితితో విమర్శలపాలైన ఇందిరమ్మను మెదక్ ప్రజలు అక్కున చేర్చుకోవడంతో ఈ విజయం పెను సంచలనమే అయ్యింది. అందుకే నాన్నమ్మ బాటలో.. ఇక్కడ్నుంచే ప్రియాంకను పోటీ చేయిస్తే కాంగ్రెస్‌కు కలిసొస్తుందని ఏఐసీసీ ప్లాన్ చేస్తోందట. బీజేపీని ఢీ కొట్టలేక చతికిలపడుతున్న కాంగ్రెస్‌కు ప్రియాంక రూపంలో ఊపిరిపోయాలని హైకమాండ్ అనుకుంటోందట.

అంతా ముందస్తుగానే..!

ప్రియాంక గాంధీ తెలంగాణ పర్యటించడం పక్కా వ్యూహమేనట. రానున్న రోజుల్లో తెలంగాణ ఇంచార్జ్‌గా నియమించినా పెద్దగా ఆశ్చర్యపోనక్కర్లేదట. సరూర్‌నగర్ పర్యటన జస్ట్ శాంపిల్ మాత్రమేనని.. మున్ముందు ఇక నెలలో రెండుసార్లు రాష్ట్రంలో పర్యటించేలా హైకమాండ్ ప్లాన్ చేస్తోందట. ఇప్పుడు యువత, నిరుద్యోగులు.. రానున్న రోజుల్లో రైతులు, ఆ తర్వాత ఉద్యమకారుల ఇలా ఒక్కో పర్యటనలో ఒక్క వర్గానికి సంబంధించి సభ ఉండబోతోందట. అయితే.. ఇటు ఇంచార్జ్.. అటు తెలంగాణ నుంచి పోటీ ఇవన్నీ ఒక్కసారిగా వార్తలు రావడంతో అసలు ఇందులో ఏది నిజమో తెలియక కార్యకర్తలు, వీరాభిమానులు తికమకపడుతున్నారు. వాస్తవానికి ప్రియాంక ఇదిగో ఫలానా చోటు నుంచి పోటీచేస్తారని వార్తలు ప్రతిసారి వస్తున్నాయే తప్పితే ప్రత్యక్ష ఎన్నికల్లో ఆమె ఎప్పుడూ బరిలోకి దిగలేదు. బాధ్యతలు మాత్రం పెద్దవే ఉన్నప్పటికీ పోటీ మాత్రమే ఎక్కడా చేయలేదు. ఇప్పుడు యువనేత రాహుల్ గాంధీపై అనర్హత వేటు వేసిన తర్వాత కాంగ్రెస్‌కు ఉన్న ఏకైక ఆప్షన్ ప్రియాంకేనని కార్యకర్తలు, వీరాభిమానులు చెప్పుకున్నారు. రానున్న ఎన్నికల్లో అది కూడా వయనాడ్ నుంచి ప్రియాంక పోటీచేస్తారని వార్తలు వచ్చాయి. అయితే ఇంతవరకూ ఆ ఊసేలేదు. ఒకవేళ పోటీచేయాల్సి వస్తే వయనాడ్, తెలంగాణ నుంచి ఒక స్థానంలో.. రెండుచోట్లా పోటీచేయించాలనేది హైకమాండ్ ప్లానట. ఆడబిడ్డ పైగా ప్రత్యేక రాష్ట్రం ఇచ్చిన పార్టీగా.. ఇందిరమ్మను ఇందిరమ్మ

ప్రియాంక రూపంలో చూసుకుని జనాలు గెలిపిస్తారని రాష్ట్ర పెద్దలు ధీమాతోనే ఉన్నారట.

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 11:15

బీఆర్ఎస్ అధినేత పార్లమెంట్ ఎన్నికల్లో నాందేడ్ స్థానం నుంచి పోటీ చేయనున్నారా ❓️

బీఆర్ఎస్ అధినేత కేసీఆర్.. రానున్న జనరల్ ఎలక్షన్స్‌లో మహారాష్ట్రలోని నాందేడ్ పార్లమెంట్ సెగ్మెంట్ నుంచి పోటీ చేయాలని భావిస్తున్నట్టు సమాచారం.

పార్టీ అధినేత స్వయంగా అక్కడి నుంచి పోటీచేసి గెలిస్తే దాని ప్రభావం మొత్తం రాష్ట్రం మీద ఉంటుందని అక్కడి నేతలు అభిప్రాయపడుతున్నారు. నాందేడ్ సెగ్మెంట్ మీద ఫోకస్ పెట్టినా ప్రత్యామ్నాయంగా ఔరంగాబాద్‌నూ పరిశీలిస్తున్నట్టు తెలిసింది.

మరికొంత విస్తృత అధ్యయనం తర్వాత ఎక్కడి నుంచి పోటీచేయాలన్న దానిపై కేసీఆర్ ఓ నిర్ణయానికి వచ్చే చాన్స్ ఉన్నది. బీఆర్ఎస్ ఏర్పడిన తర్వాత కేవలం మహారాష్ట్రపై మాత్రమే ఫోకస్ పెట్టిన కేసీఆర్.. ఎక్కువగా తెలంగాణకు సరిహద్దుగా ఉన్న నాందేడ్, ఔరంగాబాద్ జిల్లాల మీదనే దృష్టి సారించారు.

ఆ జిల్లాలకు చెందిన నేతలనే పార్టీలో చేర్చుకోవడంపై ఆసక్తి చూపుతున్నారు. గ్రామస్థాయి మొదలు రాష్ట్ర స్థాయి వరకు వివిధ పార్టీలకు చెందిన నేతలను వందల సంఖ్యలో బీఆర్ఎస్‌లోకి ఆహ్వానిస్తున్నారు. ఎన్సీపీ, శివసేన పార్టీలకు చెందిన నేతలు కూడా వీరిలో ఉన్నారు.

ఇప్పటికే రెండుసార్లు నాందేడ్ జిల్లాలో పబ్లిక్ మీటింగ్స్ పెట్టిన బీఆర్ఎస్.. త్వరలో పొరుగున ఉన్న చంద్రాపూర్ జిల్లాలోనూ బహిరంగ సభను నిర్వహించేందుకు కసరత్తు చేస్తున్నది. ఇటీవల జరిగిన బోకర్ మార్కెట్ కమిటీ ఎన్నికల్లో పోటీచేసి ఓడిపోయినప్పటికీ ఇకపైన స్థానిక సంస్థల ఎన్నికల్లో బీఆర్ఎస్ తరఫున అభ్యర్థులను నిలబెట్టాలని గులాబీ బాస్ భావిస్తున్నారు.

జాతీయ పార్టీగా గుర్తింపు కోసం..

జాతీయ పార్టీగా బీఆర్ఎస్‌ను తీర్చిదిద్దాలన్న లక్ష్యాన్ని మహారాష్ట్ర నుంచే స్టార్ట్ చేయాలని కేసీఆర్ భావిస్తున్నారు. తొలుత కర్ణాటక నుంచి బోణీ కొట్టాలని భావించి జేడీఎస్‌తో సన్నిహిత సంబంధాలు కొనసాగించినా ఆ రాష్ట్ర అసెంబ్లీ ఎన్నికల్లో పోటీకి బీఆర్ఎస్ దూరంగానే ఉన్నది. జేడీఎస్‌కు మద్దతుగా ప్రచారం చేయనున్నట్టు ఆ పార్టీ మంత్రి హరీశ్‌రావు వ్యాఖ్యానించినా అది మాటలకే పరిమితమైంది. నాందేడ్‌ నుంచి బీఆర్ఎస్‌కు విస్తృతమైన మద్దతు లభిస్తూ ఉన్నదనే భావనలో గులాబీ బాస్ ఉన్నారు..

:

* The author of this news article is not vetted by StreetBuzz. This is author's personal opinion.

నిజంనిప్పులాంటిది

May 10 2023, 11:12

ఇవాల్టి నుండి రికౌంటింగ్ వెరిఫికేషన్ అప్లికేషన్

ఇయ్యాల్టి నుంచి రీకౌంటింగ్, రీవెరిఫికేషన్ కు అప్లికేషన్లు

జూన్ 4 నుంచి అడ్వాన్స్డ్ సప్లిమెంటరీ పరీక్షలు

ఇంటర్ రిజల్ట్స్ విడుదలయ్యాయి. ఫస్టియర్లో 61.68% మంది, సెకండియర్లో 63.49% మంది పాస్ అయ్యారు. పోయినేడాదితో పోలిస్తే పాస్ పర్సంటేజీ తగ్గింది. గతేడాది సెకండియర్లో 67.16 శాతం మంది పాస్ కాగా, ఈసారి 63.49 శాతం మంది మాత్రమే పాస్ అయ్యారు.

ఫస్టియర్లో పోయినేడు 63.32 శాతం మంది పాస్ కాగా, ఈసారి 61.68 శాతం పాస్ అయ్యారు. ఇక సర్కార్ కాలేజీల్లో దాదాపు సగం మంది స్టూడెంట్లు ఫెయిల్ అయ్యారు. సెకండియర్లో మొత్తం 80,100 మంది పరీక్ష రాయగా 43,340 మంది మాత్రమే పాస్ అయ్యారు. పోయినేడాది సర్కారులో పాస్ పర్సంటేజీ 56.37 శాతం కాగా, అది ఈసారి 54 శాతానికి తగ్గింది. మంగళవారం నాంపల్లిలోని ఇంటర్ బోర్డులో సెక్రటరీ నవీన్ మిట్టల్తో కలిసి విద్యాశాఖ మంత్రి సబితా ఇంద్రారెడ్డి ఇంటర్ ఫలితాలు విడుదల చేశారు. ఎప్పటిలాగే ఈసారీ అమ్మాయిలు సత్తా చాటారు. సెకండియర్లో మొత్తం 4,65,478 మంది పరీక్షలు రాయగా, వారిలో 2,95,550 (63.49%) మంది పాస్ అయ్యారు. అమ్మాయిలు 2,29,958 మంది రాయగా 1,64,598(71.57%) మంది ఉత్తీర్ణత సాధించారు. అబ్బాయిలు 2,35,520 మంది రాయగా 1,30,952 (55.60%) మంది పాస్ అయ్యారు. ఫస్టియర్లో మొత్తం 4,82,675 మంది పరీక్షలు రాయగా.. 2,97,741 (61.68%) మంది పాస్ అయ్యారు. అమ్మాయిలు 2,41,673 మందికి గాను 1,65,994 (68.68%) మంది పాస్ కాగా.. అబ్బాయిలు 2,41,002 మందికి 1,31,747 (54.64%) మంది ఉత్తీర్ణత సాధించారు.

ములుగు టాప్..

సెకండియర్ జనరల్ కేటగిరీలో 85 శాతం పాస్ పర్సంటేజీతో ములుగు జిల్లా టాప్ లో ఉండగా.. ఆ తర్వాతి స్థానాల్లో కుమ్రంభీమ్ ఆసిఫాబాద్ (81 శాతం), మేడ్చల్ (75 శాతం) నిలిచాయి. చివరి స్థానాల్లో మెదక్ (52 శాతం), నాగర్ కర్నూల్ (54 శాతం), వరంగల్ (58 శాతం) ఉన్నాయి. ఒకేషనల్ కేటగిరీలో 85 శాతం పాస్ పర్సంటేజీతో నారాయణపేట జిల్లా టాప్ లో ఉండగా.. 52 శాతంతో జగిత్యాల చివరి స్థానంలో ఉంది. ఇక ఫస్టియర్ జనరల్ కేటగిరీలో 75 శాతం పాస్ పర్సంటేజీతో మేడ్చల్ జిల్లా టాప్ లో ఉండగా.. 73 శాతంతో రంగారెడ్డి, ఆసిఫాబాద్ జిల్లాలు తర్వాతి స్థానాల్లో ఉన్నాయి. మెదక్ (38 శాతం), నారాయణపేట (41 శాతం) చివరి స్థానాల్లో ఉన్నాయి.

గురుకులాలు ఫస్ట్..

ఇంటర్ ఫలితాల్లో గురుకులాలు సత్తాచాటాయి. ప్రైవేటు కాలేజీలతో పోలిస్తే భారీగా పాస్ పర్సంటేజీ నమోదైంది. ప్రైవేటు కాలేజీల్లో సెకండియర్లో 63 శాతం మంది పాస్ కాగా, తెలంగాణ రెసిడెన్షియల్ ఎడ్యుకేషన్ సొసైటీ గురుకులాల్లో 92 శాతం మంది పాస్ అయ్యారు. అయితే ఎయిడెడ్ విద్యాసంస్థల్లో మాత్రం 46 శాతం మందే ఉత్తీర్ణత సాధించారు.

జూన్ 1 నుంచి ఇంటర్ క్లాసులు: నవీన్ మిట్టల్

రీకౌంటింగ్, రీవెరిఫికేషన్కు బుధవారం నుంచి దరఖాస్తు చేసుకోవచ్చని ఇంటర్ బోర్డు సెక్రటరీ నవీన్ మిట్టల్ వెల్లడించారు. ఈ నెల 16 వరకు అవకాశం ఉంటుందని తెలిపారు. రీకౌంటింగ్ కోసం ఒక్కో పేపర్కు రూ.100, రీవెరిఫికేషన్ కు రూ.600 ఫీజు చెల్లించాలని చెప్పారు. విద్యార్థులు tsbie.cgg.gov.in వెబ్ సైట్ ద్వారా దరఖాస్తు చేసుకోవాలన్నారు. రీవెరిఫికేషన్ కు అప్లై చేసుకున్నోళ్లకు ఆన్సర్ బుక్ లెట్ జిరాక్స్ కాపీలు ఇస్తామని పేర్కొన్నారు. ఇక జూన్ 4 నుంచి 9 వరకు అడ్వాన్స్ డ్ సప్లిమెంటరీ పరీక్షలు నిర్వహించనున్నట్టు వెల్లడించారు. సప్లిమెంటరీకి కూడా బుధవారం నుంచే ఫీజు చెల్లించవచ్చని చెప్పారు. మానసిక ఇబ్బందులుంటే హెల్ప్ లైన్ నంబర్ 14416కు కాల్ చేయాలని స్టూడెంట్లకు సూచించారు. జూన్ 1 నుంచి ఇంటర్ క్లాసులు స్టార్ట్ అవుతాయని, త్వరలోనే ప్రైవేటు కాలేజీల అఫిలియేషన్ల ప్రక్రియ పూర్తిచేస్తామని తెలిపారు.

ఆందోళన పడొద్దు: సబితా ఇంద్రారెడ్డి

ఫెయిల్ అయిన స్టూడెంట్లు ఆందోళన పడొద్దని మంత్రి సబితా ఇంద్రారెడ్డి సూచించారు. వచ్చే నెల 4 నుంచి అడ్వాన్స్డ్ సప్లిమెంటరీ పరీక్షలు ఉంటాయని చెప్పారు. ఈసారి ఎంసెట్లో ఇంటర్ మార్కుల వెయిటేజీ తొలగించామని, కాబట్టి మార్కులతో ఇబ్బంది లేదన్నారు. పిల్లలకు తల్లిదండ్రులు భరోసా ఇవ్వాలని సూచించారు. సర్కారు కాలేజీల్లో తక్కువ పాస్ పర్సంటేజీ నమోదైందని, గురుకులాలతో పోటీ పడాలన్నారు.

:

* The author of this news article is not vetted by StreetBuzz. This is author's personal opinion.

Sign Up

మళ్లీ హంగ్‌ తప్పదా..?

Cyclone Mocha: బంగాళాఖాతంలో బలపడుతున్న అల్పపీడనం...అండమాన్ అప్రమత్తం

Pawan Kalyan: కడియంలో పాడైన పంటలను పరిశీలించిన పవన్‌ కల్యాణ్‌

Karnataka Elections: కొనసాగుతున్న పోలింగ్‌.. లైన్‌లో నిల్చుని ఓటేసిన కన్నడ ప్రముఖులు

విద్య.. వైద్యాన్ని జాతీయం చేయాలి : ఆర్ నారాయణ మూర్తి

కొండగట్టు అంజన్న చెంతకు కాళేశ్వరం నీళ్లు

ఆల్ సో మేష్ కుమార్

ప్రియాంక గాంధీ తెలంగాణలో పోటీ చేయనున్నారా ❓️

బీఆర్ఎస్ అధినేత పార్లమెంట్ ఎన్నికల్లో నాందేడ్ స్థానం నుంచి పోటీ చేయనున్నారా ❓️

ఇవాల్టి నుండి రికౌంటింగ్ వెరిఫికేషన్ అప్లికేషన్